YURISTKADR

2021-12-12 11:11:06
Ётоқхонада яшаётган бу оилалар, қария отахон ва онахонлар, ёш болалари ва чақалоқлари бор оилалар иссиқлик таъминотидан батамом узиб қўйилган. Ҳозир улар, совуқдан иззилаб ўтиришибди. Постимизда шу ҳақида айтган эдик.

Бироқ, мутасаддилар бу аҳолининг дардига барибир эътибор қаратишмабди, битта Мирзо Улуғбек тумани ҳокимлиги баёнот берди. Лекин улар ҳам “айб бизда эмас, Менделеев номидаги кимё-технология институти раҳбариятида, улар узиб қўйган” қабилида баёнот бериш билан чекланган холос. Олий таълим вазирлигининг эса бу масала билан иши ҳам бўлмади шекилли.

Кеча кечқурун, шу ерда яшайдиган одамлардан бири хафа бўлиб телефон қилиб қолди. Энди, электр таъминоти узилибди. Кеч бўлса ҳам бордик. Ғалати томони, бу бинода ва ётоқхонанинг ҳамма қисмида свет бор. Бироқ айнан 14 та хонадоннинг ўзида, хоналарида йўқ. Қаранг, эшикни очсангиз коридорда ток бор, лекин хонадонларда йўқ. Иложсиз, коридордаги розеткаларга уланиб олишибди. Аслида иссиқлик тизими ҳам шунақа, 1 ва 3 қаватда ва хатто зиналар жойлашган қисмида ҳам бор, лекин айнан аҳоли яшайдиган хоналарда (бор-йўғи 3-4 метр бу ёқда) йўқ.

Энди, собиқ коллеж биносини фойдаланишга қабул қилиб олган институт ва Олий таълим ва ўрта-махсус таълим вазирлигининг Қурилиш дирекцияси раҳбарияти бу аҳолига электр таъминотига уланишга руҳсат беришмаяпти экан. Ана энди, совуқда қолган ёш болали ва чақалоқли оилалар, кекса отахон ва онахонлар зулматда қолишибди, хатто овқат қилиша олмаяпти.

Бу одамлар мурожаат қилмаган жойи қолмаган, хатто прокуратурага ҳам. Бу ерда яшовчилар айтишига қараганда, туман прокуратурси ҳам, вазирликнинг таъмирлаш ишларини олиб борган Қурилиш дирекцияси раҳбарига муаммони тўғрилаш кераклигини айтган, лекин бу ҳам ҳеч қандай натижа бермабди.

Ҳуллас, аҳолини кўчага хайдашнинг янгича усулини ўйлаб топишган, шу йўл билан уларни бу ердан хайдашни режа қилишган шекилли. У ёқда бизнинг, ҳокимиятдагиларнинг, прокуратурадагилар, институтдагилар, вазир ва вазир ўринбосарларининг болаларимиз ёруғда ва иссиқда ўтиришибди, бу ёқда эса...

Шу воқеалар Тошкентда бўлаётганига ишонгим келмаяпти.

@yuristkadr Ochish/sharhlash

2021-12-12 11:03:53 Ётоқхонада қадрсизланаётган инсон қадри ҳақида. Ўтган хафтада Тошкент шаҳар М.Улуғбек тумани ТТЗ-1 мавзеси 47 уйда жойлашган коллеж ётоқхонасида яшаётган, бироқ оғир вазиятга дуч келган инсонлар билан учрашдим. Уларнинг аҳволи ҳақиқатдан ҳам ёмон, олдиндаги… Ochish/sharhlash

2021-12-12 09:22:53 Ўзбекистонда меҳнат муносабатларига киришадиган нечта ташкилот бор?

Ўзбекистондаги айни пайтда ишлаб турган корхона ва ташкилотлар сонига қизиқдим.

Демак, 2021 йил ҳолатига рўйҳатдан ўтган 503.538 та ташкилот мавжуд, шундан 475.197 таси фаол, яъни ишлаётган, 28.341 таси нофаол ташкилотлардир. Бу йилда 95.311 та янги ташкилотлар очилган бўлса, 11.547 та ташкилот тугатилган.

Энг кўп корхона ва ташкилотлар албатта, пойтахтда. Тошкент шаҳрида 100.539 та ташкилот мавжуд, ундан кейинги ўринда 52.239 та кўрсаткич билан Тошкент вилояти турибди, Фарғона вилоятида 43.529 та, Самарқанд вилоятида 41.145 та, ундан кейин эса Андижон 40.982 та ташкилот билан бешинчи ўринда жойлашган.

Энг кам ташкилот Сирдарё вилоятида – 16.436 та, ундан кейин ўринларда 21.321 та корхона билан Навоий, кейин 22.027 та билан Жиззах вилоятлари ҳамда 22.667 та корхона билан Қорақалпоғистон Республикаси жойлашган.

Асосийси, республика бўйича 475.197 таси фаол ва амалда ишлаётган корхона ва ташкилотлар мавжуд. Бу статистика билан нима демоқчимиз?

Айни вақтда Ўзбекистонда 475.197 та меҳнат ҳуқуқидан ҳабари бўлган, кадрлар ишини биладиган ва ходимларга оид иш юритишни тушунадиган мутахассислар бўлиши керак. Шуни айтмоқчимиз.

Фарқи йўқ, у ҳох алоҳида лавозим бўлсин, ёки ходимлар камлигидан қайсидир мутахассисга юклатилган бўлсин, лекин бизда камида 475.197 та меҳнат ҳуқуқини ўзлаштирган шахслар бўлиши зарур.

Шу ҳолатда, 600 дан ортиқ моддадан иборат янги Меҳнат кодекси қабул қилиб қолинса, 475.197 та корхона қандай аҳволга тушиб қолишини ҳам тасаввур қилиб кўринг.

Меҳнат ҳуқуқи фанига ва ходимлар (персонал)ни бошқариш соҳасига бўлган эътиборни кучайтиришимиз керак, ўртоқлар!

@yuristkadr Ochish/sharhlash

2021-12-12 01:01:04 Ҳимоя ордери талабларини бажармаган шахсларга маъмурий жавобгарлик кучайтирилиши мумкин.

Ички ишлар вазирлиги ҳам муҳим бир ҳужжат лойиҳасини, яъни Ўзбекистон Республикасининг Маъмурий жавобгарлик тўғрисидаги кодексининг 206-1-моддасига ўзгартиш киритиш ҳақидаги қонун лойиҳасини эълон қилди.

Маълумки, МЖтКнинг 206-1-моддасига асосан тазйиқ ўтказган ва (ёки) зўравонлик содир этган ёхуд уларни содир этишга мойил бўлган шахс томонидан ҳимоя ордери талабларини бажармаган шахсларга, —

базавий ҳисоблаш миқдорининг 1 бараваридан 3 бараваригача миқдорда жарима солишга ёки 15 суткагача муддатга маъмурий қамоққа олиш жазоси қўлланилиши назарда тутилган.

Эълон қилинган қонун лойиҳасида юқоридаги “1 бараваридан 3 бараваригача” деган сўзларни “3 бараваридан 5 бараваригача” деган сўзлар билан алмаштириш таклиф этилмоқда.

Хўш, ҳимоя ордерининг ўзи нима?

Билсангиз, 2019 йил 2 сентябрдаги “Хотин-қизларни тазйиқ ва зўравонликдан ҳимоя қилиш тўғрисида”ги қонун бор. Шу қонунга кўра, ҳимоя ордери — тазйиқ ва зўравонликдан жабрланувчи аёлга давлат ҳимоясини тақдим этувчи, хотин-қизларга тазйиқ ўтказаётган ёки уларга нисбатан зўравонлик содир этган шахсга ёхуд бир гуруҳ шахсларга нисбатан бу Қонунда белгиланган таъсир кўрсатиш чоралари қўлланилишига сабаб бўладиган ҳужжат ҳисобланади.

Ҳимоя ордери ички ишлар органлари томонидан тазқий ва зўравонликдан жабр кўраётган аёлларга берилади. Ордернинг нусхаси шу аёлларга тазйиқ ва зўравонлик қилган ёки шунга мойиллиги бор бўлган зўравон “мускулист”ларга берилади.

Ҳимоя ордерини берган ички ишлар органи ходими зўравонга жабрдийда аёлни ҳимоялаш бўйича ордернинг шартлари ҳамда уни бажармаслик оқибатлари ва зўравонлик хулқ-атворини ўзгартириш бўйича тузатиш зарурлиги тўғрисида огоҳлантиради. Ҳамда ордер билан унга аёлга нисбатан бир қатор қарши ҳаракатлар қилишни чеклайди. “Қисиб юр” деган маънода, албатта.

Масалан, зўравоннинг жарбдийда билан ўзаро алоқасини таъқиқлаш, тазйиқ ўтказилган ва зўравонлик содир этилган тақдирда бундан жабр кўрган аёлнинг ҳамда ўша зўравоннинг бир хонада бирга бўлишини чеклаш кабиларни бунга мисол қилиб келтириш мумкин.

Ҳуллас, тушунган бўлсангиз, агар ана шу зўравон киши ҳимоя ордерида кўрсатилган талабларни бузса ёки уларга риоя қилмаса, МЖтКнинг 206-1-моддасида кўрсатилган жаримага ёки 15 суткалик маъмурий қамоқ жазосига тортилиши мумкин.

ИИВ эса ўз таклифида, юқорида айтганимиздек, жазонинг жаримага оид қисмини янада кучайтиришни таклиф қилмоқда. Нима ҳам дердик, қўшиламиз.

@yuristkadr Ochish/sharhlash

2021-12-12 00:23:57 Давлат бюджети ҳисобидан тиббий ёрдам бериладиган шахслар рўйҳати тасдиқланади.

Ўзбекистон Республикаси Президентининг “Ўзбекистон Республикасининг Давлат бюджети маблағлари ҳисобига тиббий ёрдам кўрсатиладиган имтиёзли тоифадаги шахслар рўйхатини тасдиқлаш тўғрисида”ги қарори лойиҳаси эълон қилинди. Лойиҳа ташаббускори Соғлиқни сақлаш вазирлиги.

Лойиҳага кўра, қуйидаги шахслар Давлат бюджети маблағлари ҳисобидан тиббий ёрдам бериладиган имтиёзли шахслар тоифасига киритилмоқда:

1. Болаликдан ногиронлиги бўлган шахслар;
2. Чин етимлар;
3. I ва II гуруҳ ногиронлиги бўлган шахслар;
4. 1941 — 1945 йиллардаги урушдан ногиронлиги бўлган шахслар ва унинг қатнашчилари, шунингдек, уларга тенглаштирилган шахслар;
5. 1941 — 1945 йиллардаги уруш даврида меҳнат жабҳасининг қатнашчилари;
6. Ёлғиз яшовчи ёки “Ижтимоий ҳимоя ягона реестри” ахборот тизими орқали аниқланган кам таъминланган оилалар аъзолари бўлан пенсияга чиққан шахслар;
7. Чернобиль АЭС фалокатини тугатишда иштирок этган шахслар жумласига кирувчи ногиронлиги бўлган шахслар;
8. Байналмилалчи-жангчилар;
9. “Ижтимоий ҳимоя ягона реестри” ахборот тизими орқали аниқланган кам таъминланган оилаларга мансуб шахслар;
10. Соғлиқни сақлаш вазирлиги томонидан тасдиқланадиган рўйхат бўйича гинекологик касалликлари мавжуд ҳамда патологияли ҳомиладор аёллар;
11. Соғлиқни сақлаш вазирлиги томонидан тасдиқланадиган рўйхат бўйича 18 ёшга тўлмаган патологияли болалар;
12. Соғлиқни сақлаш вазирлиги томонидан тасдиқланадиган рўйхат бўйича эндокрин касалликларга чалинган беморлар;
13. Соғлиқни сақлаш вазирлиги томонидан тасдиқланадиган рўйхат бўйича тери касалликлари ва жинсий йўл билан юқтириладиган касалликларга чалинган шахслар;
14. Соғлиқни сақлаш вазирлиги томонидан тасдиқланадиган рўйхат бўйича сил касаллигига чалинган шахслар.
15. Соғлиқни сақлаш вазирлиги томонидан тасдиқланадиган рўйхат бўйича онкология касалликларига чалинган шахслар.

Мана шу ерда рўйҳатнинг 10-15-қаторларига жиддий эътирозим бор. 6 та ҳолатдаги касалликка чалинган беморларга бундай имтиёз бериш учун, уларнинг рўйҳати Соғлиқни сақлаш вазирлиги томонидан тасдиқланар экан.

Бу нотўғри бўлади, бундай ўта муҳим рўйҳатни Президент ёки Вазирлар Маҳкамаси қарори тартибида тасдиқлаган маъқул, чунки ушбу рўйҳатларни тасдиқлаш ваколатини Соғлиқни сақлаш вазирлигида қолдириш эртага кўплаб муаммоларни келтириб чиқариши мумкин.

Масалан, вазирлик истаган вақтда бундай рўйҳатларни қисқартириш ёки кенгайтириш имконига эга бўлиб қолади. Соғлиқни сақлаш вазирлиги эса биламизки, коррупциядан жа унақа даражада ҳоли бўлган тизим эмас.

@yuristkadr Ochish/sharhlash

2021-12-11 21:52:34 ТУРИЗМ ВА СПОРТ ВАЗИРЛИГИ ЯҚИНДА ЎТКАЗАДИГАН АТТЕСТАЦИЯ ТАДБИРИ ҚОНУНИЙМИ?

САВОЛ.
Ассалому алейкум яхшимисиз Саидали ака сиздан яна бир бор илтимос, олдин ҳам сизни каналда ёритган маълумотлариз билан ходимларни ёппасига бўшатиш ҳақидаги огоҳлантириш бекор бўлган эди. Ҳозирда Туризм ва спорт вазирлиги яна Болалар-ўсмирлар спорт мактаблари директорларига аттестация ташкил қиляпти, шу буйруқ қонунийми?

ЖАВОБ.

Ўзбекистон Республикаси Президентининг 2021 йил 5 ноябрдаги “Спорт таълими тизимини тубдан такомиллаштириш орқали олимпия ва паралимпия спорт турлари бўйича спортчилар захирасини шакллантириш сифатини янада ошириш чора-тадбирлари тўғрисида”ги ПҚ-5279-сонли қарори қабул қилинган.

Мазкур қарорнинг 7-банди 4-хатбошисига кўра Туризм ва спорт вазири А. Абдухакимовга:

2022 йил 1 мартга қадар барча давлат спорт-таълим муассасалари раҳбарлари, уларнинг ўринбосарлари ҳамда тренерларини аттестациядан ўтказиш ҳамда унинг натижаси асосида чуқур билим, тажриба ва амалий кўникмаларга эга бўлган юқори малакали мутахассислар билан тўлдириш чораларини кўриш юклатилган.

Яъни, давлат спорт-таълим мактабларининг нафақат директорлари, балки уларнинг ўринбосарлари ва тренерларини аттестациядан ўтказиш Президент қарори билан белгиланган топшириқдир.

Шу нуқтайи-назардан давлат спорт мактабларидаги ушбу аттестация тадбирлари келаси йил
1-чорак давомида бўлиши кутилаётган расмий жараён ҳисобланади ва бу жараён тўлиқ қонунийдир.

Бошқа томондан хавотирингизни тушуниб турибмиз. Давлат органларида раҳбарият таркиби қанчалик кўп аттестация ўтказилса, коррупция аломатлари ҳам шунчалик кўп кузатилиши мумкин. Гарчи буни вазирларнинг ўзи истамаса ҳам, баъзан уларнинг ён-беридаги айрим “учарлар” вазиятдан ўз манфаатлари йўлида фойдаланишга ҳаракат қилишади.

Биз Туризм ва спорт вазирлигини 2022 йил январь-февраль ойларида бўлиб ўтадиган аттестация тадбирларини шаффоф ва очиқ тарзда ўтказишга ҳамда бу жараённи жамоатчиликнинг кўз ўнгида ўтказишга чақириб қоламиз.

Бу масалада Адлия вазирлигида яхши тизим йўлга қўйилган, шундан намуна сифатида фойдаланса бўлади.

@yuristkadr Ochish/sharhlash

2021-12-11 17:40:33 Телеграмда Kаtarsis деган канал бор экан, боя эрталаб кўрган эдим.

Дунё ва жамиятимиздаги бўлаётган жараёнларга, турли воқеликларга жуда аниқ, таҳлилий ва ибратли муносабат билдирилар экан. 1 соатлар чамаси шу каналдаги бир-биридан ажойиб постларни ўқиб ўтирдим, уланиб-уланиб кетаверди, умуман ундаги фикрларни ўқисанг ўзинг учун керакли ҳулосалар чиқарадиган яхши платформа бўлибди. Масалан:

Эшаклар байрами...

Бир қишлоқнинг кекса айилчиси (эшакнинг «эгари»ни ясовчи уста) омонатини Ҳаққа топширди. Бундан қувонган эшаклар қишлоқ майдонига тўпланиб, байрам бошладилар. Эшакларнинг бири бу ҳолга узоқдан ҳайрон қараб турган қари бир эшакни кўриб қолиб, унинг олдига борди ва:
- Сизнинг ҳеч нарсадан хабарингиз йўқ шекилли. Айилчи уста ўлди, - деди. Ёши катта эшак пинагини ҳам бузмади.
- Ўлган бўлса нима бўпти! Шунга байрам қилиш керакми?– деди.
- Ие, нега байрам қилмайлик? – деди ёш эшак ҳайратланиб...

Давомини каналга аъзо бўлиб, ўқиб оларсиз, роса маъноли пост чиққан. Кейин, бу каналдаги бошқа фикрларни кузатиб бориш ҳам эсдан чиқмасин-а?

Уланишингиз учун линк @Katarsis_uzb

@yuristkadr Ochish/sharhlash

2021-02-23 21:25:12 Худо хохласа, Бухоро каердасан деб Бухоройи шариф томон йул олдим. Ochish/sharhlash

2021-02-23 20:18:14 ЭКОЦИД ЖИНОЯТИ ҲАҚИДА НИМАЛАРНИ БИЛАМИЗ?

Янги таҳрирдаги Жиноят кодекси лойиҳасида экология соҳасидаги янги бир моддага эътибор қаратамиз.

Лойиҳанинг 193-моддасида биринчи марта “экоцид” жинояти ҳақида сўз боради. Бу модда, лойиҳанинг тинчлик ва инсониятнинг хавфсизлигига қарши жиноятлар туркумига киритилмоқда. Маълумот учун айтаман, ушбу жиноятлар қаторидан урушни тарғиб қилиш, агрессия, геноцид, терроризм каби ўта хавфли жиноятлар ҳам ўрин олган.

Демак, 193-моддага кўра, экоцид, яъни қасддан ўсимлик ёки ҳайвонот дунёсини оммавий қириб юбориш, атмосфера ҳавосини, ер ва сув ресурсларини заҳарлаш, агар ушбу ҳаракатлар экологик офат ёки фавқулодда экологик вазиятни келтириб чиқаришга қаратилган бўлса, - ўн йилдан ўн беш йилгача озодликдан маҳрум қилиш жазолари белгиланади.

Лойиҳадаги янги “экоцид” жинояти Россия Федерацияси Жиноят кодексидан (358-моддасидан) ва қўшни Қозоғистоннинг Жиноят кодексидан (169-моддасидан) олингани кўриниб турибди. Фақат Россияда экоцид учун 12 йилдан 20 йилгача, Қозоғистонда эса, бизни лойиҳадаги билан бир хил: ўн йилдан ўн беш йилгача “срок” берилиши кўрсатилган.

Масала шундаки, лойиҳанинг алоҳида бобидан бошқа экология соҳасидаги жиноятлар ҳам ўрин олган. Бу жиноятларга масалан, ер, ер ости бойликларидан фойдаланиш шартларини ёки уларни муҳофаза қилиш талабларини бузиш, атроф табиий муҳитни ифлослантириш, экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш каби жиноятлар ҳам киради.

Ушбу жиноятларнинг диспозицияси “экоцид” жинояти билан жуда-жуда яқин, хатто мазмунан бир хил бўлиб ҳам чиқмоқда. Айниқса, бу жиноятларнинг диспозициясидаги “бошқача оғир оқибатларга сабаб бўлса” деган жумлалар билан.

Фарқ шуки, вазиятга 193-моддададаги экоцид жинояти деб баҳо бериш учун содир этилган жиноят экологик офат ёки фавқулодда экологик вазиятни келиб чиқишига сабаб бўлиши керак.

“Табиатни муҳофаза қилиш тўғрисида”ги Қонуннинг 39-моддасига кўра:

хўжалик фаолияти ва бошқа йўсиндаги фаолият, табиат стихияли кучларининг вайрон этувчи таъсири ёхуд рўй берган фалокат ёки ҳалокат натижасида муайян ҳудудларнинг, шу жумладан сув ва ҳаво бўшлиғининг атроф табиий муҳитда инсон саломатлигига, табиий экология тизимларининг, ўсимлик ва ҳайвонлар генетик фондларининг ҳолатига таҳдид солувчи барқарор салбий ўзгаришлар содир бўлаётган қисми фавқулодда экология вазияти минтақалари деб эълон қилинади;

муайян ҳудуднинг табиат мувозанати, табиий экология тизимлари бузилиши билан боғлиқ ҳолда табиий муҳитда барқарор ёки тузатиб бўлмас ўзгаришлар рўй берган ёки рўй бераётган қисми экология офати минтақалари деб эълон қилинади. Гап йўқ, булар тушунарли.

Бироқ, бу моддада яна бир норма бор: “фавқулодда экология вазияти ёки экология офати минтақалари деб эълон қилиш тўғрисидаги қарор қонунларда белгилаб қўйилган тартибда қабул қилинади”. Муаммо шундаки, бизда ҳозиргача фавқулодда экологик вазияти ёки экологик офат минтақалари деб эълон қилишнинг алоҳида тартиби бирор-бир қонун билан белгиланмаган.

Шу нуқтайи-назардан шахсан менда, ушбу “экоцид” деб номланган модда маълум бир вазиятларда ишламай қолиши мумкин деган фикр туғилмоқда.

@yuristkadr Ochish/sharhlash

2021-02-23 17:38:46 Вазирлар Маҳкамасидагилар, нега лицензиялаш ўрнига жорий қилинган ҳабардор қилиш тизимлари ишламаяпти? Нега тадбиркорларга тўсиқ бўляпсиз?

Мен ҳозирги Вазирлар Маҳкамасининг иш услубига тушунмайманда. Ижро интизомининг бузилишида бу ташкилотнинг ўзи “бош-қош” бўлаётганга ўхшайди.

Ҳуллас, Президентимизнинг 2020 йил 24 августдаги ПФ-6044-сон Фармони билан 2021йил 1 январдан кўплаб фаолиятлар бўйича мавжуд бўлган лицензиялаш ва руҳсатномалар бекор қилинган ёки соддалаштирилган.

Масалан, Фармоннинг 3-иловасига асосан 2021 йил 1 январдан бошлаб нодавлат таълим фаолияти сифатида кадрлар малакасини ошириш ва уларни қайта тайёрлаш фаолиятини амалга ошириш учун лицензия талаби бекор бўлган.

Ҳамда 1 январдан бошлаб бу фаолиятни тегишли ваколатли органни ҳабардор қилиш тартибида амалга ошириш мумкинлиги белгиланган. Булар тўғрисида Президентнинг ўзи ҳам Парламентга йўллаган мурожаатномасида айтиб ўтган. Яъни ҳаммаси тадбиркорлар учун, уларга енгиллик яратиш учун.

Лекин, жуда афсусланарли вазият юзага келган ҳозир. Мазкур фаолиятни янги бошлаётган тадбиркорлар айни вақтда ушбу фаолиятни амалга ошириш ҳуқуқидан де факто маҳрум этилган десам ишонасизми?

Муаммо шуки, айни вақтда нодавлат таълим фаолиятини амалга ошириш бўйича лицензия тизими ўрнига жорий этилиши керак бўлган, ҲАБАРДОР ҚИЛИШ ТИЗИМИ ҳали ишга туширилмаган.

Шу сабабли, тадбиркорлар ҳозирда бу фаолиятни юритиш учун лицензия ҳам ололмайди, ваколатли органни ҳабардор қилиш имконига ҳам эга эмас. На униси ва на буниси. Соддароқ қилиб айтганда, улар ҳеч қанақасига ишлай олмайди.

Билишимча, лицензия талабининг ўрнига жорий этилаётган ҳабардор қилиш механизми бўйича алоҳида қоидалар тасдиқлаш учун аллақачон Вазирлар Маҳкамасига киритилган экан. Лекин, бизнинг Вазирлар Маҳкамасидаги масъуллар “тошбақасимон” иш услубини мукаммал кўринишидан “унумли фойдаланиб” Қарор лойиҳасини ҳалигача ортга сурмоқда экан.

Ҳозир Президентнинг ПФ-6044-сонли Фармонида кўрсатилган нодавлат таълим йўналишидаги талаблар Вазирлар Маҳкамаси томонидан қўпол равишда бузилганлиги, 1 январдан ишлаши лозим бўлган қоидалар ижросизлик туфайли икки ойдан бери ишламаётганлиги маълум бўлиб турибди.

Бу салбий ҳолатлар тадбиркорларнинг йўлига тўсиқ эканлигини, уларнинг манфаатларига жиддий зарар етаётганлигини ҳамда ПРЕЗИДЕНТ ФАРМОНИ ВА ҚАРОРЛАРИНИНГ ИЖРОСИ асосан, юқоридан бошлаб бузилаётганлигини англатади.

Соддалаштирилган ва лецензиялаш ўрнига ҳабардор қилиш тизими билан ишлаш белгиланган қолган фаолиятларчи, улардаги аҳвол қандай? Бу ҳақида ҳам тез орада маълумот берамиз.

https://t.me/yuristkadr/3512

@yuristkadr Ochish/sharhlash