2023-05-16 06:22:58
Umumiy oʻrta taʼlim muassasalarida 2022-2023-oʻquv yilini yakunlash va “Soʻnggi qoʻngʻiroq” tadbirlarini oʻtkazish boʻyicha TAVSIYALAR
Mamlakatimizdagi barcha umumiy oʻrta taʼlim muassasalarida 2022-2023-oʻquv yilini yakunlash hamda “Soʻnggi qoʻngʻiroq” tadbirlarini (keyingi oʻrinlarda – tadbir) yuqori saviyada oʻtkazilishini tashkil etish maqsadida quyidagilarga amal qilishingiz tavsiya etiladi:
umumiy oʻrta taʼlim muassasalarida tadbirni joriy yilning 25-may kuni ertalab soat 8:00 dan 9:00ga qadar “Ilmni qadrlang, ilmga intiling!” shiori ostida tashkil etish; oʻquvchilar xavfsizligini taʼminlash maqsadida umumtaʼlim maktablarining oʻquvchilar sonidan kelib chiqqan holda ushbu tadbirga faqatgina 1-, 4-, 9-, 11-sinf oʻquvchilarini jalb etish;
tadbirni maktabning hovlisi, bogʻida yoki soya-salqin ochiq maydonlarida oʻtkazish hamda maktab hududiga texnika vositalari va begona shaxslarning kiritilmasligini taʼminlash;
tadbirlar oʻtkaziladigan joylarni talab darajasida jihozlash, gigiyena va tozalik talablariga muvofiq sharoitlar yaratish, yongʻin va texnika xavfsizligi qoidalariga amal qilgan holda oʻquvchilar xavfsizligini taʼminlash; umumiy oʻrta taʼlim muassasalarida tadbirlarning tartibli oʻtishini taʼminlash maqsadida joylardagi mahalla qoʻmitasi, ota-onalar va huquqni muhofaza qilish idoralari vakillari bilan hamkorlik qilish; maktab rahbariyati tomonidan tadbir ishtirokchilarini tabriklash jarayonida yurtimizda soʻnggi yillarda erishilgan yutuqlar, amalga oshirilgan keng koʻlamli bunyodkorlik ishlari, “Insonga eʼtibor va sifatli taʼlim yili”da taʼlim tizimidagi islohotlar toʻgʻrisida aniq raqam va dalillar keltirilgan holda maʼlumot berish; tadbirga faxriy oʻqituvchilar, ota-onalar, kasaba uyushmasi, mahalla va hamkor tashkilotlar, shuningdek, oʻrnak boʻladigan maktabning sobiq bitiruvchilarini taklif etgan holda ular tomonidan bitiruvchilarga bayram tabrigi va tilaklarini bildirishlarini tashkil etish; tadbirda yil davomida namunali xulq va aʼlo baholarga oʻqib, eng yuqori reyting koʻrsatkichlariga erishgan iqtidorli bitiruvchilarni taqdirlash va ragʻbatlantirish;
maktab hayotida faol ishtirok etayotgan, shuningdek, odob-axloqi, intiluvchanligi bilan tengdoshlariga oʻrnak boʻlayotgan oʻquvchilarning ota-onalarini “Eng faol ota”, “Jonkuyar ona”, “Masʼuliyatli ota-ona”, “Aʼlochi oʻquvchi otasi”, “Bilimli qiz onasi” kabi nominatsiyalari boʻyicha tashakkurnomalar berish.
Tadbir oʻtkazishda maktab hududiga muhtaram Prezidentimiz Shavkat Mirziyoyevning quyidagi shior va chaqiriqlarni ilib qoʻyish tavsiya etiladi:
Ilmni qadrlang, ilmga intiling! Bir soniya vaqtingiz ham bekor oʻtmasin!
Yoshlik – umrning eng bebaho davri. Ilm oʻtda yonmaydigan, suvda choʻkmaydigan, hech kim sizdan tortib ololmaydigan boylik ekanini aslo unutmang!
Yuksak maqsadlar yoʻlida siz – yoshlar hal qiluvchi kuch boʻlishingiz kerak.
Sayyoramizning ertangi kuni, farovonligi farzandlarimiz qanday inson boʻlib kamolga yetishi bilan bogʻliq.
Biz taʼlim tizimining barcha boʻgʻinlari faoliyatini bugungi zamon talablari asosida takomillashtirishni oʻzimizning birinchi darajali vazifamiz deb bilamiz.
Hozirgi vaqtda yoshlar tarbiyasi biz uchun oʻz dolzarbligi va ahamiyatini hech qachon yoʻqotmaydigan masala boʻlib qolmoqda.
“Bizning maqsadimiz — yuksak maʼnaviyatli, mustaqil fikrlaydigan, zamonaviy bilim va kasb-hunarlarni puxta egallagan yoshlarni tarbiyalashdan iborat”.
Quyidagilar taʼqiqlanadi:
“Soʻnggi qoʻngʻiroq” tadbirlarini, bosqichli nazorat imtihonlari va yakuniy davlat attestatsiyalarini oʻtkazishda, taʼlim muassasalarini yangi oʻquv yiliga tayyorlash borasida oʻquvchi va bitiruvchilar hamda ularning ota-onalaridan turli xil pul mablagʻlarini yigʻish;
umumiy oʻrta taʼlim muassasalari rahbarlari hamda oʻqituvchilarga bitiruvchilar tomonidan turli qimmatbaho sovgʻalar taqdim etish, qoʻshimcha turli tantanali tadbirlarni (xonadonlar, restoran yoki qahvaxonalar va h.k.da banket yoki boshqa marosimlar) oʻtkazish va yengil avtomashinalarda sayr tashkil etish.
@Pedagoglarga
https://t.me/joinchat/QgkKxey0cc4b-wvU
7.1K viewsedited 03:22