2023-12-05 22:49:40
Instagramdagi olabo‘jiInstagramda turli mazmunda yegan-yemagan videolar ko‘p uchrab turadi. O‘shalardan bir yo‘nalish borki, kontent mualliflari bu video bilan nima demoqchi ekanliklarini o‘zlari ham tushunmaydi.
Instagramdan foydalanadigan odam kamida bir marta bo‘lsa ham shu yo‘nalishdagi videolarga ko‘zi tushgan, albatta. Yosh er-xotin bo‘ladi, er xizmat safarida bo‘ladi va uyiga qaytib kelganda ayolini begona erkak bilan ko‘rib qoladi. Bu bir umumiy misol, xolos. Shu yo‘nalish atrofida aylanuvchi videolar tiqilib yotibdi.
Savol tug‘iladi: video mualliflari odamlarga bu bilan nima signal bermoqchi? Katta ehtimol bilan o‘zlari ham bilmaydi. Chunki voqealar rivojining hech qanaqa oxiri yo‘q. Shunchaki xiyonat ustida ushlab olgani ko‘rsatiladi. Ayol kishini xiyonatkor obrazda ko‘rsatishdan bular qachon tiyiladi? Aniqroq aytganda, qachon tiyib qo‘yiladi?
Yosh oilalarning buzilib ketishiga bunaqa kontentlarning ta’siri tahlil qilinmagan bo‘lsa kerak, ammo salbiy oqibatlar keltirib chiqarishi aniq. Eng kamida yosh oilalar o‘rtasida bir-biriga nisbatan turli shubha-gumonlarni, ishonchsizliklarni kuchaytirishga ham sabab bo‘lishi mumkin.
Bunaqa video oluvchilar nimani propaganda qilayotganiga o‘zlarining ham aqli yetmayapti. Ularning kontentlarini millionlab odamlar ko‘ryapti. Odamlarga bunaqa videolarning nimasi qiziq ekani ham tushunarsiz, na mazmun bor, na mohiyat.
Odamlarning ongini yegan-yemagan videolar bilan buzayotgan, yoshlarning mafkurasiga ta’sir qilayotgan bu kabi kontentlarni to‘xtatish kerak. Yoshlarga tavsiya: shunaqa videolarni ko‘rmang. Miyangizni mazmun-mohiyatsiz, tuturiqsiz narsalar bilan to‘ldirmang.
@masofatalim
15.0K viewsedited 19:49