2023-05-02 18:30:29
ТИЛСИЗ ЁВДАН АСРАСИН!
Мўмин-мусулмон ҳар бир нарсадан ҳикмат қидириб яшашга одатланган. Бирор мусибат ёки кўнгилсиз ҳодиса юз берса, истиржо – Инна лиллаҳи ва инна илайҳи рожиъун – келтириб, содир бўлган ишда ҳам хайр борлигини умид қилади.
Афсуски, Тошкент туманидаги “Холмуҳаммад ота” жоме масжидида ёнғин содир бўлиб, масжид биноси бутунлай вайрона бўлди.
Бугун Тошкент вилояти бош имом-хатиби Жасурбек домла Раупов ёнғин содир бўлган мазкур масжид ҳудудига ташриф буюриб, масжид маъмурияти билан талафотни кўздан кечирди.
Албатта, бу кўнгилсиз ҳодиса барча намозхонларни қайғуга солди. Лекин мўмин киши Аллоҳ таоло таълим берганидек:
«Биз сизларни бироз қўрқинч ва очлик билан, мол-мулкка, жонга, меваларга нуқсон етказиш билан синаймиз. Сабрлиларга башорат беринг. Улар мусибат етганда: “Албатта, биз Аллоҳникимиз ва албатта, биз У Зотга қайтувчимиз” дерлар» (Бақара сураси, 155–156-оятлар), йўл тутади.
Тошкент вилояти бош имом-хатиби раҳбарият ва масжид маъмурияти билан маслаҳатлашиб, ўт кетиб кул бўлган масжид деворларини бузиб ташлаб, қайтадан замонавий жоме ҳамда таҳоратхона қуришни режалаштирди.
Ёши улуғ отахонларимиз дуога қўл очганда бежиз тилсиз ёв – ўт балосидан паноҳ тилашмаган.
Аллоҳ таоло тилсиз ёвдан барчамизни асрасин.
Масжининг янги биноси тез орада қурилиб, олдингисидан ҳам гўзал бўлишини насиб этсин.
* * *
Шунингдек, бугун Жасурбек домла Раупов Тошкент туманидаги 5-умумий ўрта таълим мактабига ташриф буюриб, ўқувчи-ёшлар билан суҳбатлашди. Мактаб маъмурияти билан маслаҳатлашиб, ҳомийларни жалб қилган ҳолда ушбу маърифат масканининг ҳожатхонасини қайтадан замонавий шарт-шароитларга эга қилиб қуриб беришга келишиб олди.
* * *
Парвардигор ҳар иккала хайрли ишга ҳисса қўшаётган азизларимиздан рози бўлсин.
Тошкент вилояти вакиллиги
Матбуот хизматиДўстларингизга ҳам улашинг:
https://t.me/joinchat/AAAAAEGj0hkBXGlopIDbXA
2.3K viewsedited 15:30