Blog | Shokhida

2020-06-23 17:33:47 Hamma ayollarga ham emas, ammo ayrimlariga tegishli

Erkak kishi mard, nigohlari sherdek bo‘ladi

Uning oldida bir muddat tursang, haqiqiy kuchni sezasan! Uning har bir so‘zida ishonch mavj uradi...

Lekin shunday ayollar bo‘ladiki, shu kuchni ko‘paytirishga emas, so‘ndirishga harakat qiladilar...!

Bu esa eng katta xato!

U erkaklik sifatlarini yo‘qotadi!!!

Aziz ayollar siz «ER» laringizni bo‘ysundirishga emas, ularda «ERKAKLIK» sifatlarini shakllantirishga yordam bering...

Shunda oilada har kim o‘z o‘rnida qoladi...!
«Erkaklikka da'vo qilmang» Siz ularday bo‘lolmaysiz!

PsihologGoar Ochish/sharhlash

2020-06-09 15:03:45 ​​ 9-iyun - Xalqaro Do‘stlik kuni

Do‘stlik va sadoqat tushunchalari bir-biriga ma'nodosh va bir-biriga chambarchas bog‘liq bo‘lgan so‘zlardir. To‘g‘rirog‘i, sadoqat bu – do‘stlik degani, do‘stlik esa sadoqat demakdir. Bu ne'matni faqat haqiqiy do‘sti bor odamgina to‘laqonli his qila oladi.

Do‘stlik tushunchasining mazmun mohiyati haqida donishmand kishilar, olimu fozillar tomonidan ko‘plab so‘zlar aytilgan bo‘lib, ularning ba'zilarini siz azizlar bilan baham ko‘ramiz. 

- Do‘stlik shunday bir daraxtdirki, urug‘i vafo, shohlari umid, yaproqlari saodatdir. 

- Do‘stlik bir shahardirki, kaliti vafo, aholisi esa vafodorlardir. 

- Do‘stlik usiz inson yashay olmaydigan kuch-quvvat manbaidir. 

- Do‘stlik ikki shaxsning go‘yoki bir shaxs sifatida birlashib ketishi va yagona fikrni o‘zida tashimog‘idir. 

- Do‘stlik u orqali kishi o‘z dardini chiqarib yuborib, yengil nafas oladigan bir tuynukdir. 

- Do‘stlik o‘zga uchun o‘z manfaatlarini qurbon qilish, fidokor bo‘lish hamda xudbinlik illatidan ozod bo‘lishdir.

- Do‘st bilan obod uying gar bo‘lsa u vayrona ham, do‘st qadam qo‘ymas ersa vayronadur koshona ham.

- "Yomg‘ir”dan soyabon bo‘lmagan do‘st do‘st emas

Donishmandlardan biri aytadi: "mening ko‘zlarim uchun do‘stlarim manzarasidan-da mahbubroq narsa yo‘q. Quloqlarim uchun do‘stlarim safardan qaytgani haqidagi xushxabardan - da yaxshiroq rohat beradigan musiqa yo‘q". 

P.S: Do‘stlarsiz uylar huvillab qoladi, ha xuddi mening uyimdek(( . Ammo qalblar hali ham butun do‘stlar muhabbati ila

Shu fursatdan foydalanib do‘stlarimni bugungi kunimiz bilan tabriklamoqchiman, Sizlarni menga bergan Allohga hamd-u sanolar bo‘lsin (CREW, Dilyora)
Tushungan tushundi)
Qolganini uyda davom ettiramiz)

Aytgancha, Sizlar ham do‘stlaringizni tabriklash yodingizdan chiqmasin Ochish/sharhlash

2020-06-02 17:00:59 Omadli bo‘lib tug‘ilmaydilar, balki omadga erishadilar!

Siz “omadsiz insonman”, deb ko‘p qayg‘urasizmi? Siz uchun yaxshi yangilik: omadli bo‘lib tug‘ilmaydilar, balki omadga erishadilar! O‘sha omadni qanday qilib topish va boylikka rag‘batlantirish mumkin? Ehtimol, kelishini sabr bilan kutgan ma’quldir... Yaxshiyamki, har kimning o‘z uslubi bor. Bugun sizlar bilan omadga erishganlarning 12 ta fazilati va ustunligini ko‘rib chiqamiz.

1. Omadlilar ichlaridagi “olov”ni yoqa olishadi.

Agar ko‘zlaringiz chaqnamay qo‘ygan bo‘lsa, unda siz baxtli bo‘lolmaysiz. O‘zingizni shu dunyoda toping. Qalbingizning hafsalasi nega pir bo‘lganini. Silkitish yordamida o‘zingizni “komadan chiqaring”, hayotga qayting. Ichingizda butunlay boshqacha odamni chiqaring. Xuddi reklamada aytilganidek, “Yaraqlash vaqti keldi!”.

2. Omadlilar barcha holatda o‘z imkoniyatlarini ko‘rishadi.

Siz avtobusni kutib, bekatda o‘tirgancha vaqtingizni xafa bo‘lishga sarflashingiz mumkin. Yoki kitob o‘qib, chet tilini o‘rganishingiz, musiqa tinglashingiz yoki qiziqarli suhbatdosh topishingiz mumkin. Vaziyatdan samarali foydalanish juda muhim.

3. Omadlilar ko‘proq jilmayuvchi, do‘stona, xush-xandon va ochiq fe’lli bo‘lishadi.

Ularning odamlarga qo‘shilishi oson va bu ularga ko‘p imkoniyat beradi.

4. Omadli odamlar kutishmaydi

Balki o‘z baxtlarini topadilar, ularga loyiq bo‘lib, erishadilar.Ular hatto qayg‘udan ham baxtiyor bo‘la olishadi. Kimdir sizni xursand qilishini kutmang, buni faqat o‘zingiz qila olasiz.

5. Omadlilar muqarrar bo‘ron va ob-havoga qarshi turmaydilar.

Ular qiyin damlarni kamtarlik bilan kutib olishadi va o‘zlariga bog‘liq bo‘lmagan ishlarga energiya sarflamaydilar. Ammo bo‘rondan keyin har doim quyosh paydo bo‘lib, ko‘plab imkoniyatlarni tuhfa etadi.

6. Omadli kishilarning haqiqiy maqsad va orzulari bor.

Ular hatto amalga oshirib bo‘lmaydigan bo‘lishi ham mumkin. Ammo bu ularni cho‘chitmaydi. Orzuning o‘zi ularni xursand qiladi. Maqsadlaringiz uchun kurashing va olg‘a yuring.

7. Omadli odamlar shikoyat qilib, nega hayotda buncha ko‘p qiyinchiliklar borligini so‘rashga vaqt sarflamaydilar.

Ular sinovlardan o‘tib, oldinga yurishadi. Qiyinchiliklar ularni kuchliroq, uddaburon va moslashuvchan qiladi.

8. Omadli odamlar o‘tmishdagi muvaffaqiyatsizliklarga, hasadgo‘y odamlarni qoralash va g‘iybatga e’tibor berishmaydi.

Ular o‘zlarini-o‘zlari ta’minlaydi va hech qachon kimdir oldida o‘zlarini oqlamaydi.

9. Omadlilar tavakkal qilishadi va kerakli paytda imkoniyatdan foydalanishadi.

Siz ham vaziyat va imkoniyatlardan foydalaning. Imkoniyatdan foydalanish kerak bo‘lgan paytni his eting.

10. Omadlilar o‘zlarining baxt donalarini misqollab yig‘adilar.

Ular shoshilmaydilar va yuraklari har bir kichik narsa uchun hayotga minnatdorlik bildirishga tayyor: “Rahmat, rahmat, rahmat”.

11. Omadli odamlar o‘z yaqinlarini yaxshi ko‘rishadi va ularga g‘amxo‘rlik ko‘rsatishdan qo‘rqmaydi.

Yaqinlaringiz bilan muloqot qiling, yangi odamlar bilan tanishing, sizga yoqadigan qizga yuzlanib, sevgingizni tan oling, do‘st va hamfikrlarni qidiring.

12. Omadlilar tabiatda faol bo‘lishadi.

Hech narsa qilmasdan biror narsaga erishib bo‘lmaydi. Baxtga faqat osmondan moʻjiza kutmaydigan faol odamlar erishadi. Baxt va omad insonning shaxsiy xizmatidir. Siz omadga erishish uchun nima qildingiz?

xabardor.uz Ochish/sharhlash

2020-05-25 17:01:20 ​​​​ Стив Жобснинг ҳаётини ўзгартирган савол

1976 йилда “Apple” компаниясига асос солинганидан сўнг компьютер даҳоси Стив Жобс бутун вақтини севимли ишига ажратганди. У ҳар бир йиғилишга қатнашар ва ҳаётида фақат бир мартагина муҳим тадбиркорлик учрашувини ўтказиб юборганди.

“Бунинг жиддий сабаби бўлса керак?” деб ўйлашингиз аниқ. Қандай қилиб ўз ишига садоқатли ва масъулиятли инсон муҳим учрашувни бошқа нарсага алиштириши мумкин?

Ҳаммаси оддий: Жобс бир гўзал қиз билан илк учрашувни ўтказиш учун ишидан воз кечган ва оқибатда ўша қиз унинг турмуш ўртоғига айланган эди.

Бир куни Стив университетда маъруза қилади. Тингловчилар орасида унинг бўлажак турмуш ўртоғи Лоурен Пауэлл ҳам бор эди. Стивга қиз ёқиб қолади ва маъруза қилиб бўлгач қиз билан танишишга қарор қилади. Улар бир-бирларига телефон рақамларини беришади.

Стив узоқ кутишни истамайди ва ўша куниёқ қизни бирга тушлик қилишга таклиф этмоқчи бўлади.
Лекин битта тўсиқ бор эди — у тушлик пайтида муҳим тадбиркорлик учрашувига бориши лозим эди.

Машинага ўтираркан, Стив ўзига шундай савол беради: “Агар бугунги кун ҳаётимнинг сўнгги куни бўлганида нима қилган бўлардим?”

Бир оз ўйлангач, у университетга қайтади, Лоренни топиб, у билан бирга тушлик қилишга йўл олади. Ўшандан кейин улар доимо бирга бўлишган.

Ҳеч нарса абадий эмаслигини тушуниш ҳам доноликдир. Агар инсон буни англаб етса, у ўзида журъат ва матонат топади, ҳаёт деб аталмиш ўйинда таваккал қила олади.

Ўзингизга мана шу саволни тез-тез бериб туринг. Бу савол олдингиздаги энг муҳим қадамингизга ташлашга ёрдам беради. 

Агар бугунги кун ҳаётингизни сўнгги куни бўлганида нима қилган бўлардингиз? Ochish/sharhlash

2020-05-24 05:05:33 Assalomu alaykum va rahmatullohi va barokatuh! Sizlarni musulmonlar bayrami bugungi Hayit ayyomingiz bilan chin qalbimdan tabriklayman. Ramazon oyida tutgan ro‘zalaringizni kamchiliklarini kechirib Alloh dargohida qabul qilsin Sizlarga ikki dunyo saodatini tilab qolaman, yaqinlaringizni asrang

@psy_academyy Ochish/sharhlash

2020-05-05 01:18:45 O‘zingizni yaxshi ko‘rmasligingizning 10 belgisi

Odam o‘zini yaxshi ko‘radimi yoki yo‘qmi – qanday bilsa bo‘ladi? Shunchaki buni so‘rash kerak. O‘zini yaxshi ko‘radigan va qadrlaydigan odam jilmaygancha “Albatta!”, deb javob beradi. Biroq savol ikkilanish yo tushunmovchilik uyg‘otsa, odam o‘ylanib qolsa, demak, o‘zini yaxshi ko‘rishi bilan bog‘liq muammolar bor. Shubhalari bor.
Yoki “Yo‘q. Men o‘zimni yaxshi ko‘rmayman!”, degan qayg‘uli javobni olish mumkin.
Yana qanday belgilarga ko‘ra kishining o‘zini yaxshi ko‘rmasligini bilsa bo‘ladi?

1. O‘zingizni qattiq tanqid qilasiz.

Barcha xatolaringizni sezasiz va o‘zingizni bo‘sh qo‘ymaysiz. Ayovsiz tanqid qilasiz. Mayda xatolarni eslab yurasiz. Va o‘zingizga dakki beraverasiz, beraverasiz, beraverasiz. Ehtimol, buni ota-onangizdan meros qilib olgandirsiz, ular sizga qattiqqo‘llik orqali mehr ko‘rsatishgandir. Tanqid qilish orqali hayotingizdagi hamma narsa yaxshi bo‘lishi uchun harakat qilishlarini tushuntirishgandir. Biroq odamga doimiy ravishda xatolari aytib turilsa, uning rivojlanishi va hayoti go‘zallashishi haqidagi fikrlar asossizdir.

2. Qachon qaramang – doim uzr so‘raysiz.

Kimgadir xalal berayotganday his qilasiz. Shunchaki mavjudligingiz bilan. Go‘yo borligingiz uchun uzr so‘rayotgandaysiz. 
Bu quyidagi belgini yuzaga keltiradi.

3. Kimdandir nimadir so‘rashingiz qiyin.

Oddiy iltimos yoki so‘rovingiz ham boshqa odamga katta noqulaylik tug‘diradiganday tuyuladi. Siz so‘ragan ishni bajarishga sarflagan kuchiga o‘zingizni loyiq deb hisoblamaysiz. Rad javobini olishdan ham qo‘rqasiz. Rad javobi sizning qanchalar noqis ekaningizni bildiradigan navbatdagi belgiday tuyuladi.

4. O‘zingizga nisbatan past baho.

O‘zingizni hurmat qilmaysiz. Yutuqlaringizni eslamaysiz yoki ularni qadrlamaysiz. Ammo hamma mag‘lubiyatlaringiz esingizda. Shu tariqa o‘zingizga nisbatan bahongiz manfiy ko‘rsatkichga ega bo‘ladi.

5. Odamlarga rad javobini berolmaysiz.

“Yo‘q” so‘zini to‘g‘ri ishlatishni bilmaysiz. O‘zingizga bu so‘zni ko‘p aytasiz. Boshqalarga esa deyarli hech qachon. Chunki rad javobi orqali birovning ko‘nglini og‘ritishdan qo‘rqasiz. Siz uchun boshqa odamlarning hislari o‘z ehtiyojlaringiz va tuyg‘ularingizdan muhimroq.

6. Maqsadlar qo‘yishingiz va ularni amalga oshirishingiz qiyin.

Ayniqsa, katta maqsadlarni. Yaxshiroq va kattaroq narsaga loyiq emasman, deb hisoblaysiz. O‘z oldiga maqsad qo‘ygan odam hayotini yaxshilashga intilayotgan kishidir. O‘zingizni yaxshi ko‘rmasangiz, hayotingizni yaxshilash istagi ham bo‘lmaydi. Shuningdek, muvaffaqiyatsizlikdan ham juda qo‘rqasiz.

7. O‘zingizni to‘g‘ri ruhlantira olmaysiz.

Faqatgina kuchli tanqiddan foydalanasiz. Qo‘pol tepkilar va bosimlar ishlatasiz. Ozishingiz kerak bo‘lsa – o‘zingizga qo‘pol ravishda semiz ekaningizni eslatasiz. Buning o‘rniga salomatlikni tiklash va kelajakda chiroyli qomatga ega bo‘lish haqidagi xayollar qilmaysiz.

8. Boshqalarga hasad qilasiz.

Chunki bir kun kelib sizning hayotingiz ham yaxshi bo‘lishiga ishonmaysiz. Hasadga turlicha yondashish mumkin. Albatta, u unchalik yaxshi bo‘lmagan hissiyot. Ammo ba’zi hollarda motivatsiya berishi, nimanidir o‘zgartirish va kattaroq narsaga erishish istagini uyg‘otishi mumkin. Ammo sizga u motivatsiya bermaydi. Ichingizdan kemiradi va o‘zingizga nafratni kuchaytiradi.

9. O‘zingizni himoya qilolmaysiz.

Istaklaringiz uchun kurasholmaysiz. Buni qilolmaganingiz uchungina emas. Balki bunga huquqingiz borligiga ham shubha qilasiz. Atrofdagilarga bu bilinib turadi. Ehtimol, shuning uchun tez-tez jabrdiyda holatiga tushib qolasiz.

10. Maqtovlarni qabul qilishingiz qiyin.

Ularga shu qadar ko‘nikmagansizki, yo uyalasiz yo boshqa bir maqsadda aytilgani haqida o‘ylaysiz. Kimdir sizda qandaydir yaxshi jihatni ko‘ra olishiga ishonmaysiz. Siz sevishga aniq arzimasligingizni bilasiz. Axir o‘zingiz o‘zingizni sevmaysiz.
Bu ro‘yxatni o‘qib chiqib, o‘zingizni qanchalar yaxshi ko‘rishingizni tushunishingiz mumkin. 1-3 ta jumla sizga mos bo‘lsa, xavotir olmasangiz ham bo‘ladi, sizda hammasi joyida.

xabardor.uz Ochish/sharhlash

2020-04-26 02:52:09 Kun mavzusi: Ro‘za tutish deganda nimani tushunamiz?

Assalomu alaykum va rahmatullohi va barokatuh kanalimiz a'zolari. Bugun muborak Ramazon oyining 3-kuni ekan, Sizlarga Allohdan sabr tilab, tutgan ro‘zalaringizni dargohida qabul qilishini so‘rab qolaman.

Hozirgi kunda musulmon ahlining deyarli 80% qismi ro‘zador desak ham bo‘ladi. Katta-yu kichik ro‘za tutishning shartlaridan xabardor, va savobidan umidvor. Ammo ozchilik haqiqiy ro‘zadorlar sirasiga kiradi, mukammal ro‘za tutadilar.

Ko‘pchilik o‘ylaganidek, ro‘za tutish qorin och yurishi bilan kifoyalanib qolmaydi. Til ro‘zasi bor, quloq ro‘zasi bor, ko‘z ro‘zasi bor. Ro‘zamiz mukammal hisoblanadi, qachonki tilimizni g‘iybat-u yolg‘ondan tiysak, ko‘zimizni nomahramlardan tiysak, qulog‘imizni esa musiqalardan.

Ro‘zador holda musiqa eshitib yuramiz, ro‘zador bo‘la turib g‘iybatlardan tiyilmaymiz. Atigi 30 kunlik, ammo 30 milliard pulga topa olmaydigan rahmatga to‘la oyni kino ko‘rish-u, behuda ishlarga sovurib yuboramiz. Instagramda video ko‘rish, mashxurlar hayotini kuzatish, kino-seriallar bir umr kutib turadi, ammo Ramazon oyi kutmaydi, taqvodorlargina uni fazilatidan baxramand bo‘lib qoladilar. Har bir soniyasi rahmat-u marhamatga to‘la bo‘lgan oydan nega unumli foydalanmaymiz?

Sizlarga yetqizmoqchi bo‘lganim shulardan iborat edi. Ro‘zani mukammal ado etadiganlardan, va Ramazonning har soniyasida Allohni zikr etadiganlardan bo‘lishingizni tilab qolaman!

Eh qaniydi, tugamasa bu Ramazon

@psy_academyy Ochish/sharhlash

2020-04-16 16:41:42 Juda ham to‘g‘ri fikrlar

"Kim o‘qishdan (ilm olishdan) to‘xtasa qariydi. Xoh u 20 yoki 80 yosh bo‘lsin, kim muntazam o‘qishni (ilm olishni) davom ettirsa yosh-navqiron bo‘lib qolaveradi. Hayotda eng asosiysi - miyani yosh-navqiron holatda saqlashdir.

- Genri Ford
"Ford Motors" kompaniyasi asoschisi

e_kutubxona Ochish/sharhlash

2020-04-12 15:25:10 ​​Davomi

11. Yaqinlaringiz bilan suhbatlashing

Doimo ota-onangizga qo‘ng‘iroq qilish, qarindoshlaringiz va eng yaqin do‘stlaringizdan hol-ahvol so‘rab turishni o‘zingizga odat qilib oling. Anchadan beri uchrasha olmayotgan do‘stlaringizga esa videoqo‘ng‘iroq orqali sim qoqish imkoni borligi haqida ham unutmang.

12. Yangi narsalarni sinab ko‘ring

Bir qancha kichkina narsalarni sinab ko‘rishni rejalashtirish juda yaxshi odat hisoblanadi. Yangi janrdagi kino, boshqa xalqlarning milliy taomlari, yangicha janrdagi kitob yoki noodatiy xobbi – har qanday tarjiba foydali hisoblanadi.

13. Uyqu rejimini to‘g‘rilang

Bu odat juda zerikarli tuyulishi mumkin, ammo hozirdan uxlash va uyg‘onish vaqtlaringizni rejimga solib olsangiz, keyin o‘zingizga “rahmat” aytasiz. Yaxshi va to‘laqonli uyqu nafaqat sog‘liq, balki go‘zallik va qomat uchun ham foydalidir. Buni unutmang!

Ushbu barcha odatlar nafaqat hayotingizni yaxshilaydi, balki o‘zingizni ham o‘zgartiradi. Hozirning o‘zida ishlarni ortga surishni bas qiling va ertangi kuningiz uchun rejalar tuzishga kirishing. Ochish/sharhlash

2020-04-12 15:25:00 Hozirdanoq hayotingizni o‘zgartirishni istaysizmi? Asqotuvchi odatlar bilan tanishing

Karantin o‘z ustingizda ishlash uchun eng qulay vaqt hisoblanadi. Hayotingizni yana-da yaxshi qilish uchun dushanbani kutib yashash shart emas. Hozirdanoq harakatni boshlang. Keyinchalik o‘zingizga “rahmat” aytish uchun ham hozirdanoq quyidagilarni odat qilib olishingiz kerak.

1. Tongda bajariladigan ishlarni tartibga soling

Har kuni erta uyg‘onsangiz, doim ortga suradigan ishlaringizni bajarib olish uchun vaqt topiladi. Anchadan buyon tongni meditatsiyadan yoki ertalabki jismoniy mashqlardan boshlay olmay yuribsizmi? Harakatni boshlang! Shu bilan birga chiroyli va mazali nonushtalar tayyorlashni o‘rganishning ham ayni vaqti kelmadimikan?!

2. Smartfonsiz rejim

Uxlashdan oldin smartfon bilan vaqt o‘tkazish, uyqu rejimini buzilishi va yuzga erta ajin tushishiga olib keladi. Shuning uchun ham uyqudan kamida yarim soat oldin smartfon va gadjetlaringizdan voz keching. Shuningdek, uyg‘onishingiz bilanoq telefonga qarashdan ham o‘zingizni tiying. Buni o‘rniga yuqorida keltirib o‘tilgan ishlarga vaqtingizni sarflang.

3. Uyda mashq qiling

Kuniga atigi 20-30 daqiqani jismoniy mashqlarga sarflashingiz – tanangiz sizga beradigan barcha narsalar uchun eng yaxshi minnatdorlik bo‘ladi. Agar qiyin jismoniy mashqlarni unchalik yoqtirmasangiz, yoga va raqs bilan ham shug‘ullanishingiz mumkin.

4. Rejalashtirishni boshlang

Tunda keyingi kun qilishingiz kerak bo‘lgan ishlarni yozib chiqing. Kelasi haftani esa har yakshanba yoki dam olish kunlaringizda rejalashtirib qo‘ying. Bunga 15-20 daqiqa ketishi mumkin, ammo samaradorligingiz va ko‘p narsalarga ulgurishingiz sezilarli darajada oshadi. Shuningdek, bir qancha qo‘shimcha vaqtlarni yutishingiz va dam olish uchun ko‘proq vaqt ajratishingiz mumkin.

5. Birinchi darajali ishlarni belgilab oling

Avvalo, eng qiyin ishlarni, keyin esa osonlarini bajarishga odatlaning. Shunda kuningiz unumdor o‘tadi. Hayotingizga ushbu oltin qoidani tatbiq eting: 80 foiz kuchni birinchi darajali ishlarga, 20 foiz kuchni esa ikkinchi darajali ishlarga sarflang.

6. Foydali ish bilan shug‘ullaning

Online-ta’lim, hujjatli film, YouTube’dagi foydali videolar va boshqa bir qancha manbalar yangidan-yangi bilim olib, xotirangizni yaxshilash va ish koeffitsiyentingizni oshirishga ko‘mak beradi. Shuningdek, ko‘proq kitob o‘qing.

7. Moliyaviy savodxonlik

Moliya sohasida bilimlaringizni oshirish, pul tejash va ishlab topishni o‘rganish hech kimga zarar qilmaydi. Har oyda daromadingizning hech bo‘lmaganda 10-15 foizini tejab, saqlab qo‘yishga odatlaning. Ayniqsa, hozirgi karantin paytida bunday odat hech kimga zarar emas, faqatgina foyda keltirishini tushungandirsiz?! Shuningdek, bu mavzuda hech bo‘lmaganda bitta kitob o‘qish ham zarar qilmaydi.

8. Ortiqcha narsalardan qutuling

Barchamizning ham sevimli narsalarimiz juda ko‘p, ammo dori qutisi, shkaflar, tortma va telefonimiz juda ko‘p keraksiz narsalarga to‘lib ketgan bo‘ladi. Atrofingizni doimiy tarzda tozalab turishga odatlaning. Bir qancha keraksiz narsalaringizni tashlab yoki berib yuboring, galereyangizni tozalang, asabingizni buzadigan akkauntlardan chiqib keting. Toza uy va axborot maydonida nafas olishingiz ham osonlashadi.

9. Zararli narsalardan qoching

Hayotingizga hech qanday yaxshilik keltirmaydigan “zararli” aloqalardan voz kechishga uyalmang. Negativ va salbiy insonlar bilan kamroq suhbatlashing va o‘zingiz ham ular kabi bo‘lishdan tiyiling. Nolish, tanqid, g‘iybatdan qoching va bu qoidalarni buzganingiz uchun o‘zingizga jazo o‘ylab toping. Masalan, 20 marta o‘tirib turish yoki 5 kun tinimsiz minimal mablag‘ hisobiga yashash.

10. O‘zingizga vaqt ajrating

Bu sizni rohatlantiradigan hamma narsa bo‘lishi mumkin. Taom tayyorlash, musiqa, meditatsiya, film va seriallar, ijod. Haftada ikki kunni “go‘zallik kuni” deb nomlang va shu kunlarda o‘zingizning sevimli mashg‘ulotlaringiz bilan shug‘ullanishga vaqt ajrating.

Davomi bor Ochish/sharhlash