Huquqiy axborot | Lex.uz

2022-10-10 09:51:25 #Ҳукумат_қарори

Дзюдо спорт мактаблари кўпайтирилди

“Спортни ривожлантириш вазирлиги тизимига кирувчи Денов ва Урганч дзюдо спорт маҳорати мактаблари фаолиятини ташкил этиш тўғрисида”ги Ҳукумат қарори қабул қилинди (580-сон, 06.10.2022 й.)

Қарорга кўра, республика ва халқаро мусобақаларда қатнашиш учун спорт захирасини терма жамоалар таркибига тайёрлаш, Денов ва Урганч дзюдо спорт мактабларининг асосий вазифаларидан бири этиб белгиланди.

Дзюдо мактаблари ўқувчиларининг умумий контингенти ўқувчиларнинг вазн тоифалари ва синфларини ҳисобга олган ҳолда 210 нафардан кўп бўлмаган ўқувчидан иборат этиб шакллантирилади.

Дзюдо мактабларига синов имтиҳонларидан муваффақиятли ўтган ўқувчилар 2022/2023 ўқув йилидан бошлаб ҳар йили 5-синфга қабул қилинади.

Ҳужжатнинг расмий тўлиқ матни:
https://lex.uz/pdfs/6228738 Ochish/sharhlash

2022-10-06 14:52:24 #Ҳукумат_қарори

Тиббиёт йўналиши битирувчилари тўлиқ ставкагача ишлаш имконига эга бўлди

"Давлат тиббиёт муассасаларини кадрлар билан таъминлаш тизимини такомиллаштириш тўғрисида"ги Ҳукумат қарори қабул қилинди (561-сон, 03.10.2022 й.)

Қарорга мувофиқ, Қорақалпоғистон Республикаси, вилоятлар ва Тошкент шаҳрида тажриба-синов тариқасида 2022/2023 ўқув йилида:

барча тиббиёт ва ОТМларнинг “Даволаш иши”, “Педиатрия иши” ва “Тиббий-профилактика иши” йўналишлари битирувчи курсларига тўлиқ ставкагача оилавий шифокор, тез тиббий ёрдам шифокори ва санитария бўлимларида шифокор сифатида;

барча тиббиёт ОТМлар, республика ихтисослаштирилган илмий-амалий тиббиёт марказлари ва Тиббиёт ходимларининг касбий малакасини ривожлантириш марказининг магистратура ва клиник ординатура битирувчилари мутахассисликлари бўйича тўлиқ ставкагача ишлаши мумкин.

Ҳужжатнинг расмий тўлиқ матни:
https://lex.uz/pdfs/6221421 Ochish/sharhlash

2022-10-05 14:17:23 #Ҳукумат_қарори

Масофавий таълимни жорий этиш тартиби белгиланди

Ҳукумат қарори (559-сон, 03.10.2022 й.) билан “Олий таълим ташкилотларида масофавий таълим шаклини жорий этиш чора-тадбирлари тўғрисида”ги низом тасдиқланди.

Масофавий таълим орқали ҳам олий таълим ташкилотларида бакалавриат ва магистратура босқичларида кадрлар тайёрлашни йўлга қўйиш тартиби белгиланди.

Масофавий таълим асосида кадрлар тайёрлашда бир бакалавриат таълим йўналиши 300 нафар, бир магистратура мутахассислиги 30 нафар талабадан ортиқ бўлмаслиги керак.

Бунда:
мазкур талаб ахборот-коммуникация технологиялари йўналишларига татбиқ этилмайди;
талабалар сонини аниқлашда хорижий давлат фуқароси бўлган талабалар ҳисобга олинмайди.

Масофавий таълим шакли тўлов-контракт асосида амалга оширилади.

Ҳужжатнинг расмий тўлиқ матни:
https://lex.uz/pdfs/6221502 Ochish/sharhlash

2022-10-05 09:02:23 #Ҳукумат_қарори

2022/2023 ўқув йилидан мактаб формасини жорий этиш бекор қилинди

“Умумий ўрта таълим муассасаларида маънавий-маърифий ҳамда тарбиявий ишлар самарадорлигини ошириш концепцияси” Ҳукумат қарори билан тасдиқланди. (558-сон, 03.10.2022 й.)

Қарор билан 2022/2023 ўқув йилидан давлат умумий ўрта таълим муассасаларида ўқувчиларнинг ягона мактаб формасини тўлиқ жорий этиш талаби бекор қилинди.

Концепция “Янги Ўзбекистоннинг янги мактаби” ғояси асосида мактаблардаги ижтимоий муҳитни яхшилашга қаратилган чора-тадбирларни амалиётга татбиқ этишни назарда тутади.

Ҳужжатнинг расмий тўлиқ матни:
https://lex.uz/pdfs/6221555 Ochish/sharhlash

2022-10-01 09:23:03 #Қонун

“Электрон тижорат тўғрисида”ги Қонун (ЎРҚ–792-сон, 29.09.2022 й.) Президент томонидан имзоланди

Қонунга кўра, электрон тижоратда шартнома тарафлар ўртасида шартнома шартларини электрон ҳужжатлар ва (ёки) хабарларни тасдиқлаш йўли билан келишиш орқали электрон ҳужжат шаклида расмийлаштирилади.

Электрон тижоратдаги электрон ҳужжатлар қоғозда расмийлаштирилган ва ўз қўли билан имзоланган ҳужжатларга тенглаштирилади.

Ҳужжатнинг расмий тўлиқ матни:
https://lex.uz/pdfs/6213382 Ochish/sharhlash

2022-09-30 10:52:58 #Ҳукумат_қарори

Никоҳ тузиш ва ажратишни қайд этиш учун аризаларни ДХМ орқали қабул қилиш бўйича эксперимент ўтказилади

“Фуқаролик ҳолати далолатномаларини ёзиш тартибларини янада такомиллаштириш чора-тадбирлари тўғрисида”ги Ҳукумат қарори (540-сон, 28.09.2022 й.) қабул қилинди

Қарорга мувофиқ, туғилганликни тиббиёт муассасалари орқали фуқаролик далолатномаларини ёзиш бўлимларида қайд этиш тартиби 2023 йил 1 январдан Тошкент шаҳрида, 2023 йил 1 июндан эса бутун республика ҳудудида жорий этилади.

Никоҳ тузиш ва никоҳдан ажратишни қайд этиш учун аризаларни Сирдарё вилоятидаги туман (шаҳар) давлат хизматлари марказлари орқали қабул қилиш бўйича ҳуқуқий эксперимент ўтказилади (2022 йил 1 ноябрдан 2023 йил 1 июлгача).

Ҳужжатнинг расмий тўлиқ матни:
https://lex.uz/pdfs/6212525 Ochish/sharhlash

2022-09-29 14:57:59 #Ҳукумат_қарори

Маҳаллалар ташаббуси билан яшил боғлар ташкил этилиши мумкин

Ҳукумат қарори (529-сон, 27.09.2022 й.) билан “Яшил боғлар” низоми тасдиқланди

Низомга кўра, қуйидагилар “Яшил боғлар”ни барпо этиш бўйича ҳокимликларга ташаббус билан чиқиш ҳуқуқига эга:

давлат органлари ва ташкилотлари;
фуқароларнинг ўзини ўзи бошқариш органлари;
кўп квартирали уй-жойлар мулкдорлари.

Ҳужжатнинг расмий тўлиқ матни:
https://lex.uz/uz/pdfs/6210852 Ochish/sharhlash

2022-09-29 10:57:58 #Ҳукумат_қарори

Ветеринария ва чорвачилик соҳасида кўкрак нишонларини бериш тартиби белгиланди

Ҳукумат қарори (526-сон, 27.09.2022 й.) билан “Ўзбекистон Республикаси ветеринария фидойиси” ва “Ўзбекистон Республикаси чорвачилик фидокори” кўкрак нишонлари тўғрисидаги низомлар тасдиқланди

Кўкрак нишонлари билан қуйидагилар тақдирланади:

“Ўзбекистон Республикаси ветеринария фидойиси” кўкрак нишони билан – ветеринария соҳасини ривожлантириш, соҳада назоратни кучайтириш ва хизматлар сифатини ошириш, эпизоотик осойишталик, озиқ-овқат маҳсулотлари хавфсизлигини таъминлашга муносиб ҳисса қўшган фуқаролар;

“Ўзбекистон Республикаси чорвачилик фидокори” кўкрак нишони билан – чорвачиликни ривожлантириш, чорва моллари наслини яхшилаш, озуқа базасини мустаҳкамлашга муносиб ҳисса қўшган шахслар.

Кўкрак нишонлари билан тақдирланганларга БҲМнинг 4 баравари (1,2 млн сўм) миқдорида бирйўла тўланадиган пул мукофоти ва эсдалик совғалар берилади.

Ҳужжатнинг расмий тўлиқ матни:
https://lex.uz/pdfs/6210820 Ochish/sharhlash

2022-09-24 15:08:06 #Президент_қарори

Субсидия асосида олинган уй-жой кредити учун йўналтирилган маблағдан даромад солиғи олинмайди

“Ипотека кредитидан фойдаланишда аҳолига қўшимча қулайликлар яратиш чора-тадбирлари тўғрисида”ги Президент қарори (ПҚ–377-сон, 22.09.2022 й.) қабул қилинди

Қарорга мувофиқ, 2023 йил 1 январдан уй-жой учун субсидия берилган фуқароларнинг ипотека кредитлари ва уларнинг фоизлари учун йўналтирилган иш ҳақи ва бошқа даромадлари даромад солиғига тортилмайди.

Мазкур имтиёз қарз олувчи ва бирга қарз олувчилар даромадининг бир солиқ даврида меҳнатга ҳақ тўлаш энг кам миқдорининг 80 бараваридан ошмаган қисмига татбиқ этилади.

Ҳужжатнинг расмий тўлиқ матни:
https://lex.uz/docs/6203431 Ochish/sharhlash

2022-09-24 10:18:06 #Ҳукумат_қарори

Олис ҳудудларда кўмир, газ ва озиқ-овқат захиралари яратилади

“Иқтисодиёт тармоқлари, ижтимоий соҳа объектлари ва кўп квартирали уй-жой фондини 2022/2023 йиллар куз-қиш даврида барқарор ишлашга тайёрлашни таъминлаш чора-тадбирлари тўғрисида”ги Ҳукумат қарори (522-сон, 23.09.2022 й.) қабул қилинди

Қарорга кўра, 2022/2023 йиллар куз-қиш даврида республика бўйича:

2,967 та кўп квартирали уйлар;

299 та газ тақсимлаш пунктлари;

1,815.3 км ичимлик суви тармоқлари;

2,420 та ижтимоий соҳа объектлари (жумладан, 13 та мактаб, 74 та шифохона ва поликлиника, 7 та ОТМ, 47 та маданият объектлари, 11 та спорт объектлари мукаммал) таъмирланади.

Ҳужжатнинг расмий тўлиқ матни:
https://lex.uz/pdfs/6204690 Ochish/sharhlash