2023-09-11 06:17:19
Судьянинг кайфияти қанақайкин?
Юридик институт талабасиман. Аудиторияда ҳуқуқий фанларнинг биридан якуний имтиҳон натижалари эълон қилинмоқда. Курсдошларимиздан бирининг бали етмаганлиги туфайли имтиҳондан ўта олмагани айтилди. Ўша куни устознинг кайфияти яхши эди. Имтиҳондан йиқилган курсдошимизни хафа қилгиси келмаганини, уни якуний имтиҳондан ўтказишни хоҳлаётганини сездириб қўйди. Яъни, ҳаёлига келган ғалати бир фикрни масалани ҳал қилиш шарти сифатида ўша талаба қаршисида ўртага ташлади. "Ҳозир аёлимга қўнғироқ қиламан. Агар қўйиб беришимни айтса, ўтиш балингизни қўйиб бераман", - деди устоз ва ўша заҳоти барчанинг кўз ўнгида у ҳақиқатдан ҳам ўз турмуш ўртоғига қўнғироқ қилди.
- Якуний назорат имтиҳонидан бир талаба қиз ўта олмади. Мен унга шарт қўйдим: Ҳозир аёлимга қўнғироқ қиламан, аёлим агар қўйиб беринг, деса қўйиб бераман, деб айтдим. Нима дейсан?
- Дадажониси, баҳосини қўйиб беринг!
- Хўп, майли.
Хонада қарсаклар янграб кетди. Устоз якуний назорат имтиҳонидан ўта олмаган талабага ўтиш балини қўйиб бериб, уни шу тарзда имтиҳондан ўтказиб юборди. Чунки ўша куни устознинг кайфияти яхши эди-да.
Мен ушбу ажойиб ва айни пайтда ғалати воқеликни касбий фаолиятим давомида ўтган бир нечта суд ишларини кўрилиши жараёнларида беихтиёр эсга оламан. Ва афсуски, баъзан суд чиқарган қарорлар ишни кўриб чиқаётган судьянинг ўша кунги кайфиятига истар-истамас боғлиқ бўлиб қолаётгандек туюлади.
Тўғри, талабанинг балини ҳал қилувчи устоз ҳам, суд залида тақдири муҳокама қилинаётган судланувчининг тақдирини ҳал қилувчи судья ҳам кайфиятлар ва туйғулардан ҳоли бўлмаган инсонлар.
Лекин бу ерда гап кайфиятлар ҳақида ҳам эмас, аслида. Гап ўша воқеликда устоз олдида турган масалани ҳал қилишни шунчаки кимнингдир раъйи билан боғлаб қўйганлигида кетмоқда.
Инсон тақдиридаги жиддий масалаларни ҳал қилишга қаратилган айрим суд ишларида судьяларимиз ўша устознинг "ажойиб" методикасини қўллаб қўймаяптилармикин?...
Каналга уланиш:
@Advokat_Abdullayev
14.5K views03:17