Замбаракнинг ўқи

2023-02-03 18:41:43 Кеча марҳума Муслиманинг онаси ва бувисидан "Hudud24" учун интервью олгани бордик. Ўзим гаплашдим. Суҳбат тугагунича мен ҳам деярли тугадим

Фожиадан бир кун олдин ва ўша куни бўлган воқеаларни гапириб беришди. Даҳшат!

Бир неча дақиқада бахтли бир оила улкан бахтсизлик чоҳига бир умрга тушди... Кеча монтажда мен ўтира олмадим, бу гапларни иккинчи марта эшитишга юрагим чидамади. Ҳозир ҳам қайта кўролмаяпман...

Ҳозир она ва буви жабрланувчи сифатида давлатдан жиноятчига бир умрлик қамоқ жазоси берилиши ва ҳеч қачон афв этилмаслигини сўрашяпти. Яна маҳалласига чироқ ва ишлайдиган камералар ўрнатилишини сўрашди. Бошқаларнинг бошига тушмасин, душманимга ҳам раво кўрмайман деди Хурсаной опа.

Жумла мўминдан эса марҳуманинг ҳаққига дуо қилишларини сўрашди. “Дуо етиб боради унга энди фақат” деди онаси Умида.

Жойи жаннатда бўлсин Муслимани. Оллоҳ яқинларига сабр берсин.

Видеони ўзингиз кўринг:




@shahnozxon Ochish/sharhlash

2023-02-02 20:34:04 Уйга қувватлаш станцияси ўрнатдим. Энди ҳар куни тунда машина батаерясини тўлдириб қўйсам бўлади.

P.S. Тўлиқ зарядда тахминан 400-450 км юради, қаттиқ совуқда шунинг ярми.

P.P.S. 10 фоиздан 90 фоизгача (61,6 кВт/с) уйда зарядлаш 36 минг сўмга тушаркан. 1 кВт/с учун 6,89 Канада центи, 584 сўм тўлайман.

@zambarakning_oqi Ochish/sharhlash

2023-02-02 07:28:41 Уйда Исмоил ва Отабек касал. Аввал Исмоилдан бошланди, кейин Отабекка юқди.

Исмоилда симптомлар пайшанба куни кечқурун бошланди. Жума куни мактабга бормади. Душанба куни яхши бўлиб, мактабга чиқадиган ҳолга келди. Бу давр мобайнида иситмаси 38дан ошганда парацетамол бердик, холос.

Лекин сешанба куни симптомлар қайталади — қарасам, бола компьютерда эмас, диванда ётибди ўраниб. “Компьютерда эмасми, значит чўта нето” дедим-да, иситмасини ўлчадим.

Бундан ташқари, симптомларга томоқ оғриғи қўшилди. Хулоса қилдимки, вирусли касаллик бактериал касалликка айланди ва энди антибиотик ичиш керак.

Бугун ойиси Исмоилни докторга оборди. Докторга бир кун аввал ёзилдик.

Доктор ҳам кўриб, томоғида яллиғланиш борлигини айтибди ва “бакпосев” олибди. Унинг жавоби икки кундан кейин чиқаркан. Лекин шифокор касаллик бактериал экани 99 фоиз бўлгани учун дарров антибиотик — азитромицин ёзиб берибди, 5 кун ичиши керак экан.

Дарров маҳалладаги аптекага чиқиб олдик. Нархи қарийб 480 минг сўм экан, лекин ишхонам томонидан тақдим этилган суғурта бўлгани учун бир сўм ҳам тўламадик, дори бепул бўлди.

Бугундан муолажани бошладик. Бир—икки кунда тузалиб қолишига умид қиляпмиз.

Шу муддат давомида фақат парацетамол бердик. Терафлю, Инсти деган дорилар йўқ бизда. Йўталгаям дори бермади, чунки унинг сабаби (стрептококк) билан курашиш керак, симптом билан эмас, деди доктор.

Томоқ чайиш, “қиздирадиган” капельница деган нарсалар ҳам йўқ. Пулга ҳам қилдиролмайсиз, таги йўқ.

Антибиотик ҳам фақат доктор рецепти ёрдамида. Доктор доим қанчадир доза ёзиб беради, фармацевт ҳам дорини фақат доктор белгилаган миқдорда беради.

Аввал ҳам ёзгандим: “уч кун қоидаси” бор бизда. Уч кунда тузалмаса, кейин докторга учраймиз. Бу сафар худди шундай бўлди.

@zambarakning_oqi Ochish/sharhlash

2023-01-31 06:57:18 Интернет орқали автомобилга янги функциялар қўшиш Тесланинг бошқа электромобиль ишлаб чиқарувчилар олдидаги энг катта афзалликларидан бири деб ҳисоблайман.

Масалан, бугунги “обновление” машинамга рульни автоматик иситиш функциясини қўшди. Юқоридаги видео шу ҳақда.

P.S. Тесла ҳақидаги аввалги видеоларни баъзи каналлар ўзларида чиқариб, менга ҳавола беришмапти. Сал инсоф қилинглар-ей, ўртоқлар.

@zambarakning_oqi Ochish/sharhlash

2023-01-30 22:51:33 Ochish/sharhlash

2023-01-30 19:51:44 Канадада, агар ўқувчи касал бўлиб қолса, мактабга телефон қилиб ёки имейл орқали айтиб қўйиш керак. Айтиб қўймасангиз, робот телефон қилиб, боланг келмади, бизга сабабини айт дейди.

Биз кўпинча имейл орқали хабар берамиз. Кейин мактаб котибаси жавоб ёзади.

Бугун Отабекнинг сал мазаси бўлмай, мактабга бормади. Мактабига имейл ёздим. Бирпасдан сўнг Ребекка Шея хоним (мактаб котибаси) хабар берганим учун раҳмат айтиб, Отабек тезроқ тузалиб кетишини тилаб, жавоб ёзиб юборди.

@zambarakning_oqi Ochish/sharhlash

2023-01-28 20:10:29 Кеча Калгарида қарийб 40 см қор ёғиб, шаҳар тарихида январь ойида кунлик ёққан қор миқдори бўйича мутлақ рекордни янгилади. Ҳали январь ойининг бир кунида шаҳарда бунча кўп ёғмаган экан.

Ўзиям кундузи тинмай ёғди. Мен ҳам тинмай — 4 марта қор курадим.

Қор ёғиб тургандаям курайдими, деб сўрашингиз мумкин. Ҳа, агар 40 см қорни биттада курамоқчи бўлмасангиз, қор ёғаётган пайтдаям, кўп йиғилиб кетмасидан, тез-тез кураб туриш керак.

Бугун эрталаб туриб, ойнадан мўраладим: тротуарлар оппоқ. “Кофемни ичволай, кейин яхшилаб қўшниларникиниям кураб қўяман” дедим. Кофе қилдим, ичдим, кўчага чиқсам, қўшним аллақачон бизнинг ва яна бошқа қўшниларнинг тротуарини кураб қўйибди, чаққон. Мен ўзимизнинг йўлакни кураб, тозалаб қўйдим.

Эрталабдан қор курашни ёқтираман. Уйқуни қочириб, энергия беради.

Суратда: кеча тунда ёғаётган қор.

@zambarakning_oqi Ochish/sharhlash

2023-01-28 07:04:40 Tesla Model Y’нинг (ҳозирча топилган) афзаллик ва камчиликлари.

Калит ўрнида телефон. Машинанинг олдига келиб, эшик дастагини тортишингиз билан машина очилади. Ҳеч қандай калит ёки пульт кўтариб юрмайсиз.

Машинага ўтиришингиз билан салон ҳарорати белгиланган даражагача кўтарилишни, ўриндиқ ва руль ҳам исишни бошлайди. Одатда печка иситишни бошлаши учун мотор қизиши керак. Тесла ҳолатида эса печка дарҳол ишлайди. Автоматик равишда, ҳеч қайси тугмани босмайсиз.

Ўт олдириш тугмаси ҳам йўқ. D’га қўйиб, ҳайдаб кетаверасиз.

Табийки, салонда мотор товуши йўқ. Қаттиқ тезлашганда трамвайга ўхшаб “визиллаган” овоз чиқаради, холос.

Педалга сал оёғингиз тегиб кетса, тезлик 100га чиқади. 0дан 100гача тезлашиш 5 сонияни ташкил қилади. Жуда-жуда тез, кўнглингизни айнитворади. Автомобилда “коробка” бўлмагани учун тезлашиш дарҳол юз беради, педални босишингиз биланоқ.

Мана шу электромобилларнинг, хусусан Тесланинг энг катта афзалликларидан бири деб биламан. Маза қиласиз хайдаб.

Телефонга ўрнатилган дастур орқали машина салонини иситиб ё совутиб қўйиш, чироқларини ёқиш ё ўчириш, багажникни очиб-ёпиш мумкин.

Энг катта камчилиги (мен учун) бу Model Y’нинг “жесткий”роқ экани. Аввалги Фольксвагеним юмшоқ юрарди, бу сал қаттиқроқ, ғадир-будурлар устидан ўтганда сезилади.

Иккинчидан, ташқи дизайни ҳам умуман ёқмайди, ғирт қурбақа. Лекин ташқи дизайни унча ҳам муҳим эмас, асосийси унинг функционалидир.

@zambarakning_oqi Ochish/sharhlash

2023-01-27 08:16:21 Тесла камералари светофор рангларини ҳам кўра оларкан.

@zambarakning_oqi Ochish/sharhlash

2023-01-26 20:03:31 «SAMITOL TOUR» - ҳамёнбоп, ишончли ва сифатли сайёҳлик агентлиги. Умра зиёрати дейсизми, денгизли иссиқ ўлкалар дейсизми, ҳаво шарларида осмонга парвоз дейсизми, Ўзбекистон бўйлаб саёҳат дейсизми ёки санаторияларда муолажа олиб, дам олиш дейсизми, бари мужассам! Сиздан фақат маблағ ва ҳужжатлар!

«SAMITOL TOUR» жамоаси сидқидилдан сизларга тавсияларини беришади, хоҳишингизга кўра меҳмонхоналарни танлаб беришади ва дам олиш кунларингизни мазмунли ва мароқли ўтишини таъминлашади. Умра сафари учун эса малакали элликбошилар доимо хизматингизда бўлишади!

Телеграм: https://t.me/samitoltour
Инстаграм: https://instagram.com/samitoltour

P.S. Турфирма яқин қариндошимизники, сифатига 100% кафолат бераман.

Ҳамкорлик асосида Ochish/sharhlash