YURISTKADR

2021-12-14 08:15:15 АТТЕСТАЦИЯДАН ЎТОЛМАГАН ХОДИМНИ ЯНА ҚАЙТАДАН ЎША ИШГА ҚАБУЛ ҚИЛИШ МУМКИНМИ?

САВОЛ.
Ассалому-алейкум мана шу масалани сўрамоқчиман. Жудаям кўп ходимлар аттестациядан ўтказилмади. Ходимлар бўшатилди, 2 ойдан сўнг қайтариб яна жой жойига қўйилди. Савол: яна қайтадан ишга олинган ходимни аттестациядан ўтказилмаганлигини важ қилиб бўшатиш мумкинми? Улар 100-модда билан бўшатилмаган.

ЖАВОБ.

Ҳеч эътибор берганмисиз, бизда ходимларни аттестациядан ўтказиш бўйича ягона ҳуқуқий механизм, ягона норматив-ҳуқуқий ҳужжат мавжуд эмас.

Шу сабабли, ходимларини аттестация синовларидан ўтказмоқчи бўлган ташкилотлар, одатда, аттестациядан аввал, аттестация синовларини ташкил қилиш ва ўтказиш ҳақида ўзларининг алоҳида низом ёки йўриқномаларини тасдиқлайдилар. Бу билан, ҳуқуқий бўшлиқнинг ўрнини тўлдириб оладилар.

Бу албатта, Меҳнат кодексининг 1-моддасидаги “Ўзбекистон Республикасида меҳнатга оид муносабатлар меҳнат тўғрисидаги қонунчилик, жамоа келишувлари, шунингдек жамоа шартномалари ва бошқа локал норматив ҳужжатлар билан тартибга солинади” деган нормага тўғри келади.

Ҳаммаси аттестацияга оид ана шундай низом ёки йўриқнома (локал норматив ҳужжат)да қандай белгиланганига боғлиқ. Айрим, ҳушёр иш берувчилар ана шундай ички ҳужжатлар билан аттестацияга оид ҳамма нарсани белгилаб олишга ҳаракат қиладилар.

Масалан, ўзимизнинг амалиётимизда ишлаб чиқилган аттестацияга оид низомда тахминан мана бундай қоида ҳам бор эди:

“аттестациядан ўта олмаган, эгаллаб турган лавозимига нолойиқ деб топилган ходим бу лавозимдан озод этилган (бошқа ишга ўтказилган) ёки меҳнат шартномаси бекор қилинган кундан бошлаб, уни камида 1 йилсиз ушбу лавозим (ёки тенг лавозим)га қайта ишга қабул қилиниши (ўтказилиши)га йўл қўйилмайди. Агар бу вақт ичида ходимнинг малакаси оширилиб, махсус комиссия ижобий ҳулоса берса, у истисно сифатида 1 йил ўтмасидан ҳам, мазкур лавозимга қайта тайинланиши мумкин”.

Шунга кўра, биз аттестациядан ўта олмаган ходимни 1 йил ўтмасидан туриб, ёки 1 йил ичида малакасини оширмай туриб, у нолойиқ деб топилган лавозимга қайта ишга олмас эдик.

Лекин, қонунчиликда ёки ички локал ҳужжатда бу каби чекловчи нормалар бўлмаса, ходимни яна қайтадан ўша нолойиқ деб топилган лавозимига ишга қабул қилиш амалиётини ноқонуний деёлмаймиз.

Бундай ҳолларда, қайтадан ишга қабул қилинган ходим бўйича “нотўғри ишга олиб қўйибсизлар, энди тез бўшатинглар” деб ҳам айиб бўлмайди. Чунки бунга ҳуқуқий асоснинг ўзи йўқ.

@yuristkadr Ochish/sharhlash

2021-12-13 22:07:29 Ёшлардан келган таклифлар асосида алоҳида дастур қабул қилинади

«Ўзбекистон ёшлари форуми» доирасида yoshlarforumi.uz платформаси орқали ёшлардан таклифлар қабил қилинган. Таклиф юбориш муддати 12 декабрь, соат 00:00да ўз ниҳоясига етган. Маълум қилинишича, ёшлар томонидан 7593та таклифлар келиб тушган.

Эндиликда вазирлик, ташкилот ва идоралар вакилларидан иборат тажрибали экспертлар гуруҳи томонидан ёшларнинг юборган таклифлари ўрганиб чиқилади. Энг яхши таклиф эгалари “Ўзбекистон ёшлари форуми” доирасидаги тадбирларда иштирок этади ва таклифлар форум давомида мутасадди ташкилотлар билан муҳокама қилинади.

Шунингдек, таклифлари энг кўп қўллаб-қувватланган ёшларга тез орада республика миқёсидаги «Ўзбекистон ёшлари форуми»га таклиф этилгани тўғрисида электрон тарзда хабарнома юбориш бошланади. Бундан ташқари, форум якунлари бўйича ҳукумат қарори қабул қилиниши режалаштирилган.

@yuristkadr Ochish/sharhlash

2021-12-13 20:14:22 Яккасарой туманидаги Юнус Ражабий кўчасида кесиб ташланган 81 та дарахт воқеаси кўпчиликнинг ёдида бўлса керак. Ўшанда, яъни 2020 йилнинг февраль ойида дарахт кесишга қарши мораторий талабларига зид равишда кўп йиллик, қимматбахо дарахтларни кесиб ташлаган… Ochish/sharhlash

2021-12-13 20:02:56 #mibdagi_ishlar Обуначи мурожаати: Мен Давлатова Дилдора Наманган вилояти Чортоқ туманида туғилганман. 2011 йил 3 январь куни Х.З билан қонуний никохдан ўтиб, оила қурган эдик, биргаликда 10 йил яшаб, келишмовчилик туфайли, ота-онамни уйига кетиб қолдим.… Ochish/sharhlash

2021-12-13 19:59:34 Яккасарой туманидаги Юнус Ражабий кўчасида кесиб ташланган 81 та дарахт воқеаси кўпчиликнинг ёдида бўлса керак.

Ўшанда, яъни 2020 йилнинг февраль ойида дарахт кесишга қарши мораторий талабларига зид равишда кўп йиллик, қимматбахо дарахтларни кесиб ташлаган «Building and Supplies» МЧЖ мансабдор шахсларига нисбатан Тошкент шаҳар прокуратураси томонидан жиноят иши қўзғатилганди.

Оммавий ахборот воситалари
прокуратура маълумотларига таяниб дастлабки терговда айбланувчилардан 1 млрд 891,3 млн сўм зарар ундирилганлигини билдирган.

Кўпчилик қатори менга ушбу ишнинг якуни нима бўлгани қизиқ.

Шу боис, Экология ва атроф муҳитни мухофаза қилиш давлат қўмитасига ундирилган 1 млрд 891,3 млн сўмни нималарга ишлатишгани, Тошкент шаҳар прокуратурасига эса жиноят иши нима бўлганини билиш мақсадида расман мурожаат юборгандим.

Қизиқ ҳолат: Экология ва атроф муҳитни мухофаза қилиш давлат қўмитасининг билдиришича, табиатга етказилган зарар учун ундирилган 1 млрд 891,3 млн сўм қўмитага берилмаган ва шу кунга қадар Тошкент шаҳар прокуратурасининг депозит ҳисоб рақамида сақланмоқда.

Шунча вақт депозит ҳисоб рақамида пулни ушлаб туриш тўғрими, деган саволга молиячилардан жавоб олаяпмиз.

Шу йилнинг 9 ноябрида юборилган мурожаатимизга Тошкент шаҳар прокуратураси ҳозирча жавоб бермади. Менимча мурожаат чуқур ўрганилаётган бўлса керак.

@deputat_kusherbayev Ochish/sharhlash

2021-12-13 10:18:54 ЎЗИМ ПЕНСИОНЕРМАН. БОҚУВЧИСИНИ ЙЎҚОТГАНЛИК ПЕНСИЯСИНИ ОЛИШИМ МУМКИНМИ?

САВОЛ.

Мен ёшим 57 да, турмуш ўртоғим вафот этдилар. Битта қизимиз бор, турмушга чиқиб кетган хозир. Бир ўзим қолдим, 440000 сўм пенсия оламан. Турмуш ўртоғим ҳарбий эдилар, мен бокувчисини йўқотганлик пенсиясини олаоламанми ва қандай килиб? Жавоб учун олдиндан раҳмат.

ЖАВОБ.

1993 йил 3 сентябрдаги Фуқароларнинг давлат пенсия таъминоти тўғрисидаги Ўзбекистон Республикасининг 938-XII-сонли қонуни (кейинги ўринларда Қонун) 19-моддасида вафот этган боқувчининг қарамоғида бўлган меҳнатга қобилиятсиз оила аъзолари боқувчисини йўқотганлик пенсияси олиш ҳуқуқига эга бўлиши ҳамда марҳумнинг қарамоғида турмаган ота-онаси ва эри (хотини) ҳам, кейинчалик кун кечириш учун зарур маблағ манбаидан маҳрум бўлиб қолсалар, пенсия олиш ҳуқуқига эга бўлишлари айтиб ўтилган. Мазкур модданинг «б» бандида пенсия ёшига (55 ёшга) тўлган марҳумнинг хотини оиланинг меҳнатга қобилиятсиз аъзоларидан бири эканлиги кўрсатиб ўтилган.

Эътибор беринг, Қонуннинг 20-моддасига кўра, марҳумнинг бирон турдаги пенсия олаётган оила аъзолари, агар марҳумнинг ёрдами улар учун доимий ва асосий кун кечириш маблағининг манбаи ҳисобланган бўлса — боқувчисини йўқотганлик пенсиясига ўтиш ҳуқуқига эгадирлар дейилган. 21-моддада эса марҳум пенсионернинг оиласига пенсия боқувчининг иш стажидан қатъи назар тайинланиши, 47-модда «в» бандида эса боқувчисини йўқотганлик пенсияси — пенсия олиш ҳуқуқи пайдо бўлган кундан бошлаб, лекин пенсия тайинланиши учун мурожаат этишдан олдинги 6 ойдан ошмаган муддатдан эътиборан тайинланади, пенсия марҳумнинг оила аъзоси меҳнатга қобилиятсиз деб ҳисобланган бутун давр учун, оиланинг: эркаклар — 60 ёшга, аёллар — 55 ёшга тўлган аъзолари учун эса — умрбод тайинланиши белгилаб қўйилган.

Демак, юқоридагилардан хулоса қилиш мумкинки, агар сиз марҳумнинг тўлиқ боқувида бўлган ёки ундан ёрдам олиб турган бўлсангиз, бу ёрдам сиз учун доимий ва асосий кун кечириш маблағининг манбаи ҳисобланган бўлса, марҳум турмуш ўртоғингизнинг қарамоғида турган деб ҳисобланасиз ҳамда ёшга доир пенсиянгизни боқувчисини йўқотганлик пенсияси турига ўтказиш учун яшаб турган жойингиз бўйича Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг туман (шаҳар) бўлимига тегишли ариза ва барча зарур ҳужжатлар билан мурожаат этишингиз керак.

Бордию, пенсиянинг бир туридан бошқа турига ўтказиш юзасидан тақдим этган аризангиз рад этилган тақдирда Пенсия жамғармаси бўлими тегишли қарор чиқарилгандан кейин беш кундан кечикмай рад этиш сабаблари, қабул қилинган қарор юзасидан шикоят қилиш тартиби кўрсатилган ҳолда рад этиш тўғрисида сизга хабарнома бериши шарт ва бир вақтнинг ўзида пенсиянинг бир туридан пенсиянинг бошқа турига ўтказиш учун тақдим этилган барча ҳужжатларингизнинг асл нусхаларини ҳужжатлар олинганлиги тўғрисидаги тилхат билан қўлингизга қайтариши керак.

Агар Пенсия жамғармаси бўлими томонидан сизнинг амалдаги пенсиянгиз тури пенсиянинг бошқа турига ўтказиш юзасидан аризангиз қаноатлантирилса, бу тўғрисида қарор қабул қилингандан кейин боқувчисини йўқотганлик пенсиясини тўлаш барча зарур ҳужжатлар билан бирга тегишли ариза билан мурожаат қилган ойингиздан кейинги ойнинг биринчи кунидан бошланади ва сизга янги пенсия гувоҳномаси ёзиб берилади.

Экспертимиз Раъно Исамитдинова

@yuristkadr Ochish/sharhlash

2021-12-12 19:43:04 Ўтган хафталарда суд тизимидаги ходимлар ҳам аттестация синовларидан ўтказилди. Судьялардан ташқари ходимлар албатта.

Аттестациядан ўта олмади деб топилган суд ходимларини келаси хафтадан ишдан бўшатиш жараёни бошланиши кутилмоқда. Шунақа гаплар.

Ҳа айтмоқчи, мабодо, ҳомиладор ёки 3 ёшга тўлмаган боласи бор аёл ходимларни ҳам аттестациядан ўтказиб қўймадингларми? Шунга ўхшаш масалада орада бир аноним ҳабар келганди. МК 237-моддага асосан, уларни бунақа важлар билан бўшатиб бўлмайдида.

Суд тизимидаги мутасаддилар, орада шу каби масалаларга ҳам бир қараб қўярсизлар. Эҳтиёткорлик яхшида барибир.

@yuristkadr Ochish/sharhlash

2021-12-12 19:20:52 Олий суддан мажбурий обуна масаласида шунақа топшириқ бўлганми?

Судьялар ўзидан-ўзи тарафларга “келинг, ака шу газетага обуна қилиб беринг” демаса керак.

Баҳодир Ахмедов судларда бўлаётган мажбурий обуна ҳақида ҳабар бермоқда. Ochish/sharhlash

2021-12-12 14:05:00 ОТМ.ЛАРНИНГ КАДРЛАР БЎЛИМЛАРИ ТАЛАБАЛАР БИЛАН ҲАМ ШУҒУЛЛУНИШИ КЕРАКМИ?

САВОЛ.
Ассалому алайкум. Мен ОТМнинг ходимлар бўлимида ишлайман. Саволим шуки, далват ОТМларида талабалар таркибига оид буйруқлар (талабалар сафига қабул қилиш, талабалар сафидан четлаштириш ва ҳоказолар) ким томонидан тайёрланиб рўйхатга олиниши керак? Чунки бу ҳозир “Ходимлар бўлими”нинг ходимларига юклатилган. Вахоланг-ки “Ходимлар бўлими” ходимларга оид ҳужжатлар билан шуғулланмайди-ми?

ЖАВОБ.

Ҳабарингиз бўлса керак, ҳозирча давлат ташкилотлари кадрлар хизматига қўйилган талаблар масаласида алоҳида норматив-ҳуқуқий ҳужжат қабул қилинмаган.

Аслида, Президентимизнинг 2019 йил 3 октябрдаги ПФ-5843-сонли фармони билан тасдиқланган “Ўзбекистон Республикасида кадрлар сиёсатини ва давлат фуқаролик хизмати тизимини тубдан такомиллаштиришга оид биринчи навбатдаги чора-тадбирлар дастури”нинг 5-қаторида, асосан, Давлат хизматини ривожлантириш агентлигига:

Давлат органлари ва ташкилотлари кадрлар билан ишлаш бўлинмаларининг номланиши, уларнинг тузилмаси, штатлари сони, вазифалари, функциялари, ҳуқуқлари ва мажбуриятларини аниқлашга қўйиладиган унификациялаштирилган талабларни белгилашни назарда тутувчи Вазирлар Маҳкамаси қарорини 2019 йил 1 декабргача ишлаб чиқиш юклатилган эди.

Бу масала эса қолиб кетди ва мана кўриб турибмизки, сиз каби давлат олий таълим муассасасининг кадрлар хизмати ходимлари аслида ўзларига тегишли бўлмаган бошқа вазифалар билан шуғулланиб юрибди.

Аслида, ОТМлардаги талабалар ходимлар ҳисобланмайди, улар билан ҳеч қандай меҳнат шартномаси тузилмаган, шу сабабли ҳам ОТМлардаги кадрлар бўлинмаларига талабалар таркибига оид (талабалар сафига қабул қилиш, талабалар сафидан четлаштириш ва ҳоказолар) ҳужжатлар билан шуғулланишни юклатиш мутлақо нотўғри деб ҳисоблаймиз.

Бу каби ҳолатлар кадрлар хизмати зиммасидаги асосий вазифа ва функциялар билан шуғулланишга ҳамда ОТМлардаги ходимлар таркибига оид масалалар билан шуғуллунишга тўлиқ имкон бермайди.

Шу сабабли ҳам, ОТМларда меҳнат муносабатлари соҳасидаги муаммолар камайиш ўрнига тобора кўпайиб бормоқда.

Мен билган айрим ОТМларда (масалан, ТДЮУда)ги кадрлар бўлими талабаларга доир хат-ҳужжатлар ва буйруқлар билан шуғулланмайди, улар ўзларининг ишлари билан – муассасадаги меҳнатга оид муносабатлар билан ва ходимларнинг шахсий таркиби билан шуғулланади.

Менимча, Олий таълим вазирлиги ҳозирги муаммони бартараф этиш чорасини кўриши керак, сабаби, бошқа ОТМларнинг кадрлар хизматида ҳам шу каби ҳолатлар учраб турибди.

@yuristkadr Ochish/sharhlash

2021-12-12 11:11:06
Ётоқхонада яшаётган бу оилалар, қария отахон ва онахонлар, ёш болалари ва чақалоқлари бор оилалар иссиқлик таъминотидан батамом узиб қўйилган. Ҳозир улар, совуқдан иззилаб ўтиришибди. Постимизда шу ҳақида айтган эдик.

Бироқ, мутасаддилар бу аҳолининг дардига барибир эътибор қаратишмабди, битта Мирзо Улуғбек тумани ҳокимлиги баёнот берди. Лекин улар ҳам “айб бизда эмас, Менделеев номидаги кимё-технология институти раҳбариятида, улар узиб қўйган” қабилида баёнот бериш билан чекланган холос. Олий таълим вазирлигининг эса бу масала билан иши ҳам бўлмади шекилли.

Кеча кечқурун, шу ерда яшайдиган одамлардан бири хафа бўлиб телефон қилиб қолди. Энди, электр таъминоти узилибди. Кеч бўлса ҳам бордик. Ғалати томони, бу бинода ва ётоқхонанинг ҳамма қисмида свет бор. Бироқ айнан 14 та хонадоннинг ўзида, хоналарида йўқ. Қаранг, эшикни очсангиз коридорда ток бор, лекин хонадонларда йўқ. Иложсиз, коридордаги розеткаларга уланиб олишибди. Аслида иссиқлик тизими ҳам шунақа, 1 ва 3 қаватда ва хатто зиналар жойлашган қисмида ҳам бор, лекин айнан аҳоли яшайдиган хоналарда (бор-йўғи 3-4 метр бу ёқда) йўқ.

Энди, собиқ коллеж биносини фойдаланишга қабул қилиб олган институт ва Олий таълим ва ўрта-махсус таълим вазирлигининг Қурилиш дирекцияси раҳбарияти бу аҳолига электр таъминотига уланишга руҳсат беришмаяпти экан. Ана энди, совуқда қолган ёш болали ва чақалоқли оилалар, кекса отахон ва онахонлар зулматда қолишибди, хатто овқат қилиша олмаяпти.

Бу одамлар мурожаат қилмаган жойи қолмаган, хатто прокуратурага ҳам. Бу ерда яшовчилар айтишига қараганда, туман прокуратурси ҳам, вазирликнинг таъмирлаш ишларини олиб борган Қурилиш дирекцияси раҳбарига муаммони тўғрилаш кераклигини айтган, лекин бу ҳам ҳеч қандай натижа бермабди.

Ҳуллас, аҳолини кўчага хайдашнинг янгича усулини ўйлаб топишган, шу йўл билан уларни бу ердан хайдашни режа қилишган шекилли. У ёқда бизнинг, ҳокимиятдагиларнинг, прокуратурадагилар, институтдагилар, вазир ва вазир ўринбосарларининг болаларимиз ёруғда ва иссиқда ўтиришибди, бу ёқда эса...

Шу воқеалар Тошкентда бўлаётганига ишонгим келмаяпти.

@yuristkadr Ochish/sharhlash