❤ Шерҳои тожики ❤

2021-03-23 09:05:34 Далер Назаров
Суруди неки
Стихи - Лоик Шерали
Гала-концерт "Шогун-Бахор 2016"
Лужники, Москва

Daler Nazarov
Surudi Neki
Lurics - Loiq Sherali
Concert "Shogun-Bakhor 2016" Luzhniki Moscow

#наворҳо Ochish/sharhlash

2021-03-23 09:05:33 * * *
Ало, кайҳони дури ман, ало эй хоксори ман,
Ки ҳоло сабз медорӣ баҳори рӯзгори ман.

Шабат хуш бод боре дар канори ёри иҷборӣ,
Агарчи нестӣ дар шоми ғамҳо ҳамканори ман.

Туро ҳар бор агар бинам, ҷавонӣ боз меояд,
Ту – ишқи шуълабори ман, умеди пойдори ман.

Агар чашмат набинам, чашмаи илҳом мехушкад,
Ту – ҷони беқарори ман, ту – шеъри обдори ман.

Агар рӯят набинам, рӯи тақдирам сияҳ гардад,
Ту – ҳусни рӯзгори ман, ту ҳузни хушгувори ман.

Зи абрӯи баланди ту, зи мижгони дарози ту,
Ҳама авҷу барори ман, ҳама шӯру шарори ман.

Зи ҳар ҳарфи суруди ман фурӯзон мешавад номат,
Ту – ёду ёдгори ман, ту – зарлавҳи мазори ман.

Хушо аз кӯрии чашми касон, моро баҳоре ҳаст,
Хазонатро набинам, эй гули доимбаҳори ман!

[1986]
#ғазалҳо Ochish/sharhlash

2021-03-22 06:21:08 * * *
Аз дур ошёни туро ёд мекунам,
Дар ҳар куҷо нишони туро ёд мекунам.

Аз кӯчаҳои шаҳр хаёлӣ чу бигзарам,
Айвони гулфишони туро ёд мекунам.

Аз ҳафт ранги тобиши рангинкамони дур
Садрангии ҷаҳони туро ёд мекунам.

Оғӯшам аз ҷавонию зебоӣ пур шавад,
То чеҳраи ҷавони туро ёд мекунам.

Дар об дида ҷилваи чашми ситорагон,
Чашмони меҳрубони туро ёд мекунам.

Ҳар гаҳ забони хомаам гирад зи изтироб
Лабҳои байтхони туро ёд мекунам.

То бӯи дард бишнавӣ аз шеърҳои ман,
Он дардҳои ҷони туро ёд мекунам.

Азбас дар остонаат мондаст лахти дил,
Якумр остони туро ёд мекунам...

[1979]
#ғазалҳо Ochish/sharhlash

2021-03-22 06:21:08 * * *
Ёре, ки аҳди ошиқӣ бо ман бубаст, рафт,
Гуфто бас аст оҳу ғам, дигар бас аст, рафт.

Болои ин ҳама ғаму дарду шикастҳо
Аз нав дили шикастаи моро шикаст, рафт.

Гуфтам, ки як дили варо ёбам, хуш орзуст,
Як дил ба даст н-омаду сад дил зи даст рафт.

Чун баста буд риштаи ҷонам ба тори мӯш,
Як худ нарафт, риштаи ҷонам гусаст, рафт.

Ишқе, ки дар фарози наҷобат мақом дошт,
Чун санги бодхурдае аз қулла паст рафт.

Ҷурми ман аст, эй худо ё ҷурми содагӣ,
Мурғе, ки дӯш дар кафи ман менишаст, рафт...

[1986]
#ғазалҳо Ochish/sharhlash

2021-03-22 06:21:07 * * *
Ҷамъияти куфр аз парешонии мост,
Тарақии насоро аз ақибмонии мост.
Ислом ба зоти худ надорад айбе,
Ҳар айб,ки ҳаст дар мусулмонии мост. Ochish/sharhlash

2021-03-22 03:43:54 ТАНҲОӢ

Танҳоӣ на он аст, ки танҳою ғарибӣ,
Танҳоӣ на он аст, ки бе ёри қаринӣ.
Танҳоӣ чунон аст, ки дар байни ҳама халқ
Бошӣ, вале бе дарди ҳама халқ нишинӣ.

Танҳоӣ на он аст, ки ёрону ҳарифон
Як бор напурсанду даратро накушоянд.
Танҳоӣ чунон аст, ки дар ҳозиру ғоиб
Қадри ту надонанду ғаматро назудоянд.

[1975]
Лоиқ Шералӣ Ochish/sharhlash

2021-03-22 03:43:45 Бори дигар.
Бори дигар баҳор меояд,
Аз тароват шукуфад ошӯбам.
Қабзаи зулфро кунам ҷорӯб,
Хонаро баҳри ёр мерӯбам.
Бори дигар баҳор меояд,
Ҳамраҳи ёри рафта бо армон.
Боз месозамаш варо банда,
Мекунам осияш дусад чандон.
Гесувонро ба атри боронӣ,
Медиҳам ихтиёри бӯсидан
Гунаҳоям ба ламси хуршеду,
Ғунчаҳоям барои рӯидан.
Ин баҳор аз таровати қалбам,
Лолаҳои сафед мерӯянд.
Ошиқони мананд,ки бо армон,
Қиссаҳоям ба моҳ мегӯянд...
Саидаи Синавӣ Ochish/sharhlash

2021-03-21 09:49:42 Баҳор омад, зи умрам боз як соли дигар бигзашт,
Тамоми зиндагӣ, оҳиста аз пеши назар бигзашт.
Ба мисли гӯшту нохун, ҳамеша бо ватан будам,
Агар чӣ нисфи умри беҳтаринам дар сафар бигзашт!

М. Турсунзода. Ochish/sharhlash

2021-03-21 09:49:36 Наварӯси субҳи фирӯз омадаст,
Сабза бо домони гулдӯз омадаст.

Куртаи атлас ба тан Модар Замин,
Интизори шамси дилсӯз омадаст.

Бо дили пурхаҷр бесабру шитоб,
Булбули хушхон ҷигарсӯз омадаст.

Фарши зебо маҳфилорои дил аст,
Гулбари ромишгар имрӯз омадаст.

Бо сари таъзим ба сад нозу ниёз, Лӯъбатосо пайки Наврӯз омадаст.

Омадӣ, хуш омадӣ, айёми ишқ, Ишқро фархунда ин рӯз омадаст!

ОЗАРМЕҲР Ochish/sharhlash

2021-03-21 09:49:28 Эй ғунчаи хандида, Наврӯз муборак бод!
Эй чашмаи ҷӯшида, Наврӯз муборак бод!

Эй камдили тарсида, аз ишқ фурӯ бигзор,
Эй ошиқи шӯрида, Наврӯз муборак бод!

Эй шохаи хушкида, имсол ту нашкуфтӣ,
Эй пунбаи болида, Наврӯз муборак бод!

Эй ёри аламдида, имсол куҷо рафтӣ?
Эй ёри писандида, Наврӯз муборак бод!

Эй ҳусни барозида, Наврӯз муборак бод!
Эй ҷону дилу дида, Наврӯз муборак бод!

Лоиқ Шералӣ Ochish/sharhlash