2023-04-26 14:39:28
#Muhammad_Yusuf
IQROR
O, ota makonim,
Onajon oʼlkam,
Oʼzbekiston, jonim toʼshay soyangga.
Senday mehribon yoʼq,
Seningdek koʼrkam,
Rimni alishmasman bedapoyangga.
Bir goʼsha suv boʼlsa, bir goʼsha qirlar,
Qancha yurtni koʼrdim, qancha taqdirlar.
Qayga borsam suyab, boshni tik tut deb,
Togʼlaring izimdan ergashib yurar.
Koʼrdim suluvlarning eng faranglarin,
Yo xudbinman yo bir sodda kasman men:
Parijning eng goʼzal restoranlarin,
Bitta tandiringga alishmasman men.
Na gapga koʼnayin,
Na til bilayin,
Koʼzdan uyqu qochdi, dildan halovat.
Uch kunda sogʼinsam nima qilayin?..
Chala qolar boʼldi hamma sayohat.
Bildimki, baridan ulugʼim oʼzing,
Bildimki, yaqini shu tuproq menga.
Bahorda Baxmalda tugʼilgan qoʼzing
Аrab ohusidan azizroq menga.
Sen bilan oʼtgan har kun bayram-bazm,
Sensiz bir on qolsam vahmim keladi.
Seni bilganlarga qilaman taʼzim,
Seni bilmaslarga rahmim keladi.
Respublika bolalar kutubxonasi Matbuot xizmati
Telegram|You tube|Facebook|Instagram|Web site
1.1K views11:39