2022-06-10 19:01:23
Бахтиёр Шоҳназар, Торонто, Канада: Ўрис телевидениесига чиқиб, Ўрусия империяси ва Ўрусия байроқлари фонида ҳарбий кийим кийиб, босқинчи миллатни мадҳ этиб, шеър ўқийдиган, уларни томоша қилиб, завқ олиб, ғурурланадиган аҳмоқлар фақат биздан чиқади, шекилли.
Ўрис ТВсида ўрисларни кўкка кўтариб, бошқа миллатларга паст назар билан қарайдиган мазмундаги шеърлар ўқиган ўрис, озарий, ўзбек, қирғиз, мўғул ва тожикларни кўрганимдан кейин бу фикрим тўғрилигига яна бир марта ишондим. Улар орасида қозоқлар йўқлиги мени севинтирди, умид учқуни қозоқлар!
Тилмоч бўлганим учун, шеърларни эринмай ўзбекчага ўгирдим. Илк шеърни ўрис Александр Добринин ўқиди:
Нега шовқин соляпсиз, эй, халқдан чиқиб, ириллаганлар,
Нега Ўрусияга муртадликда таҳдид қиляпсиз?
Сизни нима ҳаяжонга солди? Литвадаги халқ чиқишими?
Аралашманг: бу тортишув славянлар орасидаги тортишувдир,
Рўзғорда бўладиган, пешонага ёзилган эски тортишув,
Бу масалани сиз ҳал қилмайсиз.
Наби Набийев, Озарбайжон:
Бу қабилалар анчадан бери
Бир-бирига душмандир,
Урушлар гоҳ у томоннинг, гоҳ бу томоннинг
Фойдасига ҳал бўлган.
Сардобек Турсунов, Ўзбекистон:
Тенгсиз урушга ким чидай олади,
Манман полякми ёки содиқ ўрис?
Ўрис денгизига ўрис сойлари қуйиладими?
Ёки, қурийдими?
Екатерина Чершакова, Ўрусия:
Бизни тинч қўйинг: Қон босган
Муқаддас китобларни ўқимаганмисиз?
Бу оиладаги ўзаро душманликни
Сиз тушунолмайсиз.
Сиз учун Кремлнинг ҳам, Праганинг ҳам саси йўқ,
Урушдаги жон сақлаш учун кўрсатилган жасурлик,
Сизни ўзига жалб қилади -
Ва, сиз биздан нафратланасиз.
Эмин Гулийев, Озарбайжон:
Нима учун? Энди жавоб беринг:
Ёнғиндан хароб бўлган Москвада
Бизга бўйинтуруқ осмоқчи бўлган,
Сизни эса остида титратиб эзганларнинг
Амрини бир пул қилганимиз учунми?
Виктор Куксов, Ўрусия:
Дунёни бўйсундирмоқчи бўлган одамни
Тубанликка қулатиб, ўз қонимиз эвазига
Оврўпага эркинлик, ғурур ва
Тинчлик ўрнатиб берганимиз учунми?
Мирқодир Миркомилов, Ўзбекистон:
Гап деса қоп-қопсиз -
Ўзингизни ишда кўрсатинг!
Ёки, ётоқда ётган марҳум баҳодир,
Измаилдаги найзасини санчишга кучи қолмаган.
Насибжан Мамажанов, Қирғизистон:
Ёки, ўрис чорнинг гапи ўтмай қолдими?
Ёки, Оврўпа билан урушиш биз учун янгиликми?
Ёки, ўрислар ютқазишга ўрганиб қолдими?
Муҳаммадқодир Набиев, Ўзбекистон:
Ёки, биз озчилик бўпқолдикми?
Ёки, Пермдан Тавридагача,
Амарбаясгалан Баярцайхан, Мўғулистон:
Финларнинг совуқ қояларидан,
Оташин Колхидагача,
Исрофил Ҳалимов, Тожикистон:
Чокка тушган Кремлдан,
Тепса-тебранмас Хитой деворигача,
Темир қалқонини ярақлатиб,
Ўрис ери қўзғалмайдими?
Иван Самойлов, Ўрусия:
Хўш, ириллаганлар, ўғлонларингизни
Биз тарафга юборинг,
Ёт бўлмаган қабрлар орасидаги,
Ўрусия далаларида уларга ҳам ер топилади.
Бугун Нуруллоҳ Рауфхон домла "мустақилликни бошқатдан қозониш керак шекилли" деб ёзганида минг марта ҳақ эди!
Мен Украинада босқинчилик уруши олиб бораётган давлатни кўкка кўтарадиган шеърлар билан ўрис идеологиясини бошқа халқларга тиқиштираётган манқуртлардан нафратландим. Бошқа гап ёзишга тоқатим қолмади, сиз ёзинг!
9.0K views16:01