2021-10-23 19:15:14
Bundan ikki yilcha avval qilingan postni qayta qo’yyappan. Sababi bugun lazer operatsiyasi haqida ko’p savollar bo’ldi.
Savol: Miopiya kasalligida qoʻllaniladigan LASIK operatsiyasi nima? Qachon qilish mumkin emas? Asoratlari nima?
Javob: LASIK iborasi "laser-assisted in situ keratomileusis" soʻzlaridan olingan qisqartma soʻz. Tarjimasi "Lazer yordamida shox pardaning oʻz joyida turgan holda shaklini oʻzgartirish" degani.
Miopiya kasalligida LASIK operatsiyasidan maqsad koʻz oynak yoki kontakt linzaga boʻlgan ehtiyojni yoʻqotish. Bu maqsadga shox parda (роговица) ning qavariqlik shaklini yassi holatga keltirish va uning nur sindirish kuchini kamaytirish orqali erishiladi.
LASIK operatsiyasi shox pardaning tashqi qismidan maʻlum qalinlikdagi qismi huddi meva poʻstlogʻini archilgandek, maxsus asbob yordamida "archib" olinadi va ochiq qolgan qismi lazer nurlari yordamida kuydirilib, qalinligi kamaytiriladi ya`ni yupqa holatga keltiriladi. Shox pardaning kerakli qalinlikdagi qismi kuydirilgandan soʻng, uning poʻstloq shaklida "archib" olingan qismi yana qayta oʻz joyiga qaytarib "yopib" qoʻyiladi.
Shox parda inson organizmidagi eng tez qayta tiklanuvchi toʻqimalarga ega boʻlgani uchun tez bitish xususiyatiga ega va bu operatsiyada chok qoʻyishga ehtiyoj yoʻq. Ogʻriqsizlantirish tomchi dori yordamida boʻlib operatsiya davomiyligi odatda 3-5 daqiqadan iborat. Operatsiyalar katta qismi muammosiz o’tadi va yaxshi natijalarga erishiladi. Shu bilan birga, har qanday operatsiyada boʻlgani kabi LASIK operatsiyasi ham asoratlardan holi emas.
LASIK operatsiyasiga qarshi koʻrsatmalar quyidagilar (toʻliq boʻlmasligi mumkin): shox parda distrofiyalari (e.g. Fuchs), glaukoma, koʻzdagi boshqa kasalliklar (diabetik retinopatiya, toʻr parda koʻchishi yoki yirtilishi), homiladorlik, laktatsiya, bemorlar yoshi (<18, ba’zi jarrohlari 20 yosh deyishadi), shox parda yupqa boʻlishi, oʻta yuqori darajadagi astigmatizm, nostabil refraksiya, quruq koʻz sindromi.
Nisbiy qarshi koʻrsatmalar: sistemik autoimmun kasallik, bemor umumiy salomatligining yomonligi.
Bemor uchun ahamiyatli boʻlgan quyidagi operatsiyadan keyingi asoratlar kuzatilishi mumkin: quruq koʻz kasalligi, koʻzning yorugʻlikka oʻta sezuvchan boʻlishi, yorugʻlikda koʻrishni qiyinlashuvi, koʻz atrofida "yorugʻlik gardishi" (inglizchada halos) paydo boʻlishi, yetarlicha korreksiya qilinmaslik ya’ni kerakli minus olib tashlanmay qolishi, ortiqcha korreksiya ya’ni minusning koʻp olib tashlanishi, astigmatizm, shox parda ektaziyasi (bo’rtib chiqishi), shox parda yalligʻlanishi, infeksiya, loskut (inglizchada flap) muammolari, epiteliy notoʻgʻri oʻsishi, jismlar ikkita koʻrinishi kabilar. Juda kam hollarda intraoperativ asoratlar tufayli koʻrish qobiliyatini yoʻqolishigacha borishi mumkin.
@drbekolimjon
1.7K viewsBek Olimjon, edited 16:15
B
