REPORTER

2020-12-29 14:01:49 Ochish/sharhlash

2020-12-15 08:20:53 Fitch учта хусусий банкимизнинг рейтингини тасдиқлади

Халқаро Fitch Ratings агентлиги мамлакатимизнинг учта хусусий банки - АИКБ “Ипак Йўли” ва ХАБ “Трастбанк”нинг "В" даражасидаги, шунингдек "Универсал банк" АТБнинг "В-" даражадаги узоқ муддатли дефолт рейтингларини тасдиқлади.

Агентликнинг пресс-релизига кўра, прогнозлар "барқарор".
Ушбу банкларнинг узоқ муддатли эмитент дефолт рейтинглари уларнинг мустақил кредитлаш салоҳиятига асосланади ва бу уларнинг барқарорлик рейтингида акс этди. Fitchнинг фикрича, рейтинглар ва "барқарор" прогнози ушбу банкларнинг фойда кўриш даражаси активлар сифатининг ёмонлашуви ва капиталнинг мақбул заҳирасини яратиш ва қадрсизланишига ажратмалар ярата олиши билан пандемия босимини енгиб ўтишини тасдиқлайди.

Ҳисоботда айтилишича, “Универсал банк”нинг барқарорлик рейтинги бир поғона пастроқ даражага эга, бу рентабелликнинг пастлиги, корпоратив бошқарувнинг баъзи заиф томонлари (дахлдор томонларга кўпроқ кредит ажратилиши) ва кредитлаш стандартларини акс эттиради.
Ҳар учала банкда ҳам 2020 йилнинг ўтган тўққиз ойида кредитларнинг қадрсизланиш кўрсаткичлари деярли ўзгаришсиз қолди. Айни вақтда, иккинчи ёки учинчи чоракларда кредитларнинг 40-50 фоизига кредит таътиллари берилди (ҳукумат томонидан пандемия даврида қарз олувчиларни қўллаб-қувватлаш мақсадида тавсия этилган режим). Кредит таътиллари давомида банклар кредитлар бўйича фоизларни ҳисоблашни давом эттирдилар ва уларни кредитлар бўйича асосий қарз суммасига қўшиб қўйдилар, бу эса ҳисобланган, аммо пул шаклида олинмаган фоиз даромадларининг ошишига олиб келди. Кредит таътиллари 2020 йил 1 октябрда якунланди ва ҳар учала банк раҳбариятининг маълумотларига кўра, кредитларнинг катта қисми тўртинчи чоракда белгиланган муддатларда қайтарилди.

"Бизнинг тахминларимизга кўра, ушбу кредитларнинг бир қисми 2021 йилда реструктуризация қилишни талаб этади, бу эса долларлаштиришнинг юқори даражаси (айниқса, “Ипак Йўли”) ва сўнгги йилларда кредитлашнинг жадал ўсиши банкларнинг активлари сифатига босим ўтказмоқда", дейилади Fitch хабарида.

Учала банкнинг ҳам қисқа муддатли рейтинглари агентлик томонидан "В" даражасида тасдиқланган. “Универсал банк”нинг барқарорлик рейтинги (VR) "b-", "Ипак йўли" ва “Трастбанк”ники - "b" даражасида сақланиб қолди.

Канални дўстларингизга ҳам улашинг
@reporter_uzbekistan Ochish/sharhlash

2020-12-14 15:14:27 SOS! «Миллий тикланиш”чилар уйғонинг!

Журналистларимизнинг зийрок нигоҳи туфайли кейинги кунларда маданий ҳаётимиз, бойлигимизга устма-уст қилинган учта тажовуздан хабар топдик. Маданий мерос объектларига уюштирилган тажовузларга нисбатан жамоатчилик ўз эътирозларини баён этишмоқда. Маданият вазирлиги имкони қадар варварлар билан олишяпти.

Аммо ўзининг асосий мақсади:
– барқарор миллий ривожланишни таъминлаш, миллий манфаатларни ҳимоя қилиш ва илгари суриш, маънавий қадриятлар, урф-одатлар ва анъаналар, бой тарихий меросни сақлаш ва бойитиш, мамлакатимизда туризмни ривожлантиришга ҳисса қўшиш;
– Ўзбекистон Республикаси фуқароларида миллий ўзликни англаш ҳиссини ошириш, миллий ғурур, Ватанга садоқат ва муҳаббат туйғусини шакллантириш ҳамда мустаҳкамлаш учун қулай шароитлар яратиш;
– ўз сафида юртнинг ватанпарварларини бирлаштириш, уларнинг интеллектуал ва ижодий салоҳиятини Ўзбекистон манфаатлари ҳамда унинг халқаро обрў-эътиборини ошириш йўлида сафарбар этиш;
– ёшларни миллий мустақиллигимиз, миллий анъаналаримиз ва урф-одатларимизни асраб-авайлаш руҳида тарбиялаш, ўзлари қизиққан касб-ҳунарга йўналтиришга кўмаклашиш ҳамда ёшлар онги учун зарарли бўлган “оммавий маданият”нинг салбий таъсиридан ҳимоя қилишга ҳисса қўшиш, уларнинг Ватан равнақи йўлидаги амалий ҳаракатларини қўллаб-қувватлаш, - бўлган “Миллий тикланиш” партияси жим.

Хивада 1832–38 йилларда қурилган, ЮНЕСКО рўйхатига киритилган Тошҳовли саройининг девори ўзбошимчалик билан бузиб ташланди. Милоддан аввалги IV аср охири – милодий II асрларга оид Марказий Осиёдаги антик даврнинг энг қадимий намуналаридан бири саналган Сурхондарё вилоятидаги Кампиртепа (Окс Александрияси) археологик ёдгорлиги қўпорилди.

1947 йили иккинчи жаҳон урушида қозонилган ғалаба шарафига ўрнатилган ва Тошкент рамзига айланган 30 метрлик Тошкент курантига аллақандай “эстет” қизил боғич боғлади.

Бу ваҳшиёна ҳаракатлар Тошҳовли қад кўтарган ер тагида сув қочиши сабаб қадимий ҳовли девори оғгани ва эрта-индин қулаб тушиши, Кампиртепа деворлари эса ёмғирнинг кўп ёғиши, Курантга илинган қизил боғич эса байрамона безак сифатида оқланди.

Бу ҳақда нафақат халқимиз, балки тили, дини бошқа халқлар вакиллари фаол фуқаролик позияциясини баён этмоқда, аммо халқ руҳияти, маданиятининг нафис торларини қалқон қилиб , депутатликка сайланган партия вакиллари жим!

Халқимиз тарихининг ажралмас бўлакларига айланган, маданий мерос бойлиги сифатида рўйхатга олинган ва алоҳида қўриқланадиган иншоотлар теварагида рўй берган воқеалар ҳали вери “Миллий тикланиш”чиларни ғафлат уйқусидан уйғотолмаяпти.

Мени “Миллий тикланиш”чиларнинг нафақат сўнгги ҳодисалар юзасидан, балки бошқа тарихий обидаларга қилинган ҳужумларга нисбатан ҳеч қандай реакция билдирмаслиги таажжубга солади. Ахир партия ўзининг асл вазифаларидан келиб чиқиб бонг уриши ва жамоатчилик эътиборини муҳим ижтимоий-сиёсий муаммоларга қаратиши, бу муаммоларни партиявий ва қонунчилик воситалари орқали ҳал этиш йўлларини кўриши керак эди.

Лекин улар пинагини ҳам бузишмаяпти. Бу партия учун шармандали ва кечирилмас ҳол! Мана шу жимлиги учун сайловчилари олдида узр сўраши лозим!

Ахир партия лидери, кимсан, парламент спикерининг ўринбосари. Партия маданий мерос объектларига бўлаётган тажовузкорона хатти-ҳаракатларни тийиб қўйиш мақсадида “Маданий мерос объектларини муҳофаза қилиш ва улардан фойдаланиш тўғрисида”ги қонун ижросини фракция ва қўмиталар, Олий Мажлис мажлис йиғилишлари кун тартибига киритиши, мутасаддилардан ҳисобот талаб қилиши ва тегишли чораларни кўриши мумкин-ку.

Партия лидери иқтисодиёт ҳақида ажабтовур фикрлар билдириши ўрнига одамларнинг, мутасаддиларнинг, жойлардаги раҳбарларнинг маданий мерос объектларига нисбатан ёндашувларини фаол шакллантириш, доимий эътиборини тортиб туриш учун оммавий-маърифий, илмий анжуманлар ташкил этишга бағишласа яхши бўлармиди?!.

Канални дўстларингизга ҳам улашинг @reporter_uzbekistan Ochish/sharhlash

2020-12-11 15:37:28 Қодировнинг янги пластинкаси

Қодировнинг фикрлашидан ажабланмаслик керак. “Миллий тикланиш” демократик партияси раиси Алишер Қодировнинг: "Минтақада автосаноатни шакллантириш учун озмунча меҳнат қилинмади. Бизнес талаблари ўз вақтида бу лойиҳани фойда келтирмайди, деб ҳисоблаган. Тўлов қобилияти паст бўлган давлатларда автосаноат яшаб кетолмайди. Буни тушунган тушунади. Ўзбекистонда автосаноатни йўқ қилиб, хориждан автомобиль олиб келишни йўлга қўйишни "халқпарвар" таклиф сифатида илгари сурганлар нафақат сиёсатни, балки иқтисодни ҳам тушунмаса керак", деган фикрларидан ажабланмаслик керак.

Чунки бундай гапни иқтисодчиям, сиёсатчиям гапирмайди. Бундай гапни дорилфунун остонасини ҳатламаган одамгина гапириши мумкин.

Монополияга қарши курашиш қўмитаси раисининг биринчи ўринбосари Бобур Каримовнинг UzAuto Motors монополиясига қарши курашишнинг ягона йўли — кириб келаётган автомобиллар учун божхона тўловини пасайтириш деган фикрига муносабат билдирган Парламент спикерининг ўринбосари Алишер Қодиров бундай фикрдагиларни популизмда (аслида бу қиёс иқтисодиёт тармоқларини мувозий ривожлантиришга масъул бўлган Бош вазир Абдулла Ариповга тегишли), машҳур бўлишга интилишда айблайди.

“Олиб борилаётган ислоҳотларнинг мазмуни”ни антимонополчилар ва уларнинг тарафдорлари бошқачароқ тушунади. Эркин бозор иқтисодиёти монополлаштирилган иқтисодиётга антиподдир. Миллий иқтисодиётимиздаги айни аҳвол ана шунинг касридан. Ижтимоий-сиёсий, молиявий-иқтисодий монополизм давлат тараққиётига тушов бўлди.

Натижада жаҳон ҳамжамиятига интеграциялаша олмадик. Ўз ҳудудимизда биқиниб ётдик.

Табиийки, буларнинг нуқси кўпларнинг фикрлаш тарзига ҳам таъсир кўрсатди. Акс ҳолда “Бизнес талаблари ўз вақтида бу лойиҳани (автозавод қуришни - Reporter) фойда келтирмайди, деб ҳисоблаган.

Тўлов қобилияти паст бўлган давлатларда автосаноат яшаб кетолмайди(?!). Автосаноат давлатларни ҳам иқтисодий, ҳам сиёсий, ҳам интеллектуал кучли қиладиган тармоқ», деган асоссиз, тутуриқсиз, бир-бирига зид гаплар баён этилмасди.

Чорак асрки, иқтисодиётнинг битта тармоғини эплай олмадик. Айни пайтда ишлаб чиқарилаётган машиналарнинг эллик фоиз бутловчи қисмлари ўзимизда ишлаб чиқарилмайди. Чунки монополизм, унга ёнма-ён юрадиган коррупция соҳани ривожлантиришга йўл бермади. Соҳа тўртта одамнинг истак-хоҳиши билан тебратилди, асло халқнинг фикри-зикри билан эмас.

Антимонополчиларнинг хатти-ҳаракати халқ томонидан муносиб баҳоланмоқда. Айнан уларнинг саъй-ҳаракатлари билан машиналарнинг нархи оширилиши олди олинди. Айнан уларнинг далил-исботлари билан автомобилар импортига ўрнатилган бож тарифлари пасайтирилди. Бу каби ўзгаришларни Қодиров сезмаётган бўлиши мумкин, лекин у кишининг сайловчилари ўз ҳаётларида сезиб турганига ишончим комил.

Шундан мен каби инсонлар парламент фракцияси раҳбарининг, демпартия лидерининг «Одамларга яхшилик қилаётгандек кўринаётган бу ғоялар остида Ўзбекистонда ёмонлик ётибди”, деган фикрларига мутлақо қўшилмайди. Менимча ватандошларимиз уларнинг ўз функционал вазифаларини ҳалол бажараётганини фақат олқишлаши мумкин.

Либерал иқтисодчилар “Ўзбекистонда автосаноатни йўқ қилиб, хориждан автомобиль олиб келишни йўлга қўйиш” таклифини халққа ёқиш учун илгари суришмаяпти, балки бу фикри билан соҳани рақобат асосида ривожлантириш мумкинлигини таъкидлашаяпти. Қуйи палата раиси ўринбосарининг соф иқтисодий фикрга сиёсий тус бериши одамни ҳушёрликка чорлайди.

Ҳарқалай эҳтиёт бўлайлик.
Қодировдан бундай халқпарвар фикрларни ҳали кўп бор эшитамиз ва бора-бора ажабланмай ҳам қоламиз. Эсингиздами, бундан бирмунча олдин ҳурматли депутатнинг Россиядан қайтаётиб, чегарада қолиб кетган ватандош гастербайтерларни Ўзбекистонга киритмаслик ташаббусини кўтариб чиққан эди.

Канални дўстларингизга ҳам улашинг @reporter_uzbekistan Ochish/sharhlash

2020-12-07 10:37:02 S&Р Ўзбекистон кредит рейтингига салбий прогноз бермоқда

Халқаро "Standard & Poor's Global Ratings" рейтинг агентлиги "ВВ- / В" миллий ва хорижий валютадаги мажбуриятлар бўйича Ўзбекистон Республикасининг узоқ муддатли ва қисқа муддатли суверен кредит рейтингларини тасдиқлади. Aгентлик пресс-релизида айтилишича, рейтингнинг прогнози "салбий" бўлиб қолмоқда.

Ўзбекистон ҳукуматининг ташқи қарзлари тез суръатлар билан ўсиб бориши эҳтимоли ана шундай салбий баҳоланишга асос яратмоқда.

Бу рейтинг баҳоси кутилган эди. Эсингизда бўлса, «S&P Global Ratings» шу йилнинг июнь ойи аввалида ташқи қарз ўсиб боришини эътиборга олиб, мамлакатнинг суверен кредит рейтингини пасайтирган эди.

Шундан бери ташқи қарз жалб қилиш суръати ошса ошдики, асло пасайгани йўқ.

Ички ресурсларни жалб этиш имкони бўлмаганда (инструментлар йўқ), пулларнинг четга чиқиб кетиши олди олинмаганда, маблағлардан оқилона фойдаланиш самараси кам бўлганда, бюджет импотент ҳолга тушиб қолган ҳолларда ташқи қарзни жалб қилиш имконияти анча осондир.

Чунки олтинимиз бор, мамлакатнинг бутун бойлиги, келажаги ақлга эмас, мана шу металлга боғланиб қолган.
Лекин ташқи қарзни ўсиб бориш суръати бир кунмас бир кун тўхташи аниқ. Инвесторлар ҳам бошини йўқотиб қўйган одаммас.

Ҳукумат жалб қилинаётган ташқи қарзлардан хавотирга тушаётган халққа гоҳ-гоҳида ташқи қарзларни оптимиллаштириш бўйича ишлар олиб борилаётгани, иқтисодий ўсиш кўрсаткичларига мослиги таъминланаётгани хусусида сигналлар бериб боради. Масалан, келгуси йил бюджети муҳокамаларида четдан қарз жалб қилишни аниқ чегаралари белгилангани айтилди. Масалан, «2021 йилда Ўзбекистон Республикаси номидан ва унинг кафолати остида ички ва ташқи қарзларни жалб қилиш бўйича йиллик имзоланадиган янги битимларнинг чекланган соф ҳажми 5,5 миллиард АҚШ доллари (5 миллиард АҚШ доллари – ташқи, 0,5 миллиард АҚШ доллари – ички қарз), шундан давлат бюджети тақчиллигини молиялаштириш учун - 2,2 миллиард АҚШ доллари (шу жумладан, ички қарз – 5 триллион сўм), инвестиция лойиҳаларини молиялаштириш учун – 3,3 миллиард АҚШ доллари миқдорида белгилаш режалаштирилмоқда», - дейилади вазирлик тарқатган шарҳда.

Агар сўнгги йиллардаги ҳукумат жалб этаётган ташқи қарзнинг жадал ўсиши агентлик кутаётган даражада секинлашмаса, S&Р келгуси 12 ой ичида Ўзбекистон рейтингини яна пасайтириши мумкин. Агентлик, ҳозирги инвестиция эҳтиёжлари кутилганидан каттароқ бюджет тақчиллигига ёки ташқи танқисликка олиб келиши мумкин, деб ҳисобламоқда.

"Биз, агар иқтисоднинг ўсиши ва жорий операциялар ҳисобрақамига (СТО) тушумлар ошиши баробарида ташқи ёки ҳукумат қарзларининг ўсиши ўрта муддатли истиқболда биз кутган натижаларга мос равишда пасайиб борса, қўшимча ташқи қарздорликлар босимини юмшатишга шароит яратса, биз яна бир бор рейтингни тасдиқлашимиз мумкин", - дейилади S&Р хабарида. Ochish/sharhlash

2020-12-04 07:23:43 Аҳадбек, сиз ноҳақсиз

Ҳурматли Аҳадбек Ҳайдаров, сиз парламентарий Расул Кушербаевнинг саволларига ўта қўполлик билан жавоб бердингиз. Сиз бу ерда ноҳақсиз.

Бирон жойга таклиф этилсангиз, албатта у ерда нималар ҳақида гап боришини, нималар ҳақида гаплашиш мумкин-у, мумкин эмаслигини фикрлаб, тайёргарлик кўриб борасиз. Сизни бирор машваратга ҳеч ким сахти сумбатингизни кўргани чақирмайди.

Лекин биз сизнинг бу машваратга тайёргарликсиз келганингизга гувоҳ бўлдик.

Молия вазирлиги сизни 2021 йилги бюджет сиёсати масалалари бўйича ЎзЛиДеПчиларга тушунтириш бериш учун сизни вакил қилиб жўнатган экан, сиз авваламбор уларнинг ҳамма саволларига вазирлик номидан жавоб беришингиз шарт. Албатта, халқ вакилларида саволлар ҳар хил ва кўп бўлади. Чунки улар эртага ўз сайловчилари билан учрашганда бюджет масалалари бўйича ҳар хил саволларга дуч келади ва уларга лозим топишса, ҳарфлаб тушунтиради. Чунки сайловчиларнинг фикрлаш тарзи ҳар хил, уларни тўлқинлантираётган масалалар ҳар хил.

Кушербаевга савол беришдан олдин аввал жамғарма нима эканини билиб олиш керак, дея жеркиб беришингиз ўта маданиятсизлик аломати. Кушербаев ҳали депутат, лекин сиз оддий одамга ҳам бу тарзда жавоб беришга ҳақли эмассиз.

Чунки сиз давлат бошқаруви органининг вакилисиз, буни ўзига хос этикетлари бор. Икки қулоғингизга қуйиб олинг: агар сизга муттаҳҳамларча савол берилса ҳам сиз ана шу этикет доирасида жавоб беришингиз шарт.

Ожиз бандамиз, кимгадир симпатия-антипатиямиз бўлиши мумкин. Лекин бу асло хизмат юмушлари доирасига кирмаслиги керак. Агар ҳар иккингиз тарози палласига қўйилса, бешак Кушербаев томони босиб кетади.

Чунки Кушербаев халқ вакили, унга ўн минглаб одам ишонч билдирган. Сизни эса бир вазиру бир раис акангиз бор. Сиз халқнинг ишончли вакилига қўполлик қилманг. У ўз сайловчиларининг фикрини сизга етказишга, сиздан жавоб олишга ҳақли, сиз эса жавоб беришга мажбурсиз!

Шундоғам халқ сизнинг менежерлик қобилиятингиз қандайлигини билади: беш йилда беш марта лавозим алмаштирдингиз!

Кушербаевга нисбатан ҳурматсизлигингизни ичингизда асранг, уни минбарларга чиқиб сочманг.

Халқ билиб айтиб қўйибди: ҳурмат қилсангиз ҳурмат кўрасиз.

Канални дўстларингизга ҳам улашинг @reporter_uzbekistan Ochish/sharhlash

2020-12-01 08:41:02 Мансабга муносиблик ҳақида айрим мулоҳазалар

Адашмасам, Карел Чапекнинг “Боғбоннинг йили” асари “Боғ яратишнинг бир неча усули бор, энг яхшиси бу ишни боғбонга топшириш”, деган сатрлар билан бошланарди.

Бу фикр ҳар ким қўлидан келган ишни қилиши керак ёки жайдари тилда айтганда чумчуқ сўйса ҳам қассоб сўйсин, деган маънони беради.

Лавозимни эгаллаш ҳам шундай: фикри, иймони тоза одам лавозимга ўтиришдан олдин шу лавозимга муносибманми, топширилаётган вазифани эплаб кетаманми, қандай қилсам иш юришиб кетиши мумкин, деб ўз-ўзига савол беради. Элу халқ ҳам бирор таниши бирор лавозимга ўтирса, дарров жойини топибди ё жойини топмабди, деб баҳо беради.

Раҳбар одамнинг лавозимга муносиблигини белгиловчи аниқ стандартлар ишлаб чиқилмаган ва ишлаб чиқилиши ҳам даргумон. Чунки бу киши интеллекти билан боғлиқ масала. Аммо уни аниқлашнинг муайян мезонлари бор.

Батафсил https://telegra.ph/REPORTER-12-01-2

Канални дўстларингизга ҳам улашинг @reporter_uzbekistan Ochish/sharhlash

2020-11-26 16:09:35 Кетиш осон эмас... Вазир Султонов ва унинг командаси ишдан кетишга тайёрми?

Эртага Ўзбекистон бўйлаб ҳаво ҳарорати меъёрдан паст - 10-12- градус совуқ бўлишидан хабар топиб, этим увишиб кетди. Меъёрдаги совуққа бардош беролмаган мамлакат электр тизими меъёрдан пастига қандоқ чидаркин? Электрикларимиз кутмаган бу совуқ уларнинг профессионал тайёргарлигини имтиҳондан ўтказаяптими, дейман.

Кеча Энергетика вазири кечаю-кундуз – 24 соатдан ишлаётганини писанда қилди. Ўринбосарлари вилоятма-вилоят юрганини айтди. Жуда жўн савол мияда чарх уради: уларнинг юргани билан нима ўзгаради? Бу юришлари бемавруд эмасмикин? Нима бўлганда ҳам электр йўқлигидан фойдаланиб...

Ахир электр мамлакат мудофааси асоси, иқтисодиёт таянчи, миллат фаровонлиги, ўттиз тўрт ярим миллион одамнинг асаби, умри гарови.

Вазир Султонов шу масъулиятни сездими, биз кетишга тайёрмиз, вазирлик курсисига ўтирган кунимиздан буён бундай қарор билан муроса қилганмиз, деди. Айни пессимистик руҳ ўзибўларчиликка олиб келмадимикин? Нега шу кунгача, халқнинг таънаю дашноми, ҳақоратини эшитадиган кунгачагача шартта ташлаб кетолмади?

Энергетика соҳасидаги коллапс оқибатларини сезиб, кетиш ҳақида бир оғиз давлатимиз раҳбарига оғиз солдимикин?

Халқ таълими вазири Шерматов президентнинг Қашқадарё вилояти халқ таълими бошқармаси бошлиғининг “қуруқ ва баландпарвоз гаплар гапириб, давлатимиз раҳбарининг ҳам кўнглини хира қилгани” учун ишдан олинганини баён этди. Президент шу айблар билан таълим бошқармаси бошлиғини ишдан олган экан, мамлакат тақдирини зимистонда қолдираётган вазирни аяб ўтирармикин?

Ўйлаб кўринг, қайси бирини гуноҳи оғирроқ?!

Ташлаб кетиш айтишга осон. Вазифадан воз кечиш, истеъфо бериш бошқа мамлакатларда нормал ҳол ҳисобланади. Одамлар буни табиий қабул қилади ва бундан ҳеч ким хафа ҳам, хурсанд ҳам бўлмайди. Лекин биз ўзбеклар вазифани қисмат, обрў, келажак, бойлик, деб биламиз. Мансабдан кетган кунимиз ҳеч киммасмиз.

Султонов жаноблари вазир либосида ишни бошлаган куни бунга тайёрлигини, мардлигини айтаркан, мен бу гапларнинг самимийлигини сезмаяпман. Айтиш бошқа, амал қилиш бутунлай бошқа нарса. Шунинг учун кетолмайди!

Бизнинг Ўзбекистонда раҳбарни мансабдан туширишнинг ўзи бир муаммо. Бир зумда қанчалаб телефонлар, контактлар, конвертлар ишга тушади. Жамият, миллат, ватан манфаатлари унутилиб кетади.
Шундай экан, “ҳамма кетса ким ишлайди?” – бу савол ҳеч кимни, айнан Султонов жаноблари ва унинг командасини ўйлантирмаслиги лозим. Неча йилдирки, вазир, вазир ўринбосари бўлиб, тўққиз қаватли уйларда яшаб юрган фидойи ёшлар бор.

Кетиш осон эмас. Вазир Султонов вазифасини тарк этолмайди. Илдиз бақувват.

Энергетика соҳасидаги муаммолар тугамайди, эскириб кетган симлар, симёғочлар, трансформаторлар куни келганда алмаштирилади. Одамлар эса кунини бир амаллаб ўтказаверади.

Начора, қирқига чидаган халқ қирқ бирига ҳам чидайди-да. Ахир бизни шунга муносиб кўришаяпти-ку!

Канални дўстларингизга ҳам улашинг @reporter_uzbekistan Ochish/sharhlash

2020-11-25 13:59:49 Ё зўринг бўлсин, ё заринг
Сиз кимнинг одамисиз?

Фаррух Ғолибшерович Зияевнинг "Ягона умумреспублика процессинг маркази" МЧЖ ("UzCard")га Бош директор этиб тайинланганини эшитиб, хаёлимдан ўтган биринчи фикр шу бўлди.

Фаррухбойни адалари Ғолибшер Зияев – Бош вазир Абдулла Ариповни яқин жўраларидан, ҳозирги пайтда Бош вазирнинг Тадбиркорлар мурожаатларини кўриб чиқиш қабулхоналари фаолиятини ташкил этиш ва мувофиқлаштириш котибиятининг мудири лавозимида ишлайди.

Ҳозирги Ахборот технологиялари университетини тамомлаган Ғолибшер акамиз Ўзбекистон телекоммуникация соҳасида ишламаган йўналиш қолмаган ҳисоб. Буёғи етмагандай Миллий Телерадиокомпанияда ҳам жавлон урганлар. Қорақалпоғистонга бориб қовун тушириб қўйгандан сўнг биринчи ўринбосарлик вазифасидан мосуво бўлганди.

От ўрнини той босади, деганларидек энди саҳнага Фаррухбой чиқиб келмоқда.

Фаррухбойга Ўзкарднинг Бош директорлиги топширилди.
Ўзкарднинг директорлигига тайинланганига ҳали уч ой ҳам бўлмаган Дилшод Икрамов қаёққа кетди? Унинг ишдан олинишига нима сабаб бўлди?

Ҳукумат Икрамовнинг ишдан олинишига сабаб бўлган гуноҳларию Фаррухбойнинг менежерлик қобилиятини халққа бир маълум қилиб қўйса ёмон бўлмасди.

Ҳарқалай, гуноҳлар, хатолардан сабоқ, қобилият, истеъдоддан ибрат олинади.

Канални дўстларингизга ҳам улашинг @reporter_uzbekistan Ochish/sharhlash

2020-11-25 08:41:27 Fitch "Ипотека банк"нинг биринчи еврооблигацияларига "BB-" рейтингини берди

Халқаро Fitch Ratings рейтинг агентлиги “Ипотека банк”нинг дебют евробондларига "ВВ-", барқарор якуний рейтинг баҳосини берди
Банкнинг 2025 йилда қопланиши кўзда тутилиб, 5,5% ставкада муомалага чиқарилаётган облигациялари ҳажми 300 миллион долларни ташкил этади. Банк жойлаштиришдан тушган маблағларни биринчи навбатда маҳаллий тадбиркорлик субъектларига чет эл валютасида кредит бериш учун ишлатмоқчи.

Якуний рейтинг илгари олинган маълумотларга мос келувчи ҳужжатлар олинганидан сўнг тақдим этилди, дейилади агентлик хабарида. Ушбу якуний рейтинг 9 ноябрь куни таъминланмаган облигацияларга берилган вақтинчалик рейтингга мос келади.

Облигация рейтинги банкнинг эмитентнинг узоқ муддатли дефолт рейтинги билан бир даражада, чунки қимматли қоғозлар банкнинг бошқа таъминланмаган мажбуриятларидан устиворликка эга бўлиб, бошқа устивор носубординар кредиторлари олдидаги мажбуриятларини навбати билан бажаришда тенглигини акс эттиради.

Банк экспертлари Ипотека-банк облигацияларига истиқболи барқарор рейтингини тақдим этишда, банкка бирор кор-ҳол юз берганда Ўзбекистон ҳукуматининг банкни қўллаб-қувватлаш эҳтимоли борлигига суянган.

Агентлик экспертлари фикрича, банк капиталида давлат улушининг кўплиги ҳамда Ўзбекистон банк тизимида ҳукмронлик қилаётган ҳукуматнинг давлат банкларини қўллаб-қувватлаш тарихи банкни қўллаб-қувватлаш эҳтимолини оширади.

Канални дўстларингизга ҳам улашинг @reporter_uzbekistan Ochish/sharhlash