Asadbek Bozorov

2023-04-05 23:15:39 Yozishni yaxshi ko'raman

Maqola yozish oson va oddiy ish emas. Chunki, yozish uchun fikrlash kerak. Siz 1 daqiqada o'qib tugatgan bu maqolani yozishga 1.5-2 soat vaqt ketdi. Buni yozib ko'rganlar tushunadi.

Qiyin bo'lsa-da, unda nega men yozaveraman? Chunki men yozishni yaxshi ko'raman. Bolaligimdan shunday. Ijod qilish, nimadirlar yaratish men uchun yoqimli ish.

Hech kim bu uchun pul to'lamasa ham men yozaveraman. Sababi, fikrlarimni ulashishga menda ehtiyoj bor.

Shu bilan birga, yozish orqali fikrlarimni umumlashtirib, boshqalarga yetkazib berish ko'nikmasini rivojlantiryapman.

Yozishning buni o'quvchilardan ko'ra o'zimga foydasi ko'proq ekan. Demak, bu - shakllantirishim kerak bo'lgan yaxshi odat.

Ha, shunday. Yozish bu san'at. Yozish bu ko'nikma. Unga ega bo'lsangiz, kelajakda ko'p foyda topasiz.

Nima qilishni esa o'zingiz yaxshi bilasiz. )

@asadbekbozorov Ochish/sharhlash

2023-04-04 15:39:32 O'ylash oson ish emas

O'ylash, taffakkur qilish qiyin jarayon hisoblanadi. Chunki o'ylash - miya uchun chellenj. Miya esa qiynalishni xohlamaydi. Miya bizning energiya va resurslarimizni tejashga moslashgan. Qiyin ishlarni kechiktirishimizga asosiy sabab ham shu.

Ko'pchiligimiz qiyin ishlarni kechiktirishni dangasaligimiz va qobiliyatsizligimiz sababidan deb o'ylaymiz. Aslida bu - biologik jarayon. Kechiktirish - miyadagi limbik tizim va prefrontal korteks o'rtasidagi jang natijasi.

Limbik tizim - bu ko'ngilochar ishlarni qilishga javob beradigan miya tuzilmalari to'plami. Prefrontal korteks esa rejalashtirish va qaror qabul qilishni nazorat qiladi. Prefrontal korteks uncha rivojlanmagan va zaifroq, limbik tizim esa kuchli va rivojlangan, shuning uchun, ko'pincha, limbik tizim g'alaba qozonadi, bu esa kechiktirishga olib keladi.

Bu kurashda yengish uchun tryuk qo'llash eng to'g'ri yechim, ya'ni prefrontal korteksda "qiyin" degan taassurot uyg'otmaslik kerak hattoki qiyin ishlarda ham. Buning uchun, qiyin va katta ishlarni kichik-kichik qismlarga bo'lib tashlash kerak va buni yoqimli jarayonga aylantirib olish kerak. (Masalan, menda qahva bilan ishlash yoqimli.)

@asadbekbozorov Ochish/sharhlash

2023-04-02 15:19:47 Kechagi tadbirdan olgan insaytlarim

Aziz aka Rahimovni o'zimga ustoz deb bilaman. Kecha men anchadan beri kutib yurgan master-klass bo'lib o'tdi. Tadbir o'zgacha ruhda bo'ldi.

O'rganganlarim:

Suhbat "multidisciplinary thinking" - "ko'p tarmoqli fikrlash" yoki "qomusiy fikrlash" mavzusi ustiga qurildi.

Inson bitta sohada ketayotgan bo'lsa ham, ko'p ilmlarni egallashi kerak. Bu narsa "problem solving" - muammoga yechim topish ko'nikmasini rivojlantiradi. Ya'ni, qo'lida bolg'a va mixi bor odam muammoga faqat shu asboblar bilan yechim qidiradi. Agar uning boshqa qurollari ham bo'lsa, har xil tomondan yondasha oladi.

Ikkinchidan, bu sizni zerikarli odamga aylantirib qo'ymaydi. Axir, hayot faqat ishdan iborat emas, ish, pul topish - hayotingizning bir qismi. Shunday ekan, har xil inson bilan muloqot qilasiz. Ko'p sohalarda ilmingiz bo'lsa, bemalol suhbatdoshingiz mavzusiga tushib keta olasiz.

Va tarixdan va hozir yashayotgan ko'plab insonlarni misol keltirdilar:

Ibn Sinoni tibbiyotdan, Mirzo Ulug'bekni astronomiyadan, Enshteynni fizikadan, Leonardo da Vinchini "Monaliza"dan taniymiz-u, ammo ularning barchasi qomusiy ilmlar egasi bo'lgan. Bundan kelib chiqadiki, bitta sohada zo'r bo'lishingizda ham boshqa soha ilmlarini bilishingizning samarasi bor.

Yana suhbat chog'ida e'tiborimni tortgan narsa - o'quvchilar savol berganda ustozning bir zum o'ylanib turib, keyin javob berishlari. Samimiy, borini boricha ko'rsatadigan inson ekanlar.

Ustozning fikrlarini o'zimnikiga qiyoslab, hali hech narsani bilmasligimni tushunib yetdim va ilmga rag'batim yanada oshdi.

@asadbekbozorov Ochish/sharhlash

2023-03-30 07:04:01 Nega men boshqachaman?

Nega men boshqalarga o'xshamayman? - Nega meni tushunishmaydi? - degan xayollar sizning ham miyangizda aylanib tursa kerak.

Aslida, har bir inson unikal. Muqobili topilmaydi. Xislatidan tortib, barmoq izigacha. Nega endi boshqacha bo'lmasligingiz kerak? Axir Alloh sizni noyob holda yaratgan bo'lsa.

Yuqoridagi savollar siz-u bizni qiynashiga asosiy sabab esa - "Odamlar nima deydi". Rostdan shunaqa.

Biz harakatlarimizni, hatto gaplarimizni boshqalar nima deb o'ylashiga qarab belgilaymiz. Mana shu postni yozayotganimda ham shunday fikr o'tdi.

O'zlikni yashirib, boshqalarning fikriga ko'ra harakatlanish insonni stressga olib keladi. "Odamlar nima deydi" - bu bir qopqon. Undan qochish kerak. Aks holda, o'zingizniki qolib, boshqalarning hayotini yashashga majbur bo'lasiz.

Kuni kelib, afsuslar botqog'ida qolishni xohlamasangiz, o'zingiz xohlagandek yashang, shaxsiy qarorlar qabul qilishda tavakkal qiling.

@asadbekbozorov Ochish/sharhlash

2023-03-30 00:25:45 Odobni odobsizdan o'rgan

Bu gapni ko'p bora eshitgansiz, to'g'rimi? Ammo ma'nisini tushunib yetsangiz, bu maqol - hikmatning o'zginasi ekan.

Ba'zan atrofimdagi insonlarning hayot tarziga nazar tashlab, nahotki, shunday yashash mumkin - deb yuboraman.

Endi tushundimki, bunday insonlar bo'lishi kerak ekan. Chunki, inson o'zining aksini ko'rishi uchun unga oyna kerak.

Har bir insonda xato-kamchilik bor. Lekin, inson zoti faqat boshqaning aybini ko'radi. Demoqchimanki, boshqalarda ko'rgan siz yoqtirmagan sifat, aslida, o'zingizda ham bor. Faqat siz bunga e'tibor bermaysiz.

Shunday ekan, boshqalardan "oyna" sifatida foydalaning va o'zingizni isloh qilish payida bo'ling.

P. S: Bugun masjidda bir bola rosa bezovta qildi, xayolimni bo'ldi va bu menga yoqmadi. Endi boshqalarga ozor berib qo'ymaslikka qattiq harakat qilaman.

@asadbekbozorov Ochish/sharhlash

2023-03-18 14:05:40 Yaxshi - buyukning dushmani

"Yaxshi - buyukning dushmani. Va u juda oz narsalarning buyuk bo'lishiga asosiy sabablardan biri.

Kamdan-kam odam buyuk hayotga erishadi, chunki yaxshi hayotga moslashib qolish oson." *

Buyuk bo'lolmasligining asosiy sababi - oldinga intilmaslik, harakatdan to'xtab qolish. Bir xil hayot tarziga o'rganib qoladi-da, o'z ustida ishlamaydi, yangi bilimlarni o'rganmaydi.

Buni ko'p narsalarga qo'llasa bo'ladi.
Yaxshi sportchilar, yaxshi kadrlar, yaxshi maktab, yaxshi universitetlar... ko'p, ammo buyuklari juda kam yoki yo'q.

Bruce Leening bir gapi bor:
"Hamma taslim bo'lgan joyda sen taslim bo'lma, shunda hech kim g'olib bo'lmagan yerda sen g'olib bo'lasan."

Mana shu qoidaga amal qilishning o'zi sizni buyuklikka yetaklaydi. Buyuklikni bir yo'l deb faraz qilsak, ko'pchilik yo'lda uchraydigan to'siqlar natijasida elakdan o'tib ketadi.

Faqat qat'iy maqsad qo'ygan va irodalilargina taslim bo'lmay, oxirigacha bora oladi.

Qat'iyatli bo'ling va maqsadingizga erishmaguningizcha harakatdan to'xtamang!

* "Good to Great" kitobidan Ochish/sharhlash

2023-03-17 14:40:38 Xato qilish ayb emas

Inson zoti xatokor bo'ladi - xoh olim bo'lsin, xoh oddiy inson xatolar qilib turishi tabiiy holat.

Unda ayb nimada?
O'sha xatoni "xato" deb hisoblamaslik - ayb, uni tahlil qilib, qayta takrorlamaslikka urinmaslik - ayb.

Shaxsiy tajribamdan kelib chiqib, shuni aytolamanki, bir ishda xatolikka yo'l qo'ysangiz-u, qayerda xato qilganingizga e'tibor qaratmasangiz, 95-99% holatda xuddi shu xatoni qayta takrorlaysiz.

Umuman olganda, har bir ishda xatolardan xulosa chiqarish juda muhim. Muvaffaqiyatli insonlarning boshqalardan farqi ham shunda, ular har bir xatodan dars olishni biladi va har safar bir pog'onaga ko'tarilib boradi.

Aksincha, xatoni xato deb hisoblamaslik insonni "komfort zona"ga qamalib qolishiga olib keladi va bu holat u uchun tez orada oddiy holga aylanib qoladi. Mana shu - eng yomoni.

Shunday ekan, kichik narsalarda ham xatolardan xulosa chiqarishga harakat qiling. Ishonavering, mana shu "kichik harakatlar" kun kelib muvaffaqiyatga erishishingizda zinapoya vazifasini o'taydi. Ochish/sharhlash

2023-03-16 14:06:01 Qalamni hech kimga berma

Tasavvur qiling, siz biror-bir surat chizishni niyat qildingiz va qog'oz - qalamni qo'lingizga oldingiz. Endi ijodni boshlayman deganingizda do'stingiz kelib, o'zining fikrlarini bildirib ketdi. "Yo'q" deya olmadingiz xafa qilib qo'ymay deya. Axir u ham sizning suratingizning chiroyli chiqishini xohlaydi-da.

Do'stingiz aytgandek davom etayotganingiz-da, ota-onangiz kelib, o'zlari uchun eng chiroyli bo'lgan suratni sizga ta'riflab, chizishingizni so'radi. "Yo'q" deya olmaysiz, albatta. Axir ota-onangiz hammadan ham ko'proq sizning suratingizning eng zo'ri bo'lishini xohlaydi-ku.

Surat bitdi. Boshqalar nazdida yaxshi chiqqandek bo'ldi. Ammo, sizning maqsadingiz umuman boshqacha edi. Sizning maqsadingiz, chizmoqchi bo'lgan suratingiz boshqacha edi.

Hayot ham surat kabi. Ozgina bo'shashsangiz, boshqalar sizning hayotingizni chizishga harakat qila boshlaydi. To'g'ri, qaysidir ma'noda sizga yaxshi bo'lsin uchun. Ammo, sizning o'z orzularingiz, individual maqsadlaringiz, borar manzilingiz bor.

Natijaga kelsak, qog'ozdagi suratga tikilib qaradingiz-da, sizga yoqmadi, achchig'ingiz chiqdi, ketgan vaqtingizga afsuslanib qoldingiz, suratni yirtib, yana qaytadan chizishni boshladingiz.

Ammo, hayotda bunday bo'lmaydi. Imkoniyat faqat bir marta beriladi. Shunday ekan, hayot rasmingizni o'zingiz chizmoqchimisiz, qalamni hech kimga berib qo'ymang! Ochish/sharhlash

2023-03-09 10:57:05 Eng katta dars

20 yoshimgacha kun kelib, bir "mo‘jiza" sodir bo'ladi-yu, hayotim o'zgarib ketadi, boyib ketaman, mashhur bo'lib ketaman degan ichki hissiyot bilan yashab keldim.

Endi o'ylab qarasam, o'zim o'zgarmasam, "komfort zonam"dan chiqib harakat qilmasam, kimdir kelib, mening hayotimni o'zgartirib bermas ekan.

Ha, bu achchiq haqiqat, tan olish kerak. Turib, harakat qilib, ilm olib, kasb o'rganib, yo'lda uchraydigan qiyinchiliklarni yengib o'tmas ekansiz, bu hayotda nimadirga erishish juda qiyin.

Tanlov o'z qo'lingizda, yo hozirgi vaqtinchalik qiyinchiliklarga sabr qilib, yengib o'tasiz yoki butun umr aylanib o'tishga harakat qilib yurasiz. Ochish/sharhlash

2023-03-04 00:07:40 Boshqalarga taqlid qilmang. O'zingizning shaxsiyatingizni qurish harakatida bo'ling. Zero, eng kuchli inson o'z shaxsiyatiga ega bo'lgan insondir. Ochish/sharhlash