2023-04-03 19:54:23
Конституцияда кафолатланган тиббий хизмат
Бугун барчамиз муҳим сиёсий жараён-шу йилнинг 30 апрелъ куни ўтказиладиган референдум олдида турибмиз. Бу кун Ўзбекистоннинг, халқимизнинг эртанги кунини белгилаб беради.
Айтиш мумкинки, умумхалқ муҳокамасида ўз тасдиғини топган ва айни кунларда қўллаб-қувватланаётган Бош Қомусимизни янада такомиллаштириш, инсон қадрини улуғлашдек эзгу ниятни унда мустаҳкамлаб қўйиш мақсадида Ўзбекистон Республикаси Конституциясига таклиф бериш ва уни ҳаётимиз талабларидан келиб чиққан ҳолда янада такомиллаштириш масаласи илгари сурилди. Қонун лойиҳасининг ҳар бир моддаси халқчил тарзда халқимиз билан маслаҳатлашган ҳолда тайёрланди.
Олий Мажлис Қонунчилик палатаси депутати Мавлуда Адҳамжонова иштирокида Андижон вилоят қон қуйиш марказида ўтказилган тадбирда юқоридагилар хақида сўз борди. Таъкидланганидек, Конституциявий ислоҳотлар кенг қамровли бўлиб, улардан энг эътиборлиси сифатли ва малакали тиббий хизматни ташкил этиш масаласини конституциявий даражада мустаҳкамлаб қўйиш билан боғлиқ. Бугунги кунда тиббий хизматларнинг сифат даражаси ошиб, янги замонавий йўналишлар, даволаш ва диагностика усуллари, ноёб илмий-амалий тажрибалар шаклланмоқда. Жамиятда яшовчи ҳар бир шахснинг малакали тиббий хизматдан фойдаланиши унинг Ватанга бўлган эртанги ишончини янада оширади. Шунга кўра, Конституциямизда мамлакатда инсон ҳуқуқлари ва қонуний манфаатларини таъминлаш, қадр-қимматини улуғлашда соғлиқни сақлаш тизими устувор аҳамият касб этиши қайд этилган.
Янги таҳрирдаги Конституцияда қайд этилишича, Ўзбекистон Республикаси фуқаролари тиббий ёрдамнинг кафолатланган ҳажмини қонунда белгиланган тартибда давлат ҳисобидан олишга ҳақли.
Мавлуда Адҳамжонова, Олий Мажлис Қонунчилик палатаси депутати:
-Фуқароларга тиббий ёрдамнинг кафолатланган ҳажмини қонунда белгиланган тартибда ва давлат ҳисобидан кўрсатилиши аҳоли саломатлиги учун муҳим ижтимоий кўмак ҳисобланади. Давлат ҳисобидан кафолатланган тиббий хизматни ривожлантириш мақсадида ихтисослашган тиббиёт марказларининг юздан ортиқ филиаллари фаолият бошлади. Буларнинг барчаси юртимизда истиқомат қилаётган фуқароларнинг соғлиғини сақлашга қаратилган амалий чоралардир.
Конституцияга киритилаётган норманинг яна бир аҳамияти шундаки, давлат ўз фуқароларининг моддий аҳволидан қатъи назар кафолатланган бепул тиббий ёрдам билан қамраб олинишини мустаҳкамламоқда. Бу фуқаролар, айниқса, моддий шароити яхши бўлмаганларнинг соғлиғини сақлашга давлат ғамхўрлик қилишдан тўхтамаслигини англатади.
“Адолат” СДП Андижон вилоят кенгаши
Матбуот хизмати.
6 viewsНазаров Акбаржон, 16:54
А
