2024-05-18 16:21:39
«Не жаңалық?
» Ислам Тлепов анық биледи!Ислам Тлеповтың «Не жаңалық?» деген сораўға жуўабы тайын. Себеби, оның усы атамадағы телеграм каналында 100 мыңнан аслам ағзалары бар. Жаңалықлар менен бөлисиў ушын ол турақлы түрде мәмлекет ҳәм дүньяда жүз берип атырған ўақыялардан хабардар болыўға ҳәрекет етеди. Қарақалпақстан пайтахты Нөкис қаласынан дерлик 100 километр узақлықта жайласқан Қанлыкөл районындағы «Бостан» аўыл пуқаралар жыйынында интернет тармағына жалғаныўда ҳеш қандай машқала жоқ.
Ислам ҳәзир 24 жаста. Ол балалығында басынан өткерген кеселликтен соң майып болып қалды. Aлты жасында оқыў ҳәм жазыўды үйренди, мектеп программасын үйде өзлестирди. Ислам балалығынан хабар технологияларына қызығады. Соннан болса керек, үш жыл алдан досты Ақылбек Турсынбеков пенен бирге жаңалықлар каналын жаратыўға қарар етти. Оның ушын тек смартфон ҳәм интернетке кириў керек еди. Бул оған машқала болмады. Себеби, Ислам усы екеўи менен қашаннан берли тил табысқан еди.
Басында жазылыўшылар оғада аз еди. Бирақ, Ислам буннан түскинликке түспестен, оқыўшылардың дийдинен шығатуғын материаллар таярлаў үстинде бас қатырды. Тынымсыз ҳәрекет өз нәтийжесин берди.
Ол бүгинги күнде өз каналы ушын басқа дереклерде жәрияланған хабарларды өзбек тилинен қарақалпақ тилине аўдарма ислейди. Сондай-ақ, өзи де мақала жазады ҳәм ағзалар турақлы түрде оның менен мағлыўмат бөлиседи. Aналитиканы болса, оның республикалық көлемдеги илажларда қатнасатуғын досты Ақылбек Турсынбеков таярлайды.
«Не жаңалық?» каналында күнине ҳәр түрдеги 15 ке шекем жаңалықлар пайда болады. Исламның жумыс кестеси бир өлшемде емес. Ɵзиң унатқан жумыс пенен шуғылланыў тек ғана заўық емес, ал дәрамат та келтиреди. Реклама беретуғынлар оның менен тығыз бирге ислеспекте. Неге дегенде, оның жаңалықлар каналы Қарақалпақстандағы басқа көплеген жаңалық каналларынан бир неше есе алдында.
Район ҳәкимлиги жигиттиң дөретиўшилик күш-ғайратын қоллап-қуўатламақта. Ҳәкимниң сыйлығы — заманагөй ноутбук болып, Ислам оннан веб-сайтлар және социаллық роликлер жаратыўда пайдаланыўды жобаластырмақта.
Исламның пикирине бола, IT тараўында ислеў аңсат. Алған билимлери оған өмирде өзин табыўға ҳәм кеселлигин умытыўға жәрдем берди. Ислам үлкен ҳәм миймандос шаңарақта үлкейген. Ата-анасы Жамурат Aяпов ҳәм Aрзыгул Узақова 4 перзентин жоқары ғамхорлықта тәрбиялаған. Ислам мудамы излениўшең, ашықкеўил, инилерине ҳәм қарындасларына өрнек болады. Ислам дүнья өзгерип атыр ҳәм адамлар да теңдей өзгериўи керек, дейди. Сонда ғана раўажланыў ҳәм жәмийетлик турмыстың орайында қалыў ҳәм адамларға пайда келтириў мүмкин. Бизиң қаҳарманымыз буны жүдә жақсы атқарады ҳәм келешек ушын мақсет ҳәм жобалар әмелдегидей болғанында, ол әлбетте көтериңки кеўилде болады.
Алёна АМИНОВА
Постты басқаларға үлги болыўы ушын тарқатың.
Каналға ағза болың
@Xaliq_ushin
7.7K viewsedited 13:21