2023-05-18 07:32:39
Самарқанддаги Ҳалқаро туризм марказида Европа тикланиш ва тараққиёт банки Бошқарувчилар кенгашининг 32-йиллик анжумани бўлиб ўтмоқда. Тадбирда 73 та аъзо давлатдан 1500 дан ортиқ иштирокчи қатнашмоқда. Унда 2022 йилдаги ҳамкорлик натижалари кўриб чиқилиб, минтақаларга таъсир кўрсатаётган мавжуд муаммоларни ҳал этиш бўйича биргаликда кўрилаётган чоралар таҳлил қилинди.
Анжуман доирасида турли мавзуларда экспертлар иштирокида панел сессиялари ўтказилди. “Янги кўникмалар йўли – Марказий Осиёда инсон капиталини шакллантириш” мавзуидаги панел муҳокамасида Олий Мажлис Сенати Раиси Танзила Нарбаева ҳам иштирок этди. Муҳокамалар давомида мамлакатлар аҳолисининг ўсиб бораётган, ёш ва бошқа қатламлари салоҳиятидан қай тарзда самарали фойдаланиш ҳамда мазкур салоҳиятни қандай қилиб барқарор ўсиш катализаторига айлантириш мумкинлиги юзасидан фикр алмашилди.
Профессионал таълимни янги ёндашувлар асосида ташкил этиш, аҳолини, айниқса, ёшларни замонавий касбларга ўргатиш, бунда хусусий сектор улушини ошириш, бу доирадаги барча жараёнларнинг қонуний асосларини такомиллаштириш масалаларига алоҳида эътибор қаратилди. Сенат Раиси муҳокамалар жараёнида қуйидаги фикрларни билдириб ўтди. “Европа тикланиш ва тараққиёт банки Ўзбекистонда 10 дан ортиқ лойиҳалар доирасида ёшларимизнинг салоҳиятини оширишга, яъни инсон капиталини ривожлантиришга катта кўмак бермоқда. Мамлакатимиз демографик жиҳатдан тез ўсиб бормоқда.
Ҳар йили 600 минг ёшлар меҳнат бозорига кириб келмоқда. Уларнинг барчасини ўқитишимиз ва касбга тайёрлашимиз, шу билан бирга муносиб меҳнат, муносиб иш ҳақи ва хавфсиз меҳнат шароитлари билан таъминлашимиз зарур. Албатта, бу йўналишда ва биз учун стратегик аҳамиятли бўлган бошқа масалаларда Европа тикланиш ва тараққиёт банки билан изчил ва самарали ҳамкорлик қилишимиз ниҳоятда муҳим”.
ЕТТБ Бошқарувчилар кенгашининг йиллик анжумани доирасида, шунингдек, халқаро савдо, энергетика хавфсизлиги, қайта тикланадиган энергия манбалари, кичик ва ўрта бизнеснинг иқтисодиёт учун аҳамияти, ривожланаётган бозорларда рақамлаштириш каби йўналишларда халқаро мутахассис ва экспертлар иштирокида муҳокамалар ташкил этилди.
@Zafarbek_Solijonov
7.5K viewsedited 04:32