2023-03-10 18:20:07
Ҳудудий бошқарма бошлиғи лавозимига ташқаридан бошқа бир шахсни ишга олиш нотўғри
Айни дамда мактабгача ва мактаб таълими вазирлигининг ҳудудий бошқармаларининг раҳбар лавозимларига номзодлар билан суҳбат жараёнлари бўлиб ўтяпти. Хабар беришларича, айрим ҳудудларда мактабгача ва мактаб таълими бўлими бошлиғи лавозимига собиқ ХТБ ва МТБ бошлиғлари қолиб, аввалроқ президент мактабида ишлаган директор ёки оддий ходимлар суҳбатдан ўтиб, лавозимга тайинланаётган экан.
Олдиндан эслатиб қўймоқчимиз, бу хабар 100 фоиз тўғри эканлигига даъво қилаётганимиз йўқ. Биз фақат аслида қонунчилик бўйича қандай йўл тутиш кераклигини эслатиб қўймоқчимиз холос. Айнан мана шу масала бўйича
@yuristkadr канали таъсисчиси
Саидали Мухторалиев қонуний асослар билан жуда яхши
тушунтириш берган. Ҳозир шу ҳақда бироз гаплашамиз:
«Вилоят ХТБ ва вилоят МТБ бир-бирига қўшилиб, уларнинг ўрнида вилоят Мактабгача ва мактаб таълим бошқармаси ташкил этиляпти ва бу
МК 98-моддада кўрсатилган қайта ташкил этиш ҳисобланади. Бунда ходимлар билан меҳнат муносабатлари уларнинг розилиги билан давом этаверади.
Бироқ, икки ташкилот қўшилиб, уларнинг ўрнида битта ташкилот пайдо бўлса, демакки биринчи раҳбар энди иккита эмас, битта ва яккаю ягона бўлади. Демак, мавжуд вазиятда штат бирлигининг қисқариши бор, яъни вилоят Мактабгача таълим ва мактаб таълими бошқармаси бошлиғи лавозими бир дона бўлганлиги учун ёки вилоят ХТБ бошлиғи, ёки вилоят МТБ бошлиғи ишдан кетиши керак.
Иккиси ҳам эмас, улардан бири.
МК 100-модда иккинчи қисми 1-банди бўйича ва штат бирлиги қисқариши муносабати билан. Лекин,
МК 92-модда 2-қисмига асосан уларнинг иккисидан бирига янги вилоят Мактабгача таълим ва мактаб таълими бошқарма бошлиғи лавозими таклиф этилиши, яъни топширилиши лозим.
Ташқаридан бошқа бир шахсни олиш нотўғри бўлади, чунки бу МК 92-моддаси 2-қисмига зид бўлиб қолади ва эртага бу судда иш берувчига яхшигина ташвиш туғдиради.
Хўш унда мазкур раҳбарлик лавозимини қайси бирига ва айнан кимга таклиф қилган маъқул?Айни мана шу жойида амалдаги
МКнинг 103-моддаси деган "зот" гурсиллаб катта саҳнага чиқиб келади.
МК 103-модданинг 1-қисми бўйича юқоридаги икки раҳбардан қайси бирининг малакаси ва меҳнат унумдорлиги юқорироқ бўлса, демак ўша раҳбарда имтиёз юқори бўлади ва ўша шахс янги бошқарма бошлиғи лавозимини эгаллайди.
Кейингисига ёки бошқа иш таклиф қилинади, мабодо у рад қилса ёки унга мувофиқ иш бўлмаса, айнан ўша иккинчи раҳбар ишдан кетади. МК 100-модда иккинчи қисм 1-банди билан. Қисқартириш муносабати билан. Агарда ушбу иккисининг ҳам малакаси ва унумдорлиги тенг бўлиб, ким колишини ажратиш имкони бўлмаса, унда МК 103-модданинг 2-қисмидаги критерияларни қўллашга тўғри келади»
Шу сабабли меҳнат ҳуқуқлари бузилган собиқ раҳбар ходимлар андиша қилмасдан керакли органларга мурожаат қилишлари керак. Лавозимга тайинлаш маълум бир шахсларнинг ихтиёрига боғлиқ бўлиб қолмаслиги керак.
Xalq ta'limi Info
29.0K viewsedited 15:20