2021-05-11 16:57:54
Бу йилги рамазони шарифни ким қандай ўтказди? Ёғ нарҳи кўтарилди, яна баъзи маҳсулотларнинг ҳам нарҳи лип этиб осмонга чиқиб олди.
Сотувчи ҳурсанд, рамазони шарифни у оиласи билан шод-у ҳуррамликда ўтказди...
Ҳақиқатнинг гўри қаерда?!
Ўшанинг қаердалигини қидириб кавлаб юрган бир "ҳақиқатпараст" олти йил-у яна қанчадир ойга қамалди.
Расмини интернетда кўрдим: кўзи худди Қодирийнинг қамоқда тушган расмидаги кўзларга ўхшаркан. Қорачуғларига ниманидир гўё шуъласи тушиб, ҳира ёғду сочаётгандек...
Ҳа, ҳақиқат қаерда эканини мана энди сал сезгандайман...
У - "ҳақиқатпараст" лар ва "жим юришни истамайдиганлар" қорачуғида бўларкан...
Ўша инсон рамазонни ўкинч билан панжара ортида кутиб олди.
Эр хайитга аёли учун нима сотиб олишга ҳайрон. Ўтган байрамда "шундоқ пулнинг ўзини бераверинг!" деганди, берди! Аёли дугоналарига яхши бир баркет қилиб, ана ўша пулни сочиб юборди...
Сочса нима, битта судда раислик қилса-унақа банкетнинг ўнтасини пули чўнтакда бўлади.
Хайитни у ҳозирча ана ўша иккиланишлар билан кутиб олмоқда: пул берсинми ёки биронта бриллиант матоҳ?!
Ёлғиз аёл бугун ҳам саҳарликка "қора чой" қилди. Лабида табассум. Болалигида ота-онаси ҳам кўпинча "қорачой" ичарди. Бир қошиққина сариғёғ, бир чимдим туз... Қотган нон деганларининг бир ҳовучи сувда бўкиб, шунақаям маза берадики...
Мана шу болаликнинг эслатадиган маза бўлса керак, чамаси...
У бахтли!
Бир косагина ёвғон унга олам-олам бахт берди...
У рамазонни шундай- шукри тинмаган тили, миннатдорчилик тўлиб тошган дили билан ўзича мазмунли ўтказди.
Таксичи кечаси ухлайди, тонг саҳардан яна иш...
Ҳозир у шивалаб ёғаётган ёмғир остида бозорга борадиган мижозини кутиб ўтирибди.
Мижози чиқди ва эснаб туриб, кечаси ухламаганини ва қадр кечасини кутганини гапирди.
Таксичининг ичи бир ғалати бўлди: чарчоғдан донг қотиб ухлабди, қадр кечаси экан...
Яна олдинда тиқилинчда қолган машиналар мисол тизилишиб турган йилларига қаради: ҳали қиз чиқариши керак, ўғил уйлаши керак...
Яна қанчадир йил унга... Балки қадр кечасини кутиш насиб бўлмас...
Яқинда тўйи бўлган келинчак-ўрин кўрпа ичидан суғурилиб чиқди. Уф деб юборганига мана энди ўзи ҳижолат. Рамазон кирганидан бери у мана шунақа соат бирда туриб зирвак қилади. Эснаб-эснаб, оғзини бир қўлида ёпиб, бир қўлида капгир айлантириб...
Рамазонни у чарчоқ деб билади, чарчоқ...
Тўйиб ухлолмаган тунларининг ҳаммаси рамазонда...
Эри касал бўлганидан бери касал қараб, ўзи ҳам ухлолмайдиган бўлиб қолган хотин...
У рамазонни яна шу касал эри билан ўтказаётганидан ҳурсанд...
Аммо баъзан қўрқиб кетади: оз қолган бўлса-чи?
Ичида дарров бошқа сабаб бўй кўрсатади: "яхши кунлардан насиб қилса, яхшику-я..Аммо..."
Йўқ, у рамазонни умид билан ўтказяпти. Балки шифо деганлари қайсидир бедор кечасида қилган дуолари сабаб унинг эрига ато этилар...
Рамазон!
Унинг ҳар дилда ўзгача қиёфаси бор, худди бизга кимдир уни ойна сифатида қўйиб кетгандек..
Дуо қиламан; савдогарлар рамозоннинг баракаси фақат пулда эмаслигини тушунсин!
Ҳақиқат ҳеч қачон панжара ортига ўтмасин ёки ерга кўмилмасин!
У ҳар инсоннинг авайлаб юрган қорачуғида яшасин!
Бировни қақшатганларнинг ҳеч йўқ-шу ойда виждони уйғоқ бўлсин!
Пул сочиб яшаётганлар-ҳалол ва ҳаромнинг фарқига етсин!
Ёлғизнинг ёри ҳамиша Аллоҳнинг ўзи бўлсин...
Шукроналик туйғуси бизни еч қачон ва ҳар қандай ҳолатда ҳам тарк этмасин...
Тирикчилик ғами- умримизнинг олтин лаҳзаларини биздан тортиб олмасин...
Бу муқаддас ойнинг асл ибодати- саҳарликда турфа овқатлар еб, кейин кун бўйи ифторликка нима тайёрлаш ҳақида ўйлаб яшашлик ташвиши эмас...
Келинларга ва аёлларимизга бироз енгиллик бериш, уларга асл ибодат нима эканлигини англатиш-бу ҳам аслида савоб!
Шу савобга талабгорлар кўпайсин!
Ва ҳеч қачон рамазони шарифда атрофимиз бўшаб қолмасин, таровеҳ сафлари кўпайсин ва кўнглимизни бир зум ибодат иштиёқидан бенасиб қилмасин!
Ҳурмат билан Ummu Zaynab.
@Solixa_Ayol
Яхшилик учун яқинларингиз билан баҳам кўринг!
https://t.me/joinchat/AAAAAEoqxJvob7F63SjCig
5.8K views13:57