Kitobxon kundaligi

2021-02-14 07:40:57 Бугун халқаро китоб улашиш куни экан. Мен ҳеч китоб улашишга ҳам, олишга ҳам қизиқмаганман. Бировлардан китоб сўрашни-ку, ёқтирмайман . Ўзи қоғоз китоб кам ўқирдим. Майли сизлар китоб улашишдан чарчаманг. Сўнгги марта кимга қайси китобни совға қилдингиз ёки олдингиз?

@kitoblog Ochish/sharhlash

2021-02-13 05:30:00 Россия Китоблар палатаси 2020 йилдаги энг машҳур муаллифлар рўйхатини тузди.

Россия Китоблар палатаси 2020 йилдаги китоблар, журналлар ва газеталарнинг нашр этилиши бўйича якуний маълумотларни эълон қилди.

Ўтган йилгидек Стивен Кинг яна 2020 йилда энг оммабоп муаллифга айланди, унинг умумий китоблар тиражи 774 минг нусҳани ташкил этди. Иккинчи ўринда детективлар муаллифи Дарья Донцова(Руслар Азамат Қоржовови) (525 минг). Классик адабиёт ҳам ўқувчилар орасида машҳур бўлиб, Фёдор Достоевский (459,4 минг) учинчи ўринни эгаллади. Кучли бешликка шунингдек фантаст ёзувчи Aнджей Сапковский (406 минг) ва Aлександра Маринина (374,5 минг) кирди.

Болалар адабиёти сегментида энг машҳур муаллиф Корней Чуковский бўлиб қолди (1.081 минг). Иккинчи ўринда болалар учун ўқув китоблари ва энциклопедиялар муаллифи Елена Улева (923 минг). Учинчи ўринда ёш китобхонларнинг севимли адиби Холли Уебб (912 минг).

Бизда умумий нашрлар бўйича ҳолат қандай экан-а, қизиқ?

@kitoblog Ochish/sharhlash

2021-02-12 21:37:09
​#kitob
#taqriz
#Sunbula

Tillaniso NURYOG'DI ning "Sunbula" kitobiga taqriz.

Kitobni qo'limga olishim bilanoq birinchi galda diqqat bilan e'tibor qilganim muqovasidagi rasm bo'ldi. Termulgancha uzoq qolib ketdim. Nimadir demoqchi. Anglolmadim baribir. Keyin mutolaa jarayoni boshlandi. Har bir jumla qayta-qayta o'qildi. "Sunbula" da his qilganim dard, qalb og'rig'ini so'nggi daf'a "Yolg'izlikning yuz yili" va "Jinoyat va jazo" da tuyganman. Sahifadan sahifaga odimlarkanman botinimda alam, iztirob, nafrat, dunyoning jamiyki qoraliklari mujassamlashgandek his qilaverdim. Lekin tasalli bor. Ha shunday. Qalb ko'zi bilan qaralsa, har nafrat, har iztirob, har dard ortida inja tuyg'ular: sevgi-muhabbat, shafqat, samimiyat yashirin. Yagona tasalli shu. Go'yoki miltillab turgan cho'g' misoli.

Kitobdagi ba'zi jumlalar ortiga berkitilgan ma'noni anglab, dod deb yuborgingiz keladi. Qaniydi, anglanmasa, his qilinmasa. Shunda keyingi jumlaga ko'chishdan oldin beixtiyor ich-ichingizdan g'alati qo'rquvni his qilasiz.

"Sunbula" ning eng katta yutug'i o'zgacha so'zlarning latofat ila o'z o'rnida qo'llanilganidir. Qolaversa, ramzlar ko'pligi kitobxon aqlini shoshirib ham qo'yadi. Xullas, baxtli yashashdan zerikdingizmi? Yashab turgan dunyongizdagi qulayliklar sizga noqulaylik tug'diryaptimi? Bir maromda davom etayotgan yashash tarzidan charchadingizmi? Unday bo'lsa, ushbu kitob aynan siz uchun.

Iqtiboslar:

"Aqlning do'zax bo'lishi hali hech narsa emas. Biz hammamiz aslida shu do'zaxda yonishga mahkum qilinganmiz. An'anaviy do'zax haqidagi tushunchalardan farqli ravishda biz arosat do'zaxida yonamiz. Qaysi tomonga tegishli bo'lishni, nima to'g'ri, nima noto'g'riligini bilolmay, arosat do'zaxida yonamiz. Endi bildim, endi tushundim deganda, oldimizdan yana bir tilsim chiqadi."

"Yomon odam bo'lishdan qo'rquvim esa yaxshi ham bo'lolmasligimga sabab bo'lgan. Yomonidan qo'rqib, tuyg'ularingga erk bermas ekansan, sen aslida yaxshi, boshqalar va oliy vijdoning tomonidan "oq" deb tan olinadigan tuyg'ularga ham erk bermaysan."

"Yuragi yonayotgan odam uchun kimgadir ko'nglini ochmoqchi bo'lib ko'rsatgan samimiyati rad etilishidan yomoni yo'q."

"Ichida yong'in yonayotgan odamga ko'ngil to'lishi muhimmas. U ko'ngilni bemalol bir chetga surib qo'ya oladi."

"Dunyo ham dunyosida sochilib yotibdi."

"Atrofda yolg'iz bo'rilar izg'iy boshladi. Agar odam istasam o'sha yolg'iz bo'rilardan birining ko'zoynagini artib beraman-u, unga g'amxo'rlik qilib, ma'lum muddat uni o'zim bilan, o'zimni u bilan ovutaman."

"O'z ichidagi qorong'ilikni tanigan odamning o'zgalar qorong'iligini tushunishi qiyin bo'lmaydi."

Telegram | Instagram Ochish/sharhlash

2021-02-12 13:20:23 Қисқичбақа менталитети

Агар битта челакка қисқичбақа солинса у қийинчиликсиз ундан чиқиб кетиши мумкин, аммо қисқичбақалар бир-неча, ўнлаб бўлса унда уларнинг бирортаси ҳам идишдан чиқолмайди. Чунки, бири чиқаётганда бошқалари унга осилиб олмоқчи бўлади ва уни тушириб юборади. Оқибатда барчаси идишдан чиқолмай қолаверади.

Психологияда қисқичбақа менталитети(crab mentality) деб ҳам кишиларнинг бир-бирини қўлламай руҳиятини синдириш,мотивацияни ўлдириш ҳолатларига айтилади. Бу менталитет болаликдан бизга ёпишиб олган. Х.Тожибоев айтгандек "Сен одам бўмайсан сен!Сен молсан, сен!" деган гап сўзлар дастлаб ота-оналардан янграйди. Болаям "ҳа мени бўганим шу эканда" деб юраверади. Сал катта бўлгач атрофдаги дўстлар,танишлар ҳам "қисқичбақа" га айланди. Э қўйсанг-чи...қўлингдан кемайди, бўладиган ишни қил.. эээ ўлиб кетамиз барибир, тарзида. Ҳамма бир биридаги мотивларни сўндириб, бирга "тешик тоғорадан" чиқолмай яшайверади. Бу кўпчиликнинг скептик бўлиб қолиши ва баъзан атай бир бирини мағлуб этмоқчилиги, билан боғлиқ.

Бу менталитет бизда деярли миллий менталитетга айланган десам, адашмасам керак.Бир биридан айб қидириш, бир бирини "кийдириш" ҳеч бўлмаса танқид қилиш бизнинг қон қонимизга сингиб кетган. Ҳатто чет элда ҳам хориждагилар қолиб ўзимизникилар бир-бирини алдаб, "ухлатмоқчи" бўлиб юради. Биз эмас, ўзим ривожланай деган худбинлик устунлик қилади.

Қисқичбақа эффекти таъсирини шифокор Игнац Земмельвейс ҳаёти мисолида кўриш мумкин.У туғруқ пайти кўплаб оналар ўлимига оддийгина дезинфекция қоидаларига риоя қилмаслик сабаблигини аниқлаган. Ва ўзи ишлаган шифохонада барча шифокорлар туғруқ олдидан қўлини яхшилаб ювиши кераклигини талаб қилган. Аммо, унинг бу янгилигига қарши чиққанлар ҳам кўп эди. Улар буни қабул қилолмай, Земмельвейс буни бошқаларга айтишига йўл қўйишмаган. Якунда уни Венадаги Дёблинг руҳий хасталар уйига алдаб олиб бориб, ўша ерда қамаб қўйишган.Орадан 2 ҳафта ўтиб Земмельвейс вафот этган.

Оналар ва болалар ўлими кўпаявергач, 18 йил ўтиб унинг назариялари амалиётга тадбиқ қилина бошлаган. Унинг шарофати билан ўша пайтлар оналар ва чақалоқлар ўлими 7 марта(!) га камайган. Бугун Будапештда унга қўйилган ҳайкалга "Оналар ҳалоскори" деб ёзилган..

@kitoblog Ochish/sharhlash

2021-02-12 06:36:35 ​ Ҳ.Ҳессе — Чўл бўриси.

Инсон ўзини буткул маънавиятга бағишлаш, илоҳийликка яқинлашишга ҳаракат қилиш, тақводорликка берилиш имкониятларига эга. У аксинча, ўз имкониятларини бутунлай жинсий ҳаётга, кўнглининг майл-истакларини қондиришга йўналтириши, ўзининг бутун интилишларини бир зумлик ҳою-ҳавасларга, кайф-сафо, маишатга сарф этиши ҳам мумкин.

Биринчи йўл тақводорликка, руҳнинг шу йўлда жафо чекишига, ўзни ўзига топширишга олиб боради. Иккинчи йўл эса бузуқликка, ҳою-ҳаваслар азобига, ўзни айнишга, бузилишга, таназ зулга маҳкум этишга элтади.

Оддий фуқаро иккаловининг ўртасида мўътадил, холисона яшашга ҳаракат қилади. У ҳеч қачон на кайф, на тарки дунёчиликдан воз кечади, у ҳеч қачон жафокаш тақводор бўлолмайди. Ўзининг маҳв этилишига ҳам рози бўлмайди, аксинча, унинг омоли садоқат, фидокорлик эмас, балки ўз «мен»ини сақлашдир.

Унинг интилиши илоҳийликка ҳам, унинг аксига ҳам дахлдор эмас, чексизлик унинг учун жуда оғир. У, албатта, Яратганнинг измида бўлади, лекин шу билан бирга, кайф-сафони ҳам эсдан чиқармайди. У ҳимматли, саховатли бўлиш билан биргаликда, Ер юзида бир оз яхши яшашни ҳам хоҳлайди.

Қисқаси, у қарама-қаршиликлар ўртасидаги муҳитда, кучли бўронлар ва момақалдироқлар бўлмайдиган ўртамиёна, холисона ва қулай жойда қўним топишга ҳаракат қилади. Бироқ чексизлик ва ноиложликка йўналтирилган ҳаётбахш этадиган ўша турмуш ва ҳис-туйғулар жўшқинлиги эвазига бунга муваффақ ҳам бўлади. Қизғин ва жўшқин яшаш мумкин, фақат энди «мен» эвазига.

Фуқаро энди «мен»дан, ҳар ҳолда ўсмай, ривожланмай қолган «мен»дан бошқа ҳеч нарсани тан олмай қўяди. У энди жўшқинлик эвазига хотиржамлик ва хавфсизликка эришади. Яратганга астойдил сиғиниш ўрнига виждон хотиржамлигини қўлга киритади, хурсандчилик ўрнига ҳузур-ҳаловатга, эркинлик ўрнига қулайликка, ўлим талвасасида куйиб-ёниш ўрнига ёқимли ҳароратга эга бўлади...

@kitoblog Ochish/sharhlash

2021-02-11 14:13:11 Shuni oʻylab qolaman. Ichki ziddiyatlariga oʻralashib, bundan qandaydir noyob asar yaratishga shoshiladiganlar XX asr psixologlarining asarlarini bir oʻqib chiqsa, oʻziniyam, oʻquvchilarniyam umrini tejagan boʻlardi. Koʻpchilik azoblarining hech qanday romantikasi yoʻq. Ochish/sharhlash

2021-02-11 10:50:15 Агар кунига 25 бетдан ўқисангиз бу ойига 750 бет дегани. Яъни 2-4 та китоб.

Йилига эса 9100 бет дегани яъни 30-40 та атрофида китоб. Демак, бир йилда 30+ китоб ўқиш унчалик мушкул эмас. Баъзилар ойига ҳам 10 дан ошиқ китоб ўқиши мумкин. Аммо, ўзингизни мажбурламанг. Китобни росмана роҳат олиб, мағзини чақиб ўқинг.Ойига 2-3 та, йилига 30 та ҳам яхши натижа.

@kitoblog Ochish/sharhlash

2021-02-10 15:14:44 ​ Стив Жобс—Уолтер Aйзексон
#Бир_дақиқада_бир_китоб

Китобдаги асосий фикрлар:

Стив Жобс қандай инсон эди.

Болаликдан Стивга ақл бовар қилмас қатъият хос эди. У ҳеч қачон бошқалар хоҳлаган нарсани қилмаган, лекин бирон қарорга келиши билан у ҳар қандай йўл билан мақсадига эришарди.

Жобс бошқа одамларнинг ҳис-туйғуларини жуда яхши ҳис қиларди, одамларнинг заиф томонларини сезувчи ғайритабиий қобилиятга эга эди. Стив одамни қандай камситишни, уларни ерга уришни яхши биларди. У қўл остидагиларга асоссиз равишда қўпол муносабатда бўлган. Aммо, агар ходим ўзини хотиржам тутса, ишни тўғри ва самарали бажарса, Жобс уни ҳурмат қила бошларди.

Стив Жобс ўзлигини излашдан тўхтамасди: у зен-буддизмга эътиқод қилар ва AҚШдаги Буддист коммунада ҳам истиқомат қилади. У тажриба қилишдан қўрқмасди: очликни синаб кўрганди, турли хил парҳезлар ("Apple" номи олма парҳези туфайли пайдо бўлган) ва уйқусизликни синаб кўрганди. Стив сабрсиз ва кескин кайфияти билан ажралиб турарди.У агар нимадир у хоҳлагандек бўлмаса, тез-тез йиғлар ва омма олдида жазавага тушиб қоларди.

Стив Жобснинг ғоялари:

— Биз ҳамма нарсани яхши қилишимиз керак, ҳатто ҳеч ким кўрмайдиган нарсани ҳам.

— Биринчи даражали маҳсулотни яратиш учун фақат энг яхши ходимларни ишга ёллаш керак.

— Раҳбар барча жараёнларда иштирок этиши керак.

— Сиз ўзингиз эга бўлишни истаган маҳсулотни яратишингиз керак.

— Дизайн технологияни бошқариши керак.

— Ҳақиқий санъаткорлар ҳамма нарсани соддалаштирадилар. Жобс ҳамма нарсада: компанияни бошқаришда, маҳсулотни лойиҳалашда, муваффақият калити— рекламада ҳам оддийлик лозим деб ҳисобларди.

— Aгар биз ўзимизга зарар етказмасак, буни бошқа биров амалга оширади. Умуман олганда компанияга бир бутун сифатида қараш Жобсга ўз рақобатчиларидан сезиларли устунликни берганди. У глобал даражада фикрлар, iPhone-нинг чиқарилиши iPodнинг сотилишини камайтиради ва iPad эса ноутбукларнинг сотувига зарар етказади деб қўрқмаган.

- Харидор ҳар доим ҳам хақ эмас. Жобсдан "Сиз маркетинг тадқиқотларини ўтказасизми?" , деб сўрашганда, Жобс "Йўқ, чунки биз истеъмолчига кўрсатмагунимизча у ўзи нимани хоҳлашини билмайди" деб жавоб берган.

@kitoblog Ochish/sharhlash

2021-02-10 10:12:03 ​​ Ж.Селинжер—Жавдарзордаги халоскор

Бу асарни анчадан бери турли рейтинглар юқори топларида кўрганимда, "ўқишим керак" деб юрардим. Ўзбекча таржимаси чиққач, эса китобхонларнинг турли қарама қарши фикрлари эса ҳайратимга сабаб бўлди. Тармоқда кимдир асарни мақтар, Ҳолденни жуда яхши кўриб қолганини таъкидласа, бошқалар эса асарда оддий маиший воқеалар тасвирлангани ва ҳаёсиз парчалар кўплигини айтиб танқид қиларди.

Шундай ҳиссиётлар билан асарни бошладим. Дастлабки 50-80 бетгача асар мени ўзига тортиб кета олмади, аммо шундан кейин қизиқишим ошиб, қолган ярмини бир кечадаёқ тугатиб қўйибман.

Ҳа ростан ҳам асар одатий бир ўсмир, ёшнинг бир неча кунлик кўрган кечирганларини тасвирлайди. Бундай олиб қараганда оддий, маиший сюжет. Аммо, бу каби асарларниг мураккаблиги ҳам балки шунда, воқеалар ортидаги маънони ўзингиз англаб олишингиз керак. Ҳолден каби кўплаб ёшлар ўз ҳисларини аниқ билдира олмайди. Кимнидир яхши кўриши, нафратланишини сўз билан эмас ҳаракатлари билан кўрсатиши мумкин ҳолос. Айниқса Ҳолден ва синглиси ўртасидаги муносабат, меҳр оддий вазиятларда(акасига қалпоғини бериши, Ҳолденнинг хати) билинади. Умуман асарда ўсмирнинг ҳаётга, анъанавий қарашлар ва мунофиқликларга бўлган исёнини яққол кўриш мумкин. Унинг мактабдан кетиши аслида шунчаки мактабга эмас, балки ҳаётдаги соҳталикка,  адолатсизликларга қўл силташи эди. Бундай муносабат асли кўпларнинг бошидан ўтган. Шунчаки бизнинг мисолда бу мактаб, ўқитувчилар эмас, балки ҳаёт, атрофимиздаги одамлар ва амалдорлар бўлади, кўпинча.

Шунингдек, асарда ҳақоратлар, сўкинишлар, очиқ саҳналар ҳам жуда кўп учрайди.  Лекин бу асарнинг янада ҳаётийлигини таъминлайди, балки оригиналида бу нарсалар асарга янада табиийлик бергандир.

Айни мана шу каби жиҳатлар сабабли ҳам асар ўқувчиларда 2 хил таасурот қолдирса керак. Кимдир сюжетга юзаки баҳо беради ва уни бошқа психологик-фалсафий асарлар билан солиштириб, "енгил асар" дейди. Аммо, бошқаларга у дилдан ёқиб қолади қахрамонларга ўзгача меҳр беради. Камюнинг "Бегона" си, Довлатовнинг "Чемодани"  ҳам шундай асарлардан. Шунчаки сюжет, ортиқча ички кечинмалар, фалсафа ёзилмаган. Аммо, улар асарда бор ва шунчаки сюжет ортидаги кичик воқеаларда тасвирланган. Шу сабаб ҳам балки Бегонани кўплар тушунмас. Мерсо ёки Ҳолденни ёмон кўрар, салбий қахрамон деб баҳолар. Аммо, бундай асарларда салбий ёки ижобий образлар бўлмайди, шунчаки образ бўлади. Қахрамонни тушуниш ёки тушунмаслик ўқувчининг ўзига ҳавола.

Асар менга ёқди, бемалол бошқаларга тавсия қила оламан. Айниқса ёшлар ўқиса кўплаб кечинмаларига жавоб олади, балки.

@kitoblog Ochish/sharhlash

2021-02-10 07:22:29 Китобдан бошни кўтариб, интеллектуал ўйинга олға . Ростини айтганда Заковат янги сифат ва куч билан қайтмоқда. Совринлар ҳам анча катта! Барча ўз кучини синаб кўриши мумкин! Балки 100 000 000 га сиз эга чиқарсиз

@kitoblog Ochish/sharhlash