Futgolium

2021-07-18 09:27:43 ​Маоши камайиши мумкин бўлган Роналду, бойваччага айланаётган осиёлик ва яна бир трансферни оширишга яқин “Милан”

Кечагина Роналдунинг “Ювентус”да қолиши ҳақида ёзган эдик. Италиялик инсайдер Никола Скира Криштианунинг Туринда яна бир мавсум эмас, яна икки йил қолиши мумкинлиги ҳақида хабар берди. Унга кўра Роналду тез орада “Юве” раҳбарияти билан шартномасини 2023 йил ёзига қадар узайтиришни муҳокама қилади. Агар Роналду янги битимга кўнса, у ҳолда унинг йиллик 31 миллион евродан 20 миллион еврога пасаяди. 36 ёшда бўлса ҳам гол уришдан тўхтамаётган супертўпурарнинг топаётган пулларига барака тилаймиз. Яхши кунларига ишлатсин.

Ҳатто “Арсенал” ҳам кўпмиллионли трансферларга пул бор! Арсен Венгер даврида трансферларга зиқналиги билан танилган “Арсенал” не ажабки, тез орада 50 миллион фунтга ҳимоячи сотиб олади. Бу пуллар “Брайтон”нинг 23 ёшли ҳимоячиси Бен Уайт учун сарфланмоқда. Уайт бу пулларни оқлайдими ёки йўқ буни, албатта, вақт кўрсатади. “Тўпчилар” мухлисларига эса бошга тушганини кўз кўрар дейишдан ўзга иложимиз йўқ.

“Интер” Ҳакимининг ўрнига кимни олиб келади? Миланликлар Ашраф Ҳакимини “ПСЖ”га сотиб, ўз ғазнасини қарийб 70 миллион еврога бойитиб олди. Энди эса унинг ўрнига Эктор Белерин ёки Алекс Теллесни олиб келиш ҳаракати бошлангани маълум бўлди. Бу танловда Белерин варианти анча ҳақиқатга яқин келмоқда. Боиси Теллесни “МЮ” ижарага бериш эмас, фақат сотишни ўйлаётгани ҳақида аввалроқ ёзгандик. Ким келса, ҳам ёш ва навқирон Ҳакимининг ўрнини боса олиши анча мураккаб вазифа бўлади. Аммо келадиган азаматга омад тилаймиз, холос.

Осиёнинг айни дамдаги энг яхши ўйинчиси ҳам бойваччага айланадиган кўринади. Сон Ҳён Мин “Тоттенҳэм” билан шартномасини 2025 йил 30 июнига қадар узайтириши кутилмоқда. 29 ёшли футболчи агар “шпролар” билан келишувга эришса, у ҳолда унинг йиллик моянаси 12 миллион еврони ташкил этадиган бўлади. Ёмон эмас-а! Нималар деяпман! Ахир бу даҳшат-ку! Қаддингни ур, Сон!

“Милан” ҳужумчидан сўнг ҳимоячи билан шартнома тузади. Оливьер Жиру трансферини еълон қилган “россонерилар” энди “Монако”дан сенегаллик 24 ёшли ҳимоячи Фоде Балло-Турени олиб келиши аниқ бўлиб турибди. Футболчи билан 2025 йил 30 июнига қадар шартнома тузилиши кутилмоқда. Князлик клуби бу трансфердан 4 миллион еврога эга бўлади.

Ҳозирча шулар! Яна кўришамиз, азиз мухлис!

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-18 05:22:59 Футбол тарихидаги энг узоқ масофадан урилган гол кимга тегишли эканлиги ва уни қачон, қайси жамоанинг дарвозасига урилганини биласизми?

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-18 05:13:25 ​“Бавария” дарвозасига урилган шедевр гол

Европа клублари ҳам мавсумга тайёргарликни бошлаб олди. Кечаги куннинг икки воқеаси, албатта, эътиборимизни тортмай қолмади. Биринчиси, Элдор Шомуродовнинг “Женоа” сафида Австриядаги йиғин доирасида маҳаллий “Штубай” (5:0) дарвозасини ишғол қилгани ва майдонда янги рақамда (11) пайдо бўлгани бўлса, иккинчиси “Бавария” ўртоқлик ўйинида “Кёльн”га (2:3) ютқазганидир. Марк Ут эҳтимол кечаги куннинг энг чиройли голини урди. Унинг шедеврини қуйида томоша қилишингиз мумкин. Десертига эса ўзимизнинг Шомуродов голи!

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-17 15:22:13 ​“Милан”да қариялар тандеми, “ПСЖ”нинг ожиз миллионлари, омадсизлар рокировкаси ва “Сити”га рақобатчи топилгани ҳақида

Куннинг яна муҳим хабарларини битта постга жамлашга аҳд қилдик. Ёқса, улашиш текин, азиз мухлис

Оливье Жиру расман “Милан” аъзосига айланди. У янги клуби сафида 9 рақам остида ҳаракат қиладиган бўлди. “Милан” мухлисларини яна бир “қария” футболчи трансфери билан табриклаймиз. Энди “россонерилар” ҳужум чизиғида 34 ёшли Жиру ва 39 ёшли Златан (у октябрда 40 га киради) биргаликда ҳаракат қилиши мумкин. Омадларини берсин!

“ПСЖ”нинг миллионлар ҳам коронавирус олдида ожиз. Париж клубининг кўпмиллионли хариди Ашраф Ҳакими коронавирусга йўлиқди. 22 ёшли футболчи айни чоғда изоляцияга олинган. У “ПСЖ”нинг “Шамбли”га қарши ўртоқлик ўйинини ўтказиб юборади ва дебютини кутишга мажбур бўлади. Нима ҳам деймиз, ўзингизни бу боладан эҳтиёт қилинг, ниқоб тақинг ва эмланинг деб қоламиз!

Сотиб олиш эмас, сотиш ҳақида ҳам ўйлаб турадиган “Ман Сити”. Кеча “Сити”нинг Ҳарри Кейн ва Жек Грилиш трансфери учун 200 миллион фунт сарфлашга тайёрлиги ҳақида ёзгандик. Маълум бўлишича, “шаҳарликлар” асосий таркибнинг 1-2 нафар футболчиси ва шунингдек, Янхел Эррера, Иван Илич, Морган Рожерс, Патрик Робертс каби футболчиларини сотиб 50 млн фунт атрофида маблағ жамғаришни ният қилган. Албатта, сотиб олиш учун баъзида бой бўлсанг ҳам сотиб туриш керак. Ахир ётиб еганга тоғ ҳам чидамайди деб бежиз айтишмаган.

Омадсизлар рокировкаси. “Ювентус” ўтган йили “Барселона”га “бадарға қилинган” Миралем Пянични ортга қайтариш ниятида экан. Туринликлар ўтган йили унинг ўрнига келган Артур 3 ойга сафдан чиққани учун шу қарорга келган. “Кекса синьора”да Пянич трансфери учун пул йўқ, аммо улар футболчи алмаштириш таклифини илгари суради. Пянич ўрнига Туринда ўз ўрнини топа олмаган Аарон Рэмзи таклиф этилади. “Барселона” бу трансферга нима дейиши эса олий ҳакам — вақтга боғлиқ.

Ҳаммаси келишилган. “Манчестер Юнайтед” ва “Реал” Рафа Варан трансфери юзасидан келишувга эришди. Унга кўра Мадрид клуби ушбу келишувдан 58 миллион еврога эга бўлади. 28 ёшли Варан Манчестер клубида йилига 12 млн евро маош олади ва 5 йиллик шартномага имзо чекади. Таъкидлашларича, “Реал” 10 йилдан бери Мадридда бўлган Варанга йилига 7 миллион евролик маош ва 4 йиллик янги битим таклиф қилган. Бироқ Рафа бунга рози бўлмаган. Хуллас, ўша гап нима бўлса ҳам бахтли бўлинглар, қўша қаринглар!

Кутилмаган харидор. Ҳарри Кейн учун курашга “Челси” ҳам қўшилди. “Ман Сити” асосий даъвогар сифатида қаралаётган футболчи учун энди яна бир жиддий харидор бор. “Тоттенҳем” президенти Дениел Левига “Челси” варианти кўпроқ ёқаётгани ҳақида ёзишмоқда. “Аристократлар” Кейн трансферига пулдан ташқари Темми Абраҳамни ҳам қўшмоқчи эканлиги Левига хуш ёққан. Кўрамиз, кузатамиз, бу сериал нима билан тугар экан!?

Ҳозирча шулар, биз фақирларни кузатиб бораётганлингиздан мамнунмиз!

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-17 09:34:57 149:0 — Футбол тарихидаги энг йирик ҳисоб!

Бундай ҳисоб қайд этилишига нима сабаб бўлган? Бундай йирик ҳисобда қаерда ва қайси жамоалар ўртасида қайд этилган?

Биласизми?

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-16 22:05:36 ​ЕЧЛнинг мезбон шаҳарлари, бир қарорга келган Роналду, “Сити”нинг миллионлари ва барчасига нуқта қўйган Гарай

Куннинг энг муҳим хабарларини битта постга жамлашга ҳаракат қилдик, азиз мухлис. Марҳамат, ёқимли иштаҳа!

УЕФА катта клубларнинг аксарияти дам олаётган бир вақтда Чемпионлар Лигасининг кейинги 4 йилдаги финалларига мезбонлик қиладиган шаҳарларни тасдиқлаб қўя қолди. Демак, мезбон шаҳарлар билан танишинг:

2022 йил — Санкт-Петербург
2023 йил — Истанбул
2024 йил — Лондон
2025 йил — Мюнхен

Криштиану Роналду “Ювентус”даги келажаги борасида бир қарорга келди. La Gazetta dello Sport нашрига кўра португалиялик юлдуз 2022 йил 30 июнига қадар клубда қолишга қарор қилган ва бу борада клуб раҳбариятини ҳам огоҳлантирган.

“Атлетико” ва “Барселона” Гризманн ҳамда Саулни алмаштириши кутилмоқда. Саулнинг агенти ҳозирча ҳеч нарса ҳал қилинмаганини айтиб турибди. У агар мижози кетишга қарор қилса унинг олдида “Барселона”дан ҳам бошқа вариантлар кўплигини таъкидлаган.

“Шпорлар”нинг янги устози Нуну Эшпириту Санту Ҳарри Кейннинг жамоада қолишига умид қилаётган бир вақтда, “Манчестер Сити”нинг Англия терма жамоаси ҳужумчисидан воз кечмагани маълум бўлиб қолди. The Athletic нашри шайхлар қўлидаги клубнинг Ҳарри Кейн ва Жек Грилиш трансфери учун 200 миллион фунт стерлингдан воз кечишга тайёрлигини ёзди. “ Астон Вилла” Грилишни 100 млн фунтга сотишга тайёр турган бир вақтда, Кейн учун таклиф этилган худди шунча суммадан “Тоттенҳэм” аллақачон воз кечиб бўлган. Яна бир орада “Сити” агар Кейнни олиб кела олмаса, “Бавария”дан Роберт Левандовскини сотиб олишга ҳаракат қилиши ҳақида хабарлар ҳам пайдо бўлди.

Оливьер Жиру яқин соатларда “Милан” футболчиси сифатида таништирилади. Француз аллақачон “Челси” мухлислари билан хайрлашишга улгурди.

“Манчестер Юнайтед” ўтган йили “Порту”дан олиб келган ва асосий таркибдан муқим ўрин ола билмаган Алекс Теллесни ижарага бермаслиги маълум бўлди. Инсайдер Фабрисио Романо Манчестер клуби Теллесни сотишдан бошқа вариантларни кўриб чиқмаслигини таъкидлаган. Айни дамда футболчининг агенти мижозига янги жамоа қидириш билан банд.

Мауро Икарди Италияга қайтиши мумкин, фақат “Интер”га эмас, балки “Ювентус”га. “ПСЖ” агар Икардини А Сериянинг бирор клубига сотадиган бўлса, у ҳолда “Интер”га 15 миллион еворни қуртдек санаб беришга тўғри келади. Чунки Париж клуби Икардини “Интер”дан сотиб олаётганда келишувга шундай банд киритилган.

Есекиел Гарай 34 ёшида футболчилик фаолиятига нуқта қўйди. Аргентиналик ҳимоячи сўнгги 3 йил жароҳат билан курашгани ва энди оғриқларга чидай олмаётгани сабаб якуний қарорга келган. Гарай “Расинг”, “Реал Мадрид”, “Бенфика”, “Зенит” ва “Валенсия” клубларидаги фаолияти билан сиз мухлисларга яхши таниш.

Бизда ҳозирча шулар, азиз мухлис! Тонгда насиб қилса, яна бир ғойибона суҳбатлашамиз!

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-15 19:10:32 ​Шунақаси ҳам бўлиб туради: “Барселона” ўзининг энг бойвачча футболчисини трансферга қўйворди

Кечагина “Барселона”нинг энг бойвачча футболчиси — Мартин Брейтуэйт ҳақидаги материални эълон қилган ва унинг нималардан даромад қилишини ёзгандик.

Испан нашрларига кўра “Барселона” даниялик “олтин бош”ни трансферга қўйибди. Шундай бўлиши аниқ эди, чунки жамоа мавсум бошланмасидан ҳужум чизиғини янгилаб улгурди: бир йўла икки футболчи текинга олиб келинди — Серхио Агуэро ва Мемфис Депай. Камига Антаун Гризманнинг ҳам Саулга алмаштириши кутилмоқда.

Каталонияликлар аллақачон ортиқча бўлиб қолган Брейтуэйт трансферидан 15 миллион евро ишлаб олишни кўзлаган. Бойваччага айни дамда Англиянинг ўртаҳол клублари — “Вест Ҳэм”, “Норвич” ва “Брайтон” қизиқиш билдириб турибди. Шунингдек, “Валенсия” ҳам бор. Бироқ лақаби бирам хунук бўлган бу клуб (“кўршапалаклар”) Мартинни фақат ижарага олишга қурбилари етишини маълум қилган.

Маълумотча ўрнида қабул қиласиз: 30 ёшли даниялик ҳужумчи ўтган мавсумда “Барселона” сафида 42 та ўйиннинг баъзиларида тўлиқ, кўпларида эса захирадан майдонга тушиб 7 та гол урди ва 4 та голли узатма бериб қўйган.

Даврамизда болалар билан ҳазиллашиб турамиз: Мартинни эркалаб “Олтин тўп”нинг янги эгаси деймиз. Нима бўлганда ҳам бойваччага қаерга борса ҳам тошдек қотишини тилаймиз.

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-15 19:10:30 ​Ўз сиёсатидан воз кечган ва кечмаган “Реал”

“Реал” бир неча йиллар олиб борган “энг зўрини сотиб ол” деган трансфер сиёсатидан воз кечганига анча бўлди. Ора-сирада қилинган (масалан, Эден Азар) кўпмиллионли трансферлар ҳам бу гапимизни рад эта олмайди. Ҳар ҳолда клуб раҳбарияти асосий эътиборини энди чиқиб келаётган “умидли ёшлар” (Винисиус, Родриго)ни овлашга қаратаётгани айни ҳақиқат.

Бу сиёсат фонида Мадрид клуби ўзининг “ветеран”ларидан қилган хизматларига қарамай воз кечишда давом этмоқда. Раул, Касиляс ва яқиндагина Рамос. Уларнинг нима ишлар қилганию ва қай тариқа клубдан кетганидан хабардорсиз. Рамосдек том маънодаги катта футболчининг кетиши “Реал” учун биринчиси ҳам, охиргиси ҳам эмас. Навбатдаги “Рамос” эса Рафа Варан бўлиши кутилмоқда. Франциялик футболчининг “қироллик клуби” билан шартномаси 2022 йил 30 июнида якунига етади. “Реал” эса уни ҳам текинга қўйиб юборишдан кўра ҳозироқ сотиб юборишни маъқул кўрмоқда. Эндигина 28 ёшни қоралаган Варан 10 йилдан бери Мадрид сафида. Унинг ўзи ҳам янги қон, янги нафас ва янги жамоага қарши эмаслиги сўнгги чиқаётган хабарлардан ҳам маълум.

Маълумотларга кўра “Манчестер Юнайтед” Вараннинг ўзига 5 йиллик шартнома таклиф қилган. Рафа катта эҳтимол билан бу таклифга розилик беради ва йилига 12 миллион евролик маошни қуртдек санаб олади.

Хўш, Вараннинг кетиши “Реал” учун фожиа бўладими? Бизнингча, йўқ. Фожиа бўлганида Касиляс, Раул ёки Роналду кетганида бўларди. Жамоа эса ҳамон мавжуд. Совринлар учун курашда давом этмоқда. Вараннинг ўрнига катта эҳтимол билан унинг ватандоши Жюл Кунде олиб келиниши мумкин. Кунде ва ўтган мавсумда Рамоснинг йўқлигини билдиришни қайсидир маънода уддалай олган Эдер Милитаодан иборат ҳимоя жуфтлиги рақиб ҳужумчилари учун яхшигина бош оғриқ бўлиши мумкин.

Бу шахсий фикрлар, холос. Унга қўшилмасликка тўла ҳақлисиз. Яна насиб қилса, ғойибона фикрлашамиз, азиз мухлис!

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-15 15:14:10 ​Либосдаги харита. Клуб янги либосини оддий мухлис ўйлаб топгани ҳақида

Бразилияда “Атлетико Минейро” деган клуб бор. Балки, эшитгандирсиз. Ўша клуб 2021/22 йилги мавсум учун либосини тақдим этди. Хўп, нима бўлибди дерсиз? Қизиғи шундаки, бу либослар тўпламини оддий мухлис ўйлаб топган.

“Атлетико” кетма-кет иккинчи йил мухлислар ўртасида клуб либоси учун махсус танлов ўтказиб келмоқда. Исталган киши ўз эскизини юбориши мумкин. Улар ичидан энг яхшисини эса мухлисларнинг ўзи танлайди. Ташкилотчилар бу йилги танловда 559 турдаги дизайнни қабул қилди. Улардан 13 таси эса финалга йўл олди. Овоз берувчилар сони эса 60 мингга яқин кишини ташкил қилди.

Ғолиб эса Лукас Адриано исмли йигит бўлди. Айнан унинг лойиҳаси спорт либосларини ишлаб чиқарадиган Le Coq Sportif компанияси эътиборини ҳам ўзига торта олди.

Либоснинг асосий қисмидан Минас-Жерайс штати харитаси ўрин олди. “Атлетико” эса ушбу штатдаги Белу-Оризонти шаҳри жамоаси ҳисобланади.

Либоснинг орт қисмида қизил учбурчак шакли ўрин олган. Бу эса штат байроғини ўзида акс эттирганлигини англатади. Либоснинг пастки қисми ўнг тарафида 113 рақами ҳам акс этган. Бу эса клубнинг 113 ёшда эканлигини англатади. Либосдаги хўроз шакли эса Le Coq Sportif компанияси рамзи ҳамда “Атлетико” тимсолидир. Клубнинг лақаби ҳам “хўрозлар”.

Мухлислар ушбу либослар тўпламини кўтаринкилик билан кутиб олди. Бир сутка ичида ушбу футболкалардан 35 мингтаси сотилиб кетди.

Хуллас, мухлисларга ҳам мана шундай ишонч билдиридаган клублар кўпаяверсин деб қоламиз. Зеро футбол биринчи навбатда мухлислар учун ўйналади.

Каналга уланиш https://t.me/joinchat/csS83QbVtskzNDE6 Ochish/sharhlash

2021-07-15 11:33:21 ​Ҳарри Кейн бўлмаса, бошқаси бор

Ҳа, “Манчестер Сити”нинг Ҳарри Кейн борасида “Тоттенҳэм”га юборган таклифлари ҳозирча қабул қилинмади ва катта эҳтимол билан қабул қилинмаслиги ҳам мумкин.

Чунки “шпорлар” президенти Дениел Леви ўта қайсар раҳбарлардан бири. Кейн жамоани тарк этиб, соврин ютиш истагида бўлса ҳам Леви уни қўйиб юбормаслик аҳдида қатъий турибди.

Қайд этиш керак, “шаҳарликлар” Кейн учун Евро—2020 мусобақасидан олдин Лондон клубига 117 миллион евро таклиф юбориб, рад жавобини олганди.

Араб шайхлари раҳнамолигидаги клуб бу вазиятдан чиқиб кетиш йўлида яна бир вариант топди. Маълумотларга кўра, пулдан муаммоси йўқ “Сити” “Бавария” голеадори Роберт Левандовскини Манчестерга кўчириб келиш вариантини кўриб чиқаётган экан. Мюнхенликлар эса Леванинг жамоадан кейинги ёзда текин кетмаслиги учун яхшигина пул эвазига сотиши мумкинлиги ҳақида таъкидланмоқда.

Маълумот ўрнида айтиб ўтишимиз керак, Левандовски ўз вақтида Мюнхен клубида айни дамдаги “Сити”нинг устози бўлган Хосеп Гвардиола билан бирга фаолият олиб борган.

Хуллас, Леви Кейнни олиб қолмоқчи экан, “шаҳарликлар” учун бу унчалик муаммо эмаслигини мана шундай хабарлардан ҳам билса бўлади.

Бизни кузатишда давом этинг!

Каналга уланиш https://t.me/joinchat/csS83QbVtskzNDE6 Ochish/sharhlash