2023-01-18 07:09:05
Илғор тажрибаларни татбиқ этиш борасида манфаатли ҳамкорлик мустаҳкамланади.
Шу кунларда давлатимиз раҳбарининг Сингапур мамлакатига ташрифи халқимизнинг фаол қатлами ва дуне жамоатчилигида катта қизиқиш уйғотди. Бу бежиз эмас.
Сингапур аҳолиси (6 млн киши) ва ҳудуди (1 минг км квадратга етмайди) анча кичик бўлишига қарамасдан, Осиё-Тинч океани минтақасининг иқтисодий марказига айланиб улгурган.
Бу мамлакат электроника, кимё саноати, биотехнологиялар, банк соҳаси, логистика ва транспорт машинасозлиги соҳасида катта муваффақиятларга эришган. Ялпи ички маҳсулоти ҳажми қарийб 400 млрд доллар бўлган йирик иқтисодий салоҳиятли мамлакатлардан бири. Бежизга Осие мўжизасини намоен этаетган давлатлар сирасига киритилмаган.
Ушбу мамлакат тажрибасини ўрганиш, ўзаро манфаатли ҳамкорликни мустаҳкамлаш тез сурьатларда ривожланиб бораетган Ўзбекистон учун муҳим аҳамиятли ва фойдали.
Давлатимиз раҳбари Сингапур Президенти, Бош вазири билан музокаралар ўтказган.
Президентимиз Сингапур билан яқин истиқболдаги ҳамкорликнинг бешта асосий йўналишини кўрсатиб ўтди.
Биринчидан, инсон капиталини ривожлантириш ва давлат бошқаруви учун юқори малакали кадрлар тайёрлаш.
Сингапурда туб ислоҳотларни амалга ошириб, бугунги тараққиетини таьминлашга улкан ҳисса қўшган арбоб - Ли Куан Ю номидаги Давлат сиёсати мактаби иштирокида бошқарув, шаҳарсозлик, инфратузилмани ривожлантириш, рақамли трансформация, инновациялар, таълим ва соғлиқни сақлаш соҳаларида биргаликда давлат хизматчиларини тайёрлаш ва уларнинг малакасини ошириш дастурини амалга оширишга келишиб олинди. Шунингдек, Ўзбекистон Давлат бошқаруви академияси негизида Сингапурнинг етакчи экспертларини жалб қилган ҳолда давлат хизматчиларини интенсив қайта тайёрлаш дастури ишга туширилади.
Иккинчидан, Сингапурни Ўзбекистондаги хусусийлаштириш жараёнларига жалб қилиш. Сингапурнинг етакчи компаниялари илғор тажрибаси, замонавий технологиялари ва бошқарув усулларидан фойдаланган ҳолда Ўзбекистоннинг йирик корхоналарини хусусийлаштириш доирасидаги лойиҳаларни амалга ошириш истиқболлари муҳокама қилинган. Давлат корхоналарини трансформация қилиш ва таркибий ўзгартириш, кейинчалик уларни IPOга чиқариш ва ташқи инвестицияларни жалб қилиш учун қўшма Инвестиция жамғармасини тузиш таклиф қилинди.
Учинчидан, илғор «яшил» технологиялар ва рақамли ечимларни жалб қилиш. Сингапурнинг рақамлаштириш соҳасидаги ютуқларини жорий қилиш, шунингдек, ушбу мамлакатнинг «яшил» ривожланиш бўйича инновациялари ва технологияларини қўллаш имкониятлари муҳокама қилинган.
Тўртинчидан, шаҳар инфратузилмаси ва коммуникацияларни такомиллаштириш. Шаҳарларни режалаштириш ва қурилиш, кўкаламзорлаштириш, коммунал хўжалик соҳаларида ҳамкорлик бўйича тадбирлар келишиб олинди. Ўзбекистонда инфратузилма ва тармоқ лойиҳаларини амалга ошириш бўйича қўшма Лойиҳалаштириш ва инжиринг марказини ташкил этиш бўйича келишув бу борадаги биринчи қадамдир.
Бешинчидан, инвестициялар ва ўзаро савдони кенгайтириш, Сингапурнинг етакчи компаниялари билан қўшма лойиҳаларни илгари суриш муҳимлиги қайд этилди.
Устав капитали 500 миллион доллар бўлган Ўзбекистон-Сингапур инвестиция компаниясини ташкил этиш юзасидан келишувга эришилди.
Бундан ташқари, томонлар халқаро ва минтақавий кун тартибининг долзарб масалалари юзасидан фикр алмашдилар.
Ташриф жараенида Ўзбекистон-Сингапур ҳамкорлигини янада кенгайтиришга қаратилган саккизта ҳужжат имзоланган.
Жумладан таълим, транспорт, соғлиқни сақлаш, кадрлар, шу жумладан давлат хизматчиларини тайёрлаш соҳаларида ҳамкорлик тўғрисида битимлар қабул қилинган. Савдо-иқтисодий шериклик ҳамда икки мамлакат прокуратуралари ўртасидаги ҳамкорлик бўйича келишувларга эришилган.
Сингапур билан ҳамкорлик қилиш, тажриба алмашиш ва илғор ютуқларни олиш мамлакатимиз ривожи учун манфаатли бўлади.
@a_xaitov
146 views04:09
A
