Shaxsiy Blog1

2022-07-02 18:29:05 Bir xalqaro tashkilot tomonidan oʻtkazilayotgan tadbirda ilmiy ishim mavzusida chiqish qilib berishimni iltimos qilishdi. Bordim. Chiroyli tadbir boʻldi. Faqat... davlat telekanalidan kelgan texnik xodimlar biroz “qiynalishdi”:
roʻmolli spiker tasvirga tushib qolmasligi uchun, kameralarini koʻtarib dam u yoqqa oʻtishadi, dam bu yoqqa oʻtishadi.
Uning ustiga, men boshimdagi “dahshatli” roʻmolim bilan bir vazirlikdan kelgan opaning yonida oʻtiribman. Opani tasvirga olmasa boʻlmaydi. Meni tasvirga olsa, yana boʻlmaydi.

Xullas, tadbir orasida – kofe breyk paytida, yaʼni tadbir ishtirokchilari zaldan chiqib ketgan payt oʻsha opadan intervyu oladigan boʻlishdi. Opaning beli ogʻriyotgan ekan, tik turib intervyu berishga koʻnmadi. “Shu joyda oʻtirib gapiraveraman”, dedi.
Oldin opani boshqa spikerlar bilan gaplashib turgan holatini tasvirga oladigan boʻlishdi. Soxta bir koʻrinish tashkillashtirishmoqchi, yaʼni.

Meni qitmirligim tutdi - joyimdan qoʻzgʻalmay oʻtiraverdim. Muxbir qizcha nima qilishini bilmay, yuzida soxta tabassum bilan yonimga keldi (oʻlganining kunidan jilmayyapti, bilib turibman).
Egilib, qulogʻimga pichirladi:
- Opajon, kofe breykka chiqmismi?
- Rahmat-e mehribonchilik uchun. Hech nima yegim yoʻq. Shu yerda oʻtirib turaqolaman. Ana, boshqa spikerlaram shu yerda.
- Hmm... anavi... hmm... Man opadan intervyu olishim kereydi-de...
- Marhamat! Bunga qarshiligim yoʻoʻ. Olovrilar.
- Sal chetrooda oʻtirip turomismii...
- Haaa... voyyy... Fonni buzyappanmi? Roʻmolim dahshatli koʻrinyaptimi? – pichirladim menam ovozimga vahimali tus berib.
Qizposhsha qip-qizarib ketdi.

Buyam bir buyruq bajaruvchi-da, kel shuni qiynamay, deb tashqariga yoʻnaldim. Eshik tagida yana bir muxbir yigitcha turgan ekan.
- Opajon, - dedi, - rosa zoʻr chiqish qildiz, - dedi. – Agar roʻmolizzi orqadan oʻrab tursez, sizdan intervyu olardik, - dedi.

Hali javob qilishga ulgurmasimdan, bir odam lip etib roʻparada paydo boʻldi-da:
- Zoʻr mutaxasisakansiz, - dedi. – Shu... man bir narsaga hayronman-de, shunday bilimli ayollar nega roʻmol oʻravolasilar? Karera qilomisilarda keyin... Tilvizirga chiqomisilar...

Qarasam, bunga berilajak javoblar uvol.
- Bitta savol bersam maylimi sizga? – dedim.
- Bemalol, bemalol... – dedi.
- Agar miyangiz boʻlganida, “Ayol kishi nega roʻmol oʻraydi” degan savolga nima deb javob qilgan boʻlardingiz? A?.. Miyam bor, deb tasavvur qiling, mana...

Dilfuza Komil

https://t.me/joinchat/V9rOjjc2w___l0Xf Ochish/sharhlash

2022-06-25 14:54:30 Sen yaratgan olamu inson go'zal,
Sen yuborgan Mustafo, Qur'on go'zal,
Sen buyurgan har amal, iymon go'zal,
Ruhlar ichra sunganing vijdon go'zal,
Bu go'zalliklar jamolingdan Sening!

Har ishing, har so'zu ahkoming buyuk,
Ham jazoying, hamda in’oming buyuk,
Qilganing insonga ikroming buyuk,
Jannatingdek dini Isloming buyuk,
Bu buyukliklar jalolingdan Sening!

Sen yaratmish ikki dunyoying tugal,
Har sifoting, hamma asmoying tugal,
Barcha manglaylarda imloying tugal,
Dillar ichra chekkan imzoying tugal,
Bu tugalliklar kamolingdan Sening!

ⒸHusaynxon Yahyo Abdulmajid

https://t.me/joinchat/V9rOjjc2w___l0Xf Ochish/sharhlash

2022-06-22 10:47:50 TURKIYLAR

Qilichin tashladi beklar nihoyat,
bosildi tulporlar,
tigʻlar suroni,
urhoga oʻrgangan tillarda oyat,
turkiylar tanidi komil xudoni.

Qilichlar zangladi.
falokat hushyor,
turkiylar quvvatin berdi yerlarga.
Hiylagar doʻstlarday yaqinlashdi yov
komillik qidirgan jasur erlarga.

Ilvasin yigitlar,
bobir yigitlar,
sajdaga bosh qoʻydi yovga ters qarab,
gʻullarni kemirib yigʻladi itlar,
buyuk boshni kesdi qilich yaraqlab.

Turkda bosh qolmadi.. qolmadi dovlar.
xotin-xalaj qoldi motam koʻtarib,
“bizga tik qarama” buyurdi yovlar,
yovlarga ters qarab yashadi bari.

Talandi samoviy tulpor uyuri,
talandi zarlari,
zebu zabari,
ters qarab oʻling deb yovlar buyurdi,
yovlarga ters qarab jon berdi bari.

Lahadga kirdilar oʻzlarin qargʻab,
qolmadi arabiy,
turkiy xatlari,
tugʻingiz dedi yov teskari qarab,
yovlarga ters qarab tugʻildi bari.

Tugʻildi,
tugʻildi,
tugʻildi qullar,
qirqida qirilgan — imdodga muhtoj,
yovlarga ters qarab itlarday hurar,
bir-biriga dushman,
bir-biridan koj.

Joʻmardlar qirilgan Turonzaminda
doʻzaxiy tajriba pallasin koʻrdim:
eshshak suvrati bor qay bir qavmda,
qay birida toʻngʻiz kallasin koʻrdim.
Bu holdan buvaklar boʻgʻilib oʻlar,
qul Bilol ezilib yigʻlar falakda.

Oʻzlarin yondirar borliqdan toʻygan
Badaxshon laʼliday asl malaklar.
Moʻminlar besh bora Allohni eslar
sajdaga bosh qoʻyib jallod toshiga.
Oʻgrilib sal ortga qarayin desa,
boshiga urarlar,
faqat boshiga.

Bormi er yigitlar, bormi er qizlar,
bormi gul bagʻringda joʻmard nolalar,
bormi bul tufroqda oʻzligin izlab,
osmonu falakka yetgan bolalar.

Bor boʻlsa,
alarga yetkarib qoʻying,
bir boshga bir oʻlim demagan ermas,
shahidlar oʻlmaydi,
bir qarab toʻying:
Yovga ters qaragan musulmon emas!
Yovga ters qaragan musulmon emas!
Yovga ters qaragan musulmon emas!
Yovga ters qaragan musulmon emas!
Yovga ters qaragan musulmon emas!

Shavkat Rahmon Ochish/sharhlash

2022-06-19 09:18:29 Bill Geytsdan ham boy odam

Bill Geytsdan soʻrashdi: Bu dunyoda sizdan ham boy odam bormi?
Geyts: Ha, mendan ham boyi bor, deb javob berdi.
- Kim u? - soʻrashdi.
- Oʻqishlarimni tugatib, Microsoft shirkatini qurish ishlari bilan uchib ketish uchun Nyu-York aeroportiga bordim. U yerda bir gazeta sotuvchisiga koʻzim tushdi. Qoʻlidagi gazetalardan biri diqqatimni tortdi. Qoʻlimni choʻntagimga soldim, mayda pulim yoʻq edi. Biroz uzoqlashdim, oʻsha qoratanli va yosh gazetachi bola yonimga yugurib kelib:
- Janob, marhamat, gazeta mendan sizga hadya, deb gazetani uzatdi.
Men unga: yonimda mayda pul yoʻq, dedim.
U ham: Men buni sizga hadya qildim, dedi.
Bu hodisadan roppa-rosa 3 oydan keyin aynan oʻsha aeroportda yana uchrashib qoldik. Bir gazeta diqqatimni tortdi. Yana choʻntagimda maydam yoʻq. Bola gazetani uzatib, oling, dedi. Men unga: bolam, oʻtgan safar ham shunday holat yuz bergandi. Sen shunday holatda har koʻrgan odamingga gazeta hadya qilasanmi? - deb soʻradim.
- Albatta, men hadya berganimda chin qalbimdan beraman. Bu menga xursandchilik ulashadi, xotirjam boʻlaman...

Bill Geyts aytadi:
- Bu gap mening xayolimni shunday qamrab oldiki, bir savol qiynay boshladi: qiziq, bu bola qaysi mantiq va qaysi hissiyotga asoslanib bunday dedi!?

Oradan 19 yil oʻtdi. Moddiy tomondan oʻzimni tiklab, dunyoning eng boy odamiga aylandim. Oʻsha bolaning yaxshiligini qaytarish maqsadida bir guruh tuzdim. Ularga oʻsha bolani qidirib topishlarini tayinladim. Ularga oʻsha aeroportga borib, menga gazeta sotadigan qoratanli bolani topib kelishlarini buyurdim. Bir yarim oydan keyin bir joyda uning qoravullik qilayotganini bildim. Unga taklifnoma yuborib, ofisimga taklif qildim. Kelganida:
- Meni tanidingmi? - deb soʻradim.
U ham: - Albatta, Siz Bill Geytssiz. Sizni hamma taniydi, dedi.
- Esingdami, sen yoshligingda gazeta sotarding, menda mayda pul boʻlmagandi, sen menga gazetani hadya qilganding. Buni nima uchun qilganding?
- Buning maʼlum bir sababi yoʻq. Bir kishiga evaziga hech narsa kutmasdan bir narsa bersam, xursand boʻlaman, huzurlanaman.
- Men senga oʻsha yaxshiligingni qaytarmoqchiman. Istaganingni soʻra.
- Qanaqasiga qaytarasiz?
- Nima istasang soʻra, beraman...
Yigit kulib turib:
- Nima soʻrasam oʻshani berasizmi? Rostmi?
- Ha, soʻra...
- Sizga rahmat, janob. Lekin hech narsaga ehtiyojim yoʻq.
- Bir narsa soʻrashing kerak, yaxshiligingni qaytarmoqchiman.
- Janob Bill Geyts, sizning kuchingiz koʻp narsaga yetadi. Lekin mening yaxshiligimni qaytara olmaysiz...
- Nima demoqchisan? Qanday qilib qaytara olmasligim mumkin?
- Siz bilan mening oramdagi farq, men sizga oʻzim muhtoj boʻlib turib berdim, lekin siz boylikning choʻqqisiga chiqqanda qaytarmoqchisiz. Shunday ekan, uni qaytara olmaysiz. Lekin siz qilmoqchi boʻlgan yaxshilikdan xursand boʻldim. Katta rahmat.

Bill Geyts aytadi:
Yigitning oʻsha gapi uning mendan boy ekanligini his qilishimga sabab boʻldi. Chunki, berishning eng yaxshisi ehtiyojing boʻlib turib berishingdir. Bu yigit aynan shunday qildi.

Abdulloh Rahimboyev tarjimasi Ochish/sharhlash

2022-06-18 12:52:45 ​​QIYOMATLIK DOʻST

Men seni Xudodan yalinib topdim,
Soʻng qaygʻu eshigin manguga yopdim.
Garchi baxt ortidan juda koʻp chopdim,
Menga goh uchradi
xiyonatli doʻst,
Boringga ming
shukr qiyomatlik doʻst.

Sendan gado yangligʻ non soʻramayman,
Malak-ul mavt kabi jon soʻramayman.
Yetim qolgan qushdek don
soʻramayman,
Men mehr soʻrayman
diyonatli doʻst,
Boringga ming
shukr qiyomatlik doʻst.

Sendan yashirguvchi sirim yoʻq mening,
Ishongin dilimda kirim yoʻq mening,
Xato qilsang boʻlay
koʻzguying sening,
Bu dunyo ham ekan
sinoatli doʻst,
Boringga ming
shukr qiyomatlik doʻst.

Yelkamda
gunohim fildanda ogʻir,
Men ham bir quldirman, Xudomas axir!
Menga sovgʻa qilgin bir chimdim mehr,
Kimlargadir kerak
daromadli doʻst.
Boringga ming
shukr qiyomatlik doʻst.

Sensiz huvullagan ayvonman oʻzim,
Misli yaralangan jayronman oʻzim.
Oʻzimning holimga hayronman
oʻzim,
Yovga xam tilayman
salomatlik doʻst,
Boringga ming
shukr qiyomatlik doʻst.

Topilar
mol-dunyo, janona va pul,
Pulga biz qul emas! Pul bizlarga qul!
Sendan kechmoq jondan kechishdek mushkul,
Haqqa itoatli, ibodatli,
doʻst,
Boringga ming shukr,
qiyomatlik doʻst.

Qiyomat kunida boʻlmaskan soya,
Shunda Alloh aylab bizni himoya.
Soya bergay quvon, shudir kifoya,
Duo qilsak boʻlsin, ijobatli doʻst,
Boringga ming shukr qiyomatli doʻst.

Shaytonga qo'gʻirchoq boʻlmasang boʻldi,
Hajga bir bormasdan soʻlmasang boʻldi.
Faqat mendan oldin oʻlmasang boʻldi,
Bu jonim ham axir omonatli doʻst,
Boringga ming shukr qiyomatlik doʻst.

11:45-18.06.2013
Abdurahmon Meshayan

https://t.me/joinchat/V9rOjjc2w___l0Xf Ochish/sharhlash

2022-06-16 21:45:28 ل
Butun dunyo faylasuflarining savollariga javob boʻlgan bitta harf.

Falsafa (filosofiya) soʻzi yunoncha filo — sevish va sofiya — hikmat soʻzidan olingan. Falsafa — hikmatni sevish.

Qadimgi-yu bugungi barcha faylasuflar — hikmatshunoslar “nima uchun?” degan savolga javob qidirishgan.

Hikmat aslida har qanday ishga mazmun va maʼno beradigan va uni mantiqiy qiladigan narsadir.

Xoʻsh, olamlarning bor ekanligining hikmati nima? Qanday hikmat bilan dunyo bugungi holga keldi.

Tabiat qonuniyatiga koʻra, hech bir zarra oʻz-oʻzidan bor boʻlmaydi, va oʻz-oʻzidan yoʻq boʻlmaydi, balki shaklini, turini oʻzgartiradi.

Atomlar molekulaga aylansa ham, aylanmasa ham, dunyo turgancha u yoki bu koʻrinishda turaveradi. Ularda yashash uchun kurash yoʻq.

Atomlar molekula boʻlsa-boʻlmasa; molekula hujayra boʻlsa-boʻlmasa, hujayra aʼzo, aʼzolar jonzot boʻlsa-boʻlmasa, koinot turgancha bor boʻlib turaveradi.

Bir atom uchun, uning odam atomi, toshdagi zarra atomi yoki koinotda daydib yurgan vodorod atomi boʻlishning farqi yoʻq. Uning borligi yoki yoʻqligiga taʼsir koʻrsatmaydi.

Xoʻsh shunday ekan, nima sababdan atomlar birlashib, jonzot holiga kelyapti? Buning hikmati nima?

Mana shu savolga javob topish odamlarni tafakkurga, hikmatni qidirishga, yaʼni falsafaga undagan.

Falsafa esa, biologiya, fizika, matematika, botanika, mikrobiologiya, astronomiya kabi fanlarga ota boʻlgan.

Butun dunyo ilm-fani mana shu jarayonlar ortidagi hikmatni topishga qaratilgan.

Agar biror olim, u zoolog boʻladimi, mikrobiolog boʻladimi, astrofizikmi, oʻz ilmiy tadqiqotlarini ana shu hikmatni topishga qaratmas ekan, demak u mutafakkir emas, texnik xodimdir. Chunki shunchaki hikmatsiz hisob-kitobni kompyuter ham qiloladi.

Xoʻsh? Barcha mutaffakirlar borliqning hikmatini qidirar ekan, topganlarmi?

Yunon faylasuflari faqat aqlni ishlatish orqali hikmatni topishga urinishgan va qisman topishgan. Musulmon faylasuflari esa aqlni naql orqali sayqallab hikmatni topishgan.

Zotan musulmonlar qoʻlida Hikmatning oʻzi bor edi.

Soʻzimizning boshiga kelsak, bugungi kunda dahriy boʻlgan ilm-fan vakillari hali hanuz topolmagan narsa, butun borliqning bor boʻlishi ortidagi hikmat edi.

Qurʼoni karimda esa, bu hikmat bir harf ortida oʻrin olgan:

ل
Lom harfi “uchun” degan maʼnoni bildiradi.

“Jin va insonni faqat menga ibodat qilishi uchun yaratdim”. Zariyat, 56.

ليعبدون
“Liyaʼbuduuni”

Menga ibodat qilishi uchun.

Mana shu hikmatni toʻgʻri anglasak, olamlardagi barcha narsaning mavjudligi mantiqiy va maʼnoli boʻladi.

SaidKomil MuhammadKarim

https://t.me/joinchat/V9rOjjc2w___l0Xf Ochish/sharhlash

2022-06-11 14:30:58 #Latoif

Chaqirilmagan mehmon

"Chaqirilmagan mehmon" bir guruh odamlarni ketayotganini ko'rdi. Ular to'yga ketyapti deb o'ylab, ularning orqasidan bordi. Ular shoirlar ekan, o'zlarining amirni madh etib to'qigan she'rlarini aytib amirdan mukofot olishardi. Oxirida, "chaqirilmagan mehmon"ning o'zi qoldi. U gapirmay o'tirardi. Unga, she'ringni ayt! – deyishdi. Men shoir emasman – dedi. Unda kimsan?! Men, Alloh ta'olo aytgan { "Va shoirlarga gumrohlar ergashur." 26:224 } gumrohman dedi. Uning javobidan amir kulib yubordi va unga mukofot berdi.

Erkin tarjima

https://t.me/joinchat/V9rOjjc2w___l0Xf Ochish/sharhlash

2022-06-11 11:31:01 Umar ibn Xattob raziyallohu anhuning vafoti

Umar ibn Xattob roziyallohu anhuga suiqasd qilinib, pichoqlanganlarida u kishiga sut ichirishdi. Sut biqinlaridan oqib chiqib ketdi. Shunda tabib: Ey, amirul moʼminiyn, vasiyatingizni qilib qoling, umringiz oz qoldi, dedi. Umar ibn Xattob oʻgʻillari Abdullohni chaqirdilar va: huzurimga Huzayfa ibnul Yamonni olib kel, dedilar.
Huzayfa ibnul Yamonga Rasululloh sallallohu alayhi vasallam munofiqlarning ismlari yozilgan roʻyxatni bergan edilar. Roʻyxatdagilarni faqat Alloh, Rasululloh va Huzayfadan boshqa hech kim bilmas edi. Huzayfa Umar ibn Xattobning huzuriga kelganda: Ey, Huzayfa ibnul Yamon! Allohning nomi bilan soʻrayman, Rasululloh sallallohu alayhi vasallam meni ismimni ham munofiqlarning roʻyxatida zikr qilganmidilar - deb soʻradilar. Huzayfa indamay koʻzidan yosh toʻkdi va: Rasululloh buni menga omonat qilganlar, sizga aytolmayman, yo Umar, dedi. Umar yana: Xudo haqqi soʻrayapman, Rasululloh meni ismimni ham oʻshalarni orasida aytmaganmilar?? Huzayfa qattiq yigʻladi va: Faqat sizga aytaman va boshqa hech kimga aytmayman. Sizni ismingizni aytmaganlar, dedi. Shundan keyin Umar ibn Xattob oʻgʻillari Abdullohni chaqirdilar va: bu dunyoda yana bitta ishim qoldi, dedilar. Abdulloh: u nima ish edi otajon, dedi. Rasulullohning yonlariga dafn etilsam edi, dedilar va: ey, oʻgʻlim: Moʻminlarning onasi Oisha roziyallohu anhoning oldilariga borginda: amirul mo'miniyn demagin, balki Umar sizdan izn soʻrayapti. Siz uyning egasisiz, agar izn bersangiz ikki birodarimning oyoqlari ostiga dafn etilsam, deyaptilar degin. Oisha roziyallohu anho: Ha, bu joyni oʻzim uchun olib qoʻygan edim, mayli Umarga beraman, dedilar. Abdulloh xursand boʻlib keldi va: otajon, Oisha ruxsat berdilar, dedi. Abdulloh qarasaki Umar yuzlarini tuproqqa bosib yotibdilar. Darhol boshlarini koʻtarib tizzasiga qoʻydi. Umar oʻgʻillariga qarab: nima uchun yuzimni tuproqdan olding? Otangni yuzini tuproqqa qoʻy, yuzi tuproqqa belansin. Ertaga Rabbisi Umarni magʻfirat qilmasa holiga voy boʻladi, dedilar.
Umar ibn Xattob oʻgʻli Abdullohga vasiyat qilib vafot etdilar. Vasiyat shu ediki, meni yuvib, Rasulullohning masjidlarida janozamni oʻqiganingdan keyin Huzayfaga qaragin. Balki u mendan istihola qilib aytmagandir. Agar janozamni oʻqisa meni Rasulullohning hujralariga olib borgin. Eshikni oldiga borganda toʻxtagin va: Ey, ona oʻgʻlingiz Umar keldi, degin. Amirul moʼminiyn keldi demagin. Balki, mendan hayo qilib izn bergandir. Agar izn bermasa musulmonlarning qabristoniga olib borib koʻminglar.
Abdulloh otasining jasadini Rasulullohning masjidlariga olib borib janoza oʻqidi. Qarab tursa Xuzayfa ham kelib janoza oʻqidilar. Abdulloh bundan xursand boʻldi va mayyitni koʻtarib Oishaning uyiga olib bordi. Ey, ona! Oʻgʻlingiz Umar keldi, izn berasizmi?-dedi. Oisha: olib kiringlar, dedilar. Umar raziyallohu anhu ikki birodarlarining yoniga dafn qilindilar.

Alloh taolo Umar ibn Xattobdan rozi boʻlsin.

Xomidbek domla hafizahulloh.

Faxriddin Shayzaqov

https://t.me/joinchat/V9rOjjc2w___l0Xf Ochish/sharhlash

2022-06-08 10:57:43 Agar vafot etsam...

Agar vafot etsam, Alloh nasib qilsa, musulmonlar lozim boʻlgan ishlarni qilishadi:

• kiyimlarimni yechib olishadi;
• jasadimni yuvishadi;
• kafanga oʻrashadi;
• tobutga solishadi;
• masjidda yoki uyimda menga janoza oʻqishadi;
• qabristonga olib borishadi;
• qabrga qoʻyishadi;
• baʼzi odamlar uyidan, baʼzilari ishxonasidan janozamni oʻqib, dafn qilish uchun kelishadi;
• meni dafn qilib boʻlishgach, bir necha kishilar “Mulk” surasini tilovat qilishadi, qolganlar uni tinglashadi. Baʼzi himmat qilganlar “Yasin” surasini ham tilovat qiladilar.
• duolar qilingach, hamma tarqalishni boshlaydi.

Alloh nasib etsa, uyimda qoldiradigan kishilarim va narsalarim:

• ota-onam, aka-ukalarim, singlim, ahli oilam, farzandlarim, jiyanlarim, qarindoshlarim, doʻstu birodarlarim;
• uy, mashina va ularning kalitlari;
• kitoblarim;
• kiyimlarim, doʻppilarim, poyabzallarim;
• pullarim.

Vafot etganimdan soʻng dunyo kelgan joyidan davom etaveradi.

Oʻtirgan kursimga boshqa kishi oʻtirib, ishni davom ettiradi.

Molu davlatim merosxoʻrlarim orasida taqsimlanadi. Oʻzim esa oʻsha molu davlatlar uchun hisob berayotgan boʻlaman.

Vafot etganimda eng avval ismimni tark etishadi.

Meni yuvmoqchi boʻlishganda, ismimni aytishmaydi, balki, “Jasad qayerda?” deyishadi.

Kafanga oʻralgan holda tobutda yotar ekanman, menga namoz oʻqimoqchi boʻlganlarida, “Janozani olib kelinglar” deyishadi.

Qabristonga olib borib, dafn etayotganlarida, “Mayyitni uzatinglar, tobutni tortib olinglar” deyishadi.

Shunday ekan, men nasabimga, falonchilarning zurriyoti ekanimga, mansabimga, obroʻyimga aldanib qolmasligim kerak.

Vafotimdan keyin men uchun mahzun boʻladiganlar uch xil boʻladi:

1. Meni yuzaki taniydiganlar “Bechora vafot etibdi-da” deyishadi.

2. Doʻstu birodarlar bir necha soatdan to bir necha kungacha mahzun boʻladilar, eslab, duo qiladilar. Soʻng odatiy hayotlarini yashashda davom etadilar va yuzlarida kulgu koʻrina boshlaydi.

3. Uyimdagi mahzunlik bir yilgacha choʻzilib, keyin ismim xotiralar qutisiga tashlanadi.

Shu bilan odamlar orasidagi hikoyam nihoyasiga yetadi. Oxirat ostonasidagi haqiqiy hayot boshlanadi. Bu qabr hayoti.

Qabrimda chiroyim ham, molim ham, farzandlarim ham, oila aʼzolarim ham, aka-ukalarim ham, “domla”, “qori aka” deb yurgan doʻstlarim ham, uy-joylarim ham, dafnda ishtirok etganlar ham qolmaydi.

Qabrimda men bilan faqat amalim qoladi.

Savollar boshlanadi:

— Robbing kim?
— Robbim Alloh!

— Dining nima?
— Dinim Islom!

— Mana bu odam haqida nima deysan?
— Bu kishi Alloh taoloning risolatini biz ummatlariga yetkazgan, omonatni ado etgan sevikli Paygʻambarimiz Muhammad sollallohu alayhi vasallamdirlar!

Alloh taoloning fazli bilan qabrimda menga yordam beradigan narsalar:

• oʻqigan farz namozlarim;
• tutgan farz roʻzalarim;
• bergan zakotlarim;
• qilgan hajim;
• nafl ibodatlarim;
• maxfiy sadaqalarim;
• yetimning boshini silaganim;
• ota-onamga qilgan xizmatlarim;
• boshqa solih amallarim.

Dunyoga qaytib, bir marta sajda qilish, bir marta tasbeh aytish orzusida yotgan milliardlab qabrlarda yotganlar bor.

Birodarlar, bugun bizda imkonimiz bor, hali jonimiz tanamizda. Bandalik vazifalarimizni oʻz oʻrnida, vaqtida, ixlos bilan ado etaylik! Zulm qilganlarimizdan uzr soʻraylik, qazo namozlarimizni oʻqib, qazo roʻzalarimizni tutib, odamlardan olgan qarzlarimizni toʻlaylik!

Robbimiz barchamizni Oʻzining hidoyatidan ayirmasin va xotimamizni chiroyli qilsin! Amiyn!

Nozimjon Hoshimjonov tayyorladi

https://t.me/joinchat/V9rOjjc2w___l0Xf Ochish/sharhlash

2022-06-03 16:13:54 Bir toʻy boʻldi, bir toʻy boʻldiyey,
Keksalar ham ketdi yosharib,
Oʻynay-oʻynay yakunlangach kuy,
Duo qildi qoʻlin koʻtarib.

Omin dedi, keksa otalar,
Qoʻl ochishdi duoga hamma.
Erkaklaru qizu xotinlar,
Duo bilan qoʻyishdi tamgʻa.

Kuchin koʻring duoning endi,
Soʻragani, koʻklarga yetdi.
"Topganingga toʻy qilgin dedi"
Topgan puli toʻylarga ketdi.

Duomidi qargʻishmidi bu,
Yuzlab yilki shunday kechadi.
Boshqa yoʻqdek oʻzbekda orzu,
Topganini toʻyga sochadi.

https://t.me/joinchat/V9rOjjc2w___l0Xf Ochish/sharhlash