2023-05-29 13:54:54
#Mulohaza
Turmushga chiqdi.
Er lazzatni his etadi, xotin og‘riqni.
Homilador bo‘ldi.
Er xursandchilikni his etadi, xotin ko‘ngil aynish, charchoqni.
Bola tashladi.
Erga ta’ziya bildiriladi, ayolga malomat toshlari otiladi.
Homiladorlik kechikdi.
Er ovutiladi, unga ko‘ngil ko‘taruvchi gaplar aytiladi, ayol jarrohlik amaliyoti, tahlillarni boshidan o‘tkazadi, qo‘rquv, aybdorlikni his qiladi.
Homilador bo‘ldi va farzand tug‘ildi.
Er faxrni tuyadi, uni tabriklashadi, bolaga ismni u qo‘yadi, ayol og‘riqni, to‘lg‘oq mashaqqatini his etadi, emizadi, bola yig‘lasa bedor bo‘ladi.
Biz ayollarning sha’nini ko‘targan, ularni qadrlashga buyurgan Islom diniga e’tiqod qiluvchi musulmonlarmiz.
Islom dini bizga jannat onalar oyog‘i ostida deb ta’lim bergan.
Islom dini qizini chiroyli tarbiya qilgan ota-onalar uchun o‘sha qiz do‘zaxdan parda bo‘lishining va’dasini bergan.
Islom dini soliha ayol erining dinining yarmiga yordam ekanini, qolgan yarmida erning o‘zi taqvo qilishi lozimligini o‘rgatgan.
Islom dini bizga ayol kishi qiz bolaligida uning nafaqasi otasining, agar otasi bo‘lmasa, aka-ukasining, erga tekkach, erining, eri o‘lsa, farzandlarining zimmasida ekanini o‘rgatgan.
Islom dini ayol kishining ziynatining rioyasini qilib, haj, umra qilib bo‘lgach, sochining uchidan biroz qirqishi kifoya deb e’lon qilgan.
Islom dini ayolni zinoda ayblab, bu gapiga guvoh keltira olmaganlarga 80 darra urish jazosini tayinlagan va bo‘htonchini fosiq deb, uning guvohligi qabul qilinmasligini e’lon qilgan. Ayolning iffatiga, nomusiga til tekkizganlarga ana shunday jazo belgilagan.
Islom dini bosh farzandi qiz bo‘lgan ayollarni barakali ayollar deb e’lon qilgan.
Islom dini ayol-qizlardan xohishini so‘ramay, ularni turmushga berishdan qaytargan.
Islom dini nikoh o‘qilgandan so‘ng kuyovning zimmasiga kelinga mahr berish majburiyatini yuklagan. Agar ayol mahrini olmasa, erini o‘ziga yaqinlashtirmaslik haqqiga ega.
Islom dini ayolni himoya qilayotib vafot etgan erkakka shahidning savobini va’da qildi.
Payg‘ambarimiz sollallohu alayhi vasallam ayollarga yaxshi munosabatda bo‘lishni buyurganlar.
Islom dini: "Musulmon erkaklarning yaxshisi ayoliga yaxshi munosabatda bo‘lganidir" deb e’lon qildi.
Shunday qilib, Islom dini ayollarga ko‘pgina huquqlar berdi.
Biz erkaklar o‘zimizga berilgan juftimizning omonat ekanini unutmasligimiz kerak.
Nozimjon Hoshimjon@Umr_Falsafasi
5.1K views10:54