bakiroo

2024-04-10 08:05:32 Ҳамма-ҳаммага Ҳайит айёми муборак!

Яратганнинг нури қалбингизни тарк этмасин! Ochish/sharhlash

2024-04-09 16:58:00 ​Тиббиёт муассасаларининг кўчириб, ўрнини "инвесторларга" сотиш қонун билан тақиқланиши керак

Пойтахтда сотиладиган ва ажратиладиган ер қолмагани сайин энг ликвид ва инфратузилмага яқин бюджет объектларига кўз олайтириш бошланмоқди.

Сайланмаган, ҳисобдор бўлмаган, тийиқсиз амалдорларнинг фалон шифохонани фустон жойга кўчириш ва ўрнини "хорижий инвесторларга" бериш таклифлари кўпаймоқда, "ташаббуслар" турли дастурларга тиқиштирилмоқда. Бундай таклифлар тилло нархидаги ер майдонларини аллақачон кўз остига олиб қўйган корчалонлар томонидан гўёки бизнесни қўллаб қувватлаш гарнири билан тортиқ этилмоқда.

Ўзи шаҳардаги шифохоналарни (улар Бош план асосида тўғри режалаштирилгани учун аҳоли учун жудаям қулай жойларда жойлашган) четга кўчириб, ўрнига "иш ўрни яратиш" ва "инвесторларнинг" лойиҳаларини жойлаштириш баҳонаси билан ликвид майдонларни эгаллаб олиш пандемиядан кейин бир бошланиб, кейин тўхтаб қолган эди.

Хусусан. бир ярим йил аввал Махсуслаштирилган юқумли касалликлар шифохонаси коммунал муаммолар баҳонаси билан Зангиотага бадарға қилинганди. Кейин биратўла учта шифохона — Республика ихтисослаштирилган онкология ва радиология илмий-амалий тиббиёт маркази, Тошкент шаҳар онкологик касалликлар шифохонаси ва Тошкент вилоят онкологик касалликлар шифохонаси бинолари ва иншоотларини сотиш ҳаракати бошланди. Мазкур шифохоналарнинг сотилиши жамоатчиликнинг жиддий ва ҳақли эътирозлари туфайлигина тўхтатиб қолинди.

Энди эса навбат 7-шифохонага келганга ўхшайди. Мазкур шифохонани бошқа жойга кўчириб, қарийб 5 гектарлик ер майдонини кореялик инвесторларга бериш таклиф этилган. Кореялик инвесторлар ёки уларнинг шерикларини нега айнан мазкур касалхона ҳудудини эгалламоқчи бўлаётгани картага қарасангиз, тушунасиз.

Бюджет тиббиёт муассасаларини четга чиқарилиб, ўрнини бизнес эгаллаётгани жуда ёмон ишора. Айниқса, ўзини ижтимоий деб эълон қилган давлат учун. Бизнес манфаатлар, айниқса тор манфаатлар ижтимоийликни рад этмаслиги керак.

Худди шу каби тенденциялар олий таълим муассасалари эгаллаган майдонлар билан юз бера бошлайди (бу ҳақда алоҳида тўхталамиз). Агарда жараён бошланмасдан туриб тўхтатилмаса.

Қарорлар, оғзаки топшириқлар ва эзгу ниятлар декларацияси билан бу ёвуз ва ижтимоий посангини бузадиган жараёнга қарши туриб бўлмайди. Ўзбекистонда таълим ва тиббиёт муассасалари ўрнини кўчириш қонун билан бутунлай тақиқланиши зарур. Ҳаттоки уларнинг ўрнига бошқа, лекин тижорий тиббиёт лойиҳалари ташкил этилган тақдирда ҳам. Ochish/sharhlash

2024-04-09 12:10:56 Ер тақдим этилишидан олдин петербурглик инвестор камида 1 миллион долларни банкка қўйганми?

Минг бир лазейкалар бўлсаям, фақат тор манфаатларни кўзласаям, қани энди қонун қоидаларга амалдорларимиз ўзлари амал қилишса.

Ер Кодекси ва Президент Фармони белгилаган талабларга кўра, энг яхши таклифни танлаш орқали аниқланадиган, қиймати камида 10 миллион АҚШ доллари эквивалентида (ер майдони ҳажмига кўра ортиб боради) бўлган йирик инвестиция лойиҳасини амалга ошириш учун — лойиҳа қийматининг камида 10 фоизига тенг маблағ аввалдан махсус ҳисобрақамга жойлаштирилганда Вазирлар Маҳкамаси ер ажратиши мумкин.

Лекин Тошкентнинг қоқ марказида, Алишер Навоий номидаги кино саройи ва «Пахтакор» стадиони ўртасидаги автотураргоҳ ўрни учун «Стройпроект» МЧЖдан бошқа яна қандай субъектлардан таклифлар олинган? Петербургликлар бу лойиҳани амалга ошириш учун лойиҳанинг камида 10%и, яъни камида 1 миллион долларни банкдаги махсус ҳисобварақларга қўйганми?

Буларни билмаймиз. Чунки бу тўғридаги қарор ёпиқ. Ёп-ёпиқ.

Нима учун аукциондан ташқари ажратилаётган ер майдонлари бўйича инвестор, хусусий шерик билан келишилган шартлар, битимлар, мажбуриятлар акс этган қарорларни очиқ эълон қилиш мумкин эмас?

Ва ўзи маълум бир ер майдонини аукционга қўйиш мумкин, бошқа ер майдонини эса тўғридан тўғри ажратиш мумкинлиги мезонларини қандай?

Нега фақат иттоппас жойлардаги ноликвид, ер майдонлари аукционга чиқарилади. Юқори бозор қийматига эга, марказ ва қулай инфратузилмага эга ер майдонлари эса юмалоқ ёстиқ қилиб "инвесторларга" текинга берилади? Ochish/sharhlash

2024-04-09 10:08:13 Петербурглик инвестор аукциондан ер олса бўлмасмиди?

Инвестор Санкт-Петербургдаги «Стройпроект» МЧЖ Тошкентнинг қоқ марказида, Алишер Навоий номидаги кино саройи ва «Пахтакор» стадиони ўртасидаги автотураргоҳ ўрнида бизнес марказ қуради.

Бир неча ҳафта аввал атрофи дарахтзор бўлган мазкур ер майдони бирон бир белгисиз ўраб олинганди.

Ўзбекистонда, айниқса Тошкент шаҳрида бирон бир тадбиркор қурилиш қиламан деса, агар юқори кабинетларга кириш имкони бўлмаса, аукционга рўпара қилинади. Юқоридаги мисолда эса, 3 йил аввал қарзларини тўлай олмай савдо комплексларидан воз кечган петербурглик компанияга ҳеч қанақа аукционсиз Тошкентдаги энг қиммат жой шундоқ берилмоқда.

Ҳа, ўша жойга бизнес марказ қуриш мумкин бўлса, очиқ аукционга чиқарилса бўлмасмиди? Майли, ўша петербурглик инвестор ҳам қатнашиб, ютса, қураверсин эди. Тешилиб ётган бюджетимиз бир неча миллион долларлик маблағ тушарди.

Буям майли. Аукцион ўтказмадинглар ҳам дейлик. Ўша россиялик инвесторга Янги Тошкентдан ер таклиф этса бўлармиди? Давлат банкларига ва ҳокимиятларга офис ва меҳмонхоналар қуриш учун Янги Тошкентда ихтиёрий мажбурий протоколлар чиқариб берилаяптику. Қурсин ана Янги Тошкентда.

3 йил аввал қонунчиликда лазейка қолдирганидаёқ шундай бўлиши аён эди. Яъни дўстларга текин ер, қолганларга, яъни қора халққа аукцион орқали (лекин аукционда сотиладиган ернинг ўзи йўқ). Бунинг устига мана шу лазейка орқали ер ажратиш қарорлари ҳам ёпиқ.

Бирибир аниқлаштириб олишимиз керак: Ўзбекистон тенг имкониятлар мамлакатими ё танланган дўстлар учун улкан имкониятлар мамлакатими? Ochish/sharhlash

2024-04-09 02:30:00 ​Ўзавтосаноат ислоҳ қилиниши керак, бусиз рақобатли автомобиль бозори бўлмайди

Гарчи расмий мақоми Акциядорлик жамияти бўлсада, Ўзавтосаноат бир вақтнинг ўзида ўнлаб вертикал интеграциялашган ишлаб чиқариш корхоналарини назорат қилади. Бир вақтнинг ўзида мулкдор. Бир вақтнинг ўзида сотувчи, ҳам улгуржи, ҳам чакана, ҳам импортчи. Бошқа нормал дунёда ўзаро рақобатлашадиган Chevrolet, BYD, Volkswagen, Škoda, Isuzu, Man автомобиль брендларини Ўзавтосаноат Ўзбекистон ҳудудида ўзаро рақобатчи эмас, монопол режимга хизмат қилувчи шерикларга айлантирган (Kia, Renault, Chery ва Haval ҳам бу қоидага амал қилади). Буюртмалар ва молиявий ресурсларни тақсимловчи. Ўзавтосаноат автомобиль соҳасининг асосий регулятори ҳам. Ўзбекистон ҳукуматининг автомобиль саноатига оид барча қарорлари, хусусан бож ва нотариф чекловларга оид директивалари Ўзавтосаноат истаклари, манфаатлари ва мақсадларини ифода этади. Бошқача айтганда, Ўзавтосаноат ҳукумат таркибида бўлмаган тармоқ вазирлиги (узоқ йиллар Ўзавтосаноат раиси бир вақтнинг ўзида ҳукумат раиснинг ўринбосари бўлиб келган).

Ўзбекистон автомобиль бозорида "эркин рақобат энг катта душман" деб ҳисобланиши айнан Ўзавтосаноатнинг ҳозирги мақоми билан боғлиқ. Ўзбекистон ўтмиши мисолида сиз транспортни оласизми, савдоними, туризм, умумий овқатланиш ё қурилиш, ҳам регулятор, ҳам эгалик ва ўйинчи мақомидаги тармоқ вазирликларининг бўлиши доимо монополияни дастаклаб келган. Бундай иш тутишдан воз кечишгина саналган соҳаларда эркин рақобатга йўл очган.

Ўзавтосаноат мисолида ҳам шу жараён амалга оширилиши керак. Токи Ўзавтосаноат ислоҳ қилиниб, ундан регуляторлик функциялари ҳукуматга ўтказилмаса, соҳанинг вертикал интеграциясидан воз кечилмаса, бозордаги барча ўйинчиларга, уларнинг катта ё кичиклигидан қатъий назар, тенг имкониятлар тақдим этилмаса, шўрпешона ўзбекистонликларнинг танловсизлиги давом этаверади.

Идеалда, активларини битта бренд остида консолидациялаштирган Ўзавтосаноат бозордаги ўнлаб мустақил ва рақобатлашувчи ўйинчилардан бири бўлиши керак холос. Ундан ортиғи эмас. Ochish/sharhlash

2024-04-08 16:46:46 Ўзбекистонда ўртаҳол синфи кенгаймоқда

2024 йил 1 апрель ҳолатига енгил автотранспортда йўловчи ташиш фаолияти бўйича ўзини ўзи банд қилганлар сони 457 684 нафарга етган. Солиштириш учун, таксичилар ўзини ўзи банд қилишга рухсат этилган 2022 йил 1 декабрда бу кўрсаткич 50 908 нафарни ташкил этган. Ўн йиллар давомида такси сектори норасмий иқтисодиётнинг ажралмас бўлаги бўлиб келган. Самарасиз ва маъмурчилиги қиммат назорат, фақат юридик шахслар орқали такси хизмати кўрсатиш, бозорга киришни имконсиз қилиш талаблари тескари натижа бераверган. 2022 йил сентябрга келибгина ҳукумат таксистларни ўзини ўзи банд қилиб ишлашга рухсат берди.

Ўзи умуман ўзини ўзи банд қилиш механизмини ишсизликни камайтириш эмас, норасмий меҳнат бозорини оқартириш ва расмий ўсишга қадам қўйиш воситаси сифатида кўравериш керак. Умумий сони 2,8 млн.дан ошган сартарошлар, қассоблар, чеварлар, кўрпачилар, гулчилар, новвойлар, дурадгорлар ўзи бусиз ҳам ўз иши билан шуғулланиб келишган, лекин улар ҳеч қачон расмийлашмаган. Банк молия хизматларидан, буюртмалар бозоридан узоқда, узилишда бўлишган.

Кўз ўнгимизда Ўзбекистонда ўзи мавжуд фаолиятни расмийлаштириш орқали ўртаҳол синфи шаклланмоқда (ўрта синф билан адаштирманг). Уларга давлатдан фақат бир нарса — ҳалақит бермаслик керак холос. Шунда улар катта бўлиб, ўсиб, кенгайиб ўрта синфга айланади. Ochish/sharhlash

2024-04-08 10:46:23 "Улар бу ишларидан фахрланишмоқда"

Улар қанчалар ярамас ва очкўз монополист эканини очиқ тан олишаётгани йўқ, улар бундан очиқча фахрланишмоқда.

Эътибор беринг, ҳеч бир соғлом ўзбекистонлик Ўзбекистонда ишлаб чиқариш тўхтасин, заводлар ёпилсин, деган талаб қўйгани йўқ.

Лекин фриклар эркин Рақобат талаби ҳамда тўқиб чиқарилган фейк "ишлаб чиқариш бўлмасин" ўртасида тенглик қўйиш билан овора.

Шу маънода саҳнага чиқарилган фриклар билан баҳсга киришиш истеъмолчиларнинг соғлом талабларини емирилишига хизмат қилади. Ўзбекистонликларни танловсиз талашда давом эттиришни истаётганлар биз мана шу фрик ва масхарабозлар билан ўралашиб қолишимизни, қонуний талабларимиздан чалғишимизни исташмоқда. Ochish/sharhlash

2024-04-08 07:39:52 Маҳаллалар фуқароларнинг ўзини ўзи бошқариш органларидир

Фуқароларнинг ўзини ўзи бошқариш органлари фаолиятига давлат органларининг ва улар мансабдор шахсларининг аралашувига йўл қўйилмайди. Ҳарқалай қонунларимизда шундай ёзилган.

Тайинланган пойтахт ҳокимига кўра, "Маҳаллаларнинг асл бошқаруви фуқаролар қўлига, қулайлиги ва хавфсизлигини таъминлаш эса масъулларга юклатилади".

Ҳокимбова, шу пайтгача қонунга амал қилмаётганмидик?

Маҳалла устига қўйилган, ҳеч бир қонунда акс этмаган еттилик институти нима бўлади? Ochish/sharhlash

2024-04-07 17:02:14 Давлат хизматчилари олигархия хизматида бўлса

Коррупциянинг энг хавфли ва юқори чўққиси бўлган, мамлакат суверенитети учун даҳшатли оқибатларни келтириб чиқарадиган бундай ҳолатларга қарши нормал давлатларда шафқатсиз равишда курашилади. Ҳукумат хизматчиларининг ва айниқса, регуляцияга оид ваколатларга эга топ амалдорларнинг олигархик гуруҳлар билан яқинлашиб кетиши қонун билан таъқиб қилинади. Ўзбекистонда оддийгина кўринган ҳолатларда ҳам, масалан, ҳукуматда регуляция функцияларига эга бўлган амалдорнинг ўша соҳадаги олигархик тузилмага ишга ўтиши ёки олигархик тузилмадаги менежерларнинг регуляторга айланишини чеклайдиган қонуний тизим ишлайди. Қаттиқ жазо маҳкамаси фаолият кўрсатади.

Содда қилиб айтганда, ҳукумат ва бизнес, айниқса, йирик бизнес ва олигархия чатишиб кетмаслиги ва якунда, мамлакат бойликларига қўшиб давлат мустақиллигини ҳам сотиб юбормасликлари учун Манфатлар тўқнашуви тўғрисидаги қонунлар қабул қилинади.

Ўзбекистонда ҳам шу каби қонун лойиҳаси бир минг бир марта таҳрир қилиниб, рандаланилиб, ўзларига мослаб, қуйи палатада кўриб чиқилганига бир ярим йилдан ошди.

Сенатда Манфаатлар тўқнашуви тўғрисидаги қонун маъқулланганига 10 ой бўлди. Шундан кейин қонун изсиз йўқолди. Эски Конституцияга кўра ҳам, "сеники, меники, бизники" қилиб қабул қилинган Конституцияга кўра ҳам, бу қонун аллақачон кучга кириши лозим эди.

Лекин қонун ҳалигача йўқ. Қонун қайси тумбочка ё сейфга яшириб қўйилганини Ўзбекистоннинг расман иккинчи одами Танзила опа ҳам билмайди.

Сиз айтишингиз мумкин, ҳа, ўша ўзларига мослаб, у ёғидан, бу ёғидан кесиб, думи юлинган товуққа айлантирилган қонун кучга кирди, нима, кирмади нима. Бир жиҳатдан тўғри, лекин ҳеч бўлмаса, Манфаатлар тўқнашуви тўғрисидаги қонуннинг номинал тарзда бўлса ҳам мавжудлиги, олигархлар ичак чавоғигача ўзиники қилиб олган бўлиши мумкин бўлган чиновниклар, унга етакловчи ёки ишора берувчи битимлар ва ҳаракатлар ҳақида гапириш, ёзиш, жамоатчилик эътиборини чуқурлашиб бораётган муаммога қаратишга имкон беради. Ochish/sharhlash

2024-04-07 13:12:06 Вақт – бу пул. Қадрли вақтингиздан унумли фойдаланинг ва "ТЕЗКОР КРЕДИТ" ёрдамида бизнесингизни ривожлантиринг!

Исталган валютада 500 000 АҚШ доллари эквивалентигача;
3 йилгача;
Имтиёзли давр – 3 ойгача!

Аризангизни sqb.uz сайтида онлайн тарзда қолдиринг.

Батафсил маълумот sqb.uz ёки 1180 рақами орқали.

Реклама Ochish/sharhlash