2023-01-18 19:38:58
#Ҳоким_минбари
“Тезкор штаб” – доимий назоратимда!” –
Шоҳрух ШоаҳмедовКунларнинг совуб кетиши билан боғлиқ вазиятлар ҳақида бизга келиб тушаётган саволлар юзасидан Шоҳрух Шоаҳмедовдан интервью олдик. Ҳоким саволларимизга жавоб берар экан, қуйидагиларга аниқлик киритди.
– Ҳаво ҳароратини кескин тушиб кетиши ортидан келиб чиқадиган вазиятни олдиндан тўғри баҳолаб зарур чораларни амалга оширдик, – дейди ҳоким бизга. – Шу боис, туман ИИБда “Тезкор штаб” фаолиятини йўлга қўйдик ва у доимий назоратимда турибди.
Гапни очиғини айтганда, қиш мавсумига пухта тайёргарлик кўрдик. Масалан, 2021 йилда ишни бошлаб, 2022 йил кузда Юқори Чирчиқдаги Ўзбекистон газ тақсимлаш шахобчасидан Паркент туманига табиий газни узатиш учун алоҳида 325 диаметрли қувур тортиб келдик.
Агар бу масалада эътиборсизлик қилганимизда бугун газнинг вақтинчалик учиш ҳолати 400-500 хонадонда эмас, 10 мингдан ортиқ хонадонда содир бўлаётган бўлар эди.
Электр таъминотини яхшилаб бориш мақсадида ҳам аввалдан керакли ишларни бажардик. Жойларда эскирган симларни алмаштириб, кўплаб трансформаторларни таъмирлаб, янгиларини ўрнатдик.
Айни кундаги барча авария ҳолатлари тузилган авария гуруҳлари томонидан ўз вақтида бартараф этиб борилмоқда.
Натижада, бошқа шаҳар ва туманлардан фарқли ўлароқ электр таъминотидаги узилишлар 1-5 суткалаб давом этмаяпти.
Умуман олганда, кўмир, газ балонлар ўз вақтида етказиш тизимини йўлга қўйганимиз, қўшимча кўмир заҳирасини ҳам яратганмиз.
Яна бир муҳим гап! Шу кунларда ўтказилаётган эҳсон ошлари, уйларга тарқатилган озиқ-овқат ва моддий ёрдамга сарфланаётган маблағлар бюджет ҳисобидан олинмаган. Барчаси эзгулик йўлида амалга оширилмоқда.
Ногиронлар, боқувчисини йўқотган, қарияларга эса давлат томонидан белгиланган нафақалар тўловини ҳам ўз вақтида етказилиши шахсан назоратимда турибди.
Фурсатдан фойдаланиб, саховат ишларида қатнашаётган қўли очиқ инсонлар, сектор раҳбарлари, шунингдек, туман прокуратураси, ички ишлар, Иқтисодий жиноятларга қарши курашиш департаменти, фавқулодда вазиятлар, мудофаа бўлимлари ҳамда солиқ инспекцияси, "Паркенттумангаз" газ таъминоти, электр тармоқлари корхонаси, туман йўллардан фойдаланиш УК, "Тошкент сув таъминот" МЧЖ Паркент тумани бўлими ва бошқа коммунал хизмати ташкилотлари жавобгарлик ва масъулият билан куну тун фаолият кўрсатиб тургани учун уларга чин дилимдан раҳмат айтаман!
Энг асосийси, синовли кунларда бизни қўллаб-қувватлаб, дуо қилиб турган туманимизнинг оқкўнгил аҳолисига ўз миннатдорчилигимни билдираман!
Ишонтириб айтаманки, туманимизда бу йил ўтган йилгидан кўпроқ улкан ишлар амалга оширилади. @PARKENT_TONGI
3.9K views16:38