#Спорт
Футбол бўйича "ДХХ кубоги"нинг туман босқичи ғолиблари аниқландиХабарингиз бор, аҳоли, айниқса, ёшларнинг спорт билан шуғулланиш кўрсаткичини ошириш, футбол спорт турини кенг оммалаштириш мақсадида бир неча йиллардан буён "ДХХ кубоги" баҳслари ўтказиб келинмоқда.
Эътиборлиси, бу йилги мусобақалар ҳам туманимиз миқёсида кенг қулоч ёзиб, маҳалла ёшлари ўртасида соғлом турмуш тарзини тарғиб қилишга катта ҳисса қўшяпти.
Хусусан, мазкур беллашувларнинг туман финал босқичи туманимиздаги "Гулбоғ" марказий ўйингоҳида юқори савияда ташкил этилди.
Унда туманнинг Қирғизовул ва Қуёш маҳалласи жамоалари ғолиблик учун курашишди.
Таъкидлаш жоизки, шиддатли ўйинларга гувоҳ бўлиш мақсадида бу ерга келган ёшу қари, футбол ихлосмандлари учун жараён ўзгача шукуҳда, ҳаяжонларга бой ўтди.
Қизиқарли ўтган баҳсда Қуёш маҳалласи жамоаси Қирғизовул маҳалласидан келган рақиб жамоа устидан 2-1 ҳисобида ғолибликни қўлга киритиб, "ДХХ кубоги"нинг туман босқичида зафар қучди.
Ўз-ўзидан 2-ўринни Қирғизовул ёшлари банд этган бўлса, 3-ўрин Обод маҳалласи жамоасига насиб этди.
Шунингдек, мусобақанинг мини футбол бўйича ўғил болалар ўртасида ўтказилган баҳсларида
1-ўринни Оқтепа маҳалласи, 2-ўринни Бойқозон маҳалласи ва 3-ўринни Хўжа маҳалласи жамоаси эгаллашди.
Айнан шу йўналишда бўлиб ўтган қиз болалар ўртасидаги мусобақа секторлар кесимида 1-ўринни 3-сектор, 2-ўринни 1-сектор ва 3-ўринни 4-сектор жамоалари қўлга киритиши билан якунланди.
@PARKENT_TONGI
