bakiroo

2024-04-12 15:20:01 ​Банкрот деб эълон қилинган ва Ривалдонинг қарзини ўзбек ҳалқи бўйнига илган Zeromax "болаларидан" бири NeftGazMontaj 20 йиллигини нишонламоқда экан

Компания ўзининг ўсиб чиққан илдизларини яна бир бор эслатишни унутмаган:

"2004 йилда ташкил этилган NeftGazMontaj МЧЖ ҚК хорижлик ва ўзбек таъсисчилар, жумладан, Zeromax GmbH ва «Тошнефтгазқурилиш» ОАЖ, «Бухорагазсаноатқурилиш» ОАЖ ҳамда бошқа бир қатор маҳаллий корхоналарнинг биргаликдаги фаолияти натижаси бўлди" дейилади реклама ҳуқуқлари асосида тарқатилган релизда.

Маълумот учун, айнан Zeromax акциядори бўлган NeftGazMontaj МЧЖ Бунёдкор (Қурувчи) футбол клубининг муассиси ҳисобланган. Ҳатто жамоа ташкил бўлган вақтда "Нефтегазмонтаж-Курувчи" деб аталган.

2010 йилда банкрот деб эълон қилинган Zeromax миллиардлаб қарзларидан қутулиб қолган. Бу жараён нафақат Ўзбекистон учун, бутун Европа иттифоқи учун аср афераларидан бири ҳисобланади. Zeromax'дан қарзини ундира олмаган Ривалдо ва Денильсонларнинг қарзи охири Ўзбекнефтегаз бўйнига, яъни ўзбекистонликлар гарданига осилганидан хабарингиз бўлса керак.

Яна бир қизиқ тарафи NeftGazMontaj МЧЖнинг 100%лик таъсисчиси ўлароқ Давактивнинг Тошкент шаҳар бошқармаси кўрсатилган. Ва МЧЖ яна бир мутлақо тасодифга кўра, SANOAT ENERGETIKA GURUHI ва унга аффилланган бизнес тузилмалар билан бир манзилда, Бунёдкор кўчаси 47 уйдан қўним топган. Ochish/sharhlash

2024-04-12 07:00:03 ​Қозоғистон хорижликлар учун бензин нархини оширмоқчи

Қўшниларимиз ёқилғи баланси мувозанатини таъминлаш ва "кулранг" экспорт каналларини қисқартириш учун 92 ва 93 октанли бензин нархини хорижликлар учун 205 тенгедан 245 тенгегача оширишмоқчи.

Қозоғистон Энергетика вазирлиги маълумотига кўра, мамлакат фуқаролари учун нархлар ўзгаришсиз қолади (205 тенге). Мазкур қарор шимолдаги агрессорнинг нефтни қайта ишлаш заводлари бирин кетин ишдан чиқаётгани ва сув тошқинлари фонида ёқилғига талабни ошаётгани туфайли Қозоғистон бензинига босимни кучайтираётгани билан боғлиқ бўлиши мумкин.

Айтиш керакки, 92/93 бензин учун нархлар оширилгани билан Ўзбекистонликлар учун барибир жозибадор бўлиб қолади. 245 тенге бу 6 945 сўм дегани.

Шимолдаги севимли оғалари билан биргаликда шўрпешона ўзбекистонликларни аёвсиз қоқиштираётган маҳаллий монополия ва олигархиянинг Ўзбекистондаги ўрнатиб олган аждарҳо нархлари нафақат минтақада, дунёда ҳам энг қимматларидан ҳисобланади. Ochish/sharhlash

2024-04-11 14:50:54 Давлат нима қилиши ва нима қилмаслиги кераклиги ҳақида

Беҳзод Ҳошимов:

Давлат қайсидир товарларни ишлаб чиқариш билан шуғуллланиши керак бўлмаган ташкилот. Яъни давлатнинг функциялари бор, ижтимоий, оммавий товарларни етказиш: инфратузилма, тоза ҳаво, ижтимоий хизматлар, суд, хавфсизлик каби функциялари бор. Лекин автомобил, самолёт саноатини ривожлантириш каби ихтиёрий шунга ўхшаган нарсалар билан шуғулланиши бизга қимматга тушади. Биз йиллар давомида бунинг учун тўлаб келяпмиз. Чунки буни давлат қилса, самарасиз бўлади, самарали бўлса ҳам ундан келадиган ютуқларимиз камроқ бўлади.

"Асосий аргумент, давлат ҳисобидан стратегиялар натижасида яратилган иш ўринларини ҳисоботларда шунча иш ўрин яратдик дейиш мумкин, лекин унинг натижасида яратилмай қолган иш ўринлари кўзимизга кўринмайди, холос. Лекин улар йўқ дегани эмас. Шунинг учун иш ўринлари ҳақидаги муҳокаманинг хатолиги шундаки, ўша инвестиция, пул, маблағлар иқтисодиётнинг самаралироқ соҳаларига сарфланса, кўпроқ иш ўрни яратиларди. 15-16 миллионта меҳнатга лаёқатли халқимиз бор, уларнинг аксари жуда кичкина корхоналарда ишлашади. Давлат ҳисобидан юзлаб миллионлик қарзлар олиниб, ёки субсидиялар берилган корхоналарда кўп бўлса 30 мингта одам ишлайди. Меҳнат бозорига қарасак, бу пичоққа илинадиган рақам ҳам эмас. Бизда ҳар йили юз минглаб одамлар ишини йўқотади ва яна қайтиб ишга жойлашади".

"Америкалик иқтисодчи Хитойга борса, канални кетмонда қазишаётганини кўради. Иқтисодчи “нима учун экскаваторларда қазимаяпсизлар, сизларда бу нарса бор-ку?” деса, хитойликлар “сиз тушунмаяпсиз, бизда мақсад иш ўринларини яратиш, бу ерда юз минглаб одамлар ишлаяпти”, дейди. Иқтисодчи “унда чой қошиқ берсанглар бўларкан, янада кўпроқ иш ўрни яратиларди” дейди.
Самарасиз иш ўринларини яратиш чегарасиз, лекин чой қошиқ бериб канал қазиётганларга қачондир: “Бўлди, бу иш тугади” дейилса, биттада 50 мингта иш ўрни йўқолиши мумкин. Лекин бунга аввалбошдан йўл қўйилган хатонинг тузатилиши деб қараш керак. Иккинчидан, божлар йўқ бўлгани натижасида бойлик кўпайиб, у самарали соҳага йўналтирилганда яратиладиган иш ўринлари кўзга кўринмайди".

Ўтган йили Давлат раҳбарининг АҚШга сафари чоғида Беҳзод Ҳошимов қатор таклифларни илгари сурганди. Ochish/sharhlash

2024-04-11 14:11:06 Донорлик ва хайрия ишлари ҳам рақамлаштирилмоқда

Ижтимоий ҳимоя миллий агентлиги Click компанияси билан ҳамкорликда “Инсон учун” янги хайрия платформасининг тақдимотини ўтказди.

Мазкур платформа эҳтиёжманд инсонларга хайрия маблағларини ўтказишни шаффоф ва ишончли тарзда амалга ошириш мақсадида ишлаб чиқилган.

“Инсон учун” платформаси орқали нафақат моддий ёрдам бериш, балки бошқалардан кўмак сўраш ҳам мумкин. Бунинг учун онлайн ариза тўлдириш талаб этилади. Платформага киритилаётган маълумотларнинг ҳақиқийлиги ва яхлитлигини эса Ижтимоий ҳимоя миллий агентлиги таъминлайди.

Шунингдек, платформа орқали хайрия маблағлари ўтказилган беморнинг аҳволини кузатиб бориш ва унинг ҳолати билан танишиш ҳам мумкин. Ochish/sharhlash

2024-04-11 10:34:57 Ҳимояланмаган инвестициялар макони

Қанақадир топшириқ ё фармойиш Қонун, Президент қарорлари, Ҳукумат қароридан устун кўрилиб ижро қилиниши ҳақида жуда кўп ёздик. Бизнес учун талабларни ёмон томонга ўзгариши вақтида қонун билан белгиланган 3 ойлик ўтиш вақти қоидалари ишламаганлиги ҳеч кимни ҳайрон қолдиргани йўқ. Парламентдан тортиб бизнес манфаатларини ҳимоя қилиши декларацияланган биронта институт ишламайди. Ҳаммаси фалажланган. Ёки жим туриш вазифасини бажаришмоқда.

Яна қонунларимизда давлат бошқаруви органлари, маҳаллий давлат ҳокимияти органларининг ҳамда улар мансабдор шахсларининг ғайриқонуний ҳаракатлари (ҳаракатсизлиги) ва қарорлари натижасида етказилган зарарларни ундиришга ҳақли деб ёзиб қўйилган. Бу ҳам ишламайди. Ҳеч қачон ишламаган. Шунчаки қайсидир нормал давлат қонунларидан кўчириб олиб, ёзиб қўйилган.

"Агар қонунчилик ҳужжатларининг бажарилиши инвесторга ёки инвестицияларга зарар етказадиган бўлса, ушбу қонунчилик ҳужжатлари орқага қайтиш кучига эга бўлмайди" даган нормалар бу шунчаки шиор холос.

Шунинг учун аввало нормал инвесторлар Ўзбекистонга қадам босмайди, ё ёпиқ кабинетларда келишиб ишлайдиган дордан қочган муттаҳамлари келади. Ёки адашиб бозорга киргани ҳам биринчи прецедентдан кейиноқ барча рискларни товар ва хизмати нархи устига қўйиб юбориш йўлига ўтади.

Электромобиль бозорига кириб, совуғини еб қолганларда ҳам бундан бошқа альтернатива йўқ. Улар бу лаънатланган бозордан камроқ йўқотишлар билан эсон омон чиқиб олган тақдирда ҳам, ё қайтиб Ўзбекистонга пул тикишмайди ё кўргуликлари дарс бўлмай яна бирон иш бошлашган тақдирда аввал бошданоқ бизнесни тортиб олиш, рейдерлик, ёпиб қўйиш, тақиқлаш рискларини нарх устига миндириш йўлидан юришади.

Шунақа макон. Шунақа замон. Ochish/sharhlash

2024-04-11 08:00:00 Биз эркин бозор тарафдоримиз

Ўзбекистонда электромобиллар сотуви билан шуғулланувчи тадбиркорлар Давлат раҳбарига мурожаат қилишмоқда.

"Биз ва бошқа 400 дан ортиқ шу каби тадбиркорлик субектлари томонидан электромобилларни сотиш учун автосалонлар ва уларга хизмат кўрсатиш учун сервис шохобчалари ташкил этдик. Биргина 2023 йилнинг ўзида биз каби тадбиркорлар 630 миллион долларлик 21 минг дона электромобил олиб келди. ҚҚС, утилизация ва бошқа тўловлар ҳисобига бюджетга 1 триллион 250 миллиард сўм тушум тушди".

"Аммо бугунги кунда товарларимиз Хитой ёки Қозоғистон чегарасида қолмоқда. Сабаби, 2024 йил 1 апрелдан бошлаб хусусий тадбиркорларга электромобилларни олиб киришда бир қанча чекловлар қўйилди. Шу боис, тузилган шартномалар ёпилиши, мумкин бўлган дебиторлик қарзлари ва буюртмаларимиз асосида келаётган автомашиналарни ўз корхонамизга кирим қила олмаслигимиз, Техник жиҳатдан тартибга солиш агентлиги томонидан мувофиқлик сертификатлари берилмаслиги каби бир қанча муаммоларга дуч келмоқдамиз".

"Ўзбекистонда автосалонлар ўртасида рақобат пайдо бўлди… Биз тизим яратдик, олиб киргандан кейин сервис кўрсатдик, машинага кафолат бердик. Хитойдан юқори малакали мутахассисларни жалб қилдик. Аммо 1 апрелдан бизга зарб бўлди".

Бизнес вакиллари ўз мурожаатларида Давлат раҳбаридан 1 апрелдан киритилган чекловларни олиб ташлашни ва очиқ бозорни қўллаб-қувватлашни сўрашган. Ochish/sharhlash

2024-04-10 11:27:17 Тадбиркорлик субъектлари ижтимоий-маиший хизматлар кўрсатишга жалб қилинади

Ижтимоий ҳимоя миллий агентлиги Тошкент шаҳри Мирзо Улуғбек туманида ўзгалар парваришига муҳтож шахсларга уйда ижтимоий-маиший хизматларни кўрсатишни аутсорсинг асосида ташкил этиш бўйича пилот лойиҳа амалга оширилишини эълон қилди.

Унга кўра, ёрдамга муҳтожларга овқат тайёрлаш, хонадонларини йиғиштириш, кийим-кечакларни ювиш, гигиена тадбирларини амалга ошириш, сантехника жиҳозларини таъмирлаш каби бир қатор хизматларни кўрсатиш учун тадбиркорлик субъектлари билан ҳамкорлик қилинади.

Ижтимоий хизматлар кўрсатиш истагидаги тадбиркорлар 2024 йил 20 апрелга қадар +998881992552 рақамига мурожаат қилишлари мумкин. Ochish/sharhlash

2024-04-10 08:05:32 Ҳамма-ҳаммага Ҳайит айёми муборак!

Яратганнинг нури қалбингизни тарк этмасин! Ochish/sharhlash

2024-04-09 16:58:00 ​Тиббиёт муассасаларининг кўчириб, ўрнини "инвесторларга" сотиш қонун билан тақиқланиши керак

Пойтахтда сотиладиган ва ажратиладиган ер қолмагани сайин энг ликвид ва инфратузилмага яқин бюджет объектларига кўз олайтириш бошланмоқди.

Сайланмаган, ҳисобдор бўлмаган, тийиқсиз амалдорларнинг фалон шифохонани фустон жойга кўчириш ва ўрнини "хорижий инвесторларга" бериш таклифлари кўпаймоқда, "ташаббуслар" турли дастурларга тиқиштирилмоқда. Бундай таклифлар тилло нархидаги ер майдонларини аллақачон кўз остига олиб қўйган корчалонлар томонидан гўёки бизнесни қўллаб қувватлаш гарнири билан тортиқ этилмоқда.

Ўзи шаҳардаги шифохоналарни (улар Бош план асосида тўғри режалаштирилгани учун аҳоли учун жудаям қулай жойларда жойлашган) четга кўчириб, ўрнига "иш ўрни яратиш" ва "инвесторларнинг" лойиҳаларини жойлаштириш баҳонаси билан ликвид майдонларни эгаллаб олиш пандемиядан кейин бир бошланиб, кейин тўхтаб қолган эди.

Хусусан. бир ярим йил аввал Махсуслаштирилган юқумли касалликлар шифохонаси коммунал муаммолар баҳонаси билан Зангиотага бадарға қилинганди. Кейин биратўла учта шифохона — Республика ихтисослаштирилган онкология ва радиология илмий-амалий тиббиёт маркази, Тошкент шаҳар онкологик касалликлар шифохонаси ва Тошкент вилоят онкологик касалликлар шифохонаси бинолари ва иншоотларини сотиш ҳаракати бошланди. Мазкур шифохоналарнинг сотилиши жамоатчиликнинг жиддий ва ҳақли эътирозлари туфайлигина тўхтатиб қолинди.

Энди эса навбат 7-шифохонага келганга ўхшайди. Мазкур шифохонани бошқа жойга кўчириб, қарийб 5 гектарлик ер майдонини кореялик инвесторларга бериш таклиф этилган. Кореялик инвесторлар ёки уларнинг шерикларини нега айнан мазкур касалхона ҳудудини эгалламоқчи бўлаётгани картага қарасангиз, тушунасиз.

Бюджет тиббиёт муассасаларини четга чиқарилиб, ўрнини бизнес эгаллаётгани жуда ёмон ишора. Айниқса, ўзини ижтимоий деб эълон қилган давлат учун. Бизнес манфаатлар, айниқса тор манфаатлар ижтимоийликни рад этмаслиги керак.

Худди шу каби тенденциялар олий таълим муассасалари эгаллаган майдонлар билан юз бера бошлайди (бу ҳақда алоҳида тўхталамиз). Агарда жараён бошланмасдан туриб тўхтатилмаса.

Қарорлар, оғзаки топшириқлар ва эзгу ниятлар декларацияси билан бу ёвуз ва ижтимоий посангини бузадиган жараёнга қарши туриб бўлмайди. Ўзбекистонда таълим ва тиббиёт муассасалари ўрнини кўчириш қонун билан бутунлай тақиқланиши зарур. Ҳаттоки уларнинг ўрнига бошқа, лекин тижорий тиббиёт лойиҳалари ташкил этилган тақдирда ҳам. Ochish/sharhlash

2024-04-09 12:10:56 Ер тақдим этилишидан олдин петербурглик инвестор камида 1 миллион долларни банкка қўйганми?

Минг бир лазейкалар бўлсаям, фақат тор манфаатларни кўзласаям, қани энди қонун қоидаларга амалдорларимиз ўзлари амал қилишса.

Ер Кодекси ва Президент Фармони белгилаган талабларга кўра, энг яхши таклифни танлаш орқали аниқланадиган, қиймати камида 10 миллион АҚШ доллари эквивалентида (ер майдони ҳажмига кўра ортиб боради) бўлган йирик инвестиция лойиҳасини амалга ошириш учун — лойиҳа қийматининг камида 10 фоизига тенг маблағ аввалдан махсус ҳисобрақамга жойлаштирилганда Вазирлар Маҳкамаси ер ажратиши мумкин.

Лекин Тошкентнинг қоқ марказида, Алишер Навоий номидаги кино саройи ва «Пахтакор» стадиони ўртасидаги автотураргоҳ ўрни учун «Стройпроект» МЧЖдан бошқа яна қандай субъектлардан таклифлар олинган? Петербургликлар бу лойиҳани амалга ошириш учун лойиҳанинг камида 10%и, яъни камида 1 миллион долларни банкдаги махсус ҳисобварақларга қўйганми?

Буларни билмаймиз. Чунки бу тўғридаги қарор ёпиқ. Ёп-ёпиқ.

Нима учун аукциондан ташқари ажратилаётган ер майдонлари бўйича инвестор, хусусий шерик билан келишилган шартлар, битимлар, мажбуриятлар акс этган қарорларни очиқ эълон қилиш мумкин эмас?

Ва ўзи маълум бир ер майдонини аукционга қўйиш мумкин, бошқа ер майдонини эса тўғридан тўғри ажратиш мумкинлиги мезонларини қандай?

Нега фақат иттоппас жойлардаги ноликвид, ер майдонлари аукционга чиқарилади. Юқори бозор қийматига эга, марказ ва қулай инфратузилмага эга ер майдонлари эса юмалоқ ёстиқ қилиб "инвесторларга" текинга берилади? Ochish/sharhlash