2022-12-07 13:50:21
ИСЛОМ АСОСЛАРИ
Аллоҳнинг фаришталарига ишониш
Пайғамбар алайҳиссалом бизни Аллоҳдан кейин унинг фаришталарига ишонишимизни буюрган. Бу ишончнинг энг катта фойдаси тавҳид эътиқодининг ширк аралашмаларидан, кирларидан ва хатарларидан пок бўлишидир. Юқорида айтиб ўтганимиздек мушриклар Аллоҳга икки хил махлуқотларни тенглаштиришган.
1) Қуёш, ой, юлдузлар, ўт, сув, улуғ одамлар каби кўзга кўринадиган жисмли махлуқотлар.
2) Қандайдир парранданинг орқасида коинот ишларини бошқариб турадиган, баъзилари шамолни, яна баъзилари булутни бошқариб, ёмғир ёғдирадиган, баъзилари эса, ёруғликни пайдо қиладиган кўзга кўринмас, жисми йўқ махлуқотлар. Инсоннинг олдида гавдаланиб турадиган биринчи хилдаги махлуқотларнинг илоҳийлиги “Аллоҳдан бошқа илоҳ йўқ” дейишининг ўзи билангина йўқолади. Аммо мушриклар иккинчи хилдаги кўз билан кўриб, ҳис қилиб бўлмайдиган махлуқотларга кўпроқ мойилдирлар. Уларни маъбуд ёки Аллоҳнинг зурриёти, деб ўйлашади. Хаёлан уларнинг суратларини чизиб, ўша суратларга сажда қилишади, назр-ниёзлар бериб, ўзларича яқинлик ҳосил қилишади. Инсонларнинг тавҳидга бўлган эътиқодлари мана шу иккинчи хилдаги ширк аралашмасидан озод бўлиш учун одамларга бошқа мустақил эътиқод баён қилинди.
Пайғамбар алайҳиссаломнинг бизларга баён қилишича, баъзилар ўзларича “худо” деб ёки “Аллоҳнинг зурриёти” деб ўйлаётган нуроний махлуқлар Аллоҳнинг фаришталаридир. Аслида уларнинг илоҳийликка ҳеч қандай даҳли йўқ. Улар Аллоҳга тўла итоат этадилар, бирон ишда ҳам осийлик қилмайдилар. Аллоҳ улар билан ўз мулкини бошқаради, улар Аллоҳнинг буйруқларини мукаммал адо этадилар. Ўзларича ҳеч иш қилолмайдилар. Ўз қувватлари билан Аллоҳга қарши чиқишлари ёки бировга Аллоҳдан шафоат олиб беришлари мутлақо мумкин эмас. Уларга ибодат қилиш, улардан ёрдам сўраш инсон учун хорлик, шармандаликдир. Зеро, Аллоҳ уларни Одам алайҳиссаломга уни яратган куни сажда қилдирган, уларга бермаган илмни Одам алайҳиссаломга берган. Дастлаб, ўзига сажда қилган фаришталарга сажда қилмоқ бориб турган шармандаликдир.
Пайғамбар алайҳиссалом бир тарафдан бизларни фаришталарга ибодат қилишдан қайтарган бўлса, иккинчи тарафдан, уларнинг Аллоҳнинг сараланган бандалари эканини баён қилган. Улар хато ва гумонлардан пок, табиатан асло Аллоҳга гуноҳ қилмайдиган нуроний мавжудотлардир. Улар доимо ибодатда бўлиб, юқоридан келадиган барча вазифаларни бажарадилар. Аллоҳ таоло уларнинг орасидан Жаброил алайҳиссалом номли улуғ бир фариштани танлаб олиб, уни пайғамбарларга ваҳий олиб келувчи қилиб тайинлаган. Пайғамбаримиз Муҳаммад алайҳиссаломга Қуръонни келтирган ҳам ўша Жаброил алайҳиссаломдир. Фаришталардан баъзилари ҳар доим одамлар билан бирга бўлиб, уларнинг яхши ёки ёмон барча ишларини ва сўзларини ёзиб борадилар. Уларда ҳар бир кишининг ишлари ва сўзлари ёзилган бўлиб, инсон Аллоҳнинг маҳкамасида турган вақтида дунё ҳаётида қилиб ўтган яхши ё ёмон, очиқ ё махфий ишларига гувоҳлик берадилар.
Аммо фаришталарнинг моҳияти, яратилиш шакллари тўғрисида бизга кўп хабар берилмаган. Биз уларнинг борлигига ишонишгагина буюрилганмиз. Уларнинг шакллари тўғрисида ўзимизча бирор нарсани тўқиб чиқаришимиз жаҳолатдир. Уларнинг борлигини инкор қилишимиз куфрдир. Зеро, уларни инкор қилишга ҳеч кимнинг далили йўқ. Уларни инкор қилиш Пайғамбар алайҳиссаломга ишонмасликдан бошқа нарса эмас. Тўғрироғи, биз пайғамбар алайҳиссалом буюргани учунгина фаришталарнинг борлигига ишонаверамиз.
http://t.me/Quron6
671 views10:50