2023-04-17 12:27:53
МИНГ ОЙДАН АФЗАЛ КЕЧА
Ойларнинг энг улуғи Рамазон, кунларнинг энг улуғи жума бўлганидек, кечаларнинг ҳам фазилатлиси Қадр кечасидир. Аллоҳ таоло бу кеча ҳақида алоҳида сура нозил қилди ва унинг номини ҳам айнан шу кеча билан атади.
«Албатта, Биз уни (Қуръонни «Лавҳул маҳфуз»дан биринчи осмонга
) Қадр кечасида нозил қилдик. (Эй Муҳаммад!
) Қадр кечаси нима эканини Сизга не ҳам англатур?! Қадр кечаси минг ойдан яхшироқдир. У (кеча
)да фаришталар ва Руҳ (Жаброил
) Парвардигорларининг изни билан (йил давомида қилинадиган
) барча ишлар (режаси
) билан (осмондан ерга
) тушарлар. У (кеча) то тонг отгунича саломатликдир».
Сура муборак Қадр кечасига бағишланган. Бу кечада бир йиллик ишлар, ҳукмлар, ризқлар, ажаллар белгиланади. Аллоҳ таоло бир йиллик тақдирни фаришталарга билдиради ва бу йил тақдир қилинган нарсаларни уларга ёзиб қўйишни амр этади.
Бу муборак кечанинг қадри улуғдир.
"
Қадр" сўзи икки хил маънода келади:
1) қадри улуғ;
2) миқдор, яъни бандаларнинг тақдирини белгилаш.
Аллома Ибн Касир раҳматуллоҳи алайҳ суранинг нозил бўлиш сабаби ҳақида: «Пайғамбаримиз соллаллоҳу алайҳи ва саллам умматларига кўпроқ хайрли ишлар қилиб, улуғ савобга эга бўлишларини орзу қилиб: “
Эй Раббим, менинг умматимни умматлар ичида умри қисқа, амали оз қилдинг!” дедилар. Шунда Парвардигори олам: "Сиз ва умматингиз учун, эй ҳабибим, Қадр кечасини минг ойдан афзал қилдим", деди. Шунда Расулуллоҳ ва барча саҳобалар қувониб кетишди», деганлар.
Ривоят қилинишича, бир куни Мусо алайҳиссалом Аллоҳ таолога нидо қилиб: "Илоҳо, Сенинг яқинлигингни билишни истайман", деди. Аллоҳ таоло: “Мен Қадр тунида уйғоқ бўлганларга яқиндирман”, деди. Мусо алайҳиссалом яна: “Илоҳо, Сенинг раҳматинг орзусидаман”, деди. Аллоҳ таоло: “Менинг раҳматим Қадр кечасида мискинларга раҳм қилганларгадир”, деди. Мусо алайҳиссалом: “Илоҳо, Сирот кўпригидан яшиндек ўтишни истайман”, деганларида Аллоҳ таоло: “Қадр кечасида фақирларга садақа берганларни олдинроқ ўтказаман”, деди. Мусо алайҳиссалом давом этиб: “Илоҳо, жаннат боғларида бўлишни ва уларнинг мевасидан тановул қилишни истайман”, деди. “Қадр кечасида тасбеҳ айтиб, Мени зикр этиш билан машғул бўлганлар жаннат боғларига сазовор бўлишади”, деди Аллоҳ. Мусо алайҳиссалом: “Илоҳо, дўзахдан нажот топишни истайман”, деганларида Аллоҳ таоло: “Қадр кечасида кўп истиғфор айтганлар дўзахдан нажот топадилар”, деди. Мусо алайҳиссалом яна илтижо қилиб: “Илоҳо, Сенинг розилигингни истайман”, деганларида Аллоҳ таоло: “Эй Мусо, Менинг розилигимни Қадр кечасида икки ракат нафл намоз ўқиганлар топадилар”, деди (“Зубдатул воизин”).
Қадр Рамазон ойининг нечанчи кечаси эканини Аллоҳ ва Расули сир тутган. Бандалар Рамазон ойининг ҳар кечасини қадр билиб, уни бедор ўтказиши учун шундай қилинган. Лекин саҳобалар Расулуллоҳ соллаллоҳу алайҳи ва салламдан уни аниқлаб айтиб беришларини кўп сўраганларидан кейин дастлаб Рамазоннинг учинчи ўн кунлигида, кейинроқ тоқ кечаларидан излаш кераклиги ҳақида айтганлар. Охири у кечанинг аломатлари Рамазоннинг 27-кечаси экани маълум бўлди
("Тафсири Бағавий").
Ойша розияллоҳу анҳо айтадилар:
«Расулуллоҳ соллаллоҳу алайҳи ва саллам: “Лайлатул қадрни Рамазоннинг охирги ўн кунлигининг тоқ кунларида кутинглар”, деб айтдилар» (Имом Бухорий ривояти).
Лайлатул қадрнинг яна бир фазилати, бу кечада фаришталар ва Руҳ (яъни, Жаброил алайҳиссалом) Аллоҳ таолонинг изн-ихтиёри ила йил давомида қилинадиган барча ишларни белгилаш учун осмондан заминга тушадилар.
Қадр кечаси то тонг отгунга қадар тинчлик, осойишталик ва саломатлик кечасидир. Аслида Рамазони шарифнинг ўзи раҳмат, мағфират ва тинчлик-омонлик ойидир. Шу боис ойлар султони Рамазонни хотиржамлик ва осойишталикда ўтказишимиз, унинг ҳар бир кун ва соатини ғанимат билишимиз лозим.
Толибжон НИЗОМ
┉┅━❀ ❀━┅┉
Янги манзилимиз
Улашинг | https://t.me/MuslimShosh
3.4K views09:27
M
