Муҳаммад Али Муҳаммад Юсуф

2021-02-14 12:39:22 #Қадам_бақадам

Ҳамма нарса қадам-бақадам.

Йўлларни қадам-бақадам босиб ўтилади. Дарахтлар ҳам миллиметр, миллиметрлаб ўсади. Тома-тома кўллар пайдо бўлади. Бирданига келган сув эса сел бўлиб, офатга айланади.
Инсон ҳам кўзимиз илғолмайдиган ўлчовлар билан униб-ўсиб, камолотга етади. Дунёда ҳеч бир нарса бирданига катта бўлиб қолмайди.
Ҳамма нарсани Аллоҳ йўқдан бор қилиб, аста секин униб-ўсиши У Зотнинг ер юзига ўрнатган қонунларидандир. Табиат ҳам, инсон ҳам ана шундай. Аста секинлик билан илдиз отмай, бир кунда ўсиб қолган дарахт қулаши муқаррар.
Биз мўминлар инсон сифатида яшаш тарзимиз ҳам шу қонунларга боғлиқдир. Ҳеч ким бир кунда камолга эриша олмайди. Иймон ҳам, куфр ҳам аста секин буюклашади.
Кўзимиз кўраётган нарсалар, қулоғимиз эшитаёган сўзлар, тилимиз сўзлаётган гаплар бамисоли томчи. У тома-тома ё иймонимизни, ё куфримизни буюклашишига хисса қўшади.
Намоз раъкатлар сони билан, рўза кунлар сони билан, ҳаж тавофлар сони билан мукаммал бўлади. Саноғида камчилик бўлса, бу амаллар адо қилинган ҳисобланмайди.
Йўл ҳам қадам-бақадам кесиб ўтилади. Босилган ҳар бир қадам йўлнинг бир парчаси ҳисобланади. Яхши ва ёмон амал ҳам ҳудди шундай. Амалларимизнинг йиғиндиси иймон ёки куфр йўлимизни тамомлайди. Яхши ва ёмон амалнинг кичкинаси, аҳамиятсизи бўлмайди. Биргина сўз билан абадий жаннатий ёки абадий жаҳаннамий бўлишимиз мумкин. Шунинг учун қулоғимизга кирган бир сўзга, тилимиздан чиққан бир сўзга бефарқ бўлмаслигимиз, аҳамиятсиз қолмаслигимиз лозим. Ҳарфлардан сўзлар, сўзлардан жумлалар қурилгани каби, ҳаётимиз ҳам кечаги намозимиз, бугунги зикримиз, эртанги солиҳ амалларимиздан ташкил топиб, бизнинг ҳаёт йўлимизни акс эттиради, охират йўлчилигимизни тамомлайди. Ҳамма нарса қадам-бақадам...

@MuhammadAliMuhammadYusuf Ochish/sharhlash

2021-02-13 20:29:23 #Муножот

Яҳё ибн Муъоз Розий раҳимаҳуллоҳ шундай деди:

Илоҳим!
Тун муножотингсиз татимайди.
Кун тоатингсиз татимайди.
Дунё зикрингсиз татимайди.
Охират авфингсиз татимайди.
Жаннат жамолингсиз татимайди.

@MuhammadAliMuhammadYusuf Ochish/sharhlash

2021-02-13 11:14:37 #Ҳадис

Расулуллоҳ соллаллоҳу алайҳи васалламнинг мавлолари Савбон розияллоҳу анҳудан ривоят қилинади:

«Набий соллаллоҳу алайҳи васаллам:
«Қадарни дуодан ўзга ҳеч нарса қайтара олмайди. Умрни яхшиликдан ўзга ҳеч нарса зиёда қила олмайди. Албатта, банда қилган гуноҳи туфайли ризқдан маҳрум бўлади», дедилар».

Имом Аҳмад ривоят қилган.

@MuhammadAliMuhammadYusuf Ochish/sharhlash

2021-02-12 08:25:42 #Таъзия

Инна лиллаҳи ва инна илайҳи рожиъуун.

Кеча жума оқшоми устозимиз Шайх Муҳаммад Аввоманинг жуфти-ҳалоли вафот этдилар. Аллоҳ тало ҳожи онамизни мағфират қилсин. Чеккан дардларини хато камчиликларига каффорат айласин. У кишига шаҳидлик мақомини бериб, жаннати Фирдавсга дохил айласин. Ортидан қолган яқинларига сабри жамил берсин. Амин!

@MuhammadAliMuhammadYusuf Ochish/sharhlash

2021-02-11 20:51:36 #Расулуллоҳга_салоту_саломлар_бўлсин

«اللَّهُــمَّ صَلِّ وَسَـــلِّمْ على نَبِيِّنَـــا مُحمَّد».

«Аллоҳумма, солли ва саллим ъала набийина Муҳаммад».

@MuhammadAliMuhammadYusuf Ochish/sharhlash

2021-02-11 12:19:55 #Ҳадис

Ибн Масъуд розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Дўзахга ҳаром қилинган кишини ёки унга дўзах ҳаром бўлган кишини сизларга хабарини берайми? У (биродарларига ҳожат вақтида) яқин турадиган, тавозуъли ва мулойим кишилардир», дедилар».

Имом Термизий ривоятлари.

@MuhammadAliMuhammadYusuf Ochish/sharhlash

2021-02-10 12:13:58 #Илм

Абу Саъид Худрий розияллоҳу анҳудан ривоят қилинади:
«Набий соллаллоҳу алайҳи васаллам:
«Илм олиш ҳар бир мусулмоннинг зиммасидаги фарздир», деганлар».

Илм олиш шубҳасиз, барча эркагу аёлга бараварига фарз қилинган амалдир.
Илм олишдан мақсад қалбни ёмон хислатлардан фориғ қилиб, уни фазилатлар билан зийнатламоқдир. Илмни Аллоҳ розилиги учун ва мусулмонларга хизмат учун ўрганилса охиратимиз учун ҳам, бу дунёмиз учун ҳам фойдали бўлади.
Ҳаммамиз илм ўрганишни ва уни ҳаётимизга татбиқ қилишни хоҳлаймиз. Бироқ илм билан шуғуланишнинг ўзигина етмайди, бу илмни унутмаслик ва уни узоқ муддат хотирада сақлаш ҳам керак бўлади. Шунинг учун бу йўлда бизга тўсиқ бўладиган сабабларни билиб олсак, ўрганган илмимизни хотирамизда мустаҳкамлашга муваффақ бўламиз, иншааллоҳ.
Қуйида илмни хотирамизда сақлашга тўсқинлик қиладиган айрим сабабларни айтиб ўтамиз:

1. Аллоҳга осийлик қилиш ва гуноҳларга ботиш.
Илмни унутишнинг ва баракасини ҳис қилмасликнинг асосий сабаби қалбдаги гуноҳларнинг асоратидир. Гуноҳ амалларга бефарқлик, ҳаром нарсаларга қараш илми унутиш ва фойдасини кўрмасликга сабаб бўлади.

2. Кўп ва аралаш ейиш.
Айниқса унли, шакарли ва ўта ёғлик махсулотларни кўп истеъмол қилиш. Маълумки, танамизга фойдаси бўлмаган бу махсулотлардан узоқ туришимиз кераклигини табиблар ҳар доим таъкидлаб келишади. Бу тарзда таом истеъмол қилиш уйқуни кўпайтиргани учун инсон ҳам илм ўрганишдан, ҳам унумли ишлашдан маҳрум бўлади.

3. Тартибсиз уйқу.
Хуфтон намозидан кейин жуда кеч ухлаш ва бомдод намозидан кейин ухлаш илмнинг унумдорлигини ва баракатини йўқотадиган омилларнинг боши ҳисобланади. Аслида инсоннинг энг баракали ва зеҳнининг энг тиниқ бўладиган пайти саҳар вақтидир. Саҳар пайтида ухламаслик учун хуфтон намозидан кейин барвақт ухлаш керак. Шунингдек, соғлиғимиз, ақлимиз ва гормонал мувозанатликнинг соғлом бир шаклда ишлаши учун ҳам эрта ётиб, эрта туриш энг фойдали одатлардан ҳисобланади.

4. Беҳуда ва фойдасиз ишлар билан шуғулланиш.
Беҳуда ва фойдасиз ишларга вақт сарфлаш ҳам илмни унутишга сабаб бўлади. Ҳаётимизда шу даражада чалкашлик кўпайганки, зеҳнимиз керакли ва кераксиз нарсалар билан тўлиб тошган. Зеҳнимиз ўткирланиши ва янада кўпроқ илм ўрганишимиз учун вақтимизни керакли ва фойдали ишларга сарфлашимиз лозим.

5. Тартибсиз, устозсиз китоблардан илм ўрганиш.
Илмни ўз эгалари, уламолардан олишнинг аҳамияти жуда катта. Устоз илм бериш билан бирга одоб, мутавозелик ва босқичма босқич таълим олишни ўргатади.
Бу илмни қисқа муддатда эгаллаш, олган илмни осонликча унутмаслик ёрдам беради. Ҳаммасидан ҳам муҳими адашиш, тўғри йўлдан тойиш, залолатга кетишдан сақлайди.
Аллоҳим, барчамизга манфаатли илм, ҳалол ризқ ва мақбул амал бергин.

@MuhammadAliMuhammadYusuf Ochish/sharhlash

2021-02-09 20:34:19 #Азон

Азон кўнгилларга хитоб этувчи нидо ва бизга Роббимизнинг амрини эслатувчи Билолий садодир. Азон динимизнинг, бирлигимизнинг тимсоли ва шиоридир. Азон намоз вақти кирганини эълон қилиш билан бирга, Аллоҳнинг буюклигини, Пайғамбаримиз Муҳаммад соллаллоҳу алайҳи васаллам Унинг қули ва элчиси эканлигини, намоз нажот топиш йўли эканлигини ҳам эълон қилади. Бизни Роббимизнинг ҳузурига чорлайди. Қадр-қиймати чексиз бўлган азон садосини тинглаш, уни муаззин ортидан қайтаришнинг савоби ва фазилатлари ҳам кўпдир.

Набий соллаллоҳу алайҳи васаллам:
«Азон ва иқома орасидаги дуо рад қилинмас», деганлар.

«Ким муаззинни эшитганда, "Ашҳаду аллаа илааҳа иллаллоҳу ваҳдаҳу лаа шарийка лаҳу ва ашҳаду анна Муҳаммадан абдуҳу ва Расулуҳу. Родийту биллаҳи Роббан, ва бил Ислами динан ва би Муҳаммадин Расулан" деса, унинг гуноҳи мағфират қилинур», деганлар.

«Ким чин қалбдан муаззин айтган нарсани айтиб турса-ю, агар "Ҳайя ала" ларда "Лаа ҳавла ва лаа қуввата "деса жаннатга киради», деганлар.

@MuhammadAliMuhammadYusuf Ochish/sharhlash

2021-02-09 10:21:08 #Дуоибад

Расулуллоҳ соллаллоҳу алайҳи васаллам:

«... Ҳаргиз ўзингизни дуоибад қилманглар, авлодларингизни дуоибад қилманглар, молларингизни дуоибад қилманглар! Яна Аллоҳдан нима сўралса ижобат қилинадиган вақтга мувофиқ келиб қолманглар!» дедилар.

Имом Муслим ривоят қилган.

@MuhammadAliMuhammadYusuf Ochish/sharhlash

2021-02-08 21:53:05 #Тавсия

Суфён ибн Уяйна роҳимаҳуллоҳ шундай деди:

Олдинги уламолар қуйидаги сўзларни бир-бирларига мактубларида ёзишар эди.

1- Ким ичини ислоҳ қилса, Аллоҳ унинг ташини ислоҳ қилади.

2- Ким Аллоҳ билан ўзининг орасини ислоҳ қилса, Аллоҳ у билан одамларнинг орасини ислоҳ қилади.

3- Ким охирати учун амал қилса, Аллоҳ унинг дунё ишларини Ўз зиммасига олади.

Ибн Абуд Дунё «Ал-ихлос ван-нийя» китобида ривоят қилган.

@MuhammadAliMuhammadYusuf Ochish/sharhlash