2021-12-18 18:09:20
Меҳнат мигрантларига оид Ўзбекистон ва Россия ўртасидаги ҳукуматлараро Битимни амалга ошириш бўйича Ишчи гуруҳи йиғилиши ўтказилди
Россия Федерацияси ваколатли органлари делегациясининг мамлакатимизга ташрифи доирасида жорий йилнинг 16-17 декабрь кунлари Урганч шаҳрида “Россия Федерацияси ҳудудида вақтинчалик меҳнат фаолиятини амалга ошириш учун Ўзбекистон Республикаси фуқароларини ташкилий асосда қабул қилиш ва жалб этиш тўғрисида”ги ҳукуматлараро битимни амалга ошириш бўйича Ишчи гуруҳининг навбатдаги йиғилиши ўтказилди.
Унда Ўзбекистон Республикаси Бандлик ва меҳнат муносабатлари, Ташқи ишлар, Ички ишлар вазирликлари, Ташқи меҳнат миграцияси агентлиги, Россия Федерацияси Меҳнат ва ижтимоий ҳимоя, Ички ишлар, Қурилиш ва уй-жой хўжалиги, Қишлоқ хўжалиги вазирликлари, Меҳнат ва бандлик федерал хизмати, Роструд ҳамда йирик иш берувчи корхоналар вакиллари иштирок этди.
Йиғилишда пандемия шароитида мазкур битим асосида Россия ҳудудида вақтинча ишлаш учун Ўзбекистон фуқароларини ташкиллаштирилган ҳолда ишга жалб қилиш, уларни жўнаб кетишдан олдин касблар ва тилга ўқитиш, меҳнат миграцияси оқимини тартибга солиш ҳамда ўзбекистонлик меҳнат мигрантлари учун янада қулайликлар яратиш бўйича амалга оширилаётган ишлар ва ҳамкорлик истиқболлари муҳокама қилинди.
Хусусан, қурилиш соҳасида вақтинчалик меҳнат фаолиятини амалга ошириш учун 10 минг фуқарони Россияга соддалаштирилган тартибда ишга жўнатиш бўйича пилот лойиҳасининг бажарилиш жараёнлари, Россия меҳнат бозори ва иш берувчилари талабларига асосан фуқароларни рус тили ва касбларга тайёрлаш, Россиянинг ўрта махсус таълим муассасалари филиаллари ва қўшма ўқув дастурларини Ўзбекистонда очиш, ушбу давлатда ишлаётган юртдошларимиз ҳуқуқларини ҳимоя қилиш механизмини янада такомиллаштириш каби масалалар юзасидан фикр алмашилиб, йиғилиш якунлари бўйича ишчи гуруҳнинг тегишли баёни имзоланди.
Каналга обуна бўлиш https://t.me/migratsiyaagentligi
5.2K views15:09
T
