Laylo Sobir qizi

2022-11-30 12:56:45 #эгасига

Ранжима, сўзимдан сезилмаса ишқ,
Ранжима, севгимни этмасам ошкор.
Минг бир Лайлиларнинг севгисидан кўп,
Сенга туҳфа этар муҳаббатим бор...

Лекин, буни ошкор этмоқлик душвор,
Қалбда яшамоқда ҳадсиз андиша.
Сенинг кўзларингда яшнайди баҳор,
Сенинг сўзларингда ишқ бор ҳамиша!

Сўзинг оташидан қуёш ҳайратда,
Меҳринг зиёсидан унга туҳфа эт.
Ёруғликдан ёруғ, самодан катта,
Қалбинг дунёсига мени олиб кет!

Мен эса айтмасман «севаман!» сўзин,
Кечир, дилдан тилга кўчмас туйғулар!
Сенга пичирлайман севгимни ўзим,
Тақдир йўлларимиз бир бўлса агар...

Қайсдек яшаб тургин, бўлиб девона,
Розиман, севсанг-у севилаверсам...
Аммо не қилайин очиқ ошкора,
Севмоқлик гуноҳдек туюлаверса...

Лайло СОБИР қизи Ochish/sharhlash

2022-11-29 06:55:22 Эгасига

Мен булутлар орасидаман,
Ҳовучингни тутгин, тўкилгум...

Ва билки, азизим
Бахт бўлиб ёғаман,
Тўкиламан табассум бўлиб...
Тақиб оласан сўнг кулгучларингга.
осмонга боқасан
табассумлар тўкилган онда
юзингни қувончга чаясан...

Мен булутлар орасидаман!
Ёмғирманми?
Ёки қуёшман?!
Агар билмоқликни истасанг
Ёғишимни кут...
Бир ёғсам ҳам хўўп ёғаман
кўп ёғаман...
Тугамайман асло!
Ўшанда сен мени кўзларингга қама!
Асир эт!
Сенинг қўлларингда ахир нелигим-
ёмғирманми ва ёки қуёш!
Сел бўлиб ёғаманми?
Нур бўлиб ёғаманми?
Танла!

Лайло СОБИР қизи Ochish/sharhlash

2022-11-28 08:31:00 Ғам чекмоққа арзимас дунё,
Оддий экан ҳаёт тилсими.
Мен табассум қизиман, гўё,
Енгилмайман дардга, муҳими...

Ортимдан тош отган ғанимга,
Қаратмайман эътиборимни.
Кўрсин мени,
Ушбу очуннинг
Бахтлилардан бахтиёрини!

Кўзимдан ёш шаршарасини,
Оқизгунча пешона,тақдир,
Кулиб-кулиб яшаб оламан,
Мен бир бора туғилгум ахир.

Зулматларга ботар хасадгўй,
Мен осмонман!
У зарра холос!
Дерман, Лайло шуни билиб қўй,
Бахтли яшаш, энг гўзал қасос!

Лайло СОБИР қизи Ochish/sharhlash

2022-11-27 06:43:54 ЯНА СЕНГА

Аёз ёноғидан ўпган гул мисол,
Эртаси ноаниқ бўлиб яшадим.
Энди сен келтиргин менга баҳорни,
Қировмас, қуёшга буркансин қалбим!

Шамол совурди вақт тегирмонида,
Қуриб тўкилмоққа кўнмас умидни...
Илинж бекатида кутяпман ҳамон,
Мени бахт томонга элтар пеэздни.

Кунлар маржон каби турар тизилиб,
Дилда чалкаш ҳислар тортадилар саф...
Баҳорни олиб кел йўлбошчи бўлиб,
Келмасанг...
Йўловчи бўлмоқдан не наф?! Ochish/sharhlash

2022-11-26 11:58:00 Мен бугун тутдайин тўкилиб кетдим,
Ҳовучинг қайдайди, қайдайди, Ота?!
Тупроққа кўмилдим юрагим билан,
Нега тақдир бунча хўрлайди, Ота!

Ҳаёт бу курашиб яшамоқ дерлар,
Синов лашкарлари тортишармиш саф!
Қўлларинг беҳосдан силтаниб кетар
Курашиб, курашиб тополмасанг наф...

Кўзларимда яна ёмғирлар пайдо,
Қанчалар оғирдир-арта олмайсан!
Кетгансан-ортингда милён йиллик йўл,
қайтмайсан, қайтмайсан, қайта олмайсан!

Симёғоч симига қўнган қушдайман,
Салгина адашсам-йиқилгум қотиб...
Сен эса рўёби сароб тушдайсан,
Сен бизни, биз сени қўйган йўқотиб...

Елкамда ортилган зил-замбил осмон,
Қачон қулаб тушар, билмайман, Ота!
Ўнгларимда армон, сўлимда армон,
Ёмғир шеригиму, чўлдайман, Ота!

Кўнглингда нима у, ранго-ранг гулми?
Ёки азоблардан сув ичган тикан?!
Ота, амин бўлдим, танаси бошқа,
Ҳеч қачон дардингни тушунмас экан!

Лайло СОБИР қизи Ochish/sharhlash

2022-11-25 16:57:02 Умрим қай бекатда йўловчи ҳозир?
Қай бир манзил томон отланди экан.
Юлдузлар санчилиб қолар руҳимга
Оловга ўралган тушлари билан.

Тунов кун шамолга дардимни айтдим-
Бошин олиб ,қанот қоқди узоққа.
Етим қолиб кетган дайди боладай,
Йўлим йўқ ўзимдан қочиб кетмоққа.

Қисмат тиним билмай ичади ашким,
Ўзига тож ясар кулгуларимдан.
Сукунат сасидан сипқораман жим
Руҳимда ғалаён
«Мен ахир кимман?»

Кўнглимни безаса тонгларни севган,
Бахтга айланмоқни истаган ҳислар...
Ўзимдан қочишни эплай олмаган
Мен эса...
Юрибман Қуёшни излаб!

Лайло СОБИР қизи Ochish/sharhlash

2022-11-25 08:20:42 ОДАМДАРАХТ

Ўсаётган
кучли дарахтман,
шохларимда пишар сўзларим,
ўйчан кузак келгувчи йўлга
икки тоғдай боқар кўзларим.
Фурсат эса —
шошқалоқ бола,
меваларнинг хуш бўйин туйиб,
атрофимда тинмай айланар,
гоҳ кундузни, гоҳ тунни кийиб...

Шавкат РАҲМОН Ochish/sharhlash

2022-11-18 15:02:29 Skripkali xayollar

Shams sharqona tavoze bilan
ena boshlar asta mag'ribga
Huvillagan kuzgi bog'larda
o'rtanadi sariq skripka.

Daraxtlardek bo'lurman ozod,
Shamollardek kezgum telbarib.
Lazzatlanib simiraman, oh,
Noyabrning ohanglarini.

Ayolligim eslatar mezon,
Tug'ilganim –isyonmi, qasdmi?
Qiz uzatgan OTAdir osmon,
Yomg'ir –endi tuproqning hasmi.

Bu adoqsiz yo'llar– Majnunruh,
Nigohlarim boqar Laylivor.
Sozanda ham tinglovchi ham yo'q,
Skripka bor, Kuy bor, Sog'inch bor...

Mehrinoz

@abbosova_mehrinoz Ochish/sharhlash

2022-11-15 15:36:26 Qizimga!

Sofiya!
Ko‘zlari dengizrang qizim,
Toleyingga baxtlar bossin muhrini...
Akang ham sen borsan, dadang ikkimiz,
Sizlarga tilaymiz go‘zal umrni...

Sofiya!
Allohning mo‘jizasi sen,
Kelding — bag‘rimdasan xuddiki quyosh.
Ming shukr Rabbimga bu tuhfa uchun,
Qaroqlaringda sira ko‘rmayin g‘amyosh!

Sofiya!
Qalbimda boshlandi bahor,
Xush yasha! Xush kelding dunyoyi-dunga!
Tashakkur aytaman takror va takror,
Meni ona qilib tanlaganingga! Ochish/sharhlash

2022-11-14 22:02:51 #Alhamdulillah

Yetkazganiga, loyiq qilganiga shukr! Ochish/sharhlash