HAQSÖZ

2020-12-26 23:19:48 Оғзи-бурнимизни кесдилар,
бироқ ,
Чиқмади шунда ҳам биргина
Широқ .
На ёғий қўшинин сарсон этолдик ,
На ўзликни ўздай сақлаб қололдик.

Достон бўлса ҳам-ки Тўмарисимиз ,
Тўхтамади асло ўмаришимиз.

Аждодларимиз деб кўксимиз кериб ,
Юрибмиз миллатга нуқул панд бериб .

Бўри бўлмоқликка чоғли кишимиз ,
Ўлда-жўлда бари қилган ишимиз .

Тўдага айланиб жамият туздик ,
Номимиз , номимиз биргина ўзбек.

Зўримиз тортади ўзига томон ,
Унинг инжиқлигин кўтарар замон.

Адолат минбардан тушмайди пастга ,
Кунимиз қолган шу тўрт-беш нокасга.

Худоё тавбамиз сохта , кўриб қўй ,
Халқин сотганларни ўзинг уриб қўй !

Бало юборсанг ҳам очмаса кўзин ,
Нафс виждонини қўйган эрса тўсиб ,
Кўтаргин орадан чирикларимиз ,
Азиз қил бўлса гар тирикларимиз!

Йигитали Нур (Йигитали Тоштемиров)

@haqsoz Ochish/sharhlash

2020-12-10 21:32:25 AQSHning O’zbekistondagi Favqulodda va Muxtor elchisi Daniel Rozenblum janoblarining inson huquqlari kuni munosabati bilan tabrigi Ochish/sharhlash

2020-12-10 21:30:08 Buyuk Britaniyaning O’zbekistondagi Favqulodda va Muxtor elchisi Tim Torlot janoblarining inson huquqlari kuni munosabati bilan tabrigi Ochish/sharhlash

2020-12-05 21:37:08 Markazlashgan eski boshqaruv uslubi

Prezident Mirziyoyev sudlar to‘g‘risidagi nutqida : "... Sudlarning barchasini Toshkentga qaraydigan qilaman, kattakonlar ko‘rib turadigan qilaman..."-degan fikrni bildirib o‘tdi.
Aynan mana shu so‘zlar uning siyosiy va huquqiy savodxonligi o‘ta darajada sayoz ekanligini oshkor qilib qo‘ydi.

Eski marazlashgan, buyruqbozlik tizimidan qolgan sarqit ong mahsuli bo‘lgan bu fikrning amalga oshishi korrupsiyaning yanada chuqur ildiz otishiga yordam beradi.
Amaldorni hechqanday" kattakon" halol ishlashga undamaydi, aksincha korrupsiyaning rivojlanishiga hissa qo‘shadi, xolos.
Chunki, bu holatda Sudyalar xalqqa emas, "kattakon"ga yoqishga harakat qilishadi.

Bundan tashqari,"kattakon"larning nazorati sudlarning mustaqilligiga barham beradi.

Harqanday siyosiy kuchni xalqqa berish lozim, faqat xalqgina amaldorni halol bo‘lishga majbur qila oladi.
Sudlar halol ishlashlarini ta'minlash uchun esa Sud jarayonlarini jurnalistlar va blogerlarga jonli yoritishga ruxsat berilishi lozim.

"Toshkentga qaratib qo‘yish" siyosatidan butunlay voz kechib, har bitta viloyatni erkin iqtisodiy zonaga aylantirish kerak.
Prezident janoblari esa hokim tayinlash vakolatidan voz kechib, xalqqa o‘z siyosiy huquqini, ya'ni hokimlarni saylash huquqlarini berishi lozim. Xalqdan tortib olingan harqanday huquq borki, qaytarilishi shart.
Hokimlar prezident uchun emas, xalq uchun xizmat qilsin.

Hokimlarni hozirgi holatda xalq uchun xizmat qilyapdi deb aytolmasangiz kerak?
Fermerlarning yerini olib qo‘yganda, mevali bog‘larni, aholining uylarini buzayotganda yoki tadbirkorlarning binolarini vayron qilayotganda hokimlar xalqqa yoqish uchun qilishganmidi?

Xalqning chiroqsiz, gazsiz qoldirilishi kimga yoqish uchun?

Ahmoq ham bilsa kerak bu usullar bilan xalqqa yoqib bo‘lmasligini.

Hokimlar buyruq bajaruvchilardir, ular aynan prezidentning buyrug‘ini bajarishadi va faqatgina unga yoqishga harakat qilishadi.

Shabnam Olloshkurova

@haqsoz Ochish/sharhlash

2020-12-04 02:07:39 Уялмасангиз ҳам, ҳеч бўлмаса халққа раҳм қилинг!

Кўп нарсаларни умуман тушунмайман. Биттаси — жамиятимизда узоқ йиллардан буён яшаб келаётган "ишчи гуруҳ" тушунчаси ва унинг фаолияти, қўлланиш жўғрофияси...

Масалан, баъзи ноаниқ, фавқулодий масала ёки биз учун янги соҳа ёхуд мутлақо шахсий характерга эга, жамият учун хавфли даҳанаки жанжаллар бўлса, тушуниш мумкин. Бироқ ҳаммаси икки карра икки тўртдек аниқ масала — қишлоқларда газ ва свет йўқлигини ўрганиш бўйича ишчи гуруҳ тузилиб жойларда юргани ғалати иш. Очиғи, мен шундай ўйлайман.

Бу масалани қонунчиларимиз, парламентдаги муҳтарам вакилларимиз “кабинка”сидан чиқмай ҳам аниқлаши мумкин. Ҳалиги катта “тилпон”ни олиб тўртта керакли рақамни терса бўлди, Энергетика вазирлигидаги оддий мутахассис ҳам аҳволни тушунтириб қўяди.

Масалан, у айтиши мумкин: ака, 30-40 йилдан буён бу тизимда ислоҳот бўлмаган, соҳа модернизация қилинмаган, газ ва электр сотишда аниқ ҳисоб-китобимиз йўқ. Юқоридан бюджетга пул керак, газ ва электрнинг релсини ташқарига тўғрила, деса тўғрилаб, қайтар деса, қайтариб ўрганганмиз. Глобал, энергетика энг муҳим стратегик соҳага айланган бугунги дунёда аниқ ва бугунги талабларга жавоб берадиган концепция ё стратегиямиз йўқ. Сизлардан илтимосимиз шулки, йиғилишларда фақат ЕОИИга қўшилсак, ундоқ бўлур, бундоқ бўлур, дея жағ урмасдан, мана бу муҳим факторниям бир ўйлаб кўрсанглар, бизга энергетикамиз бўйича Миллий концепция ёки стратегия ишлаб чиқиб уни қонунийлаштиришда ёрдам беринглар, дейиши мумкин.

Биз эса доим аксини қиламиз. Аниқ, кўзга кўриниб турган нарсани титкилаб унга яна янги "ташхис" қўйишга ҳаракат қиламиз. Ҳаммамиз ўзимизни ишлётгандек, ватанпарвардек, фидоийдек кўрсатишга ҳаракат қиламиз. Бироқ кимга?

Совуқда дирдираб, зимистон уйда мўлтираб ўтирган шу мушфиқ халққами?.. Уялиш ҳеч бўлмаса раҳм қилиш керак.

@platformauzb Ochish/sharhlash

2020-12-04 02:07:38 Ochish/sharhlash

2020-12-03 16:14:21 УЛУҒЛИК НИМАДИР?

Улуғлик даъвосини қилиш тубанликдир. Улуғлик – катталикдир. Катталик Аллоҳга хос. Бандага хокисорлик ярашади.
“Лисонут тайр”да айтиладики, Симурғ қошига кетаётган қушлар Унинг қошига қандай совға олиб борайлик деб Ҳудҳудга савол берадилар. Ҳудҳуд: “У подшоҳнинг хазинасида ҳамма бойлик бор. У ҳеч нарсага муҳтож эмас. Унинг бисотида ожизлик йўқ. Подшоҳга заифлик билан, хокисорлик билан боринг!” – дейди.
Машҳурлик, нотиқлик, гўзал чеҳра, чиройли кийим, қимматбаҳо улов, жилмайган юз, кўксдаги қўл, олам аҳлининг жамики эҳтироми, чеки кўринмайдиган бойлик, шарафингга отилган мушаклар, чалинган қарсаклар, киришинг билан ўриндан туришлар, атрофингни ўраган мухлислар, суратга тушишни истаганлар, ҳашамдор уйлар – буларнинг ҳеч бири инсон учун улуғлик ё иззат мезони эмас. Бу ризқларнинг соҳиби бўлган одам улуғлик маснадида ҳисобланмайди.
Аллоҳ таоло иззат ва улуғликни иймон устида барпо бўлган гўзал ва самимий хулқ ичига яширди. Аллоҳ ўз бандалари ичидан кимгадир улуғворлик ато этса, бу банда ўзини тупроқдан қуйида кўради. У шишмайди. Ҳовлиқмайди. Гердаймайди. Ўзидан кетмайди. Мақтовга эҳтиёж изҳор қилмайди. Зотан, инсонларнинг мақтовига кўз тикиш чўчқа думалайдиган балчиққа талпинишдан кўра ёмонроқдир.
Шайтон измидан юрган пасткашлар улуғларга кесак отиб чарчамайдилар. Асли, уларнинг на мустақил фикри, на эркин қарори йўқ. Ялоқларига тўлдирилган ювинди учун ҳақ тўлайман бошқаларга ҳурадиган итлардир улар.
Пастакашда мардлик йўқ. Мард инсон душманликни ҳам ўз ўрнига қўяди. Мард душман ўз рақибини ҳам қадрлашни билади. Тубанлар эса бу каби туйғулардан йироқ. Улар ахлат тозалаш учун қўлга кийиладиган бир қўлқопдир.
Агар кўчада бир ит акилласа, оқил инсон унга эътибор бермас. Тишлаб олмасин деб дарҳол узоққа кетар. Башарти, итга жавоб бериш учун тўрт оёқлаб, унинг қаршисига турса, не бўлур?!
Бир отарчи чиқиб муаззам Ислом қадриятлари хусусда валдираса; яна бир ахлоқсиз обрўли инсонлар шаънини булғалаш учун чангалида ахлат кўтариб келса – уларнинг қай бирига эътибор бериш керак?! Эътибор бермоқ оқилнинг ишими? Бу улуғлик поясидаги зотларга ярашурми?!
Тубанлар билан тенг бўлмаслик – иззатнинг белгисидир. Бетарбия сўзларни жавобсиз қолдирмоқ бу сўзни-да, унинг сўзловчисини-да, жазоламоқ услубидир. Модомики, илоҳий қадриятларга тил тегизганнинг тилини суғуриб олмоқ имкони бўлмаса, уни ёлғизлатиш ва эътиборсизлик қамалида қолдирмоқдан ўзга чора йўқ.
Улуғлик – лаиму арзол қаршисига чиқмасликдир. Бу тоифанинг чораси қаттиққўл амалдир, холос. Ҳар қандай сўз уларга таъсир этмас.
Буюклар номига доғ туширмоқ учун ҳаракат қилган кас ўзини тириклай куйдирмоқда, шубҳасиз. Ювинди истагидаги талваса уни бўғиб ўлдириши муқаррар.
Вақт шамоли макон узра эсиб турибди. Бу эсиш қиёмат кунига қадар давом этгай. Бу шамол йўқликка қараб учирмайдиган бирор махлуқ йўқдир оламда. Вақт шамолига дош беражак биргина қудрат – Иймон ила Аллоҳга қурбат ҳосил этмакдир. Аллоҳнинг қонунлари вақт шамолидан кучлироқ ва бу қонунларга итоат этганларни Аллоҳнинг ўзи ҳифз этажак, табиий.
Аллоҳнинг ҳузурига ожизлик билан йўл ол. Роббинг қаршисида таслимият ва кўзёш ила қойим бўл. Ўзгалар устидан ўзингни катта олма ва тубанлар қаршисида ўзингни ерга урма. Бу Аллоҳ берган иззат ва улуғликдир, иншааАллоҳ!

Акром МАЛИК
2020 йил, 1 декабр

Луғат

• Лаим – пасткаш
• Арзол – разиллар

@haqsoz Ochish/sharhlash

2020-12-02 16:19:23 Халққа газ беринг, раҳбарлар!

Ўғлим шамоллаб, Хоразм вилоят болалар шифоханасига даволанишга ётдик.
Бўлимда энг енгил касалланган бемор мани ўғлим. Оллоҳ хамма касал болаларга Ўзи шифо берсин.

Касалхонада ҳар-хил одам ҳар-хил синиқ кўнгиллар. Аксар болалар бувиси билан ётишибди. Сабаби оналарининг бошқа боласи бор, ёки ота-оналари ўзга юртларда ризқини теришга кетишган.

Бугун ҳамхонамнинг 14 ёш ўғли 10 кунлик комадан ўзига келмай оламдан ўтди. Онаизорнинг ҳозирги аҳволини айтишга тил ожиз. Касалхонадаги кўпчилик бемор болалар гайморит, менингит, бронхить ва шунга ўхшаш касалликлар билан курашмоқдалар.
Оламдан ўтган бола ҳам менингит бўлиб миясига йиринг ўтиб операция қилинган.

Ишонмассиз, марказда яшаганим учун уйимда газ, свет, сувдан муаммо йўқ. Лекин бошқа беморларнинг ҳаммасини касалланишига газсиз совуқ уй сабаб.

Газ йўқлигидан совуқ уйда болалар касалланиб, оғир асоратлар билан касалхонага ётишган. Айримлари эса ўлим билан олишиб ётибди.
Ҳар куни янги касаллар келади. Нарсаларини қўйиб жойлашгунича хонани ўтин, таппи, кўмир хиди олиб кетади.
Аёл, кампирларга раҳмим келади, қиш келди дегунча шу ҳидлар танасига сингиб кетади. Оилада аёл бечора қишда эрига аёл бўлиб эмас, ўтин ёқувчи хизматчи бўлиб кўринади.

Укол оладиган пайт каридорни, болаларнинг қийналиб йиғлаганлари эштилиб юракларни эзади.
Нахотки, шу қийноқлар, болаларнинг газсиз совуқ туфайли нобуд бўлишлари рахбарларга етиб бормаса?!
Шу болаларнинг уволидан қўрқишмаса?!

Қўрқишмайди, чунки уларнинг уйлари иссиқ, болалари иссиқ уйларда катта бўлишмоқда.

Эссиз 30,40 ёшдаги аёлларнинг аксари қора мехнатдан, тутундан ўзидан 10 ёш катта кўриниш беради. Мункиллаган бувилар невараларининг касалланиб азобланганидан баттар қаддилари букилган.

Юртимизда газ кони кўп, халққа газ беринг раҳбарлар!
Қиёматда савол-жавобдан қўрқинг!
Хозир хаёт тугаб хаммамиз 2 метрлик зах қабр маконимиз бўлади.
Нахот шулар миянгизда айланмаса?!

Dilnoza Ismoilzoda

@haqsoz Ochish/sharhlash

2020-12-02 16:19:01 Изтироб...

Қишлоғимдан икки нафар, қўшни қишлоқдан бир йигитни тунов куни тупроққа бердик. Тошкентда мардикорчилик қилишарди, ис газидан заҳарланиб, вафот этишди. Узоқроқ қариндошчлиги ҳам бор эди.

Бири ёлгиз фарзанд эди. Бирининг тўрт, иккинчисининг икки гўдаги сағир қолди. Энди 30 га чиққан болалар.

Юрагим оғриди, ўзимга келолмаяпман. Нега бунчалар ожизмиз - инсоният, технологиялар тараққиёт чўққисига чиққан замонда?!

Ўзбекнинг қисматими бу... эй худо, сабр бер!

***

Iztirob...

Qishlog’imdan ikki nafar, qo’shni qishloqdan bir yigitni tunov kuni tuproqqa berdik. Toshkentda mardikorchilik qilishardi, is gazidan zaharlanib, vafot etishdi. Uzoqroq qarindoshchligi ham bor edi.

Biri yolgiz farzand edi. Birining to’rt, ikkinchisining ikki go’dagi sag’ir qoldi. Endi 30 ga chiqqan bolalar.

Yuragim og’ridi, o’zimga kelolmayapman. Nega bunchalar ojizmiz insoniyat, texnologiyalar taraqqiyot cho’qqisiga chiqqan zamonda?!

O’zbekning qismatimi bu... ey xudo, sabr ber!

Abdurakhman Tashanov

@haqsoz Ochish/sharhlash