2023-04-29 20:28:40
Oʻzbekiston futbol assotsiatsiyasi majlislar zalida Coca-Cola Superliga va Pro-ligada faoliyat yuritadigan hakamlar ishtirokida oʻtgan tur uchrashuvlari yakunlariga bagʻishlangan seminar tashkil qilindi. Unda OʻFA rahbariyati, Oʻzbekiston futbol hakamlari markazi vakillari, FIFA instruktorlari, hakamlar va nazoratchilar ishtirok etishdi.
Seminarni OʻFA vitse-prezidenti Ravshan Irmatov tanqidiy ruhda ochib berdi va oʻz nutqi davomida mamlakatimizda futbol rivojlanayotgani, shu bilan birgalikda, uning rivojlanishida hakamlik alohida oʻrin tutishi, hakamlar bir vaqtning oʻzida mamlakat futbolining ham yuzi ekanligi, shu sababli hakamlardan har oʻyinga yuqori tayyorgarlik koʻrish kerakligi va har bir hakam muntazam ravishda oʻz ishiga nisbatan professional va jiddiy yondashishi lozimligiga urgʻu berdi.
“Hakamlarimizning saviyasi futbolimizning rivojlanishiga taʼsir oʻtkazadi. Ular yoʻl qoʻyayotgan xatolar jamoatchilikning eʼtirozlariga sabab boʻlmoqda. Avval ham koʻp taʼkidlaganmiz — sifatli hakamliksiz sifatli futbolga erisha olmaymiz. Sizlarning zimmangizda katta masʼuliyat bor”, dedi Ravshan Irmatov.
Seminar davomida tajribali ekspertlar tomonidan tayyorlangan videoroliklar yordamida joriy yilgi Superliga bahslarida qayd etilgan bahsli vaziyatlar tahlil qilindi. Baʼzi xatolar koʻrsatib oʻtilib, kamchiliklarni qanday bartaraf etish, keyingi oʻyinlarda bu xatolarni takrorlamaslik uchun nimalarga ahamiyat qaratish zarurligi boʻyicha koʻrsatmalar berildi.
Yakkakurashlar vaqtidagi keskin vaziyatlarni oʻrganish, jarima maydonchasi ichidagi qoida buzilishlari, oʻyindan tashqari holatlar, qoidabuzarliklar darajasini aniqlash va shunga koʻra jazo turlarini belgilash borasida tahliliy fikrlar aytildi.
t.me/FAUzbekistan
4.8K views17:28