2022-07-29 13:17:06
Суҳайб Румий ‒ Расулуллоҳ алайҳиссалом учун бор бойлигидан воз кечган саҳоба
Ҳозирда туркиялик машҳур сийрат олими Муҳаммад Амин Йилдирим ҳафизаҳуллоҳнинг «Тижоратчи саҳобалар» номли асарини таржима қилдим. Мазкур асарнинг Суҳайб Румий розияллоҳу анҳу ҳақларидаги бўлимига келганимда, бу саҳобанинг ҳаётларини таржима қиларканман, “Суҳайб Румий розияллоҳу анҳу мени ўзларига мафтун этди”, десам, муболаға қилмаган бўламан.
Суҳайб Румий розияллоҳу анҳу ҳақларида ўзим қаттиқ таъсирланган бир ривоятни келтираман:
Расулуллоҳ соллаллоҳу алайҳи васаллам билан Абу Бакр Сиддиқ розияллоҳу анҳу Маккадан Мадинага ҳижрат қилиб чиқишгани ҳаммамизга маълум ва машҳур. Мана шу ҳижратда бу икки дўст билан бирга Суҳайб Румий розияллоҳу анҳу ҳам бўлиши керак эди. Аммо маккалик мушриклар Суҳайбни қўйиб юборишмайди. Расулуллоҳ алайҳиссалом ва Абу Бакр Сиддиқ Суҳайбни кутиб-кутиб, у киши келмагач, Мадинага жўнаб кетадилар. Маккаликлар Суҳайбни кетишидан хабар топишиб, тунда унинг уйи олдига айғоқчилар қўйишади. Суҳайб уларни пайқагач, улардан қутилиш учун қорин оғриғи безовта қилаётгандек ҳожатга тез-тез қатнайди. Буни кўрган айғоқчилардан бири: «Бу одамни пойлашимиздан нима фойда? Буни қаранглар, Лот уни қорнига касаллик бериб қўйибди. У бу ҳолида на йўлга чиқа олади ва на Ясрибга ета олади», дейди. Унинг бу гапидан кейин ҳаммаси уйига тарқалишади. Пайтдан фойдаланиб, Суҳайб дарҳол йўлга отланади. Аксига олиб йўлда мушриклардан бири Суҳайбни кўриб қолади ва дарҳол маккаликларга хабар қилади. Дарҳол унинг ортидан тушишади ва Суҳайбнинг йўлини тўсишади. Суҳайб бошқа чораси қолмаганини сезиб, қўлига камонини олиб, ўқини қададилар ва маккалик мушрикларга қарата: «Эй маккаликлар! Мени танийсизлар, мен сизнинг орангизда энг яхши камонбозман. Ҳозир ўқдонимдаги ўқлар тугагунча ўқ отаман. Ўқим тугагач, қўлимга қиличимни оламан, қиличим сингунча сизлар билан курашаман. Ё сизлар мени ўлдирасизлар, ё мен сизларни. Яхшиликча менинг йўлимни тўсманглар, йўлни очинглар, мен кетайин», дедилар. Маккаликлар бу қатъий сўзларни эшитиб, бироз қўрқувга тушдилар. Мушриклардан бири: «Эй Суҳайб! Сен бизнинг орамизга келганингда қул эдинг. Кейин биз орқали кўп мол-дунё йиғдинг. Энди ўша бойликларни олиб Ясрибга – Муҳаммаднинг олдига кетяпсан! Аллоҳга қасамки, сени қўйиб юбормаймиз», деб бақирди. Суҳайб уларга ортиқча гапиришнинг фойдаси йўқлигини сезгач, улар билан келишишни афзал билди ва: «Орангиздалик вақтимда қанча бойлик тўплаган бўлсам, ҳаммасини сизга берсам, мени қўйиб юборасизларми?» деди. Маккаликлар бирдан эсанкираб қолишди, ундан бундай таклифни ҳеч ҳам кутишмаган эди. Чунки рўпараларидаги бу инсон бир умр ишлаб топган бойлигини фақатгина Муҳаммадга етишиш учун уларга бериб юбормоқчи эди! Мушриклар бир-бирларига қараб, бу фурсатни қўлдан бой бермаслик учун ҳам Суҳайбнинг таклифига рози бўлишди. Суҳайб уларнинг рози бўлганини кўриб, севинчи ичига сиғмасди. У: «Бор бойлигим, сарватим Макканинг фалон жойида. Бориб олинглар» деди. Маккаликлар бир неча кишини Суҳайб айтган жойга бориб, бойликни олиб келиш учун жўнатишди. Улар айтилган жойдан молларни олиб келишгач, Суҳайбни қўйиб юборишди ва бойликни тақсимлашга киришиб кетишди...
Суҳайб Румий эса севинчи ичига сиғмай, Расулуллоҳ соллаллоҳу алайҳи васаллам томон Ясрибга – Мадинага қараб йўлга тушди...
@AbdullohRahim
1.5K views10:17