2022-07-20 10:06:29
Eshqobil SHUKUR – 60 yoshda!
Shoir Eshqobil Shukur 1962-yilning 20-iyulida Surxondaryo viloyati, Qumqo‘rg‘on tumanidagi Boymoqli qishlog‘ida tug‘ildi. Toshkent davlat universiteti (hozirgi O‘zMU)ning filologiya fakultetida tahsil oldi.
O‘zbekiston televideniesi muharriri (1985-1992), “Saodat” jurnali bosh muharrir o‘rinbosari (1992-1994), Davlat matbuot qo‘mitasi bosh muharriri (1994-1995) vazifalarida ishladi. 1995-yildan “O‘zbekiston” telekanali hamda “Ma’naviyat” jurnali (2014) bosh muharriri lavozimida xizmat qiladi.
Uning ijodi o‘tgan asrning 80-yillaridan boshlanib, “Qadimgi bitiktoshlarga yozuvlar”, “Mengim momoning yo‘qlovi” singari dastlabki she’rlari bilanoq tilga tushdi. Shundan so‘ng birin-ketin “Yurakni o‘rganish” (1986), “Sochlari sumbul-sumbul” (1988), “Tungi gullar” (1989), “Yashil qushlar” (1995) she’riy majmualari dunyoga keldi. “Tungi gullar” kitobi respublika yoshlar tashkilotining Usmon Nosir nomidagi mukofotiga sazovor bo‘ldi. Eshqobil Shukur “Ko‘hna bog‘ rivoyatlari” (2005), “Oqibat oqshomi”, “Padarkush” kabi nasriy asarlar hamda “Ibtido xatosi”, “Naqshband” nomli dramatik dostonlar, “Lahza siniqlari”, “Nasoyim-ul muhabbatga sayr” turkumlari, “Dunyoning ko‘chishi”, “Qo‘riqxonada”, “Pul sanayotgan odam” kabi qissa va hikoyalar muallifi hamdir. Shoirning asarlari ingliz, rus, turk, ozarbayjon va boshqa xorijiy tillarga tarjima qilingan.
Eshqobil Shukur 2012-yilda “O‘zbekiston Respublikasida xizmat ko‘rsatgan madaniyat xodimi” unvoniga sazovor bo‘lgan. U “E’tirof” mukofoti sohibi (2013). 2016-yilda “Oltin qalam” xalqaro milliy mukofoti tanlovi g‘olibi bo‘ldi.
BOG‘
Qorong‘i bog‘ ichra oydin bir yo‘lak…
Xufton yulduziday titraydi yurak.
Sevgilar, sog‘inchlar, qayg‘ular bilan
Shu bog‘da shu kecha uchrashsam kerak…
Suvday totli sohir suxanlar bilan,
Gulga do‘ngan aziz xok-tanlar bilan,
Hazrati Xizr va chiltanlar bilan
Shu bog‘da shu kecha uchrashsam kerak.
Falakda bir gulzor, yerda bir gulzor,
Har tilda ming da’vo, har dilda ming zor,
Mening ham Xudoga aytar arzim bor,
Shu bog‘da shu kecha aytolsam kerak.
Boryapman o‘z izim, o‘z so‘zim bilan,
Ko‘ksimdagi otash yulduzim bilan,
O‘zini izlagan o‘z-o‘zim bilan
Shu bog‘da shu kecha uchrashsam kerak.
* * *
Aylanayin ovozingdan, Suv,
Iforingdan aylanay, Havo.
Ko‘nglim ichra aziz bir tuyg‘u,
To‘lqin-to‘lqin esadi navo.
Himmatingdan aylanayin, Yer,
Hayot, senga sharaf va sano!
To‘lib borar ko‘zlarimga nur,
Yuragimga to‘lmoqda Xudo.
Aylanayin ovozingdan, Suv,
Iforingdan aylanay, Havo.
VASF
Javzoning o‘n beshinchi kuni…
Oy to‘ldi.
Xushbo‘y shamol esdi tog‘lar tomondan.
Tun shunday go‘zal ediki,
U haqda she’r yozay desam
Yolg‘onchiga o‘xshab qolaman.
yoshlikjurnali.uz
@yoshlikjurnali
38 viewsY.Kamalovna, 07:06