2022-09-02 11:50:12
ЖАЛОЛИДДИН МАНГУБЕРДИ
1.
Султонингман, соҳибдилингман,
Қалбим ювдим Жайҳун ёшига.
Ай ғанимим, бу жонсиз танни
Музаффарнинг ташла пойига.
Ватан ёди – мук тушган орол,
Бир сир олди бу дунёсидан.
Руҳ – қанотли бу оппоқ отим,
Сузиб ўтди Синд дарёсидан.
Ойдин булоқ – сўнмас ғурурим,
Йўқ, шаън эмас, ёвга жон тутдим.
Тўлқинларга кўмдим онамни,
Тўлқинларга боламни бердим.
Бир ер бордир аслзодага,
Бир Ватан бор от ёлларида.
Бир хиёнат урчиди, ўсди,
Шарафулмулк хаёлларида.
Хуросону Кирмон, Синд қадар,
Саҳроларга уланди кўнглим.
Мен Ватанни суйдим ўзимдай,
Бир Ватанга айландим севгим.
2.
Бир дунёки, кемаси зуҳддир,
Бир халқ эрур – кемаси узлат.
Бир ёмғирки, сукутни билмас,
Бир шамолки, шиддати ёвқур.
Бир кўнгилки, ололмас ҳеч ким,
Дарёсига уфқлар кўчар.
Чалиб ғамгин качкулларини,
Юрагимдан дарвешлар ўтар.
Ўтар Бағдод кўчаларидан,
Оппоқ хаёл – маҳзун, мунир тонг.
Ишқ – кўз ёшим томчиларида
Кўрдим валий, кўрдим шайх, султон.
Хабиб АБДУНАЗАР
39 viewsY.Kamalovna, 08:50