2023-06-02 10:36:52
Гулнора Каримовадан жабрланганларни зарари қопланадими?
2016 йилда менга “Қувасойцемент” АЖ нинг бир нечта акциядорлари мурожаат қилишганди. Масала, уларнинг акциялари собиқ директорлар томонидан олиб қўйилиши натижасида 2009-12 йилларда келиб чиққан зарарларни ундиришда адвокат сифатида ёрдам бериш.
Мен ишни ўрганиб, рад жавобини бердим, чунки ўша пайтларда “Қувасойцемент” АЖ Гулнора Каримовага қарашли одамлар томонидан бошқарилганлиги ҳеч кимга сир эмасди. Г.Каримованинг ўзи 2016 йилда озодликни чеклаш жазосини ўтаётганлиги ҳақида турли маълумотлар мавжуд бўлсада, барибир унга бориб тақалувчи ишлар бўйича шикоят қилишнинг ўзи ҳам жуда хавфли иш эди.
2017 йил бошларида “Қувасойцемент” АЖ акциядорлари қайтадан менга мурожаат қилишди, бу пайтга келиб Ш.Мирзиёев Президент бўлиб, катта ислоҳотлар бошланган пайт эди. Шу сабабли яхши ният билан иш бошладик.
Аввало, Яратганнинг инояти билан, қолаверса, прокуратура ва суд органларининг биз тақдим этган ҳужжатларни ўрганиб, қонуний бахо берганликлари натижасида суднинг ҳукми билан адолат тикланиб, 1 300 нафардан ортиқ жабрланувчилар фойдасига Г.Каримова ва бошқалардан 27.424.332.558,33 сўм ундириш белгиланди.
Суд ҳукми билан 2020 йилдаёқ прокуратура депозитида сақланаётган пуллар ҳисобидан зарарнинг 19.557.861.038,90 сўми жабрланувчиларга тўлаб берилди. Қолган 7.866.471.519,43 сўм зарар Г.Каримова ва бошқалардан солидар тарзда ундирилиши белгиланган.
Шундан кейин, деярли уч йил мобайнида қолган суммани ундириш учун мурожаат қилмаган жойимиз қолмади. Биз мурожаатларимизда Г.Каримованинг Ўзбекистондаги мулклари мавжуд бўлмаса, ундирувни чет элдаги мулкларига қаратишни сўраб, халқаро шартномаларга асосан ундирувни амалга ошириш мумкинлигини асослаб бердик.
Бироқ барча мурожаатлар айланиб-айланиб МИБ га боради. МИБ ҳам бир хилда жавоб беради: “Суд ҳужжатлари ва бошқа органлар ҳужжатларини ижро этиш тўғрисида” ги Қонуннинг 80-моддасида белгиланган навбат асосида тўлаб берилиши маълум қилинади.
Шундан бошқа жавоб йўқ.
Ва ниҳоят Г.Каримовага тегишли пулларнинг бир қисми қайтарилиши ҳақида Ўзбекистон ва Швейцария ўртасида битим тузилди, афсуски ушбу битимда қайтарилаётган пуллар ҳисобидан Г.Каримовадан жабрланувчиларга етказилган зарарни қайтариш кўзда тутилмади.
Ваҳоланки,
БМТ нинг Коррупцияга қарши конвенциясининг 57-моддаси (Активларни қайтариш ва уларни тасарруф қилиш) нинг 3-банди с-кичик бандида барча “бошқа ҳолатларда, биринчи навбатда, мусодара қилинган мол-мулкни сўров бераётган иштирокчи Давлатга, бундай мол-мулкни унинг аввалги қонуний эгаларига қайтарилиши ёки жиноятдан жабр кўрганларга компенсация тўланиши масаласи кўради” деб белгиланган.
Менимча, Ўзбекистон томонида туриб музокарага киришган масъуллар томонидан ўз фуқароларига етказилган зарарларни ундириш масаласида етарли чоралар кўрилмаган. Қўпол қилиб айтганда, шунчаки, тупуриб қўйилган.
Шу сабабли биз ҳимоям остидаги фуқаролар билан маслаҳатлашиб, ўзинг учун ўл етим деган мақолга риоя қилиб, БМТ бош котибига ва Швейцария Конфедерацияси Президентига мурожаат қилмоқчимиз. “Г.Каримованинг пулларида бизни ҳақимиз бор, лекин бизни ҳукуматимиз вакиллари бу ҳақда сизга маълум қилмаган бўлса керак, шунинг учун Г.Каримованинг пуллари қайтарилишида 1 300 дан ортиқ жабрдийдаларни ҳам инобатга олинглар, жа борса 700 000 АҚШ долларига тўғри келади” деган маънода.
Бу ҳақда ёзишимдан мақсад, эртага БМТ ёки Швейцария ҳукумати томонидан Ўзбекистон тарафига қандайдир эътироз билдирилса, шу масалани ўзимизга айтганларингда кўриб чиқардик, дейдиганлар чиқиши мумкин.
Аслида оиладаги муаммоларни оила бошлиғи ҳал қилади, муаммо ташқарига чиқмасин, дейди. Лекин шу муаммолар оила бошлиғигача етиб бормаяпти, шекилли.
PS: Илгари ҳеч қачон шу постни максимал тарқатишга ёрдам беринг деб ёзмаганман. Бироқ ушбу постни масъул шахсларга етиб боришига ёрдам берсангиз, 1 300 дан ортиқ жабрдийдаларни дуосини оласиз, бу аниқ.
Каналга уланиш
@advokatqosimov
3.6K views07:36
B
