2022-02-22 09:06:51
«Заковат» клуби «Что? Где? Когда?» телевизион дастурининг лицензиясини харид қилди
Кўпчиликка маълумки, Россия Федерациясининг «Что? Где? Когда?» теледастури 1975 йилдан буён эфирга узатилиб келинади ҳамда кўплаб давлатларда ўзининг миллионлаб мухлисларига эга. Эътиборли томони, «Что? Где? Когда?» дастурининг хориждаги илк аналоги айнан Ўзбекистонда дунё юзини кўрган ҳамда «Заковат» интеллектуал кўрсатуви 2001 йил 25 март санасидан бошлаб 21 йилдан буён доимий эфирга узатилмоқда.
Ўтган давр мобайнида «Заковат» клуби россиялик ҳамкасблари билан доимий алоқада бўлиб келган, аммо молиявий имкониятлар йўқлиги сабабли расмий лицензия шартномаси тузишнинг имкони бўлмаган эди.
2022 йил 20 январь куни «Заковат» интеллектуал ўйинини аҳоли ўртасида оммавий-маърифий ҳаракатга айлантиришга оид Президент қарори қабул қилиниши натижасида интеллектуал клуб фаолияти янги босқичга кўтарилаётганини алоҳида таъкидлаш зарур.
Жумладан, қарор ижросини таъминлаш мақсадида «Заковат» интеллектуал клуби» нодавлат нотижорат ташкилоти ҳамда «Что? Где? Когда?» теледастурининг муаллифлик ҳуқуқи эгаси бўлган Россиянинг «Продюссерский центр «Игра-ТВ» МЧЖ ўртасида шартнома имзоланди.
Мазкур шартнома «Что? Где? Когда?» теледастурининг сценарийсидан фойдаланиш ҳуқуқи, шунингдек иккала томонларнинг келгусидаги ўзаро ҳамкорлигини ўз ичига олади.
Шартнома асосида «Что? Где? Когда?» теледастурининг бир гуруҳ ижодкорлари Тошкент шаҳрига ташриф буюришди.
Телекомпаниянинг лицензия масалалари бўйича ижрочи директори
Наталия Кузнецова, теледастур режиссёри
Андрей Лысенко, техник директор
Алексей Ветюгов ҳамда муҳаррир
Дарья Ивашкевичдан иборат делегация «Заковат» кўрсатувининг суратга олиш жараёнларида иштирок этди, иш жараёнлари билан яқиндан танишди, ўзларининг маслаҳат ва тавсиялари билан ўртоқлашди.
Шундай қилиб, 2022 йилнинг баҳорги мавсумидан бошлаб «Заковат» кўрсатуви «Что? Где? Когда?» теледастури лицензияси асосида эфирга кетишни бошлайди.
@zakovat
169.7K viewsedited 06:06