2023-04-15 15:27:34
Рамазонда энг қадрли бўлган уч фурсат
Биринчиси: Бомдод намозидан кейинги куннинг аввалги соати.
Набий соллаллоҳу алайҳи васаллам бу ҳақда:
«Ким бомдодни жамоат билан ўқиса, сўнгра қуёш чиққунча Аллоҳни зикр қилиб ўтирса, сўнг икки ракъат намоз ўқиса, унинг учун ҳаж ва умранинг ажридек бўлур. Тўлиқ, тўлиқ, тўлиқ», деб айтганлар.
Имом Термизий ривояти.
Изоҳ: Ушбу ривоятда васф қилинаётган намоз шуруқ намози ҳам дейилади. Шуруқ эса қуёшнинг чиқишидир. Бу ҳадиси шарифда бомдод намози билан қуёш чиққунгача бўлган вақтни Аллоҳнинг зикри билан ўтказишга ва айни пайтда шуруқ намозини ўқишга тарғиб қилинмоқда. Аввал айтилганидек, шуруқ намози чошгоҳ намозининг энг аввалги вақтидаги намоздир. Шунингдек, ҳадисда бомдод намозини жамоат билан ўқишга тарғиб борлиги ҳам очиқ-ойдин кўриниб турибди.
Ушбу ҳадисга амал қилиб, саҳар чоғи Аллоҳнинг ибодати, зикри билан машғул бўлиш фазилатли ишдир. Ўтган салафи солиҳлар бу ишга алоҳида эътибор берганлар. Ривоят қилишларича, бир гуруҳ ҳожиларнинг йўлини арслонлар тўсиб қолибди. Арслонлар қамали уч кун давом этибди. Арслонлардан қўрқиб бирор киши уч кунгача мижжа қоқмабди. Ниҳоят, учинчи куни саҳарда арслонлар кетишгач, ҳамма бомдодни ўқиб, ўзини уйқуга урибди. Ҳожиларнинг ичида буюк тобеинлардан Товус роҳимаҳуллоҳ ҳам бор экан. У киши ухлашни хаёлига ҳам келтирмабди. «Уч кун мижжа қоқмадингиз, бироз ухлаб олсангиз бўлар эди», дейишган экан, «Бу пайтда ухлаб бўлмайди» деб, зикрни давом эттирган экан. Бу гўзал одат ҳозирги кунда ҳам баъзи аҳли солиҳларнинг сийратида учраб туради. Бу пайтда ер юзида навбатчилик қиладиган фаришталар алмашаётган бўладилар. Бу вақтда ухлаш, ғофил бўлиш ва бошқа бефойда ишлар билан машғул бўлиш мўмин одамга тўғри келмайди. Саҳарда ибодат қилганларнинг ризқи улуғ, ухлаганларнинг ризқи тор бўлади.
Ҳозирги тараққий этган илм-фан ҳам саҳар вақтининг фазилатли эканини тасдиқламоқда. Саҳар чоғида ультрабинафша нурлар тарқаладиган вақт бўлар экан. Ўша нурлар инсон учун жуда ҳам фойдали экан.
Хўш, ким ўша нурлардан энг кўп фойда олади? Албатта, бомдодни жамоат билан ўқиб, қуёш чиққунча Аллоҳнинг зикри билан машғул бўлиб, ке¬йин икки ракъат намоз ўқиган киши-да!
Ҳа, бу ҳадисга доимий равишда амал қилишга одатланишимиз лозим.
Иккинчиси: Куннинг охирги, қуёш ботишидан олдинги пайти. Рўзадор одам бу олтин фурсатни кўпинча ифтор таомини тайёрлаш билан машғул бўлиб ўтказиб юборади. Бироқ, рўзанинг ажр савобини қўлга киритаман деган киши бу фурсатни ўтказиб юбормаслиги керак. Бу ниҳоятда қадрли фурсатдир. Бу фурсат дуолар ижобат қилинадиган пайт бўлгани учун ҳам дуо қилиш учун энг қулай имконият ҳамдир.
Учинчиси: Бомдоддан олдинги саҳар пайти. Аллоҳ таоло бу пайтдан унумли фойдаланувчи бандаларини
«…ва саҳарда истиғфор айтувчилар», деб мақтаган.
Эй рўзадор биродарим! Ушбу олтин фурсатни ғанимат билиб, муаззин азон айтгунича дуою истиғфорга машғул бўлинг. Хусусан, Рамазон ойида бу фурсатларни қўлга киритиб, Аллоҳ таоло билан алоқаларимизни тикламоғимиз лозим.
Аллоҳ барчаларимизнинг қилаётган ожизона ибодатларимизни мақбул айлаб, ўз ажри ила мукофотласин.
Камоли эҳтиром ила: Насриддин.
491 views12:27
Z
