2023-04-19 11:31:09
“Oʻqituvchilikni tashlab boshqa daromadi yaxshiroq ish qilgim kelayapti”
Oylik olasan-da, boshing ogʻrib oʻylaysan, bu pulni nimaga yetkazsam ekan deb. Kommunallar, kredit, oylik toʻlanishi zarur boʻlgan toʻlovlardan ortgan pulni qanday taqsimlash haqida bosh qotirasan.
Bolang oʻsib borayapti, ust-boshi kichrayib qoladi darrov yoki yirtiladi, eskiradi, nimadir yegisi keladi, hiqillab turadi, aylangisi keladi, undan tashqari har kuni kundalik xarajatlari uchun pul berib turish kerak. Istaganlarini muhayyo qilishga imkoning yetmaydi.
Onangni yoʻqlaging keladi, nimadir oberging, yegisi kelganini ogʻziga tutging keladi, lekin choʻntagingdagi hisob-kitobli arzimagan pulingga qarab yuraging eziladi.
Bolang ogʻriydi, oʻzingni kasallik qiynaydi yillab, lekin doktorga borishga oʻylanasan, imkoning yetmaydi, bolalarimni oldida vijdonim qiynaladi.
Ayollarga xos odatlarni ham unutayapman, chiroyli kiyinish, zeb-ziynatlar haqida-ku orzu ham qilmay qoʻyganman, faqat borku, shu borini kiyib turay deydigan boʻlganman.
Bolalarimga ham tinmay sabr qil, sabrli boʻl deyishdan nariga oʻtolmayman.
Davolanish tufayli yanayam xarajatlarni qisqartirdim, qarz boʻlishga ham ulgurdim.
Baʼzida bolam isyon qilib qoladi, qachon bizni uyimiz bitadi, qachon mehmon chaqiramiz biz ham, oʻrtoqlarim undoq, bundoq deb.
U kuni bankda ishlaydigan bir tanishim 14 mln oylik olaman, mukofot pullaridan tashqari dedi.
Men oliy toifali oʻqituvchi boʻlib, bu oylik uchun 4 oy ishlayman.
Siz bir kun 6-7 yoshli goʻdakka dars oʻtib koʻrganmisiz?
Bir bolaga oʻrgatish, taʼlim-tarbiya berish qanchalar mashaqqatli ekanligini bilasizmi? Biz esa nechtalab bolalarga mehrimizni, jonimizni, bor bilimimizni beramiz, asabimiz, sogʻligimizni sarflaymiz.
Lekin oqibatda “Sizlar oylikni oshirish haqida emas, taʼlim sifatini oshirish haqida oʻylanglar” degan gap eshitamiz.
Boshqa soha xodimlaridan qayerimiz kam? Mehnatimiz shunaqa arzimas baholanadimi? Qanday qilib shuncha yetishmovchiliklar ichida yashayotgan odamdan natija kutasiz?
Gapirsang gap koʻp, yurak ogʻriydi faqat.
Yuqori oylik oladigan oʻqituvchilar foizi umumiy oʻqituvchilarning qanchasini tashkil etadi? Nega hammaning oyligi birdan oshirilmaydi?
Bilmadim, odamni ishlagisi ham kelmaydi. Ketay desang shuncha mehnat uvol boʻladimi, deb achinasan, ketmay desang har kuni qayerdan pul topsam deb boshing ogʻriydi»
Shu tvitda muallifning toʻlgan sabr kosasini koʻrdim. Yozganlaridan boshlangʻich sinf oʻqituvchisi, oyligi 3,5 mln.
Bu pul birlamchi ehtiyojlargayam yetmayapti: bolasini yedirib-ichirish, dori-darmon, onaning ogʻziga mazali nimadir tutish (ayni roʻza vaqti boʻlsa, iftorga tansiq nimadir oborgisi keladi).
Zamonaviy latifa esga tushadi. Kelin oʻqituvchi eriga tana qiladi: “Siz meni aldab uylangansiz. Oyligim 1000$ boʻladi degandingiz”. Oʻqituvchi er: “Aldangan faqat sen emas, bizni ham aldashgan”.
Ishqilib vaziri chiqib, “Sen yaxshilab dars oʻt, keyin qoʻshimcha dars ber, ota-ona koʻnglidan chiqarib, barakasini tashlab ketadi”, demasa boʻldi.
Dilroz ABRAYEVA
4.9K views08:31
T
