Менинг бўларим бўлди ука-сингилларингни ўзинг оёққа қўясан. Ул | 🌸СОЛИХА АЁЛ🌸

Менинг бўларим бўлди ука-сингилларингни ўзинг оёққа қўясан. Уларга ўзинг бош бўласан. Сендан бошқа ҳеч кимим йўқ деб уқтираверганидан оиланинг масъулиятини эрта бўйнига олди. Онасига ёрдам бериш учун бир неча марта ўғрилик ҳам қилганди. Аммо буни фақат ўзи ва ёлғиз Аллоҳ биларди. Қўшни қишлоқда шаҳарга элтадиган катта йўл бўйида Рашид ошпазнинг кўрксиз ошхонаси бўларди. Эркаклар бу ошхонада аламаҳалгача еб-ичиб, тунда маст аҳволда уй-уйига тарқаларди. Бир неча марта отаси ҳам ўша емакхонадан маст бўлиб қайтганди. Аброр кўп марта Рашид ошпазнинг ошхонасига ўт қўймоқчи бўлди. Режасини амалга ошириш учун фурсат пойлади. Лекин ошхонада қоровул ётиб қолишини билгач, одам ўлдиришни истамай бу ниятидан қайтди. Кейинроқ велосипедини ташқарига қўйиб, емакхонага кирадиган эркакларни додини бера бошлади. Ҳеч ким йўғида велосипедни ўғирлаб сал чеккароқдаги зовур кўприги остига яширар ўша ерда уни очиб, эҳтиёт қисмларга ажратар эртаси куни шаҳарга олиб бориб сотиб қайтарди. Онасига пулларни бераётиб Шаҳарда бозорда арава тортиб топдим дея виждони қийналар кечалари алаҳлаб, беҳаловат бўлганида ароқхўрларни жазолаяпман деб ўз-ўзига таскин берарди. Худо кўрсатмасин қўлга тушиб қамалиб кетса онасининг бир дарди минг дард бўларди. Аллоҳнинг инояти билан бир воқеа сабаб бўлдию у ўғриликдан ҳазар қиладиган бўлди. Ўша куни оқшомга яқин одатдагидек сут-қатиқларни онасига олиб келиб берди ўзи эса Рашид ошпазнинг ошхонасига отамлашгани борадиганларни жазолашга йўл олди. Тутзор паналаб қулай фурсат пойлаётганди қаердандир йиғи ёрдам сўраб бақирган овоз эшитилди. Ўтирган жойидан югуриб чиқиб тўрт томонга аланглади. Бурчакдаги янги қурилган уйлардан бирида тутун кўринди. Афтидан уйга ўт кетган эди. Аброр ўртада ястаниб ётган пахта даласини оралаб чопиб кетди. Бу орада ўтган-кетган ёрдамга шошиб анча одам тўпланган экан. Уй аланга ичида ёнар одамлар оловни ўчириш учун жон-жаҳди билан тиришардилару лекин ҳеч ким олов ичидаги нарсаларни асраб қолиш учун ичкарига кирмасди. Аброр ичкарига ўзини отди. Уй эгаси аёл бояқиш бева экан чоғи, етимларим уйсиз қолди дея йиғлаганча олов ичидан нарсаларни ташқарига отарди. Аёлга ёрдам бериб олов ҳамла қилмаган нарсаларни ташқарига улоқтира бошлади. Шу пайт сервант устидан оқ рўмолчага тугилган бир нима тап этиб пастга тушди. Аброр эгилиб ерда ётган тугунчани олар экан унда тақинчоқлар тугилганини сезди. Атрофга бир қур кўз ташлаб рўмолчани чўнтагига жойлади Ёнғин ўчирувчилар келишди. Унгача бирмунча рўзғор анжомларини асраб қолдилар. Аёлнинг уч нафар қизчаси онасига ёпишиб изиллаб йиғлар, қаттиқ қўрқиб кетишганди. Аброр ёнғин ўчирувчилар келган заҳоти у ердан қорасини ўчирди. Бироз узоқлашгач рўмолчани очиб кўрди. Бир жуфт зирак иккита узук, битта занжир. Ҳаммаси тилладан. Кўз олдига уларни сотиб, бир даста пул билан уйга кириб боргани онасининг қатиқ-сут кўтариб кўчама кўча кезмаслиги энди улар ҳам бой бўлишлари келди. Қувониб кетди. Бир-бир режалар туза бошлади. Ука-сингилларига кийим қилади, чакка ўтиб таъмирталаб бўлиб қолган ошхоналарини бузиб, янгидан қуради. Ичкиликка берилган отасини даволайди...
Аммо тўсатдан кўз олдига бошқа бир манзара келди; уйи ёнган бева аёлнинг фақирона турмуши, онасининг оёғига ёпишиб йиғлаётган юпун кийимли қизалоқлар. Ўзидан нафратланиб кетди. Наҳотки шу жирканч башара унинг қиёфаси бўлса? Шу аёлнинг ўрнида онаси бўлганида-чи? Онаси ароқхўр отанинг зуғуми, зулми билан беш болани тарбиялаяпти. Уларга фақат тўғриликни, ҳалолликни ўргатган онасининг мунғайган юзини ўйлади. Кўзларида нафрат, ғазаб ва надомат ёғилиб турган, умрбод бахтсизлик билан тортишиб, фарзандлари, айниқса тўнғичидан умидлари кўр онаизорининг чеҳраси тасавурида жонланиб ўзидан, қилмишидан уялди. Ортига қайтиб аёлга тақинчоқларни қайтармоқчи бўлди. Югуриб кетди. Боя қўрқувданми, ўғирлаган нарсаларининг кучиданми тез юриб анча йўлга келиб қўйган экан. Ҳарсиллаб югураётганида тўсатдан ниманидир эслагандай тўхтаб қолди.
Чўнтагидан рўмолчани олиб, тақинчоқларни кўздан кечирди. Бир пой зирак йўқ эди. Юраги тез уриб кетди. Ҳозир аёлга рўмолчани тутқазса, ўғрига чиқарса-чи? Бир пойини топиб бер деса-чи? Йиғлаб юборди.