Nodirabegim.uz

2022-08-26 10:47:52 1. “Ёмон йигит” (Bad guy 2001. 18+). Безори, кўча йигити яхши бир қизни севиб қолса нима қилади? Кўпинча яхши томонга ўзгаришга ва унга муносиб бўлишга интилади. Кўп фильмларда шундай. Лекин бунда аксинча, у қизни ўзини оламига олиб киришга, даражасини ўзиники билан тенг - паст қилишга интилади: уни фоҳишага айлантиради. Қиз бу боши берк кўчадан қочишга кўп уринади, охир оқибат бу ердан халос ҳам бўлади, аммо кеч, унга энди шу тақдир берилди, ўтмишга қайтолмайди. Ҳа, йигитни эса севиб қолади. Менга якундаги фотосурат билан боғлиқ сюрреализм ёқди. Фильмни ҳаммаям қабул қилолмаслиги мумкин: айниқса, охирини. Ҳа, бу биз билган Южин ва Жун Санг севгисимас. Бутунлай бошқа корея одамлари.

@mittihaqiqatlar Ochish/sharhlash

2022-08-26 10:35:36 Бу ҳафта оқшомларини Ким Ки Дук фильмларига бағишладим. Бир қанча халқаро мукофотлар совриндори, жанубий Кореялик кино режиссёр К.К.Дукнинг “Ҳувиллаган уй” ва “Баҳор, ёз, куз, қиш ва яна баҳор” картиналарини илгари томоша қилгандим. Ундаги максимал сукунат ва минимал диалоглар, сўзсиз севги муносабатлари, умр ҳақидаги умидли фалсафа мени мафтун қилган. Буларни ўзбек тилида телевизорда кўрган бўлсангиз керак. Режиссёрни бошқа фильмлари бизга ўгирилганми, йўқми билмадим. Яқинда бир дўстим бошқа картиналарини ҳам кўришни тавсия қилгач, уларни русчада кўриб чиқдим. Янги кўрганларим бу икки фильмдан кескин фарқ қилади, шу билан бирга қандайдир уйғунликлар ҳам бор. Ҳар бирига алоҳида тўхталиб ўтсам дегандим.

@mittihaqiqatlar Ochish/sharhlash

2022-08-25 15:26:22 Ўрани ким ёпади?
Ким нуқта қўяди бунга
Сизифнинг елкасидаги
Оғир тошни келтиринг
Оғзини маҳкам ёпинг
Юз аср очманг сўнг
Ишонинг ҳеч кимса
Сезмас йўқолганимни.
Мўраламанг ўра ичига
Бирор жон борми деб
Ғам чекиб ўтирманг –
Тирик вужуд йўқ бунда
Кўмилишни истайдиган
Дунёдан беркинишни
Оламдан узилишни
Истайдиган руҳ бор, холос.
Руҳки, исёнлари ошкор бўлмаган
Сиз каби Годони ноумид кутган
Кечиккан ўзгалар яратган
Тақдирини қайта қурмоққа
Жазо топган фақат ўзидан
Вужудидан сирғалиб учган
Само эса қабул қилмаган
Аросатда қолмоқ истамай
Ер остин макон қилган.
Илтимос, ўтманг бефарқ
Минг йилдан сўнг эҳтимол
Руҳим топиб ўзлигин
Кирганида янги вужудга
Сизни топиб албатта
Қўлингизни сиқиб қўяди
Сўнг кўзлари қамашиб
Боққанида чексиз самога
Булутлар ҳам йўл очар унга
Яқинлашар балки худога.

Ҳозир эса ўрани ёпмоқ керак.

Аниф

@mittihaqiqatlar Ochish/sharhlash

2022-08-24 20:22:13 ​​Хотиржамлик истайман ҳозир
Мени оламда йўқ деб ҳисобланг.

Кўзларимни юмгум бир зумга...
Бешта нарса керак бўлади менга.

Биринчиси, чексиз муҳабббат.

Иккинчиси, кузни севиш:
агар япроқлар бўлмаса яшаб не қилдим
улар оҳиста тушмаса ерга.

Учинчиси, қиш кунлари
қуйса ёқимли жала
қаҳратонда ёнса аланга.

Тўртинчиси, сокин ёз
тарвуз каби думалоқ.

Бешинчиси, сенинг кўзларинг.

Матилда, менинг орзумсан,
Кўзларингсиз ухлай олмайман,
Нигоҳларингсиз яшолмайман,
Мен осонлик билан баҳорни
Жойлайман қароқларингга.

Дўстлар, менга керак бори шу
бошқа ҳеч... шулар етарли.

Энди эса сизни тутиб турмайман...

Шунчалик кўп яшадимки,
тез орада унутиб юборарлар мени,
Юракдан сидириб ташларлар,
Абадий тинч яшайдилар сўнг.

Бироқ мен сукунат истайман
асло йўқлик - ўлим эмас.
Менда кечар бари бошқача:
нафас олмоқликда этаман давом.

Ейман ва ичаман буёғига ҳам.

Шунчаки ич ичимда
буғдой донларини ўстириш
ва ерга қадаш учун
куч тўплаб бораман.
Лек она замин зулматдир
худди менинг қалбим сингари:
Мен қудуққа ўхшайман, сувларига
тун сочади юлдузларин,
далалар ёруғ бўлиши учун.
Тушуняпсизми, мен кўп яшадим,
Ва янада узоқ умр истайман.

Ҳеч қачон бунчалик ўпичларга бой
Қўнғироқча бўлмаган эдим.

Аввалгидек гўзал тонг отади,
Нурлар елар асалари қанотларида.

Мени тонг билан ёлғиз қолдиринг,
Қайта туғилмоққа имкон яратинг.

Пабло Неруда

Нодира Иброҳимова таржимаси

@mittihaqiqatlar Ochish/sharhlash

2022-08-24 17:43:21 Митти гуллар "мени суратга ол" дейишди, йўқ деёлмадим Қаердадир сизнинг ҳам гулингиз бор)

@mittihaqiqatlar Ochish/sharhlash