2022-12-28 17:59:02
Bayram kunlari iste’molchilarga yoqilg‘i-energiya resurslarini uzluksiz yetkazib berilishi uchun zarur choralar ko‘rildi
Energetika vazirligida tizimda faoliyat yuritayotgan barcha korxonalar rahbarlari ishtirokida bayram kunlari iste’molchilarni energiya resurslari bilan barqaror ta’minlash bo‘yicha ko‘rilayotgan choralar yuzasidan yig‘ilish o‘tkazildi.
Yig‘ilishda Yangi yil bayrami kunlari iste’molchilarni energiya resurslari bilan barqaror ta’minlash bo‘yicha har bir korxonalarga zarur chora-tadbirlar belgilab berildi va unga asosan quyidagi ishlar amalga oshiriladi:
Birinchi navbatda, neft-gaz va ko‘mirni qazib chiqarish, elektr energiyasi hamda neft mahsulotlarini ishlab chiqarish va yetkazib berish bo‘yicha korxonalarda maxsus shtablar tashkil etildi.
Elektr energiyasini ishlab chiqaruvchi issiqlik elektr stansiyalar va markazlar barqaror ishlashini ta’minlash uchun kuniga o‘rtacha 47-48 mln kub metr tabiiy gaz yetkazib beriladi. Shuningdek, stansiyalar uchun 70 ming tonna mazut va 230 ming tonna ko‘mir yoqilg‘isi zaxirasi yaratildi.
Hududlardagi barcha ko‘mir omborlariga ko‘mir mahsulotini uzluksiz yetkazib berilishi ta’minlanadi.
Bayram kunlari iste’molchilarga
kuniga o‘rtacha 155 mln kub metr tabiiy gaz, 2 ming tonna suyultirilgan gaz, 5000 tonna avtobenzin, 5000 tonna ko‘mir hamda 235 mln kVt-soat elektr energiyasi yetkazib berilishi ta’minlanadi.
Ta’kidlash kerakki, bayram kunlari, jumladan, yangi yil bayramida elektr energiyasiga bo‘lgan talab sezilarli darajada pasayadi. Chunki ta’lim muassasalari va bir qator ishlab chiqarish korxonalari o‘z faoliyatini vaqtincha to‘xtadi. Shu munosabat bilan ishlab chiqarilayotgan elektr energiyasining asosiy qismi aholiga va ayrim ijtimoiy soha obyektlariga yo‘naltiriladi.
Agar, tarmoqlarda nosozlik holatlari yuzaga keladigan bo‘lsa, hududlar bo‘ylab elektr va gaz ta’minoti korxonalarida tunu-kun ishlaydigan 1200 dan ortiq maxsuss brigadalar tashkil etilgan bo‘lib, ular muammolarni tezkorlik bilan bartaraf etilishini ta’minlaydilar.
Bu borada iste’molchilar
elektr energiyasi ta’minoti yuzasidan 1154 qisqa raqami yoki Telegramdagi (@HET_admin) administratorga,
tabiiy va suyultirilgan gaz ta’minoti yuzasidan 1104, 104 telefonlari yoki
Facebook ijtimoiy tarmog‘idagi guruhga hamda
ko‘mir ta’minoti yuzasidan 78-148-30-03, 71-244-38-28 telefon raqamlari va @Uzbekcoaluz_bot telegram botga murojaat qilishlari mumkin.
Qayd etish kerak, bayram kunlarida
aholi iste’molchilar elektr energiyasi va tabiiy gaz bo‘yicha yuzaga kelgan qarzdorlik uchun tarmoqdan ajratilmaydi. Eslatib o‘tamiz, iste’molchilar ushbu resurslar uchun bayram kunlari ham onlayn ravishda to‘lovlarni amalga oshirishlari mumkin.
Shu o‘rinda iste’molchilardan elektr qurilmalari va isitish moslamalariga nihoyatda ehtiyotkorlik bilan munosabatda bo‘lishlarini, ushbu qurilmalardan foydalanilmayotgan vaqtlarda tarmoqdan ajratib qo‘yishlarini, elektr va gaz uskunalaridan foydalanishda xavfsizlik qoidalariga, shuningdek, is gazidan zaharlanishni oldini olish yuzasidan berilayotgan tavsiyalarga qat’iy rioya qilishlarini so‘raymiz.
O‘zbekiston Respublikasi
Energetika vazirligi Matbuot xizmati
@minenergy_uz
416 views14:59
M
