2021-11-28 13:37:30
GUNG QO‘SHIGʻI
O‘n besh kun to‘lgan oyning dardlarini tilayman,
Oqqanot turnalarni yuragimga belayman.
Cho‘g‘ bosgan raqqosiga qismat tutgan koinot,
Childirmangni chalaver, men boshqacha o‘ynayman.
Ufqqa oqqan kuylar ostonamda bo‘y yetgan,
Javdiraydi yuragim, har tun azob to‘y etgan,
Yo‘l terolmay ko‘nglimning sarhadiga o‘t ketgan,
Childirmangni chalaver, men boshqacha o‘ynayman.
Shamolday chopib ko‘rdim, bir nuqtada qotib ham,
Toshlardan qutilmaysan, -- ming osmonga otib ham.
Ko‘zlarim kulib turgay olovlarga botib ham,
Childirmangni chalaver, men boshqacha o‘ynayman.
Yil dumalab yillarning borar shomi qorayib,
Yorilgan peshonamni shabnamlarga qo‘y chayib.
Bobosi gung attorning savdosida ne ayb,
Childirmangni chalaver, men boshqacha o‘ynayman.
Yomg‘ir sog‘inch isimi, shoir g‘amga erkami,
Dunyo og‘ib ketardi bo‘lmaganda bir kami.
Hayqiraman cho‘g‘ bosib: "Azob -- ruhning bayrami!",
Childirmangni chalaver, men boshqacha o‘ynayman.
Nargiza ODINAYEVA
@Nargiza_Odinayeva_ijodi
@ijodkorlarkengashi
2.2K viewsMehrinoz Abbosova, 10:37