2023-04-08 22:16:19
РИЗҚИНГ ИККИ ТАНГА Бир ўтинчи йигит бўлган экан. Ўрмонга бориб, тоққа чиқиб ўтин териб келиб бозорда сотарди. Ўтин тополмай озроқ шох олиб келса, бозорда ўтин йўқ, икки тангага сотар, янаги сафар кўп ўтин топиб келса, бозорда ўтин кўпайиб зўрға икки тангага сотарди. Ҳар галги савдоси икки танга эди.
Бир кун тоққа чиқиб кетаётса йўлида ўша замоннинг донишманд кишиси учрабди. Ўтинчи салом бериб:
- Сиздан бир нимани сўрасам майлими? - дебди. Донишманд киши:
- Сўранг, - дебди. Ўтинчи:
- Нима учун ҳар гал бозорга ўтин олиб келсам икки тангага сотаман. Кўп олиб келсам ҳам, оз олиб келсам ҳам.
- Э, ўтинчи, демак сени ризқинг икки танга экан.
- Йўғ-е, нимага икки танга бўлади. Ман бошқа иш қиламан. Мардикор бозорига чиқаман. Кўпроқ пул топаман, - дебди ўтинчи.
Шундан сўнг ўтинчи мардикор бозорига чиқа бошлабди. Иш жуда кўп бўлган кун иш берувчи хасисроқ бўлиб, икки танга бераркан. Иш озроқ бўлган кун эса сахий кишига учраган бўлиб, у ҳам икки танга бераркан. Шу ҳолатда мардикор бозорида тирикчилик қила бошлабди. Бозор куни ўша замонни бой кишиси келибди. Бой:
- Мани катта боғим бор, ўшанга қараб юрсанг. Ҳар кунинга икки танга берардим.
- Бой ота, уч танга қилиб беринг, - дебди ўтинчи.
- Емишинг мандан, уй жой бераман. Рози бўлсанг юр. Аммо икки тангадан ортиқ бермайман, - дебди бой киши. Ўтинчи ноилож яхши жойдан қолмай деб рози бўлиб бой билан кетибди.
Ўзи ҳалол йигит эмасми, бир пастда бой кишини назарига тушибди. Бой бир-икки йил синаб, ўтинчи маъқул келиб, ягона қизини унга узатиб ўзига куёв қилибди. Ўтинчи бой кишининг ҳамма ишларини ўзи бошқара бошлабди. Ишга астойдил киришиб обрўли одамга айланибди. Бир қиз, икки ўғилли бўлибди. Вақти келиб бой киши оламдан ўтиб, ҳамма бойлик ўтинчига қолибди.
Бир куни ўтинчи отида шаҳар айланиб кетаётса, кўзи донишмандга тушибди. Дарров отдан тушиб унинг олдига борибди.
- Ассалому алайкум. Мени танидингизми? - дебди. Донишманд киши қараб туриб:
- Э, ўтинчи, сенмисан? - дебди.
- Ҳа, мен ўтинчиман. Лекин ҳозир шу шаҳарда икки бой бўлса, бири мен. Сиз ўшанда нима деган эдингиз? Сени ризқинг икки танга деган эдингизми? Мана, бойиб кетдим. Донишманд:
- Оббо, ўтинчи-ей, сени ризқинг ҳалиям икки танга. Бу бойликдаги ризқ баракоти аҳли оиланг ва фарзандлариникидир - деган экан.
https://t.me/Hurfikruznews
78 views19:16