2023-04-14 19:01:51
Рамазоннинг охирги ўн кунлиги бошланди.
Энди ҳар куни шом намозининг азонидан бошлаб Рамазон ойининг сўнгги кунида қуёш чиққунигача
اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
"Аллоҳумма, иннака ъафуввун, туҳиббул-ъафва фаъфу ъанний" ("Эй Аллоҳ, дарҳақиқат Сен афв қилувчисан (кечирувчисан), афв этишни яхши кўрасан. Шунинг учун мени афв эт") дейишни кўпайтиринг.
Бир сонияни ҳам беҳуда ўтказманг, бу дуони қайта-қайта такрорлашдан чарчаманг. Чунки Аллоҳ сизни афв этса, нажот топасиз, машаққатлардан қутуласиз, бахтиёрлардан бўласиз.
Ибнул Қаййим роҳимаҳуллоҳ айтади: "Агар дуо қилаётган бўлсангиз-у, вақтингиз зиқроқ, қалбингизда эса сўрайдиган ҳожатларингиз бисёр бўлса, бор дуоингизни Аллоҳдан афв сўрашга қаратинг. Зотан, У сизни афв этса (гуноҳларингизни кечирса), сўрамасангиз ҳам барча ҳожатларингизни юзага чиқариб қўяди.
اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
"Аллоҳумма, иннака ъафуввун, туҳиббул-ъафва фаъфу ъанний".
Бу дуонинг маъносини ҳис қилинг:
• тананинг афви – барча касалликлардан тузалишингиз;
• диннинг афви – яхши амалларга, тоат-ибодатга, охиратда фойда келтирувчи ишларга йўллаб қўйилишингиз;
• охиратнинг афви – қилган гуноҳу маъсиятларингизни Аллоҳ кечириб, ўтиб юбориши, улар учун сизни азобламаслиги...
"Афв" сўзининг араб тилидаги маъноларидан бири "кўпайиш", "ортиш" демак. Масалан, "мол-дунёнинг афви" унинг кўпайишидир. Бунга далил:
وَیَسۡـَٔلُونَكَ مَاذَا یُنفِقُونَ قُلِ ٱلۡعَفۡوَ
"Сиздан (эй Муҳаммад) нималарни эҳсон қилишни сўрайдилар. "(Ўзингиздан) ортганини", деб жавоб қилинг!" ("Бақара" сураси, 219-оят)
Демак, Аллоҳнинг афви сизга сўраган нарсангизни ҳам, ундан ортиғини ҳам беришига сабаб бўлади.
Шундай экан, Аллоҳдан афв сўрашни кўпайтиринг. Зеро, Росулуллоҳ соллаллоҳу алайҳи ва саллам Оиша онамизга ўргатган бу дуо* бошқа ҳар қандай дуодан афзал саналади.
Термизий (3513), Ибн Можа (3850). Саҳиҳ ҳадис.
698 views16:01