Анор етиштирувчи Маданият вазирлиги Давлат йиллар давомида иж | bakiroo

Анор етиштирувчи Маданият вазирлиги

Давлат йиллар давомида ижтимой неъматлар яратиш билан эмас, умуман қўл урмаслиги керак бўлган иш - бизнес билан шуғулланганига сотувга қўйилган активлар рўйхати билан танишсангиз, яна бир бор амин бўласиз.

Маданият вазирлиги Фарғонада анор етиштирган, Ўзбекистон темир йўллари картошка эккан, сут соққан, Иссиқлик станциялари минерал сув қадоқлаган. Давлат банклари тўғридан тўғри ишлаб чиқариш билан шуғулланган. Ҳаммадан қизиғи, шу иррационал ишларнинг аксари ўтган ёмон эпохада эмас, шу янги дейилган замонда рўй берган.

Бошқача айтганда давлат ва унинг агентлари қилиши керак бўлган ишлар қолиб, қилмаслиги керак бўлган ишларга пул тиккан, инвестиция қилган, ресурсларни йўналтирган.

Бу ишларнинг бевосита зиёни, зараркунандалиги, самарасизлик ва коррупцияга йўл очгани бир муаммо, иккинчи муаммо давлат ўзининг моддий ва молиявий ресурсларини бизнес билан шуғулланишга юбориб, бевосита вазифаси бўлган ижтимоий неъматлар яратишдан маблағларни камайтирган, қисқартирган ва яна қисқартирмоқчи бўлмоқда.

Посангининг бузилиши, балки йўқлиги "Боғнинг менежери давлат бўлиши нотўғри. Бутун дунёда шунақа" дейиш даражасидаги абсурдларни кун тартибига чиқарди.